Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2013

 BIJBEL TA CAMBIA BIDA DI HENDE

“Nan Tabata Kier pa Mi Mes Wak Kico Bijbel Ta Siña”

“Nan Tabata Kier pa Mi Mes Wak Kico Bijbel Ta Siña”
  • NACI NA AÑA: 1982

  • PAIS NATAL: REPUBLICA DOMINICANA

  • HISTORIA: A LANTA COMO MORMON

MI PASADO:

Mi a nace na Santo Domingo, Republica Dominicana, como ultimo yiu di un famia di cuater yiu. Mi mayornan tabata bon studia y kier a lanta nan yiunan den un ambiente sano. Cuater aña prome cu mi a nace, mi mayornan a bin den contacto cu algun hoben misionero cu tabata mormon. Impresiona pa nan bon apariencia y cortesia, den poco tempo mi mayornan a bira un di e prome famianan riba e isla cu a join e Iglesia di Hesucristo di e Santonan di e Delaster Dianan, of Iglesia Mormon.

Como mucha, mi tabata gusta e actividadnan social di e iglesia y e importancia cu e mormonnan tabata duna na bida di famia y normanan moral. Mi tabata orguyoso di ta un mormon y a pone meta pa bira un misionero.

Tempo mi tabatin 18 aña di edad, mi famia a muda bay Merca pa mi por a bay un bon universidad. Despues di un aña, mi tanta cu su esposo, kendenan ta Testigo di Jehova, a bin for di Florida pa bishita nos. Nan a invita nos pa bay un congreso religioso cu nan. Loke a impresiona mi tabata cu tur hende rond di mi tabata busca e textonan di Bijbel cu e orador tabata menciona y tabata haci anotacion. Pesey, mi a pidi nan un pen cu papel, y mi tambe a cuminsa haci mescos.

Despues di e congreso mi tanta cu su esposo a bisa cu ya cu mi tabata interesa pa bira misionero, nan por a yuda mi siña mas tocante Bijbel. Mi a haya esey un bon idea, pasobra e tempo ey mi tabata sa hopi mas di e Buki di Mormon cu di Bijbel.

BIJBEL A CAMBIA MI BIDA:

Durante nos combersacionnan tocante Bijbel via telefon, mi tanta cu su esposo semper tabata anima mi pa compara mi creencianan cu e siñansanan di Bijbel. Nan tabata kier pa mi mes wak kico Bijbel ta siña.

 Tabatin hopi cos cu mi a acepta di e siñansanan mormon, pero mi no tabatin sigur si esakinan a cuadra cu loke Bijbel ta bisa. Mi tanta a manda mi e ¡Despertad! di 8 di november 1995, publica pa Testigonan di Jehova. Den dje tabatin algun articulo tocante e siñansanan mormon. Mi a keda sorprendi cu mi no tabata sa mes di hopi di nan siñansanan. Pesey, mi a dicidi di bay riba e website oficial di e mormonnan pa wak si loke mi a lesa den e ¡Despertad! tabata berdad. Esey tabata e caso y mi a keda mas convenci ainda ora mi a bishita e museonan mormon na Utah.

Semper mi a kere cu e Buki di Mormon y Bijbel ta complementa otro. Pero ora mi a cuminsa lesa Bijbel mas a fondo, mi a ripara cu e siñansanan mormon ta contradeci e doctrinanan di Bijbel. Por ehempel, Bijbel ta bisa na Ezekiel 18:4 cu alma ta mortal. Sinembargo, e Buki di Mormon ta bisa na Alma 42:9: “E alma no por muri nunca.”

Fuera di e contradiccionnan den siñansa di e mormonnan, nan ideanan nacionalista tambe a molestia mi. Por ehempel, segun e mormonnan, e hofi di Eden tabata situa na Jackson County, Missouri, Merca. Y e lidernan di iglesia ta bisa cu ora “e Reino di Dios cuminsa goberna, bandera di Merca lo waya cu orguyo y sin mancha riba e palo di bandera di libertad y derechonan igual.”

Mi a puntra mi mes kico esaki lo a nifica pa mi pais natal y pa tur otro pais. Mi a menciona e punto ey den un combersacion telefonico cu mi tabatin un anochi cu un hoben mormon cu tabata haya entrenamento pa bira misionero. Mi a puntr’e francamente si e lo tabata dispuesto pa bringa contra mormon di un otro pais si su pais cuminsa un guera contra e pais ey. Mi a keda babuca ora el a bisa si! Mi a cuminsa analisa e siñansanan di mi iglesia mas a fondo y tambe a haci e lidernan principal di Iglesia Mormon algun pregunta. Nan a bisa cu contesta riba mi preguntanan tin di haber cu misterionan cu algun dia lo keda revela segun cu e luz ta bira mas cla.

Desapunta cu nan splicacion, mi a dicidi di analisa mi mes mas aleu y tambe e motibo pakico mi kier a bira un misionero mormon. Mi a realisa cu esey ta pasobra mi tabatin masha deseo di yuda hende. Un otro motibo tabata cu como misionero hende lo a respeta mi. Pero, mi no tabata sa dje hopi ey tocante Dios. Aunke antes mi tabata blader hopi biaha den Bijbel, mi no a mira su balor. Mi no tabatin ningun idea di kico ta Dios su proposito pa tera y pa humanidad.

E BENEFICIONAN:

Pa medio di mi estudio di Bijbel cu Testigonan di Jehova, mi a siña entre otro kico ta Dios su nomber, kico ta sosode cu nos ora nos muri y kico ta e papel di Hesus den cumplimento di e proposito di Dios. Porfin mi a haya sa mas tocante e buki maraviyoso aki, y mi ta gusta comparti e berdadnan cu mi a siña cu otro hende. Semper mi tabata sa cu Dios ta existi, pero awor mi por papia cu ne den oracion como mi mihor Amigo. Mi a batisa como Testigo di Jehova dia 12 di juli 2004, y seis luna despues mi a cuminsa sirbi full-time den e trabou di predica.

Mi a traha cinco aña na e sede mundial di Testigonan di Jehova na Brooklyn, New York. Mi tabatin e privilegio di yuda den produccion di Bijbel y literatura basa riba Bijbel cu ta beneficia miyones di hende rond mundo. Mi a disfruta masha hopi mes di esey, y te ainda mi ta gusta yuda otro hende siña tocante Dios.