Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2013

 IMITA NAN FE

‘Aunke El A Muri, E Ta Papia Ainda’

‘Aunke El A Muri, E Ta Papia Ainda’

VISUALISA e escena aki: Abel ta wak su carnenan ta come yerba trankil riba un sero. Kisas, hopi mas leu for di unda su bestianan ta, su bista ta cay riba algo cu ta briya leu aya. E tabata sa cu eynan tabatin un spada na candela cu tabata draai continuamente, blokiando asina e caminda pa drenta e hofi di Eden. Un tempo su mayornan tabata biba eyden, pero awor ni nan ni nan yiunan no por drenta mas. Imagina bo con e biento di atardi laat ta pasa den Abel su cabey segun cu e ta hisa cara wak cielo y pensa riba su Creador. E brecha cu tin entre hende y Dios lo por cera un dia? Esey tabata Abel su deseo di mas grandi.

Awe Abel ta papia cu bo. Bo por tend’e? Kisas bo ta bisa cu esey ta imposibel, pasobra e di dos yiu di Adam aki a muri hopi tempo pasa. Despues di casi 6.000 aña no a sobra nada mas di su restonan. Fuera di esey, Bijbel ta siña nos cu “e mortonan no sa nada.” (Eclesiastes 9:5, 10) Y ni un solo palabra cu Abel a papia a keda registra den Bijbel. Pues con e por ta papia cu nos?

Bou di inspiracion, apostel Pablo a bisa: “Maske Abel a muri, e ta papia ainda.” (Hebreonan 11:4) Pa medio di kico Abel ta papia? E ta papia pa medio di su fe. Abel tabata e prome ser humano cu a desaroya e excelente cualidad ey. El a demostra su fe na un manera asina extraordinario cu su ehempel ta bibo y cu nos awe por imita. Si nos siña di su fe y haci esfuerso pa imit’e, e ora ey e relato di Abel ta papia cu nos na un manera masha real y eficaz.

Pero kico nos por siña di Abel y di su fe siendo cu Bijbel ta bisa masha tiki di dje? Laga nos mira.

E TABATA ENTRE E PROME SERNAN HUMANO

Abel a nace casi na comienso di historia humano. Mas despues Hesus a papia di Abel comosifuera e prome cu a nace “for di dia a funda mundo.” (Lucas 11:50, 51) Obviamente, Hesus tabata referi aki na e mundo di humanidad cu tin e speransa di ser rescata for di pica. Aunke Abel tabata e di cuater ser humano na mundo, aparentemente e tabata e prome hende cu Dios a mira como uno cu por haya salbacion. * Ta bisto cu Abel no a lanta den un bon ambiente familiar.

Pues aunke e mundo tabata jong, un nubia di tristeza tabata colga riba e famia humano. Abel su mayornan, Adam cu Eva, lo tabata bunita di apariencia y yen di energia. Pero nan a comete e eror di mas grandi di nan bida, y nan tabata sa esey. Un tempo nan tabata perfecto y tabatin e chens di biba pa semper. Como cu nan a rebela contra Jehova Dios, nan a ser saca for di e hofi di Eden, nan hogar den e Paradijs. Pa motibo cu nan a pone nan mes deseo prome cu tur otro cos—prome cu hasta e necesidadnan di nan descendientenan—nan a perde perfeccion y bida eterno.—Genesis 2:15–3:24.

 Obliga na biba pafo di e hofi di Eden, Adam cu Eva a ripara cu bida tabata duro. Pero ora nan prome yiu a nace, nan a yam’e Cain, esta, “Algo Produci”, y Eva a bisa: “Mi a haya [of, produci] un yiu homber cu yudansa di SEÑOR.” Eva su palabranan ta indica cu kisas e tabatin na mente e promesa cu Dios a haci den e hofi, esta, cu un cierto muher lo a haya un “simia” cu lo caba un dia cu e malbado cu a engaña Adam cu Eva. (Genesis 3:15; 4:1) Acaso Eva a kere cu ta e tabata e muher menciona den e profecia ey y cu Cain tabata e “simia” priminti?

Si ta asina, e tabata completamente ekiboca. Es mas, si Adam cu Eva a hinca e ideanan ey den Cain su cabes segun cu e tabata crece, esey sigur lo a lanta su orguyo. Cu tempo, Eva a haya su di dos yiu homber, pero di e yiu aki si e no a bisa nada particular. Nan a yam’e Abel, cu kisas ta nifica “Suspiro”, of “Banidad.” (Genesis 4:2) Acaso nan a dun’e e nomber ey pasobra nan no tabatin mucho speransa den dje manera nan tabatin den Cain? Nos no ta sigur.

En todo caso, awendia mayornan por siña hopi for di e prome mayornan ey. Puntra bo mes: Mi palabra- y accionnan ta hinca orguyo, ambicion y egoismo den mi yiunan? Of mi ta siña nan stima Jehova y forma un amistad cu ne? Lamentablemente, e prome mayornan a faya cu nan responsabilidad. Pero, pa nan descendientenan ainda tin speransa.

KICO A YUDA ABEL HAYA FE DEN DIOS?

Segun cu Cain y Abel tabata crece, Adam lo a siña nan e trabounan cu nan tabatin cu haci pa percura p’e famia. Cain a bira cunukero y Abel a bira wardador di carne.

Ma Abel a haci algo hopi mas importante. Durante e añanan cu a pasa, el a desaroya fe; esey ta e bunita cualidad cu Pablo a skirbi di dje despues. Awor, pensa un rato: Kico a yuda Abel haya fe den Jehova Dios siendo cu no tabatin ningun ser humano cu por a sirbi como ehempel p’e? Laga nos considera tres cos cu por a yuda Abel haya un fe fuerte den Dios.

Jehova su creacion.

Ta berdad cu Jehova a maldiciona e tera cu mata di sumpiña y mal yerba cu a stroba plantamento. Pero asina mes, e tera tabata produci suficiente cuminda pa Abel y su famia. Di otro banda, Dios no a maldiciona e animalnan—incluso parha y pisca—ni sero, lago, riu y lama ni tampoco cielo, nubia, solo, luna y strea. Pues tur caminda cu Abel a wak, e por a mira prueba di e gran amor, sabiduria y bondad di esun cu a crea tur cos, Jehova Dios. (Romanonan 1:20) Segun cu Abel a medita riba e creacion y tambe riba Dios su cualidadnan, su fe a bira mas fuerte.

Abel sigur a tuma su tempo pa medita riba su relacion cu Dios. Imagina con Abel tabata cuida su carnenan. Un wardador di carne tabatin cu cana hopi. E tabata guia e bestianan manso aki pa  subi sero, crusa vaye y riu; tur esaki pa nan haya e yerba di mas berde, e mihor fuente di awa y e mihor luga pa sosega. Di tur animal cu Dios a crea, carne ta parce esun di mas indefenso, comosifuera crea cu e necesidad pa hende proteha nan y guia nan. Acaso Abel tambe lo a sinti cu e tabatin mester di guia, proteccion y cuido di un ser mas sabi y mas poderoso cu cualkier ser humano? Sin duda el a expresa hopi di e sintimentonan aki den su oracionnan y como resultado su fe lo a sigui crece.

Den creacion, Abel a haya un base solido pa pone fe den un Creador amoroso

Jehova su promesanan.

Adam cu Eva lo mester a conta nan yiunan kico nan a haci cu a pone Dios saca nan for di e hofi di Eden. Pues, Abel tabatin hopi cos pa medita ariba.

Jehova a bisa cu e tera lo a ser maldiciona. Na e matanan di sumpiña y mal yerba cu tera a produci Abel por a mira bon cla cu e palabranan ey a cumpli. Jehova a bisa tambe cu Eva lo a sufri di dolor durante su embaraso y cu lo el a duna luz cu dolor di parto. Ora Abel su rumannan a nace, sin duda e por a mira e palabranan ey tambe cumpli. Jehova a premira cu Eva lo a sinti un necesidad desbalansa pa e amor y atencion di su casa, y cu Adam na su turno lo a domin’e. Abel por a mira e tristo realidad ey cu su mes wowo. Den cada un di e casonan aki, Abel por a mira cu Jehova su palabra ta completamente confiabel. Pesey, Abel tabatin bon motibo pa pone fe den Dios su promesa tocante un “simia” cu un dia lo drecha tur loke a bay robes for di den Eden.—Genesis 3:15-19.

Jehova su sirbidornan.

Abel su famia no tabata un bon ehempel p’e, pero nan no tabata e unico sernan inteligente na mundo e tempo ey. Ora Jehova a saca Adam cu Eva for di e hofi, el a haci sigur cu ni nan ni nan descendientenan no por a drenta den e Paradijs ey. Pa proteha e entrada, Jehova a pone kerubin—angel di alto rango—eynan y un spada na candela cu tabata draai rond sin stop.—Genesis 3:24.

Imagina con Abel como mucha lo tabata wak e kerubinnan ey. Como cu nan tabatin forma di hende, Abel por a mira cu nan tabata sumamente poderoso. Y e “spada”, semper na candela y semper den movecion, tambe lo mester a impresiona Abel. Segun cu Abel tabata crece, acaso el a yega di mira e angelnan aki fada y kita bay for di nan puesto? No. E criaturanan inteligente y poderoso ey a keda na nan puesto, di dia y anochi, aña aden aña afo, siglo aden siglo afo. Pues Abel por a siña cu Jehova Dios tabatin sirbidornan husto y fiel. Den e kerubinnan ey Abel a mira un clase di lealtad y obediencia na Jehova cu e no por a mira den su mes famia. E ehempel di e angelnan aki sigur a fortalece su fe.

Durante henter su bida, Abel por a mira cu e kerubinnan tabata sirbidornan fiel y obedecido na Jehova

Segun cu Abel a medita riba tur loke Jehova a revela di su mes mediante e creacion, su promesanan y e ehempel di su angelnan, Abel su fe a bira mas fuerte. Pues, nos por siña hopi for di Abel su ehempel. E ta laga vooral e hobennan mira cu maske kico otro miembro di nan famia haci, nan por desaroya un berdadero fe den Jehova Dios. Cu tur e maraviyanan di creacion rond di nos, Bijbel completo na nos disposicion y tambe e tantisimo ehempelnan humano di fe, awe nos tin un base solido pa edifica nos fe.

KICO A HACI E SACRIFICIO DI ABEL MIHOR?

Segun cu Abel su fe den Jehova tabata crece, e tabata busca manera pa expresa su fe cu accion. Pero kico un simpel hende por a duna e Creador di universo? De echo, Dios no tin mester di regalo of yudansa di ningun ser humano. Sinembargo, cu tempo Abel a bin compronde un berdad fundamental: si e simplemente ofrece Jehova lo mihor cu e tabatin, cu e motivacion corecto, su Tata celestial amoroso lo a keda contento cu esey.

Di manera cu Abel a prepara pa ofrece Dios algun carne di su tou. El a scoge esnan di mas mihor, di entre e promenan cu a nace, y a ofrece loke e a considera e mihor partinan di e lamchinan como sacrificio. Mientrastanto, Cain tambe a busca e bendicion y fabor di Dios, y pesey el a prepara un ofrenda di su cultivo. Pero Cain no tabatin e mesun motivacion cu Abel tabatin. E diferencia  aki a bira bisto ora e rumannan a presenta nan ofrenda.

Abel a ofrece su sacrificio motiva pa fe, ma Cain si no

Cada un di e dos yiunan di Adam lo a uza altar y candela pa ofrece nan ofrenda, podise na bista di e kerubinnan, kendenan p’e tempo ey tabata e unico representantenan di Dios aki riba tera. Kico Jehova a pensa di e ofrendanan aki? Na Genesis 4:4, nos ta lesa: “SEÑOR a aprecia Abel y su ofrenda.” E relato no ta bisa con Jehova a laga Abel sa cu el a aprecia su ofrenda. Pero dicon Dios a aprecia Abel mas?

Ta pa motibo di su ofrenda? Abel a ofrece un animal bibo y a drama su sanger; e sanger a representa e bida di e animal. Abel a compronde con valioso un sacrificio asina lo tabata? Siglonan mas despues, Dios a uza e sacrificio di un lamchi sano pa representa e sacrificio di su mes yiu perfecto, “e lamchi di Dios”, kende su sanger inocente lo a ser drama. (Juan 1:29; Exodo 12:5-7) Ma esakinan ta cosnan cu Abel lo no por a compronde completamente.

Loke si nos ta sigur di dje ta cu Abel a ofrece lo mihor cu e tabatin. Jehova a aprecia tanto Abel su ofrenda como Abel mes, pasobra Abel a actua motiva pa berdadero amor y fe den Jehova.

Na contraste cu Abel, Jehova ‘no a aprecia Cain y su ofrenda.’ (Genesis 4:5) No cu Cain su ofrenda tabata malo riba su mes, ya cu mas despues e Ley di Dios a permiti hende ofrece producto di tera. (Levitico 6:14, 15) Pero Bijbel ta bisa di Cain cu “su obranan tabata malo.” (1 Juan 3:12) Cain lo a pensa, manera hopi hende ta pensa te awe: cu djis pretende di sirbi Dios lo ta suficiente. Su accionnan a revela su falta di berdadero fe y amor pa Jehova.

Ora Cain a mira cu e no a haya Jehova su aprobacion, e no a purba di siña for di e ehempel di Abel. Al contrario, el a haya hopi rabia riba su ruman. Jehova a mira loke tabata pasando den Cain su curason, y pesey cu pasenshi el a rasona cu ne. Jehova a spierta Cain cu su proceder lo por a hiba na pica serio, y tambe el a sigura Cain cu lo el a bolbe acept’e, basta Cain a cambia su proceder.—Genesis 4:6, 7.

Cain no a haci caso di Dios su spiertamento; el a invita su ruman homber mas jong pa bay dal un buelta cu ne den cunucu. Eynan, Cain a ataca Abel y a mat’e. (Genesis 4:8) Den un sentido, Abel a bira e prome victima di persecucion religioso, e prome martir. Aunke el a muri, su relato no a caba eynan.

Den sentido figurativo, Abel su sanger a sclama na Jehova pa venganza of husticia. Dios a castiga Cain pa su crimen pa asina husticia prevalece. (Genesis 4:9-12) Mas importante ainda, e registro di Abel su fe ta papia cu nos awe. Aunke Abel a biba masha tiki—kisas un siglo—compara cu e hendenan di su epoca, el a biba pa agrada su Creador. El a muri sabiendo cu e tabatin e amor y aprobacion di su Tata celestial, Jehova. (Hebreonan 11:4) Nos por ta sigur cu e ta safe den Jehova su memoria ilimita, wardando e resureccion pa biba den Paradijs aki riba tera. (Juan 5:28, 29) Abo lo top’e eynan? Lo bo por top’e basta bo ta determina pa scuch’e ora e ta papia y pa imita su fe extraordinario.

^ par. 8 E expresion “for di dia a funda mundo” ta duna e idea di tira simia abou, esta, procreacion di yiu; pues e ta referi na e prome yiunan di Adam cu Eva cu a nace. Dicon anto Hesus a menciona Abel como esun cu a nace “for di dia a funda mundo” siendo cu ta Cain tabata e prome yiu di Adam cu Eva? Esey ta pasobra Cain su decisionnan y accionnan a duna di conoce cu e tabata un rebelde; el a lanta contra Jehova. Pesey Cain, mescos cu su mayornan, probablemente lo no ricibi resureccion ni liberacion.