Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2013

Ta Bon pa Resa na Santo?

Ta Bon pa Resa na Santo?

MAYORIA di hende a yega di sinti e necesidad di busca yudansa cerca un otro hende den tempo di angustia. Dependiendo di e tipo di problema, muy probablemente nos lo scoge pa papia cu un amigo cu ta mustra comprension y cu tambe a pasa den un situacion similar. Si, un amigo ideal mester tin tanto comprension como experencia.

Tin hende kisas ta sinti mescos ora nan kier haci oracion. Como cu nan ta haya cu Dios ta asina eleva y inaccesibel, nan ta sinti nan mas comodo pa acudi na un santo. Nan ta rasona cu debi cu e santonan a pasa den prueba y dificultad cu hende tambe ta pasa aden, nan ta den mihor posicion pa mustra comprension. Por ehempel, un hende cu a perde algo cu ta masha valioso p’e kisas ta prefera di resa na “San” Antonio di Padua—e patrono di cosnan perdi of horta. Si nan ta haci oracion pa un bestia cu ta malo, kisas nan ta scoge pa acerca “San” Fransisco di Assisi, y si nan ta desespera pasobra nan a perde speransa, podise nan ta scoge pa resa na “San” Judas Tadeo.

Pero, segun Bijbel, ta corecto pa resa na santo? Dios ta scucha e tipo di oracionnan ey? Kico Dios ta pensa di hacimento di oracion na santo? Siendo cu nos kier pa Dios scucha nos oracionnan, nos mester ta interesa den su punto di bista.

SEGUN BIJBEL, TA BON PA RESA NA SANTO?

E custumber di haci oracion na santo ta basa riba e doctrina di intercesion di santo, un siñansa di Iglesia Catolico. E Catisashi di Iglesia Catolico ta bisa tocante e santonan: “Nan no ta laga di intercede pa nos cerca Tata, ya cu nan ta ofrece pa medio di e unico Mediador entre Dios y hende, Cristo Hesus, e meritonan cu nan a adkeri na mundo.” Pues, esnan cu ta haci oracion na santo ta carga speransa di ricibi fabor special mediante e santonan debi cu nan ta kere cu e santonan tin un posicion bendiciona dilanti Dios.

Bijbel ta siña e doctrina ey? Tin hende ta bisa cu si y cu ta apostel Pablo a pone fundeshi pa haci oracion na santo. Por ehempel, na e cristiannan na Roma, el a skirbi: “Awor bon, mi ta haci un apelacion na boso, rumannan, pa medio di nos Señor Hesucristo y pa medio di e amor cu ta bin di spirito santo, pa hunto cu mi boso haci oracion na Dios cu masha fervor pa mi.” (Romanonan 15:30) Acaso Pablo a pidi su compañeronan cristian pa intercede p’e dilanti di Dios? Claro cu no. Mas bien, Pablo kier a mustra cu ta corecto pa pidi un compañero cristian pa haci oracion pa nos. Pero ta henteramente un otro cos pa resa na un persona cu segun bo ta den cielo pa e haci un peticion na Dios pa bo. Dicon nos no mester haci esey?

 Den e Evangelio di apostel Juan, Hesus a bisa: “Ami ta e caminda, e berdad y e bida. Ningun hende no ta yega cerca e Tata si no ta pa medio di mi.” (Juan 14:6) El a bisa tambe: “Loke boso pidi Tata den mi nòmber, E ta duna boso.” (Juan 15:16BPK) Hesus no a bisa cu nos mester haci oracion directamente na dje y cu despues e lo papia cu Dios pa nos. Mas bien, pa nos oracionnan ser scucha, nos mester haci oracion na Dios mediante Hesus y no mediante ningun otro persona.

Ora e discipelnan di Hesus a pidie pa siña nan con pa haci oracion, el a bisa nan: “Ora boso ta haci oracion, bisa: ‘Tata, laga bo nomber sea santifica.’” (Lucas 11:2) Esey ta nifica cu “ora” nos ta haci oracion, nos no mester dirigie na Hesus ni na ningun otro hende, sino na Dios so. Pues, a base di loke Hesus a siña, no ta logico anto pa conclui cu nos mester haci oracion na Dios mediante Hesucristo y no na ningun intercesor of “santo”?

Oracion ta un parti masha importante di nos adoracion na Dios. Y segun Bijbel, nos no mester adora ningun otro persona cu no ta Dios. (Juan 4:23, 24; Revelacion 19:9, 10) Ta pesey nos mester haci oracion solamente na Dios.

BO MESTER TIN MIEDO DI ACERCA DIOS DEN ORACION?

Den su Sermon Riba Sero, Hesus a duna un ehempel di un mucha cu ta pidi su tata algo di come. Un tata lo duna su yiu un piedra si e pidie pan? Of un colebra venenoso si e pidie un pisca? (Mateo 7:9, 10) Un mayor amoroso nunca lo haci un cos asina.

Mescos cu un tata amoroso, Dios tambe kier pa nos comunica cu ne

Awor, pensa un rato riba un ehempel parecido pero for di e punto di bista di un mayor. Imagina bo cu bo a percura pa bo por tin un bon relacion cu bo yiu y semper bo tabata acercabel. Na dado momento, bo yiu kier pidi bo algo cu ta importante. E no ta pidi bo mes pasobra e tin miedo di bo reaccion, pesey e ta puntra un otro hende pa pidi bo loke e tin mester. Con abo lo sinti bo? Kico si el a hacie un custumber pa comunica cu bo via di e persona ey y ta parce cu e no tin pensa di cambia? Lo bo keda contento? Claro cu no! Mayornan amoroso kier pa nan yiunan papia directamente cu nan y pa e yiunan sinti nan liber pa pidi nan tur loke nan tin mester.

Biniendo bek riba e ehempel cu Hesus a uza di e yiu cu a pidi su tata cuminda, el a rasona cu su oyentenan: “Pesey, si boso mes cu ta malbado sa di duna boso yiunan bon regalo, cuanto mas boso Tata cu ta den cielo! E sigur lo duna cos bon na esnan cu pidie.” (Mateo 7:11) No tin duda cu un mayor ta desea di duna su yiu tur loke ta bon. E deseo di nos Tata na cielo pa scucha y contesta nos oracionnan ta mas fuerte ainda.

Ora nos ta haci oracion, Dios kier pa nos papia directamente cu ne hasta si nos ta sinti nos malo pa motibo di nos propio fayonan. E no ta duna ningun otro persona e encargo pa scucha nos oracionnan. Bijbel ta anima nos: “Tira bo carga riba SEÑOR, y e lo sostene bo.” (Salmo 55:22) En bes di resa na santo of cualkier otro persona pa nan intercede pa nos, nos tin cu haci esfuerso pa nos por tin un bon relacion cu Jehova Dios y sinti nos liber pa papia cu ne.

Nos Tata celestial ta interesa den cada un di nos. E kier yuda nos cu nos problemanan y ta anima nos pa hala cerca dje. (Santiago 4:8) Esta un privilegio nos tin di por hala cerca di nos Dios y Tata, e “Skuchador di orashon”!—Salmo 65:2BPK.