Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  November 2015

Abo Ta “Stima Bo Prohimo Mescos cu Bo Mes”?

Abo Ta “Stima Bo Prohimo Mescos cu Bo Mes”?

“Stima bo prohimo mescos cu bo mes.”—MAT. 22:39.

CANTICA: 73, 36

1, 2. Con Bijbel ta enfatisa e importancia di amor?

AMOR ta e cualidad di mas importante di Jehova Dios. (1 Juan 4:16) Hesus, kende tabata Dios su prome creacion, a biba miles di miyones di aña cu ne den cielo, y el a mira cu Jehova ta un Dios amoroso. (Col. 1:15) Durante henter su bida, hasta ora e tabata riba Tera, Hesus a mustra cu e ta compronde con amoroso Jehova Dios ta, y e ta imita e amor ey. Pues, nos por ta sigur cu Jehova y Hesus semper lo goberna cu amor.

2 Na un ocasion, ora un homber a puntra Hesus cua ta e mandamento di mas grandi di Ley, el a contest’e: “‘Stima Jehova bo Dios cu henter bo curason, cu henter bo alma y cu henter bo mente.’ Esaki ta e mandamento di mas grandi y esun di prome. E di dos, igual cu ne, ta esaki: ‘Stima bo prohimo mescos cu bo mes.’”—Mat. 22:37-39.

3. Ken ta nos “prohimo”?

3 Tuma nota cu Hesus a menciona amor pa prohimo net despues di amor pa Jehova. Esaki ta mustra con importante ta pa semper mustra amor den nos relacion cu otro hende.  Pero ken ta nos “prohimo”? Si nos ta casa, nos prohimo mas pega ta nos esposo of esposa. Nos rumannan den congregacion tambe ta nos prohimo. Otronan cu nos ta considera como nos prohimo ta esnan cu nos ta topa den sirbishi. Con nos por mustra amor pa prohimo?

STIMA BO CASA

4. Con nos por tin un matrimonio feliz a pesar di imperfeccion?

4 Jehova a institui e prome matrimonio ora el a crea Adam cu Eva y uni nan. Tabata su proposito pa nan ta feliz, pa nan union dura pa semper y pa nan yena e Tera cu nan descendientenan. (Gen. 1:27, 28) Sinembargo, rebelion contra Jehova su soberania a daña e prome matrimonio y a trece pica y morto pa henter humanidad. (Rom. 5:12) A pesar di esey, nos si por tin un matrimonio feliz. E Palabra di Dios ta mustra con nos por logra esey. Bijbel tin e mihor conseho tocante e tema aki pasobra e ta bin di Jehova, esun cu a origina matrimonio.—Lesa 2 Timoteo 3:16, 17.

5. Con importante amor ta den un matrimonio?

5 Kico ta necesario pa tin un bon relacion cu otro hende? Segun Bijbel, nos mester di amor, esta, un sintimento di apego of afecto profundo pa un otro persona. Esaki siguramente ta e caso den un matrimonio. Papiando cu e congregacion, apostel Pablo a bisa lo siguiente: “Amor tin pasenshi y ta bondadoso. Amor no ta jaloers, e no ta broma, e no ta halsa su mes, e no ta comport’e indecentemente, e no ta busca su mes interes, e no ta rabia lihe. E no ta keda corda e malo cu hende a hacie. E no ta alegra cu inhusticia, ma ta alegra cu loke ta berdad. E ta wanta tur cos, kere tur cos, spera tur cos, soporta tur cos. Amor no ta caba nunca.” (1 Cor. 13:4-8) Si bo medita riba e palabranan inspira aki y aplica nan, bo matrimonio lo ta mas feliz.

Bijbel ta mustra con nos por tin un matrimonio feliz (Wak paragraf 6, 7)

6, 7. (a) Kico 1 Corintionan 11:3 ta bisa tocante autoridad den famia? (b) Con un esposo cristian mester trata su esposa?

6 Jehova a dicidi ken mester ta e cabes di famia. Pablo a splica: “Mi kier pa  boso sa cu cabes di tur homber ta Cristo; cabes di muher ta homber; anto cabes di Cristo ta Dios.” (1 Cor. 11:3) Pero Jehova kier pa e esposo eherce su autoridad na un manera amoroso y nunca na un manera cruel. Por ehempel, Jehova ta Hesus su Cabes, pero semper el a trat’e cu bondad y consideracion. Como resultado, Hesus a respeta e autoridad di su Tata, y el a bisa: “Mi ta stima e Tata.” (Juan 14:31) Hesus lo no a sinti asina si Jehova a trat’e na un manera cruel.

7 Aunke e esposo ta cabes di su esposa, Bijbel ta bisa pa e “duna [su esposa] honor.” (1 Ped. 3:7) Con un esposo por haci esaki? Wel, e por tene consideracion cu e necesidad- y preferencianan di su esposa. Bijbel ta bisa: “Esposonan, sigui stima boso esposa, mescos cu Cristo tambe a stima e congregacion y a entrega su bida p’e.” (Efe. 5:25) Hesus a hasta duna su bida pa su siguidornan. Ora un esposo ta un cabes amoroso mescos cu Hesus, lo ta mas facil pa su esposa stim’e, respet’e y ta sumiso na dje.—Lesa Tito 2:3-5.

STIMA BO RUMANNAN

8. Con nos mester trata nos rumannan?

8 Rond mundo, tin miyones di hende cu ta adora Jehova y duna testimonio di su nomber y proposito. Con nos mester trata nan? Bijbel ta contesta: “Laga nos haci loke ta bon pa cu tur hende, pero specialmente pa cu nos rumannan den fe.” (Gal. 6:10; lesa Romanonan 12:10.) Apostel Pedro a skirbi: “Awor cu boso a purifica boso alma door di obedece e berdad, loke a resulta den amor sin hipocresia pa e rumannan, stima otro intensamente di curason.” Despues el a sigui bisa: “Riba tur cos, stima otro intensamente.”—1 Ped. 1:22; 4:8.

9, 10. Dicon tin union entre sirbidornan di Dios?

9 Nos organisacion mundial ta unico. Dicon? Pasobra nos tin amor profundo y berdadero pa nos rumannan. Y como cu nos ta stima Jehova y obedece su leynan, e ta sostene nos cu e forsa mas poderoso di universo, esta, su spirito santo. Esey ta yuda nos pa ta uni y disfruta di un hermandad internacional.—Lesa 1 Juan 4:20, 21.

10 Pablo a enfatisa e importancia di tin amor pa nos rumannan. El a skirbi: “Bisti tierno compasion, bondad, humildad, suavidad y pasenshi. Sigui soporta otro y pordona otro libremente, hasta si un di boso tin motibo pa keha un otro. Mescos cu Jehova a pordona boso libremente, boso tambe mester haci mescos. Pero, ademas di tur e cosnan aki, bisti amor, pasobra e ta e laso perfecto di union.” (Col. 3:12-14) Esta agradecido nos ta cu amor, “e laso perfecto di union”, ta reina entre nos sin importa di unda nos ta bin!

11. Kico ta identifica Jehova su organisacion?

11 E amor berdadero y union cu tin entre sirbidornan di Jehova ta mustra cu nan ta practica e religion berdadero, pasobra Hesus a bisa: “Na esaki tur hende lo sa cu boso ta mi discipelnan, esta, si boso ta stima otro.” (Juan 13:34, 35) Y apostel Juan a bisa: “Na esaki ta bisto ken ta e yiunan di Dios y ken ta e yiunan di Diabel: ken cu no ta practica husticia  no ta bin di Dios; esun cu no ta stima su ruman tampoco. Pasobra esaki ta e mensahe cu boso a tende na cuminsamento: nos mester stima otro.” (1 Juan 3:10, 11) E amor y union cu tin entre e testigonan di Jehova ta un prueba convencente cu nan ta berdadero discipelnan di Cristo y cu Dios ta uzando nan pa predica e bon noticia di Reino rond mundo.—Mat. 24:14.

REUNIENDO “UN MULTITUD GRANDI”

12, 13. Kico e “multitud grandi” ta haciendo awor, y kico nan lo experencia den futuro cercano?

12 Mayoria di Jehova su sirbidornan ta forma parti di “un multitud grandi ... for di tur nacion, tribu, pueblo y idioma.” Nan ta “para dilanti di e trono [di Dios] y dilanti di e Lamchi [Hesucristo].” Ken nan ta? “Nan ta esnan cu a sobrevivi e tribulacion grandi, y nan a laba nan pañanan largo y a haci nan blanco den sanger di e Lamchi”, pasobra nan a pone fe den e sacrificio di rescate di Hesus. Esnan cu ta pertenece na e “multitud grandi” ta stima Jehova y su Yiu y “ta rindi sirbishi sagrado na [Dios] di dia y anochi.”—Rev. 7:9, 14, 15.

13 Pronto Dios lo destrui e mundo malbado aki den e “gran tribulacion.” (Mat. 24:21; lesa Jeremias 25:32, 33.) Pero Jehova ta stima su sirbidornan, pesey e lo proteha nan como grupo y yuda nan drenta e mundo nobo. Manera Dios a priminti casi 2.000 aña pasa, “lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.” Abo ta anhela pa biba den Paradijs ora cu “e cosnan cu tabata pasa antes no t’ey mas”?—Rev. 21:4.

14. Cuanto hende ta forma parti di e multitud grandi awe?

14 Ora e ultimo dianan a cuminsa na aña 1914, tabatin mas o menos 5.000 sirbidor di Jehova rond mundo. Motiva pa amor pa prohimo y cu e sosten di Dios su spirito santo, e grupo chikito di rumannan ungi a persevera den e trabou di predica. Cu ki resultado? Awe, Dios ta reuniendo un multitud grandi cu tin speransa di biba pa semper riba Tera. Awor nos ta mas cu 8.000.000 Testigo cu ta reuni den mas cu 115.400 congregacion rond mundo, y e cantidad ta sigui crece. Por ehempel, mas cu 275.500 persona a batisa como testigo di Jehova durante e aña di sirbishi di 2014, esey ta un averahe di mas o menos 5.300 hende tur siman.

15. Con e trabou di predica a progresa?

15 Ta remarcabel pa mira cuanto hende a scucha e bon noticia. Nos publicacionnan ta disponibel awe den mas cu 700 idioma. E Toren di Vigilancia ta e revista mas distribui na mundo. Nos ta imprimi mas cu 52.000.000 copia di e revista aki tur luna, y e ta disponibel den 247 idioma. Ademas, nos a imprimi mas cu 200.000.000 copia di e buki di estudio titula Kico Bijbel Ta Siña Realmente? den mas cu 250 idioma.

16. Pakico e organisacion di Jehova ta sigui crece?

16 E organisacion ta sigui crece pasobra nos tin fe den Dios y nos ta acepta Bijbel como su palabra inspira. (1 Tes. 2:13) Nos ta sigui disfruta  di Jehova su bendicion a pesar di odio y oposicion di Satanas, kende ta “e dios di e mundo aki.”—2 Cor. 4:4.

SEMPER MUSTRA AMOR NA OTRONAN

17, 18. Con sirbidornan di Jehova mester trata hende cu no ta adora e Dios berdadero?

17 Con sirbidornan di Jehova mester trata hende cu no ta adora e Dios berdadero? Den nos trabou di predica nos ta haya hende cu ta scucha nos y otronan cu ta trata nos malo. Sin importa con hende ta reacciona na nos mensahe, nos mester sigui e conseho cu Bijbel ta duna. Bijbel ta bisa: “Laga boso palabranan semper ta cu gracia, sasona cu salo, pa boso por sa con boso mester contesta cada persona.” (Col. 4:6) Ora nos ta defende nos fe, nos kier haci esey “na un manera suave y cu respet profundo.”—1 Ped. 3:15.

18 Hasta ora hende rabia y rechasa nos mensahe, nos ta mustra amor pa prohimo y imita e ehempel di Hesus: “Ora nan tabata insult’e, e no a insulta bek. Ora e tabata sufri, e no a menasa.” En bes di esey, el a confia den Jehova. (1 Ped. 2:23) Sea cu nos ta cu nos rumannan of cu otro hende, nos ta mustra humildad y aplica e siguiente conseho: “No paga malo cu malo of insulto cu insulto. Pasobra Dios a scoge boso pa bendiciona otro hende.”—1 Ped. 3:8, 9.

19. Con nos mester trata nos enemigonan?

19 Humildad ta yuda nos obedece un principio importante cu Hesus a duna. Den su Sermon Riba Sero el a bisa: “Boso a tende den pasado: ‘Stima bo prohimo y odia bo enemigo.’ Ma ami ta bisa boso: Sigui stima boso enemigonan y haci oracion pa esnan cu ta persigui boso, pa boso por demostra cu boso ta yiu di boso Tata cu ta den cielo, ya cu e ta laga su solo sali riba mal hende y bon hende y ta laga awa cay riba hende husto y inhusto.” (Mat. 5:43-45) Si, como sirbidornan di Dios, nos mester siña “stima [nos] enemigonan”, sin importa con nan ta trata nos.

20. Con nos sa cu amor pa Dios y pa prohimo lo reina riba henter e Tera? (Wak e prome plachi.)

20 Den tur area di bida, e pueblo di Jehova mester mustra pa medio di nan actitud y nan accionnan cu nan ta stima Jehova y nan prohimo. Por ehempel, hasta si hende opone nos mensahe, nos ta mustra amor pa prohimo door di yuda nan ora nan ta den necesidad. Apostel Pablo a skirbi: “No debe ningun hende nada; unico debe cu boso tin ta di stima otro, pasobra esun cu ta stima su prohimo a cumpli cu ley. Pasobra e mandamentonan—‘no comete adulterio’, ‘no mata’, ‘no horta’, ‘no cudisha’, y cualkier otro mandamento cu tin—ta keda resumi den e palabra aki: ‘Stima bo prohimo mescos cu bo mes.’ Un hende cu tin amor no ta haci malo cu su prohimo; pesey amor ta cumplimento di ley.” (Rom. 13:8-10) Como testigonan di Jehova, nos ta mustra amor berdadero den e mundo malbado, dividi y violento aki cu ta bou di control di Satanas. (1 Juan 5:19) Despues cu Jehova destrui Satanas, e demoñonan y e hendenan malbado, amor lo reina riba henter e Tera. Lo ta un gran bendicion ora tur hende riba Tera ta stima Jehova y nan prohimo.