Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  February 2013

Kico Ta e “Evangelio di Judas”?

Kico Ta e “Evangelio di Judas”?

NA APRIL di aña 2006, corantnan rond mundo tabatin e noticia sensacional cu un team di experto a publica contenido di un manuscrito antiguo cu nan a descubri recientemente, titula “Evangelio di Judas.” E articulonan di corant aki a trece padilanti cu e expertonan ta haya cu e manuscrito aki ta duna nos henteramente un otro idea di loke nos ta pensa di Judas, e discipel cu a traiciona Hesus. Nan ta duna di compronde cu Judas en realidad tabata un heroe, e apostel cu a compronde Hesus mihor y cu a entrega Hesus pa nan ehecut’e riba peticion di Hesus mes.

E manuscrito aki ta autentico? Acaso e ta revela algun berdad cu a keda scondi tocante personahenan historico manera Judas Iscariot, Hesucristo of e cristiannan di prome siglo? E lo mester duna nos un otro idea di cristianismo?

E DESCUBRIMENTO DI E “EVANGELIO DI JUDAS”

No ta mucho cla con nan a descubri e “Evangelio di Judas.” Aparentemente, no ta arkeologo a descubri ni registra e documento aki; el a aparece diripiente riba mercado di cosnan antiek den añanan ‘70 of na comienso di añanan ’80 di siglo pasa. Probablemente a descubrie na Egipto na aña 1978 den un graf bandona, posiblemente den un cueba. E tabata un di e cuater partinan di un codex (un tipo di buki antiguo) skirbi na Copto, un idioma deriva for di Egipto di antiguedad.

Despues cu nan a saca e codex cu tabatin un kaft di cuero for di e clima seco di Egipto, caminda el a keda conserva pa hopi siglo, el a cuminsa bay atras hopi lihe. Na aña 1983, algun experto por a mira e codex brevemente; pero e prijs cu tabata pidi p’e tabata asina exorbitante cu nan no a cumpr’e. Falta di cuido y e echo cu a warda e codex na un manera inapropia a pone cu el a sigui bay atras. Na aña 2000, un comerciante Suiso di cosnan antiek a cumpr’e. Despues el a entreg’e na un team internacional di experto cu a keda encarga cu e tarea complica di restaura y reconstrui e codex, ya cu awor parti di dje a plama for di otro. E team aki a traha bou di guia di e Fundacion Maecenas di Arte Antiguo y National Geographic Society. Tambe e team aki lo mester a determina e edad di e codex, y traduci y interpreta su contenido.

 Nan a uza un sistema pa determina edad di documento antiguo cu yama carbon-14. Despues cu nan a analisa e codex, nan por a confirma cu e ta autentico y cu probablemente e ta data for di siglo 3 of 4 di nos era. Sinembargo, e expertonan a yega na e conclusion cu e manuscrito Copto di e “Evangelio di Judas” a ser traduci for di e idioma Griego original di un periodo hopi mas prome. Na ki tempo y bou di ki circunstancia e “Evangelio di Judas” a ser skirbi originalmente?

E “EVANGELIO DI JUDAS”—UN EVANGELIO GNOSTICO

E prome mencion di e existencia di un obra cu yama “Evangelio di Judas” a ser haya den e documentonan di Ireneo, un obispo di Lyons cu a biba na fin di siglo 2 di nos era. Den un obra cu yama Against Heresies (Contra Herehia), Ireneo a skirbi tocante un di e varios gruponan cu e no tabata di acuerdo cu ne relaciona cu cierto siñansa. El a bisa: “Nan ta declara cu Judas, e traidor, tabata bon na altura di tur e cosnan aki, y como cu ta e so tabata sa e berdad, e por a cumpli cu e misterio di e traicion. Di e manera ey, el a bruha tur cos den otro, tanto cosnan riba tera como den cielo. Nan a presenta un cuenta inventa cu nan a yama e Evangelio di Judas.”

“No ta un persona cu tabata conoce Judas a skirbi e evangelio tempo cu Judas tabata na bida”

Ireneo tabata determina pa refuta varios siñansa di e cristiannan gnostico, kendenan a pretende cu nan tabatin conocemento special. Tabatin hopi grupo gnostico, y cada grupo tabatin su mes interpretacion di loke nan a kere tabata e “berdad.” E gnosticonan a promove nan siñansanan basa riba nan mes obranan skirbi, cu a plama durante siglo 2 di nos era.

Hopi biaha e obranan gnostico ey a afirma cu e apostelnan prominente di Hesus no a compronde su mensahe y cu tabatin un siñansa secreto cu Hesus a papia di dje y cu ta un grupito privilegia so por a compronde. * Segun algun di e gnosticonan ey, mundo tabata un prizon cu tabata contene alma humano. Pesey, e “dios creador” di e Scritura Hebreo tabata realmente un dios insignificante, kende tabata contra di e diferente diosnan poderoso cu nan a kere aden. Nan tabata kere cu un persona cu tin “conocemento” special lo a compronde cu hende tin cu bay laga nan curpa fisico.

E “Evangelio di Judas” ta basa riba e creencia ey. E ta cuminsa cu e palabranan: “Esaki ta e secreto cu Hesus a conta Judas Iscariot durante un periodo di ocho dia cu a termina tres dia prome cu el a celebra Pasco Hudiu.”

Acaso e codex aki tabata e manuscrito cu Ireneo a skirbi di dje, y cu supuestamente tabata perdi pa hopi siglo? Marvin Meyer, miembro di e prome team cu a analisa y traduci e codex, a bisa cu Ireneo su “descripcion breve ta cuadra bon cu e manuscrito Copto actual, titula e Evangelio di Judas.”

E PERSONAHE DI JUDAS DEN E EVANGELIO AKI—UN DEBATE ENTRE EXPERTONAN

Den e “Evangelio di Judas”, Hesus ta hari su discipelnan y haci mofa di nan ora nan falta di conocemento sali na cla. Pero Judas ta e unico entre e 12 apostelnan cu a demostra cu el a compronde ken Hesus tabata realmente. Pesey, ta Judas so Hesus a confia cu “e misterionan di e reino.”

E prome team di experto cu a reconstrui e manuscrito original tabata bou di influencia di e descripcion cu Ireneo a duna di e Evangelio di Judas. Den nan traduccion, Hesus a faborece Judas como e unico discipel cu lo a compronde e misterionan y “alcansa” e “reino.” Y aunke e apostelnan lo a haya un reemplaso pa Judas, Judas lo a haya un mihor recompensa cu tur e otro discipelnan pasobra t’e a yuda Hesus scapa for di su curpa fisico.

 Autornan di bukinan mas bendi, manera Bart Ehrman y Elaine Pagels—kendenan tambe ta expertonan prominente cu a studia creencia di e cristiannan di prome siglo y di e gnosticonan—a publica poco tempo despues nan propio analisis y comentarionan tocante e “Evangelio di Judas.” Nan a yega na casi e mesun conclusion cu e prome team. Sinembargo, un poco despues di esey, otro expertonan manera April DeConick y Birger Pearson a expresa nan preocupacion. Nan a bisa cu National Geographic Society a core publica e manuscrito antiguo den nan afan pa haya publicidad exclusivo di medionan di comunicacion. Ademas, nan no a sigui e procedura normal di laga otro experto haci un analisis profundo y revision di e documento prome cu e ser publica. En realidad, e team mester a firma un acuerdo pa no revela e detayenan na niun hende.

Ningun di e expertonan cu a analisa e manuscrito aki a pretende cu e ta contene informacion historico exacto

Aunke DeConick y Pearson a traha independiente di otro, tur dos a conclui cu e expertonan anterior no a traduci algun di e seccionnan clave di e fragmentonan di e codex corectamente. Segun DeConick su reconstruccion di e manuscrito, Hesus a yama Judas e “di Diestres Demoño”, no e “di diestres spirito.” * Tambe Hesus a bisa Judas bon cla cu lo e no subi bay na e “reino.” En bes di haya un mihor recompensa cu e otro discipelnan, Judas lo haya un castigo severo pasobra el a mata Hesus. Segun DeConick, e escritornan di e “Evangelio di Judas” a haci bofon di tur e apostelnan. E conclusion final di DeConick y Pearson ta cu den e “Evangelio di Judas” aki Judas no ta un heroe.

KICO NOS POR SIÑA FOR DI E “EVANGELIO DI JUDAS”?

Sea cu e expertonan a mira e Judas di e evangelio aki como un heroe of un demoño, ningun di nan cu a analisa e manuscrito aki a pretende cu e ta contene informacion historico exacto. Bart Ehrman a splica: “No ta Judas a skirbi e evangelio aki, ni e no ta un evangelio cu ta menciona Judas como su escritor ... No ta un persona cu tabata conoce Judas a skirbi e evangelio tempo cu Judas tabata na bida ... Pesey, e no ta un buki cu lo duna nos informacion adicional tocante loke di berdad a sosode durante e bida di Hesus.”

E “Evangelio di Judas” ta un manuscrito gnostico, originalmente skirbi na Griego den siglo 2 di nos era. Expertonan ainda no ta sigur si e “Evangelio di Judas” cu nan a descubri recientemente ta identico na e manuscrito cu Ireneo a referi na dje. Pero e “Evangelio di Judas” ta duna prueba cu un tempo cristiannan falso a introduci nan mes siñansanan, y esaki a crea division den nan. En bes di proba cu Bijbel ta robes, e “Evangelio di Judas” a confirma e spiertamento di e apostelnan, manera esun di Pablo na Echonan 20:29 y 30 cu ta bisa: “Mi sa cu despues cu mi no t’ey mas ... lo lanta for di meymey di boso mes hombernan cu lo troce e berdad pa pone e discipelnan bay nan tras.”

^ par. 11 E evangelionan gnostico aki ta carga nomber di esnan cu supuestamente mester a compronde e berdadero siñansanan di Hesus mihor, manera por ehempel, e “Evangelio di Tomas” y e “Evangelio di Maria Magdalena.” En total, mas o menos 30 di e obranan di antiguedad ey a ser identifica.

^ par. 18 E expertonan cu ta opina cu Judas ta un demoño den e manuscrito aki—uno cu a compronde mihor cu tur e otro discipelnan ken Hesus tabata—ta basa nan mes riba e echo cu e demoñonan den e relatonan di evangelio di Bijbel tambe a identifica Hesus corectamente.Marco 3:11; 5:7.