Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2015

“Para Firme den Fe”

“Para Firme den Fe”

“Para firme den fe, ... bira poderoso.”—1 COR. 16:13.

CANTICA: 60, 64

1. (a) Describi loke Pedro a experencia durante un tormenta riba Lama di Galilea. (Wak e prome plachi.) (b) Dicon Pedro a cuminsa sink?

RIBA un anochi cu tabatin un tormenta, apostel Pedro y algun discipel tabata rema nan boto cu hopi dificultad den Lama di Galilea. Diripiente, nan a mira Hesus ta cana riba lama. Pedro a puntra Hesus si e por a bin cerca dje. Ora Hesus a bis’e pa bin, Pedro a baha for di e boto den e lama bruto, y el a cuminsa cana bay cerca Hesus. Sinembargo, despues cu el a dal un par di stap, el a cuminsa sink. Dicon? Pasobra el a wak e tormenta y a haya miedo. Pedro a cuminsa grita pa Hesus yud’e. Mesora Hesus a gara su man y a bis’e: “Homber di poco fe, pakico bo a cuminsa duda?”—Mat. 14:24-32.

2. Kico nos lo analisa den e articulo aki?

2 Laga nos analisa tres cos cu nos por siña tocante e fe di Pedro: (1) Con Pedro a mustra fe den e yudansa di Dios, (2) Dicon el a cuminsa perde fe y (3) Kico a yud’e haya su fe bek. E puntonan aki lo yuda nos “para firme den fe.”—1 Cor. 16:13.

 FE DEN DIOS SU YUDANSA

3. Dicon Pedro a baha for di e boto, y con nos a haci algo parecido?

3 Pedro a demostra fe door di baha for di e boto ora cu Hesus a yam’e. E tabata sigur cu Dios su poder lo yud’e mescos cu el a yuda Hesus. Di igual manera, ora cu Hesus a invita nos pa siguie, nos a dedica nos mes na Jehova y a batisa. Dicon? Pasobra nos tabatin fe den tanto Jehova como Hesus, y nos tabata sigur cu nan semper lo yuda nos.—Juan 14:1; lesa 1 Pedro 2:21.

4, 5. Dicon fe ta algo asina valioso?

4 Fe ta algo hopi valioso. Mescos cu fe a permiti Pedro cana riba awa, nos fe por yuda nos haci cosnan cu pa hende por parce imposibel. (Mat. 21:21, 22) Por ehempel, fe a yuda nos haci cambionan asina grandi den nos actitud y conducta cu hendenan cu tabata conoce nos antes casi no por reconoce nos mas. Jehova a yuda nos pasobra nos a haci e cambionan aki a base di nos fe den dje. (Lesa Colosensenan 3:5-10.) E mesun fe ey a yuda nos dedica nos mes na Jehova y bira su amigo, algo cu nunca nos lo por a haci sin su yudansa.—Efe. 2:8.

5 E fe cu nos tin den Jehova ta sigui duna nos e forsa cu nos tin mester. Por ehempel, e ta yuda nos resisti e atakenan di Diabel, nos enemigo poderoso. (Efe. 6:16) Ademas, nos confianza den Jehova ta yuda nos pa ta menos preocupa ora cu nos enfrenta problema. Jehova a priminti nos cu si nos tin fe y pone e Reino na prome luga den nos bida, e lo percura pa nos necesidadnan material. (Mat. 6:30-34) Mas importante ainda, door di nos fe, Jehova lo duna nos e maraviyoso regalo di bida eterno.—Juan 3:16.

LOKE POR PONE NOS PERDE FE

6, 7. (a) Cu kico nos por compara e biento y e olanan cu a bin riba Pedro? (b) Kico ta importante pa nos corda?

6 Nos por compara e biento y e olanan cu tabata bin riba Pedro, ora cu e tabata cana riba awa, cu e prueba- y tentacionnan cu nos ta enfrenta como sirbidornan di Dios. Hasta ora e pruebanan aki ta hopi dificil, nos por soporta nan cu yudansa di Jehova. Corda cu no ta e biento of e olanan a pone Pedro sink. Pensa riba loke a pasa: “Ora el a wak e tormenta, el a haya miedo.” (Mat. 14:30) Cu otro palabra, ta ora cu Pedro a stop di enfoca riba Hesus, el a perde su fe. Nos tambe por cuminsa sink si nos “wak e tormenta.” Con asina? Wel, esey ta door di enfoca mucho riba nos problemanan y cuminsa duda cu Dios lo por yuda nos.

7 Ta importante pa nos corda cu cualkier un di nos por perde fe, pasobra Bijbel ta bisa cu falta di fe ta “e pica cu facilmente ta stroba nos.” (Heb. 12:1) Manera e experencia di Pedro ta mustra, nos fe facilmente por bira zwak si nos enfoca riba e cosnan robes. Con nos por sa si esey ta pasando cu nos? E siguiente preguntanan por yuda nos analisa nos mes.

8. Kico por pone nos duda den e promesanan di Dios?

8 Dios su promesanan ta mes real pa mi awe cu nan tabata antes? Por ehempel, Dios a priminti cu lo e destrui e sistema malbado aki. Acaso nos a cuminsa duda cu fin ta cerca debi cu nos  a laga entretenimento di e mundo aki distrai nos? (Hab. 2:3) Laga nos wak un otro ehempel. Dios ta priminti cu lo e pordona nos si nos tin fe den e rescate di Hesus. Pero, si nos keda enfoca riba nos foutnan di pasado, esey lo por pone nos duda cu di berdad Jehova a pordona nos picanan. (Echo. 3:19) Como resultado, nos lo por perde goso den nos sirbishi na Dios y asina bira inactivo.

9. Kico por pasa si nos cuminsa enfoca riba interesnan personal?

9 Ainda mi ta duna Jehova tur loke mi por? Apostel Pablo a bisa cu si nos kier ta “sigur di [nos] speransa te na fin”, nos mester sigui traha duro pa Jehova. Sinembargo, kico por pasa si nos cuminsa enfoca riba interesnan personal? Por ehempel, nos lo por tuma un trabou cu ta paga bon pero cu ta stroba nos di sirbi Dios. Esey lo por debilita nos fe, haci nos “bira floho” y pone cu nos no ta duna Jehova tur loke nos por.—Heb. 6:10-12.

10. Con nos ta mustra cu nos tin fe den Jehova ora nos pordona otronan?

10 Mi ta haya dificil pa pordona? Ora un hende ofende nos, nos ta rabia y papia malo cu ne of hasta keda sin papia cu ne? Si nos tin fe den Jehova, nos lo pordon’e. Dicon? Wel, ora un hende peca contra nos, ta comosifuera e debe nos. Asina tambe, ora nos peca contra Dios, nos deb’ele. (Luc. 11:4) Door di pordona e persona, nos ta mustra cu nos tin fe y ta balora Dios su aprobacion mas cu e debe cu e persona tin cerca nos. Hesus su discipelnan a compronde cu bo mester di fe pa pordona  otronan. Pesey, ora Hesus a bisa nan pa pordona hasta esnan cu cada bes tabata ofende nan, nan a rog’e: “Duna nos mas fe.”—Luc. 17:1-5.

11. Kico lo por stroba nos di acepta conseho?

11 Mi ta rabia ora mi haya conseho? Ora nos haya conseho, kisas nos ta enfoca mucho riba loke ta fout den e conseho of e persona cu ta conseha nos. Lo ta mihor pa purba di mira con e conseho por yuda nos mehora y pa pensa mas manera Jehova ta pensa.—Prov. 19:20.

12. Kico un cristian ta mustra ora e tin e custumber di keha contra esnan cu Dios a nombra pa dirigi e congregacion?

12 Mi ta keha contra e rumannan cu ta dirigi e congregacion? Debi cu e Israelitanan a enfoca mucho riba e mal informe di e dies spionnan, nan a cuminsa murmura contra Moises y Aaron. Despues, Jehova a puntra Moises: “Cuanto tempo mas nan lo no kere den mi?” (Num. 14:2-4, 11) En realidad, e Israelitanan a mustra un falta di fe den Dios ora cu nan a murmura contra Moises y Aaron, esnan cu Dios a nombra pa dirigi su pueblo. Asina nos tambe lo mustra un falta di fe den Dios si nos tin e custumber di keha contra esnan cu Dios a nombra pa dirigi su pueblo awe.

13. Dicon nos no mester desanima ora nos ripara cu nos fe no ta mes fuerte cu nos a pensa?

13 Despues cu bo a analisa e preguntanan aki, kisas bo a ripara cu bo fe no ta mes fuerte cu bo a pensa. No desanima. Corda cu hasta apostel Pedro a sinti miedo y a cuminsa duda. Y tin biaha Hesus mester a conseha tur su discipelnan pa motibo di nan “poco fe.” (Mat. 16:8) E les mas importante cu nos por siña for di Pedro su experencia tin di haber cu loke el a haci despues cu el a perde fe y a cuminsa sink den lama.

ENFOCA RIBA HESUS PA FORTALECE BO FE

14, 15. (a) Kico Pedro a haci ora el a cuminsa sink? (b) Aunke nos no por mira Hesus, con nos por “fiha nos bista” riba dje?

14 Kico Pedro por a haci ora el a wak e tormenta y cuminsa sink? Debi cu e tabata un bon landado, e por a landa bay bek na e boto. (Juan 21:7) Pero en bes di confia den su mes, el a bolbe enfoca riba Hesus y acepta su yudansa. Si nos sinti cu nos ta cuminsa perde fe, nos mester imita e ehempel di Pedro. Pero, con nos por haci esey?

15 Mescos cu Pedro a bolbe enfoca riba Hesus, nos tambe mester “fiha nos bista riba Hesus, e Representante Principal di nos fe y Esun cu ta hiba esaki na perfeccion.” (Lesa Hebreonan 12:2, 3.) Naturalmente nos no por mira Hesus manera Pedro a mir’e. Pero nos ta “fiha nos bista” riba dje door di studia tocante su bida y siñansanan, y purba di imita su ehempel fielmente pa asina nos haya un fe firme. Laga nos analisa algun manera cu nos por haci esey.

Nos por haya un fe firme si nos enfoca riba Hesus su ehempel y sigui su pasonan fielmente (Wak paragraf 15)

16. Con estudio di Bijbel por haci nos fe mas fuerte?

16 Fortalece bo confianza den Bijbel. Hesus tabata convenci cu Bijbel ta e Palabra di Dios y cu e ta duna nos e mihor guia den bida. (Juan 17:17) Si nos kier tin e mesun conviccion cu Hesus, nos tin cu lesa Bijbel tur dia, studi’e y medita riba loke nos a siña. Ademas di esey, nos mester haci investigacion riba e preguntanan cu nos por tin. Por ehempel, nos por fortalece nos conviccion cu e fin  ta cerca door di studia e profecianan di Bijbel cu ta mustra cu nos ta bibando den e ultimo dianan. Ora nos analisa profecianan cu a cumpli caba, esaki ta fortalece nos confianza den e profecianan cu mester cumpli ainda. Lesa experencianan cu ta mustra con Bijbel ta cambia bida di hende, y esey lo yuda nos haya mas confianza den e consehonan di Bijbel. *1 Tes. 2:13.

17. (a) Con Hesus a logra keda fiel bou di prueba severo? (b) Con nos por imita Hesus?

17 Enfoca riba e bendicionnan cu Jehova a priminti. “Pa motibo di e goso cu tabata sper’e”, Hesus por a keda fiel bou di prueba severo. (Heb. 12:2) Nunca el a laga loke mundo tin di ofrece distra’e. (Mat. 4:8-10) Con nos por imita Hesus den esaki? Esey ta door di medita riba e maraviyoso promesanan cu Jehova a duna nos. Djis imagina bo mes den e mundo nobo. Skirbi of pinta kico lo bo kier haci eynan. Traha un lista di hende cu bo kier topa ora nan resucita, y skirbi ki pregunta lo bo kier haci nan. Mira cada promesa cu Dios a haci como algo cu el a priminti abo personalmente.

18. Con oracion por fortalece bo fe?

18 Pidi Dios pa mas fe. Hesus a bisa su siguidornan pa pidi Jehova pa spirito santo. (Luc. 11:9, 13) Mientras cu nos ta haci esey, pidi tambe pa mas fe; e ta un di e cualidadnan di e fruta di spirito. Sea specifico den bo oracionnan. Por ehempel, si nos ta haya cu ta dificil pa pordona otronan, pidi Dios yuda bo fortalece bo fe pa asina bo por logra pordona.

19. Con nos por scoge bon amigo?

19 Scoge amigo cu tin un fe fuerte. Hesus a scoge su amigonan bon, specialmente esnan cu tabata mas pega cu ne. Por ehempel, su apostelnan, cu tabata su amigonan mas pega, tabata hombernan di fe cu a demostra nan lealtad door di obedece su mandamentonan. (Lesa Juan 15:14, 15.) Pues, nos por haci mescos door di scoge amigo entre esnan cu tin fe y cu ta mustra esaki door di obedece Hesus. Ademas, bon amigo por ta honesto cu otro, y nan por duna y acepta conseho.—Prov. 27:9.

20. Ki beneficio nos ta haya ora nos yuda otronan fortalece nan fe?

20 Yuda otronan fortalece nan fe. Hesus a fortalece e fe di su discipelnan tanto door di loke el a bisa como loke el a haci. (Mar. 11:20-24) Si nos ta sigui su ehempel y fortalece e fe di otronan, esey lo fortalece nos fe tambe. (Prov. 11:25) Con nos por logra esey? Den nos trabou di predica y siña hende, enfatisa e echo cu Dios ta existi, cu e ta interesa den nos y cu Bijbel ta su palabra inspira. Ademas, bo por fortalece e fe di bo rumannan tambe. Si bo ripara cu algun di nan ta cuminsa keha contra e rumannan cu ta dirigi e congregacion, no sea lihe pa rechasa nan. Mas bien, cu tacto yuda nan recobra nan fe. (Judas 22, 23) Como hoben bo por haya bo mes cu lesnan tocante evolucion. Si bo defende bo fe den creacion, lo bo por keda sorprendi con otronan lo reacciona.

21. Kico Jehova a priminti nos?

21 Danki na e apoyo di Jehova y Hesus, Pedro por a vence su miedo y duda, y el a bira un pilar di e congregacion di prome siglo. Di mes manera, Jehova ta yuda nos para firme den fe. (Lesa 1 Pedro 5:9, 10.) Ta bale la pena pa haci esfuerso pa fortalece nos fe, ya cu nos lo haya e bendicion di Dios.

^ par. 16 Por ehempel, wak e serie di articulo “Bijbel Ta Cambia Bida di Hende” den e edicion pa publico di E Toren di Vigilancia.