Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  January 2013

 TOPICO PRINCIPAL:BO MESTER TIN MIEDO DI FIN DI MUNDO?

Fin di Mundo—Miedo, Facinacion y Frustracion

Fin di Mundo—Miedo, Facinacion y Frustracion

Kico bo ta pensa di e fecha 21 di december 2012, e dia, riba kalender di e indjannan Maya, cu segun hopi hende lo trece cambionan mundial? Dependiendo di kico bo tabata spera, kisas bo ta sinti bo alivia, desapunta of kisas bo no ta preocupa bo cabes mes cu esey. Acaso esaki tabata djis un otro mal calculacion di e fin di mundo?

Awor, kico di e “fin di mundo” profetisa den Bijbel? (Mateo 24:3, E Testament Nobo di Nos Señor y Salbador Jesu-Cristo) Algun hende tin miedo cu mundo lo caba na candela. Otronan tin masha gana di wak kico lo sosode ora fin di mundo yega. Di otro banda, hopi hende a cansa di tende cu fin di mundo ta cerca. Pero, e reaccionnan ey ta basa riba echo of mas bien riba speculacion?

Lo bo keda sorprendi ora bo haya sa kico Bijbel ta bisa realmente tocante fin di mundo. No solamente e ta duna nos bon motibo pa anhela e fin, ma e ta mustra tambe con frustra hende por sinti nan ora cu e fin ta parce di tarda. Nos ta anima bo pa analisa algun pregunta cu hende sa haci tocante fin di mundo y e contesta cu Bijbel ta duna.

 Tera lo caba na candela?

WAK KICO BIJBEL TA BISA: [Dios] a establece tera riba su fundeshinan, pa asina esey no kita for di su luga nunca mas.”SALMO 104:5.

Planeta Tera lo no ser destrui, ni cu candela ni cu nada otro. Mas bien, Bijbel ta bisa cu e planeta aki ta hende su hogar eterno. Salmo 37:29 ta bisa: “E hustonan lo hereda e tera, y lo biba den dje pa semper.”—Salmo 115:16; Isaias 45:18.

Despues cu Dios a crea e tera, el a bisa cu e “tabata masha bon”, y su pensamento no a cambia. (Genesis 1:31) Su proposito no ta pa caba cu e tera, sino pa caba “cu esnan cu ta caba cu e tera” y pa proteh’e di daño permanente.—Revelacion 11:18.

Pero kisas bo ta pensa, ata e texto di 2 Pedro 3:7 ta bisa cu “e cielo y tera cu ta existi awor ta reserva pa candela”? Pues, no ta Bijbel mes ta mustra cu tera lo caba na candela? Ta bon pa tene cuenta cu tin biaha Bijbel ta uza palabra manera “cielo”, “tera” y “candela” den sentido figurativo. Por ehempel, Genesis 11:1 ta bisa: “Awor henter tera tabatin e mesun idioma.” Aki e palabra “tera” ta referi na hende.

E contexto di 2 Pedro 3:7 ta yuda nos compronde cu tanto e cielo, tera como candela menciona den e texto aki tambe ta figurativo. Versiculo 5 y 6 ta haci un comparacion cu e Diluvio di e dianan di Noe. Na e ocasion ey, Dios a destrui un mundo antiguo, pero e planeta mes a keda existi. Pues e “tera” cu e Diluvio a destrui ta representa e hendenan malbado di e tempo ey, y e “cielo” cu e Diluvio a destrui ta representa esnan cu a goberna riba e hendenan di e tempo ey. (Genesis 6:11) Ta den e mesun manera ey 2 Pedro 3:7 ta bisa cu hende malbado y nan gobernantenan corupto lo ser destrui pa semper, comosifuera kima cu candela.

Kico lo sosode na fin di mundo?

WAK KICO BIJBEL TA BISA: “Mundo ta pasa bay y tambe su deseonan, ma esun cu ta haci e boluntad di Dios ta keda pa semper.”1 JUAN 2:17.

E “mundo” cu ta pasa bay lo no ta planeta tera, sino hende cu no ta biba di acuerdo cu e boluntad di Dios. Mescos cu un ciruhano ta saca un tumor canceroso pa scapa bida di un pashent, asina tambe Dios lo elimina e malbadonan pa asina bon  hende por disfruta realmente di bida riba tera. (Salmo 37:9) Den e sentido ey, “fin di mundo” ta algo cu nos mester anhela.

Esey ta e sintimento cu traductornan di Bijbel a refleha den e manera cu nan a traduci e expresion “fin di mundo.” Nan ta papia di e ‘conclusion di un era’, of “fin di tempo.” (Mateo 24:3; BPK) Siendo cu tanto humanidad como tera lo sobrevivi e fin, no ta rasonabel pa kere cu despues di e fin lo bin un tempo nobo, of un era nobo? Bijbel ta bisa cu si, pasobra e ta papia di “e era cu ta bin.”—Lucas 18:30.

Hesus a bisa cu na e tempo ey “tur cos [lo] bira nobo.” Si, Hesus lo restaura humanidad na e condicion original cu hende lo mester tabatin, segun e proposito di Dios. (Mateo 19:28) E ora ey nos lo haya:

  • Un paradijs riba tera, cu siguridad y prosperidad pa tur hende.—Isaias 35:1; Mikeas 4:4.

  • Trabou cu ta duna berdadero sentido y satisfaccion. —Isaias 65:21-23.

  • Curacion di tur maleza.—Isaias 33:24.

  • Vigor hubenil, pasobra hende lo bolbe bira jong.—Job 33:25.

  • E goso di mira e resureccion di e mortonan.—Juan 5:28, 29.

Si nos haci “e boluntad di Dios”, esta loke e ta pidi nos, nos no tin nodo di tin miedo di fin di mundo. Al contrario, nos mester ta ansioso pa e bin.

Di berdad fin di mundo ta serka?

WAK KICO BIJBEL TA BISA: “Ora boso mira e cosnan aki sosode, boso por ta sigur cu e Reino di Dios ta cerca.”LUCAS 21:31.

Profesor Richard Kyle a skirbi den su buki The Last Days Are Here Again cu “cambionan inespera y caos social ta crea un ambiente cu ta pone hende cuminsa haci pronostico encuanto fin di mundo.” Esey ta netamente e caso ora hende no por splica e cambionan y caos cu mundo ta pasando aden.

Sinembargo, e profetanan di Bijbel no a skirbi tocante e fin pa splica dicon cos malo tabata sosode den nan tempo. Mas bien, ta Dios a inspira nan pa skirbi di sucesonan cu lo indica cu fin di mundo ta cerca. Considera algun di e profecianan aki y wak pa bo mes si nan no ta cumpliendo den nos tempo.

  •   Guera, hamber, temblor y epidemia di maleza mortal.—Mateo 24:7; Lucas 21:11.

  • Aumento considerabel di crimen.—Mateo 24:12.

  • Hende cu ta ruina e tera.—Revelacion 11:18.

  • Hende cu ta stima nan mes, stima placa y placer, pero cu no ta stima Dios.—2 Timoteo 3:2, 4.

  • Desintegracion di famia.—2 Timoteo 3:2, 3.

  • Indiferencia pa cu e evidencia cu e fin ta cerca.—Mateo 24:37-39.

  • Predicacion rond mundo di e bon noticia di e Reino di Dios.—Mateo 24:14.

Manera Hesus a bisa, ora nos mira “tur e cosnan aki”, nos sa cu fin di mundo ta cerca. (Mateo 24:33) Testigonan di Jehova ta kere cu e evidencia ta convencente, y pesey den 236 pais nan ta comparti nan creencianan cu otro hende.

Expectativa robes encuanto e fin ta nifica cu e no ta bin nunca mas?

WAK KICO BIJBEL TA BISA: “Ora nan ta bisa: ‘Paz y siguridad!’, e ora ey diripiente destruccion lo bin riba nan instantaneamente, mescos cu dolor di parto di un muher na estado; y nan lo no scapa di ningun manera.”1 TESALONICENSENAN 5:3.

Bijbel ta compara destruccion di mundo cu dolor di parto. Esey ta un dolor cu ta bin sigur y diripiente. Tambe por compara e tempo di fin cu ora un hende muher ta na estado. Segun cu e futuro mama ta mira con su curpa ta cambia, e ta realisa cu su yiu ta na caminda. Hasta si e fecha cu su dokter a calcula pa e yiu nace a pasa, e mama ey lo no tin niun duda cu pronto su yiu lo nace. Asina tambe, cualkier expectativa robes encuanto e fin no ta kita nada for di e echo cu esakinan ta “e ultimo dianan.”—2 Timoteo 3:1.

Pero kisas bo ta pensa: ‘Si e señal cu e fin ta cerca ta asina bisto, dicon hopi hende no ta mir’e?’ Bijbel ta mustra cu ora e fin ta cerca hopi ta esnan cu lo no haci caso di e señal. En bes di reconoce e cambionan drastico cu ta tumando luga den e ultimo dianan, nan lo bisa den forma di burla: “For di dia cu nos antepasadonan a bay sosega, tur cos ta sigui exactamente manera nan tabata for di cuminsamento di creacion.” (2 Pedro 3:3, 4) Cu otro palabra, aunke e señal di e ultimo dianan ta  bisto, hopi hende lo no preocupa nan cabes cu ne.—Mateo 24:38, 39.

E articulo aki a trata djis algun di e evidencianan biblico pa proba cu e fin ta cerca. * Bo tin gana di sa mas? Si ta asina, tuma contacto cu Testigonan di Jehova y pidi nan un estudio di Bijbel. Nan por duna bo un estudio di Bijbel na bo cas, na cualkier caminda cu ta cumbiniente pa bo of hasta via telefon. E unico cos cu lo e costa bo ta un poco di bo tempo, pero e beneficionan cu lo bo haya lo ta impagabel.

^ par. 39 Pa mas informacion, wak capitulo 9, “Nos Ta Bibando den ‘e Ultimo Dianan’?”, di e buki Kico Bijbel Ta Siña Realmente? publica pa Testigonan di Jehova.