Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  October 2015

Abo Ta Mira Con Dios Ta Yuda Bo?

Abo Ta Mira Con Dios Ta Yuda Bo?

“E man di [Jehova] lo wordo haci conoci na su sirbidornan.”—ISA. 66:14.

CANTICA: 65, 26

1, 2. Kico algun hende ta pensa di Dios?

HOPI hende ta pensa cu Dios no ta interesa den loke nan ta haci of loke ta pasa cu nan. Por ehempel, na november 2013, despues cu e tifon Haiyan a causa hopi daño na e parti central di Filipinas, un alcalde di un di e stadnan grandi a bisa: “Dios lo mester tabata mucho ocupa pa yuda nos.”

2 Otronan ta haci comosifuera cu Dios no ta mira loke nan ta haci. (Isa. 26:10, 11; 3 Juan 11) Nan ta manera e hendenan cu apostel Pablo a describi ora el a bisa: “Nan no tabata dispuesto pa haya un conocemento exacto di Dios.” Nan “tabata yen di tur sorto di inhusticia, cos pecaminoso, golosidad [y] maldad.”—Rom. 1:28, 29.

3. (a) Ki pregunta nos por haci nos mes tocante Dios? (b) Ora Bijbel ta papia tocante e “man” di Dios, na kico esaki ta referi?

3 Kico di nos? Na contraste cu e personanan menciona akiriba, nos sa cu Jehova ta wak tur cos. Pero nos ta realmente convenci cu e ta interesa den nos y cu e kier yuda nos? Nos ta entre esnan cu Hesus a bisa cu “lo mira Dios”? (Mat. 5:8) Pa haya sa con nos por mira  Jehova, laga nos analisa algun ehempel di Bijbel cu ta mustra con algun hende por a mira Dios su man den cierto asuntonan y con otronan a nenga di reconoce esey. Nos lo siña tambe con nos fe lo yuda nos mira e man di Dios den nos bida. Corda cu ora Bijbel ta papia di e “man” di Dios e ta referi na e poder cu e ta uza pa yuda su sirbidornan y pa vence su enemigonan.—Lesa Deuteronomio 26:8.

NAN NO KIER A RECONOCE E PODER DI DIOS

4. Dicon e enemigonan di Israel a nenga di reconoce cu ta Dios tabata yuda su pueblo?

4 Na comienso di e historia di Israel, hende por a mira y tende con Dios a yuda su pueblo. Milagrosamente Jehova a libra su pueblo for di Egipto, y nan a derota un rey tras di otro. (Jos. 9:3, 9, 10) A pesar di loke casi tur e reynan di e parti west di Jordan a tende y mira, “nan a bin hunto den un acuerdo pa bringa contra Josue y contra Israel.” (Jos. 9:1, 2) Ora e reynan ey a bringa contra Israel, nan tabatin tur oportunidad pa mira e man di Dios. Por ehempel, door di e poder di Dios “solo a keda para, y luna a keda para, te ora cu e nacion a tuma venganza riba su enemigonan.” (Jos. 10:13) Pero Jehova a permiti “nan curason [bira] duro pa sali contra Israel den bataya.” (Jos. 11:20) Israel su enemigonan a sufri un derota pasobra nan no kier a reconoce cu ta Dios tabata bringa pa su pueblo.

5. Kico e Rey malbado Acab no a reconoce?

5 Siglonan despues, Rey Acab tabatin tur oportunidad pa reconoce e poder di Dios. Elias a bis’e: “Lo no tin ni serena ni awasero e añanan aki, si no ta pa medio di mi palabra.” (1 Rey. 17:1) E palabranan ey a bin di Jehova, pero Acab a nenga di reconoce esey. Despues, Acab a mira candela baha for di cielo ora Elias a pidi Dios pa kima su sacrificio. Elias a laga Acab sa cu Jehova lo caba cu e secura. El a bis’e: “Prepara bo garoshi y baha bay, pa e awasero pisa no stroba bo.” (1 Rey. 18:22-45) Maske Acab a mira tur esaki sosode, toch el a nenga di reconoce e gran poder di Dios. E dos ehempelnan aki ta siña nos un les importante: Nos mester reconoce e man di Dios den nos bida.

NAN SI A RECONOCE E PODER DI DIOS

6, 7. Kico algun hende den tempo di Josue a reconoce?

6 Contrario cu e reynan malbado ey, tabatin otronan cu a haya nan mes den e mesun situacion, pero nan si a reconoce e poder di Dios. Por ehempel, maske mayoria di e nacionnan a bringa contra Israel den tempo di Josue, e Gabaonitanan a haci paz cu Israel. Dicon? Nan a bisa: “Bo sirbidornan a bin ... pa motibo di e nomber di SEÑOR bo Dios; pasobra nos a tende di su fama y di tur loke cu el a haci.” (Jos. 9:3, 9, 10) Nan a reconoce cu ta Jehova tabata bringa pa Israel.

7 Rahab tambe a reconoce Dios su poder den su bida. Ora el a haya sa cu Jehova a salba su pueblo, el a bisa e dos spionnan Israelita: “Mi sa cu SEÑOR a duna boso e tera.” Rahab tabata sa cu Jehova por a salba e y su famia. El a mustra fe den Jehova a pesar cu e tabata sa cu esey lo a pon’e den un situacion hopi peligroso.—Jos. 2:9-13; 4:23, 24.

8. Con algun Israelita a reconoce e poder di Dios?

 8 Distinto di e Rey malbado Acab, algun Israelita a reconoce e poder di Dios ora nan a mira e candela baha for di cielo y kima e sacrificio. Nan a bisa: “Jehova ta e Dios berdadero.” (1 Rey. 18:39) Nan no tabatin ningun duda di esey.

9. Con nos por mira e poder di Jehova awe?

9 Den tur dos ehempel, tanto esun bon como esun malo, nos por a compronde kico kiermen mira of reconoce e poder di Dios. Segun cu nos ta siña conoce Jehova, nos tambe por reconoce su poder pasobra nos ta mira su cualidadnan y accionnan cu “e wowonan di [nos] curason.” (Efe. 1:18) Mescos cu e sirbidornan di Dios di pasado y di awe, nos tambe kier mira con Jehova ta yuda su pueblo. Tin prueba cu Dios ta yudando su pueblo awe?

KI PRUEBA TIN CU DIOS TA CU NOS?

10. Ki prueba nos tin cu Jehova ta yuda hende awe? (Wak e prome plachi.)

10 Nos tin hopi motibo pa kere cu Jehova ta sigui yuda hende. Bes tras bes, nos ta tende di experencianan di esnan cu a haya contesta pa oracionnan despues cu nan a pidi Dios pa yudansa. (Sal. 53:2) Mientras un ruman homber cu yama Allan tabata predica na un isla chikito na Filipinas, el a topa cu un señora cu a cuminsa yora. Allan a bisa: “E mainta ey, e señora tabata haci oracion pa un testigo di Jehova bishit’e. Ora e tabata hoben, el a studia Bijbel cu e Testigonan. Pero ora el a casa y muda pa un otro isla, el a perde contacto cu nan. E echo cu Jehova a contesta su oracion asina lihe a emocion’e.” Den menos cu un aña, el a dedica su bida na Jehova.

Bo ta mira con Jehova ta yuda su pueblo awe? (Wak paragraf 11-13)

11, 12. (a) Con Jehova ta yuda su sirbidornan? (b) Conta un experencia cu ta mustra con un ruman a haya yudansa di Dios.

11 Hopi ruman a experencia Jehova su yudansa den nan bida. Por ehempel, algun di nan mester a lucha pa stop cu bicionan manera humamento, uzo di droga of wakmento di pornografia. Hopi biaha nan a purba di stop cu e bicionan ey riba nan mes, pero nan no a logra. Sinembargo, ora nan a busca yudansa di Jehova, el a duna nan “e poder cu ta surpasa esun di hende”, y asina nan a logra vence nan debilidad.—2 Cor. 4:7; Sal. 37:23, 24.

12 Jehova a yuda hopi di su sirbidornan enfrenta desafionan personal. Por ehempel, un ruman muher cu yama Amy tabatin dificultad ora el a ser asigna pa bay yuda construi un Salon di Reino y un cas di misionero na un isla chikito den Ocean Pacifico. El a bisa: “Nos tabata keda na un hotel chikito, y tur dia nos mester a cana riba camindanan yen di awa pa nos yega na e luga di construccion.” E mester a adapta su mes na custumbernan local, y hopi bes no tabatin coriente of awa. Amy ta sigui bisa: “Pio ainda, mi a baha mi rabia riba un ruman muher cu tabata traha cu nos. Mi a sinti masha malo mes di loke mi a haci. Na hotel, den mi camber scur mi a roga Jehova pa yudansa.” Ora coriente a bin bek, Amy a lesa un articulo den E Toren di Vigilancia tocante un programa di graduacion di Galaad cu tabata trata asuntonan cu e mes tabata lucha cu ne, esta, heimwee, con pa trata cu hende nobo y con pa custumbra  cu un cultura nobo. El a bisa: “Mi a sinti cu Jehova tabata papia cu mi e anochi ey. Esey a duna mi e animacion pa sigui cu mi asignacion.”—Sal. 44:25, 26; Isa. 41:10, 13.

13. Ki prueba nos tin cu Jehova ta yuda su pueblo “defende e bon noticia y establece e derecho legal”?

13 Tin mas prueba cu Jehova ta yuda su sirbidornan. Por ehempel, el a yuda nan “defende e bon noticia y establece e derecho legal.” (Flp. 1:7) Algun gobierno a purba di stop e trabou di predica. Sinembargo, nos a gana por lo menos 268 caso den corte supremo, y 24 di e casonan ey nos a gana den e Corte Europeo di Derechonan Humano desde aña 2000. Esaki ta mustra cu ningun hende no por stop Jehova di yuda su pueblo.—Isa. 54:17; lesa Isaias 59:1.

14. Ki otro pruebanan nos tin cu Jehova ta yuda su pueblo?

14 Ta solamente cu Dios su yudansa nos por haci e trabou di predica rond mundo. (Mat. 24:14; Echo. 1:8) Ademas, den e pueblo di Dios tin un union entre hende di diferente nacionalidad, algo cu e mundo no por imita. Hasta personanan cu no ta sirbi Jehova ta admiti: “Di berdad Dios ta meymey di boso.” (1 Cor. 14:25) Pues, nos tin hopi prueba cu Dios ta apoya su pueblo. (Lesa Isaias 66:14.) Kico di abo? Bo ta mira e man di Dios den bo bida?

ABO TA MIRA CON JEHOVA TA YUDA BO?

15. Dicon tin biaha nos no por mira cu Jehova ta yuda nos?

15 Tin ora nos tin asina hopi problema cu nos por lubida kico Dios a yega di haci pa nos. Esaki ta loke a sosode cu Elias. E tabata un homber yen di curashi. Pero, ora cu Reina Jezabel a menas’e cu morto, pa un momento el a lubida con Jehova a yega di yud’e. Bijbel ta bisa: “El a pidi pa e muri.”  (1 Rey. 19:1-4) Kico por a yuda Elias cu su problema? E mester a busca Jehova su yudansa pa e haya curashi.—1 Rey. 19:14-18.

16. Con nos por mira Dios manera Job a mir’e?

16 Job tabata asina preocupa cu su propio problemanan cu e no por a mira su situacion for di punto di bista di Dios. (Job 42:3-6) Nos problemanan tambe por stroba nos di mira con Dios ta yuda nos. Kico nos por haci e ora ey? Nos mester medita riba loke Bijbel ta bisa di nos problemanan. Si nos medita tambe riba con Jehova ta yuda nos, e lo bira mas real pa nos. Nos por bisa mescos cu Job: “Ta tende mi a tende di bo, ma awor mi wowo ta mira bo.”

Jehova ta uza bo pa yuda otro hende mir’e? (Wak paragraf 17, 18)

17, 18. (a) Den ki manera nos por mira cu Jehova ta yuda nos? (b) Conta un experencia cu ta mustra con Dios ta yuda nos awe.

17 Con nos por mira cu Jehova ta yuda nos? Wel, kisas bo ta sinti cu ta Jehova mes a yuda bo haya e berdad. Of bo a yega di scucha un discurso y sinti cu e tabata net pa bo? Kisas bo a mira con Jehova a contesta bo oracion. Porta bo a dicidi di haci mas den sirbishi y bo a mira con Jehova a yuda bo cumpli cu e meta ey. Of kisas bo a dicidi di kita for di trabou pasobra e tabata stroba bo di sirbi Jehova, y bo a mira con Jehova a cumpli cu su promesa: “Hamas lo mi bandona bo.” (Heb. 13:5) Si bo ta spiritualmente alerta, bo por mira con Jehova ta yuda bo den diferente manera.

18 Un ruman muher di Kenia cu yama Sarah ta conta: “Mi a haci oracion tocante un studiante cu mi a sinti cu no tabata aprecia su estudio di Bijbel. Mi a puntra Jehova si mi mester stop cu e estudio. Net despues cu mi a bisa amen, mi telefon a ring. Pa mi sorpresa tabata mi studiante. El a puntra mi si e por bay reunion cu mi.” Si nos keda alerta, nos tambe por mira con Dios ta yuda nos den nos bida. Rhonna, un ruman muher cu ta biba na Asia a bisa: “Ta tuma tempo pa mira con Jehova ta yuda nos. Una bes bo experencia esey, lo bo mira cuanto interes e tin den nos.”

19. Kico nos tin mester pa mira Dios den nos bida?

19 Hesus a bisa: “Feliz ta esnan di curason puro, ya cu nan lo mira Dios.” (Mat. 5:8) Con nos por tin un “curason puro”? Nos mester mantene nos pensamentonan limpi y stop di haci cosnan malo. (Lesa 2 Corintionan 4:2.) Segun cu nos ta sigui crece spiritualmente y mantene un bon conducta, nos lo por ta entre esnan cu por mira Dios. Den e siguiente articulo nos lo analisa un cualidad importante cu por yuda nos mira con Jehova ta yuda nos den nos bida: nos fe.