Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2015

Medita Riba e Gran Amor di Jehova

Medita Riba e Gran Amor di Jehova

“Lo mi medita riba tur bo obranan.”—SAL. 77:12.

CANTICA: 18, 61

1, 2. (a) Dicon bo ta convenci cu Jehova stima su pueblo? (b) Dios a crea hende cu ki necesidad?

KICO ta convence bo cu Jehova stima su pueblo? Prome cu bo contesta e pregunta ey, pensa un rato riba e ehempel di tres ruman muher: Taylene, Brigitte y Sandra. Pa varios aña e rumannan a duna Taylene conseho amoroso pa e ta balansa y pa e no ta demasiado exigente cu su mes. Taylene a bisa: “Si Jehova no tabata stima mi, lo e no a preocupa asina tanto pa mi.” Den caso di Brigitte, su casa a muri y e so mester a cria e dos yiunan cu nan tin. El a bisa: “Un di e cosnan di mas dificil, specialmente, pa un mayor soltera ta lanta yiu den un mundo influencia pa Satanas. Pero a pesar di e dolor di curason y e lagrimanan, Jehova semper a guia mi, y e no a laga e problemanan bira mas di loke mi por a soporta. Pesey mi tin sigur cu e stima mi.” (1 Cor. 10:13) Sandra tin un maleza incurabel. Na un congreso, e esposa di un ruman homber bon conoci a cumind’e y a mustra interes personal den dje. E esposo di Sandra a bisa: “Aunke nos no tabata conoce e ruman muher, su interes sincero a touch nos curason. E cariño cu nos rumannan ta mustra, hasta den cosnan chikito, ta laga mi mira cuanto Jehova stima nos.”

2 Jehova a crea hende cu e necesidad di stima otro hende y  pa hende stima nan, y si e necesidad ey no ser satisface, nos ta sinti nos tristo. Ora cos ta bay malo, kisas debi na situacionnan inespera of decepcion, maleza, problema financiero of pasobra nos no ta haya bon resultado den e trabou di predica, nos lo por pensa cu Jehova no stima nos mas. Si nos ta sinti asina, corda cu nos ta hopi valioso pa Dios y cu e tin nos man bon teni. Jehova hamas lo lubida nos si nos keda fiel na dje.—Isa. 41:13; 49:15.

3. Kico por yuda nos bira mas convenci cu Jehova stima nos?

3 Taylene, Brigitte y Sandra tabata convenci cu Jehova tabata cu nan durante momentonan dificil, y bo tambe por ta convenci di esey. (Sal. 118:6, 7) Den e articulo aki, nos lo analisa cuater cos cu ta proba cu Jehova stima nos. Nan ta (1) e creacion, (2) Bijbel (3) oracion y (4) e rescate. Si nos medita riba e bon cosnan cu Jehova a haci, nos lo ta mas agradecido ainda pa su gran amor.—Lesa Salmo 77:11, 12.

MEDITA RIBA E CREACION DI JEHOVA

4. Ora nos medita riba creacion, kico nos ta siña tocante Jehova?

4 Acaso nos lo por mira Jehova su gran amor pa nos den loke el a crea? Claro cu si. E simpel echo cu el a crea tur cos ta un muestra di su amor. (Rom. 1:20) Jehova a diseña e Tera cu tur loke ta necesario pa nos por keda na bida. Pero e no kier pa nos djis existi; e kier pa nos disfruta di bida. Por ehempel, nos tin mester di cuminda pa keda na bida. Pero Jehova a percura pa e Tera produci un variedad asina grandi di cuminda cu ta un placer pa come. (Ecl. 9:7) Catherine, un ruman muher di Canada, gusta naturaleza, specialmente den temporada di lente. El a bisa: “Ta increibel pa mira con tur cos ta haya bida bek. E matanan di flor ta programa pa floria. E parhanan ta bin bek for di caminda nan a bay pasa winter, entre nan, e blenchi cu ta bin come na e baki cu mi tin colga pafo di bentana di cushina. Jehova ta duna nos asina tanto cos bon. E mester ta stima nos hopi.” Nos Tata celestial ta disfruta di su creacion, y e kier pa nos tambe disfruta di dje.—Echo. 14:16, 17.

5. Con e manera cu Jehova a crea nos ta demostra cu e stima nos?

5 Jehova a crea nos cu e capacidad di traha y di disfruta di nos trabou. (Ecl. 2:24) El a duna hende e tarea di yena e Tera, cultiv’e y cuida e piscanan, e paharitonan y otro bestianan. (Gen. 1:26-28) Ademas, Jehova a crea nos cu cualidadnan bunita cu ta permiti nos imita su personalidad.—Efe. 5:1.

MIRA E BALOR DI E PALABRA DI DIOS

6. Dicon nos mester aprecia e Palabra di Dios?

6 Un otro muestra di Jehova su gran amor ta su Palabra inspira. Den dje nos ta siña ken e ta y con el a trata cu humanidad. Por ehempel, Bijbel ta conta nos con el a trata cu e Israelitanan a pesar cu hopi biaha nan a desobedec’e. Salmo 78:38 ta bisa: “Siendo misericordioso, [Dios] a pordona nan inikidad, y no a destrui nan; hopi biaha el a kita su rabia for di riba nan, y no a lanta tur tur su furia.” Si bo medita riba e versiculo ey, lo bo compronde mas mihor ainda cuanto Jehova stima bo y ta preocupa pa bo, a pesar cu bo ta imperfecto. Bo por ta sigur cu pa Jehova bo ta importante.—Lesa 1 Pedro 5:6, 7.

7. Pa ki otro motibo nos mester balora Bijbel?

7 Bijbel ta e medio principal cu Dios ta  uza pa comunica cu nos. Ora tin un bon comunicacion entre mayor y yiu, nan amor y confianza pa otro ta crece. Jehova ta nos Tata amoroso. Y ta berdad cu nunca nos no a mir’e ni a tende su stem, pero e ta “papia” cu nos mediante su Palabra inspira, pues lo ta bon pa nos scuch’e. (Isa. 30:20, 21) Jehova kier guia nos y proteha nos, pasobra nos ta su pueblo. Tambe e kier pa nos siña conoc’e y pone nos confianza den dje.—Lesa Salmo 19:7-11; Proverbionan 1:33.

Aunke Jehova a uza Jehu pa hala atencion di Jehosafat pa un fayo cu el a comete, Jehova a haya “algo bon” den e Rey (Wak paragraf 8, 9)

8, 9. (a) Kico Jehova kier pa nos sa? (b) Kico nos ta siña for di e ehempel di Jehosafat?

8 Jehova kier pa nos sa cu e stima nos y cu e no ta wak nos imperfeccionnan so. E ta busca e cosnan bon cu nos tin. (2 Cro. 16:9) Esey ta loke el a haci cu Rey Jehosafat (Josafat) di Juda. Un biaha, Jehosafat a tuma e mal decision di compaña Rey Acab di Israel durante un bataya pa reconkista e stad Ramot-galaad cu tabata den poder di e Sirionan. E 400 profetanan falso di Acab a sigura e Rey malbado ey cu lo e gana e bataya. Sinembargo, Micaias, e profeta di Jehova, a bisa cu nan lo ser derota, y esey ta net loke a sosode. Acab a muri den bataya, y di baina Jehosafat a scapa. Ora Jehosafat a regresa Jerusalem, Jehova a uza profeta Jehu pa hala Jehosafat su atencion pa e fayo cu el a comete. Pero a pesar di e fayo ey, Jehu a bisa Jehosafat: “Tin algo bon den bo.”—2 Cro. 18:4, 5, 18-22, 33, 34; 19:1-3.

 9 Por ehempel, na cuminsamento di Jehosafat su reinado, el a manda un grupo di prins, levita y sacerdote bishita tur e stadnan di Juda pa siña e pueblo e Ley di Jehova. E campaña tabata asina efectivo cu e hendenan di e nacionnan bisiña a cuminsa haya temor di Jehova. (2 Cro. 17:3-10) Ta berdad cu Jehosafat a tuma un mal decision, pero Jehova no a lubida e cosnan bon cu el a haci anteriormente. E relato biblico aki ta un gran consuelo pa nos, ya cu debi na imperfeccion nos tambe ta comete fayo. Pero Jehova lo sigui stima nos si di curason nos ta haci nos esfuerso pa cumpli cu su boluntad.

APRECIA E PRIVILEGIO DI HACI ORACION

10, 11. (a) Dicon oracion ta un regalo asina bunita di Jehova? (b) Con Dios ta contesta nos oracionnan? (Wak e prome plachi.)

10 Un bon tata ta scucha su yiunan ora nan kier papia cu ne. E ta stima nan, y e kier sa kico tin den nan curason y kico ta preocupa nan. Ta asina Jehova ta. E ta nos Tata celestial y e ta scucha nos ora nos kier papia cu ne mediante e bunita privilegio di oracion.

11 Nos por acerca Jehova den oracion ki ora cu nos kier. E ta un amigo cu ta disponibel 24 ora pa dia. Taylene, menciona anteriormente, a bisa: “Bo por papia tur cos cu ne.” Nos por conta Jehova nos pensamentonan di mas intimo den oracion, y e ta scucha nos y ta compronde nos mihor cu cualkier otro persona. Tin biaha e ta contesta nos via di un texto di Bijbel of un articulo di un revista of via e palabranan di animacion di un ruman. E echo cu Jehova ta contesta nos oracionnan ta un prueba mas di su gran amor pa nos.

12. Dicon ta bon pa nos medita riba e oracionnan cu tin den Bijbel? Duna un ehempel.

12 Den Bijbel nos ta haya oracion di personanan cu a habri nan curason pa Dios y a cont’e nan sintimentonan di mas profundo. Nos por siña algun les importante for di e oracionnan ey. Lo ta bon pa de bes en cuando nos studia nan durante nos Adoracion Como Famia. Si nos medita riba nan contenido, esey por yuda nos expresa nos sintimentonan mas mihor ora nos ta papia cu Dios. Por ehempel, medita riba e oracion humilde cu Jonas a haci den bariga di e pisca grandi. (Jon. 1:17–2:10) Tambe nos por repasa e palabranan sincero cu Salomon a dirigi na Jehova durante inauguracion di e tempel. (1 Rey. 8:22-53) Of nos por medita riba e Oracion di Nos Tata cu Hesus a siña nos. (Mat. 6:9-13) Pero mas cu tur cos, “laga Dios sa” regularmente “kico ta boso peticionnan.” Como resultado, “e paz di Dios cu ta surpasa tur comprondemento lo proteha boso curason y boso mente.” E muestra aki di Jehova su gran amor, esta, e privilegio di haci oracion, lo aumenta nos gratitud p’e.—Flp. 4:6, 7.

DEMOSTRA GRATITUD PA E RESCATE

13. Ki oportunidad nos tin danki na e rescate di Hesus?

13 E sacrificio di rescate di Hesus ta un regalo cu Jehova a duna nos pa asina “nos por haya bida”, aunke nos no tabata merece esey. (1 Juan 4:9) Apostel Pablo a splica cu esaki ta un muestra maraviyoso di e amor di Dios. El a skirbi: “Cristo a muri pa hende malbado na e tempo stipula. Pasobra masha poco biaha un persona lo muri pa un hende husto; si, pa un bon hende, kisas, un persona por risca muri. Pero Dios a demostra su amor pa  nos di e manera aki: Cristo a muri pa nos mientras cu nos tabata pecador ainda.” (Rom. 5:6-8) E rescate ta e prueba di mas grandi di e amor di Dios y ta duna hende e oportunidad pa por tin un bon relacion cu ne.

14, 15. Ki oportunidad e rescate ta ofrece na (a) cristiannan ungi? (b) na cristiannan cu tin speransa di biba riba Tera?

14 Tin un grupito di persona cu ta sinti e gran amor di Dios na un manera hopi special. (Juan 1:12, 13; 3:5-7) Ta trata di e cristiannan cu a ser ungi cu spirito santo y cu a bira “yiu di Dios.” (Rom. 8:15, 16) Pablo a bisa e cristiannan ungi di su tempo cu Dios “a lanta [nan] for di morto hunto cu Cristo Hesus y a pone [nan] sinta hunto cu ne den e luganan celestial.” (Efe. 2:6) Dicon el a bisa esaki siendo cu e cristiannan ey tabata riba Tera ainda? Pasobra e unginan ta ocupa un posicion spiritual eleva debi cu “Dios a seya [nan] ... cu e spirito santo cu el a priminti.” E spirito santo ey ta un garantia cu nan lo haya e herencia cu ta spera nan, esta, e bida cu tin “reserva pa [nan] den cielo.”—Efe. 1:13, 14; Col. 1:5.

15 Tur otro hende cu no ta ungi y cu ta pone fe den e rescate por bira amigo di Jehova cu e bunita speransa di biba pa semper den un paradijs riba Tera y, cu tempo, ser adopta como yiu di Dios. Pues, e rescate ta demostra cu Jehova stima humanidad. (Juan 3:16) Si nos tin e speransa di biba pa semper riba Tera y nos sigui sirbi Jehova fielmente, nos por tin sigur cu nos lo disfruta di e mihor bida posibel den e mundo nobo. Ta na su luga anto pa nos mira e rescate como e prueba di mas grandi di Dios su amor pa nos.

MUSTRA DIOS CU BO TA STIM’E

16. Dicon ta bon pa nos medita riba e tantisimo pruebanan cu tin di Dios su gran amor pa nos?

16 Ta imposibel pa menciona tur e maneranan cu Jehova ta demostra su amor pa nos. Rey David a canta: “Ki precioso bo pensamentonan ta pa mi, o Dios! Ki grandi nan cantidad ta! Si mi lo a conta nan, nan lo a surpasa e pipitanan di santo.” (Sal. 139:17, 18) Pues, medita riba e tantisimo pruebanan cu tin di Dios su gran amor pa nos. Esey lo motiva nos pa stim’e y dun’e lo mihor.

17, 18. Menciona algun manera cu nos por demostra Jehova cu nos ta stim’e.

17 Tin hopi manera cu nos por demostra Jehova cuanto nos ta stim’e. Por ehempel, nos ta mustra amor pa Dios y pa nos prohimo door di predica e bon noticia di Reino cu entusiasmo. (Mat. 24:14; 28:19, 20) Un otro manera ta door di persevera fielmente a pesar di dificultadnan cu ta pone nos fe na prueba. (Lesa Salmo 84:11; Santiago 1:2-5.) Kisas nos problemanan ta grave, pero nos por tin sigur cu Jehova ta mira nos sufrimento y lo yuda nos pasobra nos tin gran balor den su bista.—Sal. 56:8.

18 Nos ta demostra Jehova cu nos ta stim’e door di medita riba su creacion y riba e otro cosnan maraviyoso cu el a haci pa nos. Tambe nos ta demostr’e cu nos ta stim’e y ta stima su Palabra door di studia Bijbel diligentemente. Amor pa Jehova ta hala nos mas cerca dje mediante oracion. Y nos amor pa Dios ta bira mas profundo ora nos reflexiona riba e sacrificio di rescate di Hesus cu el a percura pa nos por haya pordon pa nos picanan. (1 Juan 2:1, 2) Esakinan ta djis algun di e maneranan cu nos por demostra Jehova cu nos ta stim’e pa e gran amor cu e tin pa nos.