Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  June 2013

Un Mundo sin Prehuicio—Na Ki Tempo?

Un Mundo sin Prehuicio—Na Ki Tempo?

“MI TIN un soño.” Cincuenta aña pasa, riba 28 di augustus 1963, Martin Luther King, Jr., un Mericano cu a lucha pa derecho civil, a expresa e palabranan ey den su speech di mas famoso. El a ripiti e frase fascinante ey varios biaha pa expresa su deseo cu algun dia tur hende lo ta liber di prehuicio racial. Aunke el a dirigi su mes na un publico na Merca, hende di hopi nacion a acepta e esencia di su soño.

Martin Luther King, Jr., ta duna su discurso tocante derecho civil

Tres luna despues di Martin Luther su discurso, riba 20 di november 1963, mas cu 100 pais a adopta e Declaracion di Nacionnan Uni tocante Eliminacion di Tur Forma di Discriminacion Racial. Den e decadanan cu a sigui, tabatin otro declaracionnan similar cu nacionnan rond mundo a adopta. Despues di tanto esfuerso, kisas hende ta puntra: Kico tabata e resultado?

Riba 21 di maart 2012, e Secretario General di ONU, Ban Ki-moon a bisa: “Tin hopi tratado y otro medionan valioso—y tambe un agenda extenso—pa evita y elimina racismo, discriminacion racial, odio pa stranhero, y otro formanan di intolerancia. No obstante, racismo ta sigui causa sufrimento pa miyones di hende rond mundo.”

Hasta den paisnan caminda nan a logra haci progreso den combati prehuicio racial y otro formanan di prehuicio, e pregunta ta keda: Realmente nan a logra elimina sintimentonan profundamente hancra den hende, of nan a djis siña hende pa no expresa nan sintimento? Tin hende ta pensa cu e progreso ey ta djis yuda preveni discriminacion, pero no por elimina prehuicio si. Dicon? Pasobra discriminacion ta algo cu otro hende por mira y ta castigabel pa ley, mientras cu prehuicio tin di haber cu hende su pensamento- y emocionnan, loke no ta facil pa controla.

Pesey, pa logra caba cu prehuicio mester elimina discriminacion, y tambe cambia hende su manera di pensa y su sintimentonan pa cu hende di otro grupo. Esaki ta posibel? Si ta asina, con? Laga nos wak algun ehempel di bida real cu lo yuda nos mira cu hende por cambia y tambe cu tin algo cu por yuda nan haci esey.

BIJBEL A YUDA NAN VENCE PREHUICIO

“Mi no ta sinti mi esclavo di prehuicio mas.”—Linda

Linda: Mi a nace na Sur Africa. Mi tabata considera tur hende di mi pais cu no ta blanco como inferior, sin educacion, inconfiabel y como sirbiente di hende blanco. Mi tabata esclavo di prehuicio y mi no a realisa esey mes. Sinembargo, mi actitud a cambia ora mi a cuminsa studia Bijbel. Mi a siña cu “Dios no ta haci distincion di persona” y cu loke tin den nos curason ta mas importante cu nos color di cuero of e idioma cu nos ta papia. (Echonan 10:34, 35; Proverbionan 17:3) E texto di Filipensenan 2:3 a yuda mi mira cu si mi considera cu otro hende ta mas cu mi, esey lo yuda mi vence prehuicio. Ora mi a cuminsa biba na harmonia cu principio di Bijbel, esey a yuda mi mustra interes den otro hende sin importa nan rasa. Awor mi no ta sinti mi esclavo di prehuicio mas.

“Mi a haya sa con Dios ta mira hende.”—Michael

 Michael: Mi ta di Australia y a lanta den un area caminda mayoria di hende ta blanco. Y mi tabatin prehuicio fuerte contra Asiatico, specialmente Chines. Ora mi tabata core den mi auto, y a mira un di nan, mi tabata baha mi bentana y grita cosnan ofensivo manera: “Bay bo luga bek, chino!” Mas despues, ora mi a cuminsa studia Bijbel, mi a haya sa con Dios ta mira hende. E ta stima nan sin importa di unda nan ta of ki apariencia nan tin. Esey a touch mi curason, y mi a stop di odia e hendenan ey y a cuminsa stima nan. Mi mes a keda sorprendi di e cambio drastico cu mi a haci. Awor mi ta disfruta di compania di hende di tur rasa y nacion. Mi punto di bista a cambia completamente, y esey a haci mi hopi feliz.

‘Mi a cambia mi manera di pensa, y mi a haya paz mental.’—Sandra

Sandra: Mi mama ta di e pueblo Umunede den e Estado di Delta, Nigeria. Pero, mi tata su famia ta di e Estado di Edo y nan ta papia e idioma Esan. Debi na e diferencianan aki, mi mama tabata victima di prehuicio severo di parti di mi tata su famia te dia cu mi mama a muri. Pesey, mi a hura cu mi no kier tin nada di haber cu niun hende cu ta papia e idioma Esan y cu hamas lo mi casa cu un hende di e Estado di Edo. Pero, ora mi a cuminsa studia Bijbel, mi punto di bista a cambia. Bijbel ta bisa cu Dios no ta haci distincion di persona y cu e ta acepta tur hende cu ta tem’e. Pues, ken ami ta pa odia hende di otro tribu of cu ta papia otro idioma? Mi a cambia mi manera di pensa, y mi a drecha mi relacion cu famia di mi tata. Ora mi a cuminsa aplica principio di Bijbel, mi a sinti mi hopi feliz, y mi a haya paz mental. Ademas, Bijbel a siña mi trata otro hende bon sin importa nan background, idioma, rasa of nacionalidad. Anto rey cu ken mi a casa? Un homber di e Estado di Edo cu ta papia e idioma Esan!

Dicon ta Bijbel so por a yuda e personanan aki y hopi otro hende vence prehuicio y odio cu ta profundamente hancra? Pasobra Bijbel ta e Palabra di Dios y e tin poder pa cambia e manera cu un hende ta pensa di un otro persona y su sintimento  pa cu ne. Ademas, Bijbel ta mustra kico mas ta necesario pa por caba cu tur prehuicio.

E REINO DI DIOS LO CABA CU PREHUICIO

Ta berdad cu conocemento di Bijbel por yuda un hende controla su sintimentonan robes y saca nan for di su curason, pero tin dos problema mas cu mester elimina prome cu por caba completamente cu prehuicio. E prome ta pica y imperfeccion. Bijbel ta bisa bon cla: “No tin ningun hende cu no ta peca.” (1 Reynan 8:46) Pues, ni maske cuanto esfuerso nos haci, nos tur tin e mesun lucha cu apostel Pablo tabatin. El a skirbi: “Ora mi ta desea di haci loke ta corecto, loke ta malo ta den mi.” (Romanonan 7:21) Pesey, de bes en cuando, “mal pensamento” por sali for di nos curason imperfecto, esaki, na su turno, por hiba na prehuicio.—Marco 7:21.

E di dos problema ta e influencia di Satanas e Diabel. Bijbel ta bisa cu e ta “un matado” y cu e “ta gaña henter e tera habita.” (Juan 8:44; Revelacion 12:9) Esey ta yuda nos compronde pakico tin prehuicio rond mundo y dicon ta imposibel pa hende elimina prehuicio, discriminacion, genocidio, y otro formanan di intolerancia racial, social y religioso.

Pesey, prome cu por logra caba cu prehuicio completamente, mester elimina pica, imperfeccion y e influencia di Satanas e Diabel. Bijbel ta bisa cu e Reino di Dios lo haci net esey.

Hesucristo a siña su siguidornan pa pidi Dios den oracion: “Laga bo Reino bin. Laga bo boluntad sosode, mescos cu den cielo, tambe riba tera.” (Mateo 6:10) Si, Dios ta bay uza su Reino pa elimina intolerancia, prehuicio y tur otro forma di inhusticia.

Ora e Reino di Dios bin y cuminsa goberna e tera, Satanas lo ser ‘mara’, es decir, e lo no tin ningun clase di influencia mas. Pues, lo ‘e no por gaña e nacionnan mas.’ (Revelacion 20:2, 3) Despues lo bay tin un “tera nobo”, of sociedad humano nobo, y den esaki “husticia lo biba.” *2 Pedro 3:13.

Tur hende cu lo biba den e sociedad humano husto ey lo bira perfecto y lo ta liber di pica. (Romanonan 8:21) Como subditonan di e Reino di Dios, ‘nan lo no haci daño ni causa destruccion.’ Dicon no? “Pasobra tera lo ta yen di e conocemento di SEÑOR.” (Isaias 11:9) Na e tempo ey, henter humanidad lo siña conoce Jehova Dios su camindanan y lo imita su cualidadnan amoroso. Si, prehuicio lo ser elimina completamente, “pasobra Dios no ta haci distincion di persona.”—Romanonan 2:11.

^ par. 17 Pa mas informacion tocante e Reino di Dios y loke e ta bay haci pronto, wak capitulo 3, 8 y 9 di e buki Kico Bijbel Ta Siña Realmente? publica pa Testigonan di Jehova.