Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2013

 HALA CERCA DIOS

“Bo A ... Revela Nan na Mucha Chikito”

“Bo A ... Revela Nan na Mucha Chikito”

Bo tin gana di conoce Dios—sa ken e ta, kico e ta gusta, kico e no ta gusta y kico ta su boluntad? Den su Palabra, Bijbel, Jehova Dios ta revela e berdad tocante su mes. Pero no ta tur hende cu ta lesa Bijbel por compronde e berdad ey completamente. Dicon no? Pasobra ta algun hende so a haya e privilegio ey. Ban wak kico Hesus a bisa encuanto esaki.—Lesa Mateo 11:25.

Ripara e palabranan cu e versiculo ey ta cuminsa cu ne: “Na e ocasion ey Hesus a bisa.” Ta parce cu loke Hesus tabata bay bisa tabata relaciona cu loke a caba di sosode. El a caba di scual e habitantenan di tres stad di Galilea, caminda el a haci mayoria di su obranan poderoso, pasobra nan no kier a acepta su mensahe. (Mateo 11:20-24) Kisas bo ta puntra bo mes: ‘Con un hende por yega asina leu di mira e milagernan cu Hesus a haci y no acepta e berdadnan cu el a siña hende?’ Nan no kier a bira discipel di Hesus pasobra nan tabata cabesura.—Mateo 13:10-15.

Hesus tabata sa cu pa nos por compronde e berdad cu tin den Bijbel tocante Dios, nos tin mester di dos cos: e yudansa di Dios y e motivacion corecto. Hesus a bisa: “Mi ta alaba bo publicamente, Tata, Señor di cielo y tera, pasobra bo a sconde e cosnan aki for di hende sabi y intelectual y a revela nan na mucha chikito.” Bo ta compronde awor dicon ta algun hende so tin e privilegio di compronde e berdad tocante Dios? Como cu Jehova ta e “Señor di cielo y tera”, ta e tin derecho di dicidi na ken e ta revela e berdad ey. Pero tur hende ta haya chens di compronde e berdad, pasobra Dios no ta haci distincion di persona. Awor, a base di kico Dios ta revela berdad biblico na un hende si y na un otro no?

Jehova ta gusta hende humilde, no esnan orguyoso. (Santiago 4:6) E ta sconde e berdad for di “hende sabi y intelectual.” Esnan sabi y siña di e mundo aki ta mucho orguyoso pa acepta e yudansa di Dios. (1 Corintionan 1:19-21) Dios ta revela e berdad na “mucha chikito”—hende humilde cu ta busca su yudansa di curason. (Mateo 18:1-4; 1 Corintionan 1:26-28) Hesus, e Yiu di Dios, a conoce tanto hende orguyoso como esnan humilde di curason. Hopi lider religioso bon siña y orguyoso no a capta e mensahe di Hesus, pero piscadornan humilde si a compronde esaki. (Mateo 4:18-22; 23:1-5; Echonan 4:13) Na mesun tempo, algun hende rico y bon siña cu di berdad tabata humilde a bira siguidor di Hesus.—Lucas 19:1, 2, 8; Echonan 22:1-3.

Laga nos bolbe na e pregunta cu nos a haci na cuminsamento: Bo tin gana di conoce Dios? Si ta asina, lo bo ta contento pa sa cu Dios no ta gusta hende cu ta considera nan mes sabi den bista di mundo. Al contrario, e ta gusta hende cu esnan sabi den bista di mundo ta menosprecia. Pesey si bo studia e Palabra di Dios cu un actitud humilde y e motivacion corecto, lo bo por ta un di esnan cu Jehova ta duna e regalo precioso di compronde e berdad tocante dje. Ora bo compronde e berdad ey, bo bida ta haya mucho mas nificacion for di awor, y esey por hiba na “loke realmente ta bida”—bida pa semper den un husto mundo nobo cu Dios a priminti cu lo bin pronto. *1 Timoteo 6:12, 19; 2 Pedro 3:13.

Den januari nos ta recomenda bo lesa

Mateo 1-21

^ par. 7 Testigonan di Jehova lo ta contento pa yuda bo siña e berdad tocante Dios y su propositonan. Nan ta ofrece estudio di Bijbel gratis for di e buki Kico Bijbel Ta Siña Realmente?