Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2013

 HALA CERCA DIOS

‘E Ta Dios di e Bibonan’

‘E Ta Dios di e Bibonan’

Morto tin mas poder cu Dios? Di ningun manera! Con morto, of cualkier otro “enemigo”, por tin mas poder cu Dios, kende ta “Todopoderoso”? (1 Corintionan 15:26; Exodo 6:3) Dios tin poder pa elimina morto, y el a priminti di haci esey pa medio di resureccion den su mundo nobo. * Con sigur e promesa ey ta? Loke Hesus, e Yiu di Dios, a bisa tocante e promesa ey por yena nos curason cu speransa.Lesa Mateo 22:31, 32.

Ora Hesus tabata papia cu e saduceonan, kendenan no tabata kere den resureccion, el a bisa: “Pa loke ta resureccion di e mortonan, boso no a lesa loke Dios a papia cu boso ora el a bisa: ‘Ami ta Dios di Abraham, Dios di Isaak y Dios di Jacob’? E no ta Dios di e mortonan, sino di e bibonan.” Aki Hesus a referi na e combersacion cu Dios tabatin cu Moises banda di e mata cu tabata na candela, mas o menos 3.500 aña pasa. (Exodo 3:1-6) Segun Hesus, loke Jehova a bisa Moises—“Ami ta Dios di Abraham, Dios di Isaak y Dios di Jacob”—ta un garantia cu e resureccion lo tuma luga sigur. Dicon nos por bisa esey?

Laga nos wak e contexto. Dia Jehova a papia cu Moises, e patriarcanan Abraham, Isaak y Jacob tabata morto pa basta tempo caba; Abraham tabatin 329 aña morto, Isaak 224 aña y Jacob 197 aña. A pesar di esey, Jehova a bisa Moises “Ami ta” nan Dios, y no “Ami tabata” nan Dios. Jehova a papia di e tres patriarcanan ey comosifuera nan tabata na bida ainda. Dicon?

Hesus a splica: “E [Jehova] no ta Dios di e mortonan, sino di e bibonan.” Pensa un rato riba loke esey ta nifica. Si no ta bay tin un resureccion, Abraham, Isaak y Jacob lo keda morto pa semper. Den tal caso, Jehova lo ta un Dios di cadaver. Esey lo nifica cu morto tin mas poder cu Jehova, comosifuera e ta mucho debil pa libra su fiel sirbidornan for di e gara di morto.

Pues, na ki conclusion nos por yega relaciona cu Abraham, Isaak y Jacob, y tur fiel sirbidor di Jehova cu a muri caba? Hesus a bisa enfaticamente: ‘Pa E nan tur ta bibo.’ (Lucas 20:38) Si, e proposito di Jehova pa resucita su fiel sirbidornan lo cumpli sigur. Pa Jehova, ta comosifuera nan ta na bida. (Romanonan 4:16, 17) Nan tur ta graba den su memoria perfecto te na e tempo cu el a stipula pa lanta nan for di morto.

Jehova ta hopi mas poderoso cu morto

E idea di por ta hunto atrobe un dia cu bo sernan keri cu a muri no ta atrae bo? Corda cu Jehova ta hopi mas poderoso cu morto. No tin nada cu por strob’e di cumpli cu su promesa di resucita e mortonan. Lo bo no kier sa mas tocante e promesa aki y tocante e Dios cu lo cumpli cu ne? Si bo haci esey, lo bo hala mas cerca Jehova, ‘e Dios di e bibonan.’

DEN FEBRUARI NOS TA RECOMENDA BO PA LESA

Mateo 22-28Marco 1-8

^ par. 3 Si bo kier sa mas tocante Dios su promesa di resureccion den un husto mundo nobo, wak capitulo 7 di e buki Kico Bijbel Ta Siña Realmente? publica pa Testigonan di Jehova.