Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2015

 FOR DI NOS ARCHIVO

“Jehova A Trece Boso Francia pa Boso Siña e Berdad”

“Jehova A Trece Boso Francia pa Boso Siña e Berdad”

NA MUCHA, Antoine Skalecki tabata traha den un mina di carbon. Cu yudansa di cabay, e tabata transporta carbon cu dificultad door di tunnelnan scur cu tabata keda 500 meter bou di superficie di tera. E tata di Antoine a sufri lesionnan serio ora cu un mina a basha den otro, y e famia no por a haci nada otro cu manda Antoine bay traha na su luga den e minanan. E tabata traha nuebe ora pa dia, y na un ocasion el a hera perde su bida ora cu un mina a basha den otro.

Herment cu minero Polaco a uza, y e mina na Dechy, banda di Sin-le-Noble, caminda Antoine Skalecki tabata traha

Antoine tabata un di e tantisimo yiunan cu a nace di mayornan Polaco na Francia den decada di 1920 y 1930. Dicon tabatin asina tanto Polaco na Francia? Wel, ora cu Polonia a haya su independencia despues di Prome Guera Mundial, e pais a hay’e cu un problema serio di sobrepoblacion den cierto parti di e pais. Francia, en cambio, cu urgencia tabatin mester di homber pa traha den su minanan di carbon, ya cu nan a perde mas cu un miyon homber den guera. Pues, gobierno di Francia y di Polonia a firma un acuerdo di inmigracion na september 1919. Na 1931, ya tabatin 507.800 Polaco ta biba na Francia, y mayoria di nan a establece nan mes den e regionnan di mina den parti noord di e pais.

E inmigrantenan Polaco, cu tabata trahadornan diligente, a bin cu nan custumbernan cultural y tambe nan fervor religioso. Segun Antoine, kende awor tin 90 aña: “Mi welo Joseph tabata papia cu hopi respet di e Santo Scritura, un respet cu el a haya for di su tata.” Riba diadomingo, famianan Polaco tabata bisti nan mihor paña pa bay misa, manera tabata nan custumber na nan pais di origen. Nan no tabata worry cu algun di nan bisiñanan Frances, cu no tabata dje religioso ey, tabata wak nan cu desprecio.

For di 1904, Studiantenan di Bijbel tabata predica cu hopi entusiasmo den e region Nord-Pas-de-Calais. Ey tabata caminda hopi inmigrante Polaco a tende pa prome biaha di e Studiantenan di Bijbel. Na 1915 nan a cuminsa publica e edicion mensual di E Toren di Vigilancia na Polaco, y na 1925, e revista The Golden Age (awor ¡Despertad!) a bira disponibel na e idioma ey. Hopi famia a acepta e mensahe biblico di e revistanan aki y di e buki The Harp of God na Polaco.

 E famia di Antoine a tende di e Studiantenan di Bijbel via di un omo di dje cu a bay su prome reunion na 1924. E mesun aña ey, e Studiantenan di Bijbel a tene nan prome asamblea na Polaco na Bruay-en-Artois. Menos cu un luna despues, den e mesun stad ey un representante di e sede mundial, Joseph F. Rutherford, a tene un reunion publico caminda 2.000 persona a asisti. Conmovi pa e cantidad grandi di hende presente, di cua mayoria tabata Polaco, Ruman Rutherford a bisa nan: “Jehova a trece boso Francia pa boso siña e berdad. Awor aboso y boso yiunan mester yuda e Francesnan. Ainda tin hopi trabou pa haci den e predicacion, y Jehova lo percura pa mas predicador.”

Y esey ta exactamente loke Jehova a haci tambe. E cristiannan Polaco a traha mes diligente den e trabou di predica cu nan a traha den e minanan. Algun di nan hasta a bay Polonia bek pa comparti cu otro hende e berdadnan precioso cu nan a siña. Entre nan tabatin Teofil Piaskowski, Szczepan Kosiak y Jan Zabuda.

Pero hopi ruman di habla Polaco a keda Francia y a sigui predica cu entusiasmo hunto cu nan rumannan Frances. Na 1926, na un asamblea general den e comunidad Frances Sin-le-Noble, 1.000 persona a asisti na e sesion Polaco y 300 na e esun Frances. E Anuario 1929 a bisa: “Durante e aña aki, 332 ruman Polaco a simbolisa nan consagracion [dedicacion] pa medio di bautismo.” Prome cu Segundo Guera Mundial a cuminsa, 32 di e 84 congregacionnan na Francia tabata di habla Polaco.

Rumannan Polaco na Francia riba caminda pa congreso. E spandoek ta bisa “Testigonan di Jehova”

Na 1947, hopi testigo di Jehova a acepta e invitacion di e gobierno Polaco pa regresa Polonia. Sinembargo, danki na e trabou cu nan a haci hunto cu nan rumannan Frances, e aña ey toch tabatin un aumento di 10 porciento den e cantidad di publicador di Reino. Figura bo! Durante e añanan cu a sigui, di 1948 pa 1950, tabatin aumento di 20 porciento, 23 porciento y hasta di 40 porciento. Pa yuda e publicadornan nobo aki, e sucursal na Francia a nombra e prome superintendentenan di circuito na 1948. Di e cinco rumannan cu nan a scoge, cuater tabata Polaco, y Antoine Skalecki tabata un di nan.

Hopi testigo di Jehova na Francia ainda tin e fam Polaco di nan antepasadonan, kendenan a traha duro tanto den e minanan di carbon como den e trabou di predica. Awe tambe tin un cantidad grandi di inmigrante ta siña e berdad na Francia. Sea cu e publicadornan aki bolbe na nan pais di origen of keda Francia, nan tur ta predica cu entusiasmo y ta sigui e ehempel di nan predecesornan Polaco.—For di nos archivo na Francia.