Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2015

Con Anos Por Mustra Cu Nos Ta Stima Jehova?

Con Anos Por Mustra Cu Nos Ta Stima Jehova?

“Nos ta stima, pasobra Dios a stima nos prome.”—1 JUAN 4:19.

CANTICA: 56, 138

1, 2. Den ki manera 1 Juan 4:19 ta yuda nos stima Jehova?

E MIHOR manera cu un tata por siña su yiunan ta door di su bon ehempel. Ora e mustra nan amor, nan ta siña con pa stima. No tin un persona cu ta stima su yiunan mas cu nos amoroso Tata Jehova. Pesey, apostel Juan a skirbi: “Nos ta stima, pasobra Dios a stima nos prome.”—1 Juan 4:19.

2 Den ki manera Dios a mustra cu el a “stima nos prome”? Nos por haya e contesta den loke apostel Pablo a bisa: “Dios a demostra su amor pa nos di e manera aki: Cristo a muri pa nos mientras cu nos tabata pecador ainda.” (Rom. 5:8) Jehova a haci un sacrificio grandi ora el a duna su Yiu como un rescate pa hende fiel. Asina el a mustra un amor sin egoismo. Danki na e regalo precioso aki, nos por hala cerca Dios y mustr’e cu nos tambe ta stim’e.—1 Juan 4:10.

3, 4. Con nos ta mustra cu nos ta stima Dios?

3 Amor ta e cualidad principal di Jehova. Pesey, nos por compronde dicon Hesus a bisa cu e mandamento di mas importante ta cu “bo tin cu stima Jehova bo Dios cu henter bo curason, cu henter bo alma, cu henter bo mente y cu tur bo forsa.” (Mar. 12:30) E palabranan di Hesus ta mustra cu  Jehova kier pa nos stim’e “cu henter [nos] curason.” Kiermen si nos curason no ta completo pa cu Jehova, esey lo no agrad’e. Nos amor pa Dios ta mucho mas cu djis un sintimento. Nos mester stima Jehova tambe cu henter nos alma, mente y forsa, esta, cu nos pensamento- y accionnan.—Lesa Mikeas 6:8.

4 Pues, manera Hesus a bisa, nos mester stima Jehova completamente, es decir, cu tur loke nos tin. Den e articulo anterior nos a mira cuater manera cu Jehova ta mustra cu e ta stima nos. Awor, laga nos wak loke por yuda nos haya mas amor p’e, y con nos por mustra cu nos ta stim’e.

AGRADECIDO PA LOKE JEHOVA TA PERCURA

5. Ora bo pensa riba tur loke Jehova a haci pa nos, con esey ta laga bo sinti?

5 Ora bo haya un regalo, kico bo ta haci cu ne? Di mes bo ta mustra cu bo ta apreci’e door di uz’e y cuid’e. Santiago a skirbi: “Tur don cu ta bon y tur regalo perfecto ta bin di ariba; pues, nan ta baha for di e Tata di e luznan celestial, kende no ta varia ni cambia manera sombra cu ta move.” (Sant. 1:17) Jehova semper ta percura tur loke nos tin mester pa biba y pa nos ta feliz. Esey no ta motiva nos pa stim’e?

6. Kico e Israelitanan mester a haci pa sigui disfruta di e bendicionnan di Jehova?

6 Pa siglonan e Israelitanan a biba bou di e cuido amoroso di Jehova. Semper el a bendiciona nan tanto materialmente como spiritualmente. (Deu. 4:7, 8) Sinembargo, pa nan por a sigui disfruta di e bendicionnan ey, nan mester a obedece e Ley di Dios. Esaki a encera cu nan mester a ofrece Jehova “e mihor di e prome frutanan” di nan cosecha. (Exo. 23:19) Di e manera ey, e Israelitanan por a demostra cu di berdad nan tabata aprecia e amor y bendicion di Jehova.—Lesa Deuteronomio 8:7-11.

7. Den ki manera nos por uza nos “cosnan valioso” pa mustra Jehova cu nos ta stim’e?

7 Aunke nos no ta haci sacrificio literal manera e Israelitanan, nos mester mustra cu nos ta stima Dios door di dun’e nos “cosnan valioso.” (Prov. 3:9, NW) Con nos por haci esey? Un manera ta door di uza nos cosnan material pa apoya e congregacionnan local y e obra mundial. Sea cu nos tin poco of hopi, nos tur por uza loke nos tin pa mustra cu nos ta stima Jehova. (2 Cor. 8:12) Pero tin otro maneranan cu nos por mustra Jehova cu nos ta stim’e.

8, 9. (a) Ki relacion tin entre nos confianza den e promesanan di Jehova y nos amor p’e? (b) Con Mike y su famia a mustra amor y confianza den Jehova?

8 Hesus a siña su discipelnan pa pone e Reino na prome luga, y pa no bira ansha tocante cosnan manera cuminda y paña. El a bisa cu e Tata sa loke nos tin mester. (Mat. 6:31-33) Mas nos confia den Jehova su promesa cu e ta cuida nos, mas nos ta mustra cu nos ta stim’e. Pasobra pa bo por stima un persona di berdad, bo mester confi’e. (Sal. 143:8) Pues lo ta bon pa puntra nos mes: Mi metanan y mi manera di biba ta mustra cu di berdad mi ta stima Jehova? Den mi bida diario, ta bisto cu mi ta confia cu Jehova por percura pa mi necesidadnan?

9 Un ruman cu yama Mike a mustra e  tipo di amor y confianza ey. Tempo cu e tabata hoben, e tabatin e deseo di sirbi Dios den un pais caminda tin necesidad di mas publicador. Hasta despues cu el a casa y haya dos yiu ainda e tabatin e mesun deseo ey. Mike y su famia a lesa varios articulo tocante rumannan cu a sirbi caminda e necesidad ta mas grandi, y esey a anima nan pa simplifica nan bida. Nan a bende nan cas y a bay biba den un apartamento. Despues, Mike a reduci e tamaño di su negoshi door di tuma menos cliente, y el a haya un manera pa maneh’e for di un otro pais uzando Internet. Como resultado, Mike y su famia a muda. Despues di a sirbi dos aña cu goso na un otro pais, Mike a bisa: “Nos a experencia cu e palabranan na Mateo 6:33 ta berdad.”

MEDITA RIBA LOKE JEHOVA TA SIÑA NOS

10. Dicon ta bon pa nos medita riba e leynan di Dios y su creacion manera Rey David a haci?

10 Un 3.000 aña pasa, ora Rey David a observa cielo yen di strea, el a sintie motiva pa skirbi: “E cielonan ta conta di e gloria di Dios; y e firmamento ta proclama e obra di su mannan.” Despues di a medita riba e leynan di Dios, el a bisa: “E ley di SEÑOR ta perfecto, e ta restaura alma; e testimonio di SEÑOR ta fiel, e ta haci hende simpel bira sabi.” Ki efecto esey tabatin riba dje? Wel, David a sigui bisa: “Laga e palabranan di mi boca y e meditacion di mi curason ta aceptabel den bo bista, o SEÑOR, mi baranca y mi Redentor.” Manera nos por a mira, David tabatin un bon relacion cu su Dios.—Sal. 19:1, 7, 14.

11. Kico amor pa Dios ta motiva nos pa haci cu e conocemento cu e ta duna nos? (Wak e prome plachi.)

11 Awe, nos sa hopi tocante Jehova su creacion y su proposito. Mundo ta promove enseñanza superior, pero experencia ta mustra cu hopi hende cu a core tras di esey cu tempo a perde nan fe y nan amor pa Dios. Sinembargo, Bijbel ta recorda nos cu conocemento so no ta suficiente; nos mester di sabiduria y comprondemento tambe. Jehova kier pa nos siña uza e conocemento cu el a duna nos pa beneficia nos mes y pa yuda otronan. (Prov. 4:5-7) Dios “su boluntad ta pa tur sorto di hende ser salba y yega na un conocemento exacto di e berdad.” (1 Tim. 2:4) Nos ta mustra cu nos ta stima Jehova door di haci tur loke nos por pa predica e bon noticia di e Reino y yuda hende compronde Dios su proposito pa humanidad.—Lesa Salmo 66:16, 17.

12. Kico Shannon a bisa tocante e bunita regalo cu el a haya di Jehova?

12 Hobennan tambe por mustra cu nan ta stima Jehova. Con? Esey ta door di aprecia loke Jehova ta duna nan y siña nan. Un ruman muher cu yama Shannon ta conta cu ora e tabatin 11 aña, e y su ruman muher di 10 aña a bay e congreso di districto “Devocion Piadoso” hunto cu nan mayornan. Durante un di e sesionnan, a pidi e hobennan pa sinta den un seccion special. Aunke Shannon tabata un poco nervioso, toch el a bay sinta eynan. E tabata hopi contento ora cu tur e hobennan a haya e bunita buki Loke hovenan sa puntra—Contesta práctica. Con e regalo ey a lag’e sinti tocante Jehova Dios? El a bisa: “Ta e ora ey mi a sinti cu Dios ta  un persona real y cu e ta stima mi masha hopi mes. Esta feliz nos ta cu nos gran Dios Jehova ta duna nos regalonan asina precioso!”

ACEPTA E CONSEHO Y DISCIPLINA DI DIOS

13, 14. Con nos mester reacciona ora Jehova duna nos disciplina, y dicon?

13 Bijbel ta bisa: “Esun cu SEÑOR ta stima, e ta reprende, mescos cu un tata ta reprende e yiu cu e tin delicia den dje.” (Prov. 3:12) Con nos mester reacciona ora nos haya disciplina? Apostel Pablo a reconoce cu “ningun disciplina ta algo dushi na momento cu e ta ser duna, sino algo doloroso.” Pero el a sigui splica cu esey no kiermen cu e disciplina no ta necesario, bisando: “Ma despues e ta duna e fruta di paz, esta, un bida husto, na esnan cu a ser entrena p’e.” (Heb. 12:11) Si nos ta stima Jehova, nos no ta ignora su conseho, sino acept’e sin rabia. Kisas pa algun di nos, esey no ta facil. Pero nos amor pa Dios lo yuda nos.

14 Den tempo di Malakias, hopi Hudiu no a sigui e leynan di Dios tocante sacrificio. Pa e motibo ey, Dios mester a duna nan conseho fuerte. (Lesa Malakias 1:12, 13.) Con grave e situacion tabata? Wak loke Jehova a bisa nan: “Lo Mi manda desaster riba boso. Na lugá di privilegio Mi ta duna boso desaster. Mi ta hasiendo esei kaba, pasobra boso no ta tuma e mandamentu na serio.” (Mal. 2:1, 2, BPK) Si nos tin e custumber di ignora e consehonan amoroso di Jehova, esey lo por tin consecuencia.

Sigui e conseho di Dios, y no loke ta popular den mundo (Wak paragraf 15)

15. Ki manera di pensa nos mester evita?

15 Den nos tempo hopi hende ta pensa solamente riba nan mes. Pesey, mayoria di hende no ta gusta haya conseho y disciplina, corda pa nan acept’e. Y e poco hendenan cu acept’e ta haci esaki di mala gana. Pero como cristiannan nos no mester ta asina. Bijbel  ta anima nos pa “stop di laga e mundo aki forma [nos].” Nos mester purba di compronde kico ta e perfecto “boluntad di Dios” y haci loke ta agrad’e. (Rom. 12:2) Jehova ta uza su organisacion pa duna nos conseho relaciona cu varios aspecto di nos bida: nos comportacion cu e sexo opuesto, amistadnan y recreo. Ora nos ta dispuesto pa acepta y aplica e consehonan aki, nos ta mustra Jehova cu nos ta aprecia su guia y cu nos ta stim’e di curason.—Juan 14:31; Rom. 6:17.

DEPENDE RIBA JEHOVA SU YUDANSA Y PROTECCION

16, 17. (a) Dicon nos mester tene cuenta cu Dios su manera di pensa ora nos tuma decision? (b) Con e Israelitanan a mustra un falta di amor y confianza den Jehova?

16 Ora mucha ta haya miedo, di biaha nan ta core bay cerca nan mayornan. Segun cu nan ta crece bira adulto, nan ta siña depende mas riba nan mes y tuma nan mes decisionnan. Esey ta parti di bida. A pesar di esey, esnan cu tin un bon relacion cu nan mayornan ta sigui busca conseho cerca nan ora cu nan tin cu tuma cierto decisionnan. Den sentido spiritual ta mescos, Jehova a duna nos su spirito cu ta yuda nos haya “tanto e deseo como e poder pa haci tur loke ta agrad’e.” Pero, lo ta un falta di amor y confianza si nos tuma decisionnan sin tene cuenta cu loke Dios ta pensa di e asunto.—Flp. 2:13.

17 Den tempo di profeta Samuel, e Israelitanan a sufri un derota grandi contra e Filisteonan. Na e momento ey, nan tabatin mester di Dios su guia y proteccion. Pero kico nan a dicidi di haci? Bijbel ta bisa: “Laga nos trece pa nos mes for di Silo e arca di e alianza di SEÑOR, pa e bin meymey di nos y libra nos di e poder di nos enemigonan.” Kico tabata e resultado di esaki? “E matanza tabata masha grandi mes; pasobra di Israel a cay 30.000 soldaat na pia. Y nan a coge e arca di Dios.” (1 Sam. 4:2-4, 10, 11) Por a parce cu nan tabata busca Dios su yudansa door di hiba e Arca hunto cu nan, pero en realidad no tabata asina. Mas bien, nan a sigui tras di nan propio ideanan, y e resultado tabata desastroso.—Lesa Proverbionan 14:12.

18. Ki actitud nos mester tin ora nos busca Jehova su yudansa?

18 Di otro banda e salmista a demostra e actitud corecto ora el a skirbi: “Spera riba Dios, pasobra lo mi bolbe alab’e pa e yudansa di su presencia. O mi Dios, mi alma ta abati den mi; pesey mi ta corda riba bo.” (Sal. 42:5, 6) Esta un amor profundo pa Jehova! Abo tambe a desaroya un amor y confianza asina pa bo Tata celestial? Hasta si bo contesta ta si, e siguiente conseho di Bijbel lo por yuda bo haya mas confianza den Dios: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Prov. 3:5, 6.

19. Den ki manera abo por mustra cu bo ta stima Jehova?

19 Jehova a pone e mihor ehempel den mustra amor, y esey ta yuda nos stim’e. Laga nos semper corda riba tur loke Jehova ta haci pa mustra cu e ta stima nos. Pesey, sigui haci esfuerso pa mustra Jehova cada dia cu nos ta stim’e cu henter nos curason, alma, mente y cu tur nos forsa.—Mar. 12:30.