Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2015

Bo Consenshi Ta un Guia Confiabel?

Bo Consenshi Ta un Guia Confiabel?

“Meta di e instruccion aki ta pa nos tin amor cu ta sali for di un curason limpi [y] di un bon consenshi.”—1 TIM. 1:5.

CANTICA: 57, 48

1, 2. (a) Ken a duna nos e consenshi? (b) Dicon nos mester ta agradecido cu nos tin un consenshi?

JEHOVA DIOS a crea hende cu boluntad liber, esta, e libertad pa scoge. Ademas, el a duna nan algo hopi valioso: e consenshi. Kico e consenshi ta? E ta manera un bos cu ta bisa nos kico ta bon y kico ta malo. Si nos uz’e bon, e por yuda nos tuma decision sabi y evita di haci loke ta malo. Pues, e consenshi ta un muestra cu Jehova ta stima nos y cu e kier pa henter humanidad haci loke ta bon.

2 Tur ser humano tin un consenshi. (Lesa Romanonan 2:14, 15.) Aunke mayoria di hende no ta sigui e normanan di Bijbel, toch tin algun cu ta haci loke ta bon y ta odia loke ta malo. E consenshi ta preveni cu hopi hende ta haci cosnan horibel y cruel. Bo por imagina bo mes con mundo lo ta si hende no tabatin un consenshi? Probablemente nos lo tende di cosnan mucho mas pio. Esta agradecido nos ta cu Dios a duna hende un consenshi!

3. Con nos lo beneficia di un consenshi bon entrena?

3 Aunke hende en general no ta haci caso di nan consenshi,  sirbidornan di Jehova si kier entrena nan consenshi. Ademas, nan kier pa nan consenshi ta na harmonia cu loke Bijbel ta bisa ta bon y malo. Un consenshi bon entrena ta promove union den congregacion. Sinembargo, pa entrena nos consenshi, nos no mester djis sa loke Bijbel ta bisa. E Palabra di Dios ta indica cu nos mester tin amor y fe tambe. Apostel Pablo a skirbi: “Meta di e instruccion aki ta pa nos tin amor cu ta sali for di un curason limpi, di un bon consenshi y di fe sin hipocresia.” (1 Tim. 1:5) Segun cu nos ta entrena y haci caso di nos consenshi, nos amor pa Jehova lo aumenta y nos fe lo bira mas fuerte. E manera cu nos ta uza nos consenshi ta mustra e grado di nos spiritualidad, e condicion di nos curason y si di berdad nos kier agrada Jehova. Cu otro palabra, nos consenshi ta revela ki clase di persona nos ta realmente.

4. Con nos por entrena nos consenshi?

4 Con nos por entrena nos consenshi? Nos mester studia Bijbel regularmente, medita riba loke nos a siña y pidi Jehova yuda nos aplica esaki. Claro cu esaki ta encera mas cu djis yena nos cabes cu informacion y siña regla. Nos estudio di Bijbel por yuda nos conoce Jehova cada bes mas mihor como persona. Nos por siña mas tocante su personalidad, su cualidadnan y loke e ta gusta y no ta gusta. Asina nos consenshi lo ta mas na harmonia cu e manera di pensa di Jehova Dios, y esey lo motiva nos curason pa sigui imit’e.

5. Kico nos lo considera den e articulo aki?

5 Pero kisas nos lo puntra nos mes: Con un consenshi bon entrena por yuda nos tuma decisionnan sabi? Con nos por respeta e consenshi di nos rumannan? Y con nos consenshi por motiva nos pa haci loke ta bon? Cu e preguntanan ey na mente, laga nos considera tres area den cua nos consenshi por yuda nos: (1) salud, (2) recreo y (3) e trabou di predica.

SEA RASONABEL

6. Ki situacion un cristian por enfrenta ora ta trata di asunto di salud?

6 Bijbel ta anima nos pa evita cosnan cu por haci nos daño y pa ta modera den nos custumbernan manera comemento y bebemento. (Prov. 23:20; 2 Cor. 7:1) Segun cu nos ta aplica principionan biblico, esey por yuda nos proteha nos salud na un manera rasonabel. Claro cu esey no kiermen cu nos no ta bira malo of bira bieu. Den algun pais, bo por scoge pa haya tratamento convencional cerca un doctor of na hospital. Of bo por scoge pa bay cerca un profesional cu por duna bo remedi di tera of tratamento natural. Riba un base regular sucursalnan ta haya carta di rumannan cu ta puntra si nan por tuma un of otro tratamento. Hopi sa puntra: “Un testigo di Jehova por tuma un cierto tratamento?”

7. Kico nos mester tene cuenta cu ne ora di tuma decision relaciona cu tratamento medico?

7 Ni sucursal ni e ancianonan di congregacion no por tuma decision pa un ruman ora ta trata di asunto di salud, hasta si e puntra nan kico pa haci. (Gal. 6:5) Naturalmente, nan por mustra e ruman principionan biblico cu e tin cu tene cuenta cu ne ora di tuma un decision. Por ehempel, un cristian mester corda riba e mandamento pa “sigui abstene ... di sanger.” (Echo. 15:29) Teniendo cuenta cu e mandamento ey ta pone cu nos no por acepta ningun tratamento medico cu ta envolve sanger ni  cualkier un di su cuater componentenan principal. Sinembargo, tin tratamento cu ta envolve uzo di fraccionnan chikito di sanger. Den tal caso, cada cristian mester dicidi a base di su consenshi bon entrena si e ta acepta e tratamento ey of no. * Ki otro principio biblico por yuda nos ora di scoge un tratamento medico?

8. Con Filipensenan 4:5 por yuda nos ora ta trata di asunto di salud?

8 Prome cu nos tuma cualkier decision, ta bon pa nos pensa riba e siguiente principio biblico: “Hende sin eksperensia ta kere tur kos ku bis’é, hende sabí mes ta pensa.” (Prov. 14:15, BPK) Nos sa cu algun maleza no tin cura. Pesey, nos mester tene cuidou ora hende recomenda nos tratamento cu ta priminti cielo y Tera sin cu nan por duna nos prueba di e supuesto resultadonan. Bou di inspiracion Pablo a skirbi: “Laga tur hende mira ki rasonabel boso ta.” (Flp. 4:5) Si nos ta rasonabel, esey ta yuda nos pa no dedica asina tanto tempo na asunto di salud cu cosnan spiritual ta bay na di dos luga. Nos lo por bira egoista si nos laga asunto di salud bira e cos mas importante den nos bida. (Flp. 2:4) Nos sa cu actualmente nos no por tin un salud perfecto. Pesey, laga nos pone cosnan spiritual na prome luga den nos bida.—Lesa Filipensenan 1:10.

Bo ta impone bo opinion personal riba otronan? (Wak paragraf 9)

9. (a) Kico por pone e union di congregacion na peliger? (b) Con Romanonan 14:13 y 19 ta yuda nos tuma bon decision ora ta trata di asunto di salud?

9 Un cristian rasonabel no ta impone su opinion riba otronan. Den un pais na Europa, un pareha casa a cuminsa anima otronan pa tuma un cierto pildo y sigui un cierto dieet. Nan a hasta convence algun ruman pa haci esaki. Ora cu e resultado no tabata manera e rumannan a spera, hopi di nan a rabia. E pareha por a dicidi pa nan mes si nan kier a tuma e pildo y sigui e dieet. Pero lo tabata bale la pena pa pone e union di congregacion na peliger djis pa esey? Den prome siglo, e cristiannan na Roma tabatin diferente opinion tocante cierto cuminda- y celebracionnan. Ki conseho Pablo a duna nan? Tocante e celebracionnan el a bisa: “Un hende ta haya cu un dia ta mas importante cu e otro; un otro ta haya cu e dia ey ta mescos cu tur otro; laga cada hende keda plenamente convenci den su mente.” Manera nos por a mira, nos mester tene cuidou pa nos no pone nos rumannan trompica.—Lesa Romanonan 14:5, 13, 15, 19, 20.

10. Dicon nos mester respeta decision di nos rumannan ora ta trata di asunto personal? (Wak e prome plachi.)

10 Tin ora, nos no ta compronde dicon un ruman a tuma un cierto decision riba  un asunto personal. Kico nos mester haci e ora? Nos no mester ta lihe pa husg’e of purba di fors’e pa cambia su punto di bista. Kisas su consenshi ta “debil” ainda y e mester entren’e mihor, of su consenshi ta mucho sensitivo den cierto asuntonan. (1 Cor. 8:11, 12) Di otro banda, kisas ta nos mester entrena nos consenshi pa e ta mas na harmonia cu principionan di Bijbel. Nos tur mester tuma nos propio decision ora ta trata di asunto di salud y acepta e consecuencianan.

DISFRUTA DI RECREO EDIFICANTE

11, 12. Ki conseho di Bijbel por yuda nos scoge bon recreo?

11 Jehova a traha nos di tal manera cu nos por disfruta y beneficia di recreo. Salomon a bisa cu tin “un tempo pa hari” y “un tempo pa balia.” (Ecl. 3:4) Pero no ta tur recreo ta bon, relahante of refrescante. Ademas, nos mester evita di dedica mucho tempo na recreo. Con nos consenshi por yuda nos disfruta di recreo cu Jehova ta aproba?

12 Bijbel ta spierta nos di “e obranan di carni.” Esakinan ta inclui “fornicacion, impureza, conducta sinberguensa, idolatria, bruheria, hostilidad, bringamento, jaloersheid, atake di rabia, pleitamento, desunion, secta, envidia, buracheria, coremento di paranda y cosnan por estilo.” Pablo a bisa cu “esnan cu ta practica e tipo di cosnan ey lo no ricibi e Reino di Dios.” (Gal. 5:19-21) Relaciona cu esey, nos por puntra nos mes: Mi consenshi ta motiva mi pa evita deportenan agresivo of violento? E ta yuda mi rechasa e spirito di competencia y nacionalista cu tin den hopi deporte? Mi consenshi ta yuda mi evita peliculanan cu ta contene escenanan pornografico of cu ta presenta inmoralidad, buracheria of spiritismo como algo normal?

13. Con 1 Timoteo 4:8 y Proverbionan 13:20 por yuda nos ora di scoge recreo?

13 Principionan di Bijbel ta yuda nos entrena nos consenshi ora di tuma decisionnan cu tin di haber cu recreo. Por ehempel, 1 Timoteo 4:8 ta bisa cu “entrenamento fisico ta yuda cu algo.” Hopi hende ta di acuerdo cu ehercicio ta bon pa nos salud fisico y mental. Pero, kico si nos ta gusta haci deporte den grupo? Ta importa cu ken nos ta haci esey? Proverbionan 13:20 ta bisa: “Esun cu anda cu hende sabi lo ta sabi, ma un compañero di hende bobo lo sufri daño.” Ta bisto anto cu ta importante pa laga nos consenshi bon entrena guia nos ora di scoge recreo.

14. Con un famia a aplica e principionan na Romanonan 14:2 te cu 4?

14 Christian cu Daniela tin dos yiu teenager. Christian ta conta: “Durante nos anochi di adoracion Como Famia nos a trata e tema di recreo. Nos tur a bay di acuerdo cu cierto recreo ta bon y otronan no. Tambe nos a papia tocante e sorto di amigonan cu nos mester tin. Un di nos yiu muhernan a conta nos cu algun hoben Testigo na su scol tabata comporta nan mes na un manera cu no ta apropia, y cu el a sintie presiona pa actua mescos cu nan. Nos a yud’e mira cu cada un di nos tin un consenshi, y cu nos mester lag’e guia nos ora di scoge kico nos lo haci y cu ken nos lo anda.”—Lesa Romanonan 14:2-4.

Bo consenshi bon entrena por yuda bo evita peliger (Wak paragraf 14)

15. Con Mateo 6:33 por yuda bo plania ki ora pa recrea?

15 Tambe bo mester pensa tocante ki ora bo ta recrea. Ta bo reunionnan, sirbishi y estudio personal ta bin na prome luga den bo bida? Of ta recreo ta bay  prome cu bo actividadnan spiritual? Cua ta mas importante pa bo? Hesus a bisa: “Sigui busca anto prome e Reino y e husticia di Dios, y lo e duna boso tur e cosnan aki.” (Mat.6:33) Bo consenshi ta motiva bo pa sigui e conseho aki di Hesus?

MOTIVA PA PREDICA

16. Con nos consenshi ta motiva nos pa predica?

16 Un bon consenshi no ta djis yuda nos evita di haci loke ta malo, sino e ta motiva nos tambe pa haci bon obra. Un di e obranan aki ta e trabou di predica di cas pa cas y duna testimonio informal. Pablo su consenshi a motiv’e pa haci esey. El a bisa: “Pasobra ta mi obligacion esey ta. Realmente, ay di mi si mi no declara e bon noticia!” (1 Cor. 9:16) Ora nos imita Pablo, nos consenshi ta duna nos e siguransa cu nos ta haciendo loke ta bon. Y door di predica na otronan, ta comosifuera nos ta motiva nan consenshi pa haci loke ta corecto. Ta manera Pablo a splica: “Nos ta revela e berdad, y di e manera ey nos ta recomenda nos mes na tur hende den bista di Dios.”—2 Cor. 4:2.

17. Con Jacqueline a actua na harmonia cu su consenshi?

17 Tempo cu Jacqueline tabatin 16 aña di edad, el a haya les di biologie na scol. Den e les ey nan a haya splicacion riba e tema di evolucion. Jacqueline a conta: “Semper mi tabata participa den klas, pero den e les aki mi consenshi no a permiti mi haci esey pasobra mi no por a apoya e teoria di evolucion. Mi a acerca e meneer y a splic’e mi posicion. Pa mi sorpresa, e tabata hopi amabel y el a duna mi e oportunidad pa haci un presentacion dilanti klas tocante e tema di creacion.” Door cu Jacqueline a haci caso di su consenshi bon entrena, el a sintie hopi bon. Bo consenshi ta motiva bo pa haci mescos?

18. Dicon un consenshi bon entrena ta hopi importante pa un cristian?

18 Nos mester ta determina pa sigui biba na harmonia cu e principionan di Jehova. Nos consenshi por yuda nos hopi bon den esey. Door di studia e Palabra di Dios regularmente, medita riba loke nos a siña y haci esfuerso pa aplica esey, nos ta sigui entrena nos consenshi. Di e manera ey, nos consenshi lo ta un excelente guia den nos bida cristian.

^ par. 7 Wak e “Pregunta di Lector” den E Toren di Vigilancia di 15 di juni 2004, pagina 29 pa 31, y e buki “Keda den e Amor di Dios”, pagina 215 pa 217.