Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  November 2015

Entrena Bo Yiu Chikito pa Sirbi Jehova

Entrena Bo Yiu Chikito pa Sirbi Jehova

“Laga e homber di Dios ... siña nos kico nos mester haci pa e mucha cu mester nace.”—HUES. 13:8.

CANTICA: 88, 120

1. Con Manoa a reacciona ora el a scucha cu e lo bira tata?

MANOA no por a kere loke e tabata scuchando: su esposa tabata na estado. Con esey por tabata posibel si su casa no por a haya yiu? Un angel a aparece y a bisa e esposa di Manoa cu e lo bira mama. Sin duda, Manoa a bira hopi contento, pero e tabata sa cu como mayor e lo tin un responsabilidad grandi. Con nan lo por siña nan yiu sirbi Jehova den un nacion cu tin asina tanto maldad? “Manoa a suplica SEÑOR y a bisa: ‘O SEÑOR, pa fabor, laga e homber di Dios cu bo a manda bin cerca nos atrobe, pa e siña nos kico nos mester haci pa e mucha cu mester nace.’”—Hues. 13:1-8.

2. Kico bo tin cu siña bo yiu, y con bo por haci esey? (Wak e cuadro “ Bo Studiante di Mas Importante.”)

2 Si abo ta un mayor, bo por compronde pakico Manoa a roga Jehova pa yudansa. Abo tambe tin e responsabilidad grandi di yuda bo yiu siña conoce y stima Jehova. (Prov. 1:8) Pa logra esey, mayornan cristian mester tin un bon programa di Adoracion Como Famia pa yuda nan yiunan progresa. Ta claro cu bo tin cu haci mas cu djis studia cu bo yiunan un  biaha pa siman pa e berdad keda graba den nan mente. (Lesa Deuteronomio 6:6-9.) Kico lo yuda bo inculca e berdad den bo yiunan? E articulo aki y esun siguiente lo mustra con mayornan por sigui Hesus su ehempel. Aunke Hesus no tabata un tata, mayornan por beneficia di e manera cu el a siña y entrena su discipelnan cu amor, humildad y discernimento. Laga nos considera cada un di e cualidadnan aki.

STIMA BO YIU

3. Con Hesus a mustra su discipelnan cu e ta stima nan?

3 Hopi biaha Hesus tabata bisa su discipelnan cu e ta stima nan. (Lesa Juan 15:9.) Y e tabata pasa hopi tempo cu nan. (Mar. 6:31, 32; Juan 2:2; 21:12, 13) Hesus no tabata solamente nan maestro; e tabata nan amigo tambe. Pesey, su discipelnan no tabatin niun duda cu Hesus tabata stima nan. Kico bo por siña for di Hesus?

4. Con bo por mustra bo yiunan cu bo ta stima nan? (Wak e prome plachi.)

4 Bisa bo yiunan cu bo ta stima nan, y mustra nan regularmente con importante nan ta pa bo. (Prov. 4:3; Tito 2:4) Samuel, cu ta biba na Australia, a bisa: “Tempo mi tabata chikito, mi tata tabata lesa Mi Buki di Relato Biblico tur anochi pa mi. E tabata contesta mi preguntanan, brasa mi y duna mi un sunchi prome cu mi bay drumi. Mi a keda hopi sorprendi ora mi a haya sa cu mi tata a lanta den un famia cu no tabata custumbra di duna brasa y sunchi. Pero toch e tabata haci esfuerso pa mustra mi cu e ta stima mi. Como resultado, mi tabatin un bon relacion cu ne, y mi tabata sinti mi feliz y safe.” Bo tambe por yuda bo yiunan sinti asina si bo bisa nan regularmente: “Mi  stima bo.” Mustra cariño na bo yiunan. Papia cu nan, come cu nan y hunga cu nan.

5, 6. (a) Kico Hesus ta haci pa esnan cu e ta stima? (b) Con nos mester disciplina nos yiunan?

5 Hesus a bisa: “Mi ta reprende y disciplina tur esnan cu mi tin cariño p’e.” * (Rev. 3:19) Por ehempel, e discipelnan di Hesus constantemente tabata discuti tocante ken tabata esun di mas grandi entre nan. Hesus no a ignora e problema aki. Al contrario, el a sigui duna nan conseho. Semper e tabata amabel, y e tabata busca e momento y luga apropia pa reprende nan.—Mar. 9:33-37.

6 Mustra bo yiunan cu bo ta stima nan door di disciplina nan. Tin biaha bo mester djis splica nan pakico loke nan a haci ta bon of malo. Pero, kico si bo yiu no a haci caso di loke bo a bis’e? (Prov. 22:15) Ora esey sosode, imita Hesus. Sigui duna bo yiu e guia, entrenamento y coreccion cu e tin mester na un manera suave y amoroso. Y semper purba di scoge e momento y luga apropia pa haci esaki. Un ruman muher cu yama Elaine, cu ta biba na Sur Africa, a bisa: “Ora mi mayornan tabata duna mi disciplina, semper nan tabata consistente. Si nan a bisa mi cu lo tin consecuencia si mi sigui comporta mi mes malo, semper nan tabata mantene nan mes na nan palabra. Pero nunca nan a disciplina mi cu rabia of keda sin splica mi pakico nan a disciplina mi. Como resultado, mi tabata sinti mi safe. Mi tabata compronde e limitenan cu nan a pone pa mi y loke nan tabata spera di mi.”

MUSTRA HUMILDAD

7, 8. (a) Con Hesus a mustra humildad den su oracionnan? (b) Con bo oracionnan por siña bo yiunan depende riba Dios?

7 Poco prome cu nan a aresta y mata Hesus, el a roga su Tata: “Abba, Tata, tur cos ta posibel pa bo; kita e copa aki for di mi. Sinembargo, no loke ami kier, sino loke abo kier.” * (Mar. 14:36) Imagina con e discipelnan a sinti ora cu nan a scucha of a haya sa tocante e oracion ey. Nan a realisa cu hasta Hesus como un homber perfecto a depende riba Jehova pa yudansa. Pues nan a siña cu nan tambe mester ta humilde y depende riba Jehova.

8 Bo yiunan por siña hopi di bo oracionnan. Ta berdad cu e motibo principal pa haci oracion no ta pa siña bo yiunan. Sinembargo, si nan ta scucha bo haci oracion na un manera humilde, nan lo siña depende riba Jehova. Ana, cu ta biba na Brazil, a bisa: “Ora mi mayornan tabatin problema, por ehempel tempo cu mi welonan tabata malo, nan tabata pidi Jehova pa duna nan forsa pa enfrenta e situacion y e sabiduria pa tuma bon decision. Aunke nan tabata bou di hopi presion, semper nan a laga tur cos den Jehova su man. Como resultado, mi a siña depende riba Jehova.” Ora bo haci oracion cu bo yiunan, no resa solamente pa nan. Pidi Jehova pa yuda abo tambe. Por ehempel, bo por pidie curashi pa predica of pa papia cu bo doño di trabou pa bo haya dia liber pa asisti na congreso. Si abo ta depende humildemente riba Dios, bo yiunan lo haci mescos.

9. (a) Con Hesus a siña su discipelnan pa ta humilde? (b) Kico bo yiunan lo siña si nan mira cu bo tin un spirito di sacrificio propio?

 9 Hesus a bisa su discipelnan pa ta humilde, y e mes a pone un bon ehempel den esey. (Lesa Lucas 22:27.) El a siña su apostelnan pa mustra un spirito di sacrificio propio den nan sirbishi na Jehova y den nan trato cu otro rumannan. Pa medio di bo ehempel di humildad y sacrificio propio, bo por siña bo yiunan e mesun les. Un mama di dos yiu, cu yama Debbie, a bisa: “Mi esposo ta un anciano, pero nunca mi tabata sinti jaloers cu e mester a dedica tempo na otronan. Mi tabata sa cu semper nos por a depende riba dje ora nos tabatin mester di su atencion.” (1 Tim. 3:4, 5) Su esposo, cu yama Pranas, a conta con nan ehempel como mayor a yuda nan yiunan. El a bisa: “Ora nos yiunan a bira un poco mas grandi, nan tabata gusta participa den actividadnan di congregacion y yuda na asambleanan. Nan a haci progreso, haya amigonan y nan tabata feliz.” Awor, henter e famia ta sirbi Jehova den e trabou di tempo completo. Si bo ta humilde y bo ta mustra un spirito di sacrificio propio, bo yiunan lo siña haci mescos.

MUSTRA DISCERNIMENTO Y PURBA DI COMPRONDE BO YIU

10. Ora un multitud a bin cerca Hesus, con el a mustra discernimento?

10 Hesus a mustra discernimento. E no tabata concentra solamente riba loke hende tabata haci sino tambe e motibo pakico nan tabata haci algo. E por a lesa curason. Por ehempel, na un ocasion, tabata parce cu algun hende na Galilea kier a sigui Hesus. (Juan 6:22-24) Pero e por a discerni cu e hendenan tabata mas interesa den cuminda fisico cu den loke e tabata siña. (Juan 2:25) Hesus a mira kico nan tabata haci fout, el a corigi nan cu pasenshi y a splica kico nan mester a haci pa cambia.—Lesa Juan 6:25-27.

Yuda bo yiu disfruta di e trabou di predica (Wak paragraf 11)

11. (a) Duna un ehempel con discernimento por yuda bo mira si bo yiu ta gusta sirbishi of no. (b) Con bo por yuda bo yiu disfruta di sirbishi?

11 Aunke bo no por lesa curason, abo  tambe por mustra discernimento y haya sa con bo yiu ta sinti tocante sirbishi. Hopi mayor ta tuma un pauze durante sirbishi pa asina nan yiunan por descansa y come of bebe algo. Bo por puntra bo mes: Mi yiu ta gusta sirbishi of solamente e pauze cu nos sa tuma? Si bo ripara cu bo yiu no ta gusta sirbishi mucho, purba di hacie mas interesante p’e. Dun’e cosnan chikito pa haci durante sirbishi pa asina e por sinti su mes util.

12. (a) Ki spiertamento Hesus a duna su discipelnan? (b) Dicon e discipelnan di Hesus tabatin mester di e spiertamento aki?

12 Den ki manera mas Hesus a mustra discernimento? Wel, e tabata sa kico por pone un persona comete pica. Por ehempel, su discipelnan tabata sa cu inmoralidad sexual ta malo. Pero Hesus a mustra nan kico lo por pone un persona comete inmoralidad. El a bisa: “Ken cu sigui wak un muher cu pasion, ya caba a comete adulterio cu ne den su curason. Awor bon, si bo wowo drechi ta pone bo trompica, sac’e tira afo.” (Mat. 5:27-29) E palabranan ey tabata net loke e cristiannan, cu tabata biba bou di e Imperio Romano, tabatin mester. Segun un historiador, den e teatronan Romano tabatin obranan yen di palabra malo y escenanan inmoral. El a bisa: “E escenanan mas erotico tabata haya mas aplauso.” Pues, tabata hopi amoroso di Hesus su parti pa spierta su discipelnan di cosnan cu por a stroba nan di keda moralmente limpi.

13, 14. Con bo por proteha bo yiunan di entretenimento inmoral?

13 Discernimento por yuda bo proteha bo yiunan di cosnan cu lo por causa nan daño spiritual. Awe ta mas facil cu nunca pa muchanan bin den contacto cu pornografia of otro entretenimento inmoral. Ta claro cu mayornan cristian ta siña nan yiunan cu entretenimento inmoral ta malo. Sinembargo, discernimento por yuda bo compronde kico por lanta e curiosidad di bo yiu pa wak pornografia. Puntra bo mes: Kico ta loke por pone mi yiu wak pornografia? E sa dicon pornografia ta peligroso? Mi yiu tin e confianza pa bin cerca mi si e haya su mes cu e tentacion pa wak pornografia? Hasta si bo yiunan ta hopi chikito, bo por bisa nan: “Si bo topa cu un website inmoral y haya gana di wak e, bin cerca mi y bisa mi. Bo no mester sinti berguensa, mi kier yuda bo.”

14 Discernimento lo yuda bo scoge bon entretenimento. Nos mester duna nos yiunan un bon ehempel den esey. Pranas, cu nos a menciona mas prome, a bisa: “Bo por bisa nan hopi cos, pero bo yiunan lo imita loke abo ta haci.” Si semper bo ta scoge musica, pelicula of buki cu ta moralmente limpi, bo yiunan lo haci mescos.—Rom. 2:21-24.

E DIOS BERDADERO LO YUDA BO

15, 16. (a) Dicon bo por ta sigur cu Dios lo yuda bo entrena bo yiunan? (b) Kico nos lo considera den e siguiente articulo?

15 Kico a sosode ora cu Manoa a pidi Jehova pa yud’e cria su yiu? “Dios a scucha bos di Manoa.” (Hues. 13:9) Mayornan, Jehova lo scucha boso tambe. E lo contesta boso oracionnan y yuda boso entrena boso yiunan. Boso por logra esey cu amor, humildad y discernimento.

16 Mescos cu Jehova ta yuda mayornan entrena nan yiunan chikito cu exito, asina e lo yuda mayornan entrena nan yiunan cu ta teenager. E siguiente articulo lo mustra con bo por imita Hesus su amor, humildad y discernimento ora di entrena bo yiu cu ta teenager pa sirbi Jehova.

^ par. 5 Bijbel ta siña cu disciplina ta inclui guia, entrenamento, coreccion y tin biaha hasta castigo. Mayornan mester duna disciplina na un manera amoroso y nunca cu rabia.

^ par. 7 Den tempo di Hesus, muchanan tabata yama nan tata Abba. E palabra aki tabata un muestra di amor y respet.—The International Standard Bible Encyclopedia.