Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  October 2015

Sirbi Jehova sin Distraccion

Sirbi Jehova sin Distraccion

“Maria ... a keda scucha [Hesus] su palabranan. Marta ... tabata ocupa cu hopi cos di haci.” —LUC. 10:39, 40.

CANTICA: 94, 134

1, 2. Kico a pone cu Hesus tabata stima Marta, pero kico Marta a haci cu a mustra cu e no tabata perfecto?

KICO ta e prome cos cu ta bin na bo mente ora bo pensa riba Marta, e ruman muher di Lazaro y Maria? Bijbel ta bisa: “Hesus tabata stima Marta.” Pero ta claro cu e no tabata e unico hende muher cu Hesus tabata respeta y stima. E tabata stima su mama tambe. Ademas, e tabata considera Maria, Marta su ruman muher, como su amiga. (Juan 11:5; 19:25-27) Pero kico a pone cu Hesus tabata stima Marta?

2 Hesus tabata stima Marta no solamente pasobra e tabata balente y hospitalario, pero principalmente door di su spiritualidad. Marta tabata kere tur loke Hesus tabata siña. Y e tabata convenci cu Hesus ta e Mesias. (Juan 11:21-27) Pero e tabata imperfecto mescos cu nos. Na un ocasion, ora Hesus a bay come na Marta su cas, Marta a tribi di bisa Hesus pa e corigi un situacion cu segun e no tabata bon. Marta a bisa: “Señor, bo no ta mira cu mi ruman ta laga mi so atende tur cos? Bis’e bin yuda mi anto.” (Lesa Lucas 10: 38-42.) Kico nos por siña for di e relato aki?

MARTA TABATA DISTRAI

3, 4. (a) Den ki manera Maria “a scoge e mihor parti”? (b) Ki les Marta a siña? (Wak e prome plachi.)

3 Hesus tabata hopi agradecido pa e hospitalidad di Marta y Maria, pesey e kier a comparti algun berdad valioso cu nan. Maria a probecha di e oportunidad pa siña for di e Gran Maestro. El “a cay sinta na pia di Señor y a keda scucha su palabranan.” Marta por a haci mescos. Sin duda Hesus lo a elogia Marta si el a scuch’e cu tur su atencion.

4 Sinembargo, Marta tabata demasiado ocupa preparando un cuminda special y haciendo otro trabounan pa laga Hesus sinti bon durante su bishita. Pero tur e trabounan ey a pon’e haya stress, y el a rabia cu Maria. Hesus a ripara cu Marta tabata haci demasiado cos, pesey el a bis’e cu yen di cariño: “Marta, Marta, bo ta ansha y preocupa cu hopi cos.” El a splica Marta cu un plato mes lo tabata mas cu suficiente. Despues Hesus a defende Maria bisando: “Pa loke ta Maria, el a scoge e mihor parti, y lo no kita esey for di dje.” Casi sigur Maria lo a lubida kico el a come na e ocasion special ey, pero nunca lo e lubida e animacion y e cuminda spiritual cu el a haya door di scucha Hesus cu tur su atencion. Mas cu 60 aña despues, apostel Juan a skirbi: “Hesus tabata stima Marta y su ruman muher.” (Juan 11:5) E palabranan inspira ey ta mustra cu Marta a acepta e coreccion cu Hesus a dun’e y a haci esfuerso pa sigui sirbi Jehova fielmente pa resto di su bida.

5. (a) Pakico tin mas distraccion awe cu den tempo biblico? (b) Ki pregunta nos mester haci nos mes?

5 Compara cu tempo biblico, tin hopi mas cos cu por distrai nos awe. Mas cu 60 aña pasa a bisa un grupo di studiante na Merca e siguiente palabranan: “Nunca prome den historia hendenan por a gaba di tin medionan di comunicacion asina bon, habilidad pa imprimi na un velocidad halto, revistanan na color, radio, pelicula, television ... Constantemente nan ta bombardia nos cu cosnan nobo pa distrai nos ... Poco tempo pasa, hende tabata pensa cu nos tabata biba den e Era di Rasonamento. Pero mas y mas ta parce cu nos ta bibando den e Era di Distraccion.” E Watchtower di 15 di september 1958 a bisa: “Mas cerca nos yega di e fin, mas distraccion nos lo tin.” Y ta esey mes a sosode. Pues ta importante pa haci nos mes e siguiente pregunta: Con nos por imita Maria y sirbi Jehova sin distraccion?

HACI UZO DI E MUNDO, PERO NO PLENAMENTE

6. Con e organisacion di Jehova a haci bon uzo di tecnologia?

6 E organisacion di Dios semper a haci bon uzo di tecnologia pa promove adoracion berdadero. Por ehempel, pensa riba e “Foto-Drama di Creacion”, un combinacion di pelicula, zonido sincronisa y slides na color. Prome y durante e Prome Guera Mundial, miyones di hende rond mundo a haya consuelo ora nan a mira e presentacion aki cu ta conclui cu un descripcion di e Reinado di Mil Aña di Cristo cu lo trece paz. Mas despues, miyones di hende por a scucha e mensahe di Reino via radio.  Awe, tecnologia di computer y internet ta haci posibel pa e bon noticia ta disponibel pa hende na tur parti di Tera, hasta na luganan isola.

Nos no mester laga cosnan menos importante stroba nos actividadnan spiritual (Wak paragraf 7)

7. (a) Dicon ta peligroso pa haci uzo di e mundo plenamente? (b) Di kico nos mester tene cuidou? (Wak e nota.)

7 Bijbel ta adverti nos di e peliger di haci uzo di e mundo plenamente. (Lesa 1 Corintionan 7:29-31.) Ta facil pa un di nos perde hopi tempo riba cosnan cu kisas riba nan mes no ta malo. Pensa por ehempel riba hobby, lesamento di buki, wak television, keiro, cana wak cos pa cumpra y buscando lo ultimo di aparatonan electronico of cosnan di luho. Otro cosnan cu por pone nos perde tempo ta rednan social, manda mensahe via celular of e-mail y ora cada rato nos ta check e ultimo noticianan y resultadonan di wega. Nos por hasta bira bicia na e cosnan aki. * (Ecl. 3:1, 6) Si nos no controla e cantidad di tempo cu nos ta dedica na e tipo di cosnan aki, nos por cuminsa neglisha e actividad di mas importante: nos adoracion na Jehova.—Lesa Efesionan 5:15-17.

8. Dicon ta asina importante pa nos sigui e conseho pa no stima e cosnan cu tin den mundo?

8 Satanas ta uza loke tin den e mundo aki pa distrai nos. Esey tabata e caso den e prome siglo y awe mas ainda. (2 Tim. 4:10) Pues, nos mester sigui e conseho: “No stima ... e cosnan cu tin den mundo.” Si nos purba di aplica e conseho aki den nos bida, nos lo no ta distrai y nos “amor pa e Tata” lo sigui crece. Asina, lo ta mas facil pa nos haci e boluntad di Dios y keda cu su aprobacion pa semper.—1 Juan 2:15-17.

KEDA ENFOCA RIBA E COSNAN MAS IMPORTANTE

9. Riba kico Hesus a bisa su discipelnan pa nan enfoca, y ki ehempel el a duna nos?

9 E conseho amoroso cu Hesus a duna Marta ta completamente na harmonia cu loke el a siña y e ehempel cu el a duna. El a anima su discipelnan pa keda “enfoca” riba e Reino. (Lesa Mateo 6:22, 33; wak nota.) Hesus mes no tabatin mucho cos material; e no tabatin un cas ni tereno.—Luc. 9:58; 19:33-35.

10. Ki ehempel Hesus a pone na cuminsamento di su sirbishi?

10 Tabatin hopi cos cu por a distrai  Hesus durante su sirbishi, pero nunca el a laga e cosnan ey strob’e. Por ehempel, na cuminsamento di su sirbishi, el a siña e multitudnan y haci hopi milager na Capernaum. Hopi hende a rog’e pa e keda. Pero con Hesus a reacciona? El a bisa: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Luc. 4:42-44) Y esey ta exactamente loke el a haci. Den henter Palestina el a predica y siña hende. Aunke e tabata perfecto, e tambe tabatin necesidad mescos cu nos y tin ora e tabata sinti hopi cansa door cu e tabata traha duro den sirbishi.—Luc. 8:23; Juan 4:6.

11. Kico Hesus a bisa un homber cu tabatin un problema cu su ruman, y ki spiertamento Hesus a duna?

11 Na un otro ocasion, ora Hesus tabata siña su discipelnan con pa enfrenta oposicion, un homber a interumpi nan bisando: “Maestro, bisa mi ruman homber pa e parti e herencia cu mi tata a laga pa nos.” Pero Hesus no a hinca su mes den e discusion ey. El a contest’e: “Homber, ta ken a nombra mi como hues of como esun cu tin cu parti boso herencia?” Despues Hesus a sigui siña su discipelnan tocante e peliger di laga cosnan material distrai nan.—Luc. 12:13-15.

12, 13. (a) Kico a lanta interes di algun proselito poco prome cu Hesus su morto? (b) Con Hesus a trata cu e situacion ey cu por a distra’e?

12 Durante e ultimo siman di su bida, Hesus tabata bou di hopi presion. (Mat. 26:38; Juan 12:27) E tabata sa cu e lo mester a enfrenta un huicio humiliante y sufri un morto cruel. Riba dje e tabatin hopi trabou di haci ainda. Por ehempel, wak kico a pasa riba diadomingo, 9 di nisan di aña 33. Manera Bijbel a profetisa, Hesus a drenta Jerusalem riba un burico, y e multitud tabata grita: “Esun cu ta bin como Rey den nomber di Jehova.” (Luc. 19:38) E siguiente dia, Hesus a drenta e tempel y cu curashi el a core cu e comerciantenan cu tabata uza e cas di Dios pa gana placa riba lomba di e Hudiunan.—Luc. 19:45, 46.

13 Algun proselito Griego cu a bin Jerusalem pa celebra Pasco Hudiu a keda hopi impresiona cu loke Hesus a haci. Pesey nan a puntra apostel Felipe pa haci areglo pa nan por a papia cu Hesus. Sinembargo, Hesus no a laga nan distra’e for di cosnan mas importante. E no a purba di busca apoyo cerca hende pa nan por a defend’e for di su enemigonan. Pues, despues cu el a splica Andres y Felipe cu pronto e lo muri, el a bisa nan: “Esun cu ta stima su alma ta destruye, ma esun cu ta odia su alma den e mundo aki, lo conserv’e pa bida eterno.” En bes di satisface e curiosidad di e Griegonan ey, el a anima su discipelnan pa sigui su ehempel di sacrificio propio y a priminti nan: “Si un hende kier sirbi mi, e Tata lo honr’e.” Sin duda, Felipe a hiba e mensahe positivo aki pa e proselitonan.—Juan 12:20-26.

14. Kico ta mustra cu Hesus tabata balansa aunke e tabata pone e trabou di predica prome den su bida?

14 Aunke Hesus no a laga nada distra’e for di e trabou di predica, e no tabata pensa riba trabou so. Bijbel ta bisa cu el a asisti na un fiesta di casamento y el a hasta contribui na e goso di e ocasion door di cambia awa den biña. (Juan 2:2, 6-10) Ademas, el a acepta invitacionnan pa bay come na cas di su bon amigonan y otronan cu tabata interesa den su mensahe. (Luc. 5:29; Juan 12:2) Y mas importante ainda, Hesus a  tuma tempo pa haci oracion, medita y descansa.—Mat. 14:23; Mar. 1:35; 6:31, 32.

“KITA TUR PESO”

15. (a) Ki conseho apostel Pablo a duna? (b) Con apostel Pablo a pone un bon ehempel?

15 Apostel Pablo a compara bida di un cristian cu un careda di distancia largo. Pesey el a skirbi: “Laga nos tambe kita tur peso.” (Lesa Hebreonan 12:1.) Pablo a pone un bon ehempel den esey. Aunke e por tabatin un bon futuro den hudaismo y e por a bira rico y famoso, el a laga tur esakinan atras pa asina e por a concentra riba “e cosnan mas importante.” El a traha hopi duro den e trabou di predica y el a biaha bay hopi caminda, incluyendo Siria, Asia Menor, Macedonia y Judea. Encuanto su speransa di bida eterno den cielo, Pablo a bisa: “Mi ta lubida e cosnan mi tras y ta rek pa gara e cosnan mi dilanti.” (Flp. 1:10; 3:8, 13, 14) Como cu Pablo tabata soltero, el a logra “sirbi Señor constantemente sin distraccion.”—1 Cor. 7:32-35.

16, 17. Sea cu bo ta soltero of casa, con bo por imita e ehempel cu Pablo a pone? Conta un experencia.

16 Algun sirbidor di Dios ta scoge pa keda soltero mescos cu Pablo pa asina nan tin menos responsabilidad di famia, y pa nan por dedica mas tempo na e trabou di predica. (Mat. 19:11, 12) Sirbidornan di Jehova cu ta soltero, hopi bes tin menos responsabilidad di famia cu esnan cu ta casa. Sea cu bo ta soltero of casa, nos tur por “kita tur peso” y sirbi Dios cu menos distraccion posibel. Esaki por nifica cu nos tin cu dedica menos tempo na habitonan cu por pone nos perde tempo. Tambe nos mester pone meta pa dedica mas tempo den nos sirbishi na Jehova.

17 Laga nos mira un ehempel di un pareha Gales cu yama Mark y Claire. Nan tur dos a cuminsa cu e trabou di pionero despues cu nan a caba scol, y nan a sigui traha como pionero despues cu nan a casa. Mark ta conta: “Nos a logra simplifica nos bida mas ainda door di bende nos cas di tres camber y kita for di nos trabou part-time pa asina nos por a bay yuda den e trabou di construccion rond mundo.” Durante e ultimo 20 añanan, nan a bay varios caminda na Africa pa yuda construi Salonnan di Reino. Na dado momento nan tabatin solamente 15 dollar, pero Jehova a percura pa nan. Claire a bisa: “E echo cu nos ta sirbi Jehova tur dia ta duna nos un gran satisfaccion. Nos a haya hopi amigonan nobo y nos no falta nada. E tiki cu nos a sacrifica no ta nada compara cu e felicidad cu ta bin di sirbi Jehova den e trabou di tempo completo.” Hopi ruman cu ta den e trabou di tempo completo tabatin experencianan similar. *

18. Ki pregunta nos mester haci nos mes?

18 Kico di abo? Kico bo por haci si bo ripara cu bo no ta apoya e Reino cu e mesun entusiasmo mas? Bo a laga cosnan menos importante distrai bo? Si ta asina, kisas bo mester analisa con ta bayendo cu bo estudio personal. E siguiente articulo lo por yuda bo beneficia mas di bo lesamento di Bijbel y estudio personal.

^ par. 17 Wak tambe e storia di bida di Hadyn y Melody Sanderson den e articulo “Sa Loke Ta Corecto, Anto Hacie” di E Toren di Vigilancia di 1 di maart 2006. Nan a dicidi di bende nan negoshi na Australia pa drenta den e trabou di tempo completo. Lesa kico a sosode ora nan placa a caba mientras cu nan tabata sirbi como misionero na India.