Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2015

Bo Ta Prepara pa e Fin?

Bo Ta Prepara pa e Fin?

“Maske e ta tarda, sper’e.”—HAB. 2:3.

CANTICA: 128, 45

1, 2. Ki actitud sirbidornan di Jehova semper tabatin?

JEHOVA su sirbidornan semper tabata pendiente di cumplimento di profecianan inspira. Por ehempel, Jeremias a profetisa cu Babilonia lo a destrui Juda, y esey ta loke a sosode na aña 607 prome cu Cristo. (Jer. 25:8-11) Isaias a profetisa cu Jehova lo a trece e Hudiunan bek na nan tera, y el a bisa: “Bendiciona ta tur esnan cu ta spera riba dje.” (Isa. 30:18) Mikeas tambe a spera riba cumplimento di e promesanan di Jehova relaciona cu su pueblo di antiguedad, y el a bisa: “Lo mi spera riba e Dios di mi salbacion.” (Mik. 7:7) Y pa hopi siglo, e sirbidornan di Dios a biba en espera di e cumplimento di profecianan tocante e Mesias, of Cristo.—Luc. 3:15; 1 Ped. 1:10-12. *

2 Awe, nos tambe como sirbidor di Dios ta den expectativa, ya cu nos ta warda riba e cumplimento di profecianan relaciona cu e Reino di Jehova. Hesus, como Rey di e Reino ey, lo caba cu sufrimento, elimina e malbadonan y libra e pueblo di Dios di e mundo teribel aki cu ta den gara di  Satanas. (1 Juan 5:19) Pues, nos tin cu keda alerta y consciente cu e fin ta mas cerca cu nunca.

3. Si nos tin hopi tempo ta warda pa e fin yega, kico kisas nos ta puntra nos mes?

3 Como sirbidor di Jehova, nos ta anhela pa mira e boluntad di Dios sosode na Tera mescos cu den cielo. (Mat. 6:10) Sinembargo, si nos tin hopi aña ta warda ansiosamente pa e fin yega, kisas nos ta cuminsa puntra nos mes: Dicon nos mester sigui sper’e? Laga nos wak.

DICON NOS TIN CU SIGUI SPER’E?

4. Kico ta un di e motibonan principal pakico nos tin cu “keda vigila”?

4 Bijbel ta splica na un manera cla con nos mester spera e fin di e sistema aki. Hesus a bisa su siguidornan pa “keda vigila” y pa “keda lanta.” (Mat. 24:42; Luc. 21:34-36) E solo echo cu Hesus a duna nos e mandato aki ta un bon motibo pa nos sigui spera cu e fin ta bin pronto. E organisacion di Jehova a pone un bon ehempel pa nos. Bes tras bes e organisacion ta recorda nos via di e publicacionnan pa “spera y corda semper riba e binida di e dia di Jehova” y pa keda cu nos bista fiha riba e mundo nobo cu Dios a priminti.—Lesa 2 Pedro 3:11-13.

5. Dicon nos mester ta mas alerta cu nunca?

5 E cristiannan di e prome siglo tabatin bon motibo pa keda den expectativa di e dia di Jehova, pero nos tin mas motibo ainda. Dicon? Pasobra nos ta bibando durante e presencia di Cristo. Con nos por sa? Wel, for di aña 1914 e señal di su presencia cu e mes a duna ta cumpliendo: e situacion mundial ta cada dia pio y e bon noticia di Reino ta ser predica den tur parti di mundo. Pues, ta bisto cu nos ta bibando den e ultimo dianan, of “conclusion di e era aki.” (Mat. 24:3, 7-14) Siendo cu Hesus no a bisa con largo e periodo aki lo dura, nos tin cu sigui vigila y keda alerta pasobra e fin por yega un ora pa otro.

6. Dicon nos por spera cu cos lo bira pio di loke e ta caba?

6 Kisas un hende ta puntra: Pero kico si falta hopi tempo pa e fin yega, y ainda cosnan mester bira hopi mas pio di loke nan ta awor? Ta berdad cu Bijbel ta bisa cu maldad lo aumenta mas y mas “den e ultimo dianan.” (2 Tim. 3:1, 13; Mat. 24:21; Rev. 12:12) Pues, aunke e situacion di mundo ta malo, nos por spera cu lo e bira pio.

7. Kico Mateo 24:37 pa 39 ta siña nos tocante e situacion di mundo ora cu “e tribulacion grandi” yega?

7 Pero con malo e situacion tin cu bira prome cu “e tribulacion grandi”? (Rev. 7:14) Acaso bo ta kere cu tur pais lo mester ta den guera, cu tur hende lo tin cu pasa hamber of cu den tur famia lo mester tin hende malo? Si esaki ta e caso, e ora ey lo ta bisto pa tur hende—hasta pa personanan cu no ta interesa den loke Bijbel ta bisa—cu e profecianan ta cumpliendo y cu e fin ta cerca. Sinembargo, Hesus a bisa cu mayoria di hende lo “no ... haci caso” di su presencia, y cu nan lo sigui cu nan actividadnan normal di bida te ora baca hoga. (Lesa Mateo 24:37-39.) Pues, e Scritura no ta indica cu prome cu e “tribulacion grandi” e situacion mundial lo bira asina malo cu hende lo haya nan obliga di kere cu e fin ta cerca.—Luc. 17:20; 2 Ped. 3:3, 4.

8. Kico ta bisto pa esnan cu ta obedece e mandato di Hesus pa “keda vigila”?

8 En realidad, e proposito di e señal  cu Hesus a duna tabata pa laga su siguidornan—cu si ta obedece su mandato pa “keda vigila”—sa den ki tempo nan ta bibando. (Mat. 24:27, 42) Y for di 1914, tur e detayenan di e señal ta cumpliendo. No tin duda cu nos ta bibando awor den “e conclusion di e era aki”, esta, un periodo di tempo limita cu lo termina ora cu e mundo di Satanas ser destrui.

9. Dicon nos mester keda pendiente di e fin?

9 Pues, dicon cristiannan mester keda pendiente di e fin? Pasobra esey ta loke Hesus a manda y pasobra nos ta reconoce e señal di su presencia. Nos ta kere cu e fin ta cerca, no djis pasobra nos ta kere kico cu nos tende, sino pasobra nos tin prueba solido cu ta basa riba Bijbel. Pesey nos ta keda vigila, alerta, lanta y prepara pa e fin.

CUANTO TEMPO NOS MESTER SIGUI SPER’E?

10, 11. (a) Dicon Hesus a bisa su discipelnan cu nan mester ta prepara? (b) Kico Hesus a bisa cu su discipelnan mester haci si e fin no yega lihe manera nan a pensa? (Wak e prome plachi.)

10 Hopi di nos tin decadanan lanta den sentido spiritual, pendiente di e fin. Pero nos no mester laga e echo cu hopi tempo a pasa pone nos pega soño den sentido spiritual. Nos mester ta prepara pa ora Hesus yega pa destrui e mundo di Satanas. Corda cu Hesus a bisa: “Keda alerta, keda lanta, pasobra boso no sa ki ora e tempo stipula ta. Ta manera un homber cu a biaha pa exterior y a laga su cas na encargo di su esclavonan. El a duna cada un di nan un trabou y a duna e wardador di porta ordo pa keda vigila. Pesey, keda vigila, pasobra boso no sa ki ora e Doño di cas ta bin, sea ta casi anochi, meyanochi, ora gay canta of mainta trempan, pa ora e yega diripiente, e no haya boso drumi. Ma loke mi ta bisa boso, mi ta bisa tur hende: Keda vigila.”—Mar. 13:33-37.

11 Ora cu e siguidornan di Hesus a compronde cu e presencia di Cristo a cuminsa na 1914, nan a realisa cu e fin por yega un ora pa otro y nan a prepara nan mes pa esey. Con? Nan a cuminsa haci mas den e trabou di predica e Reino. Pero Hesus a indica cu kisas lo el a yega mas laat di loke su discipelnan a pensa, sea “ora gay canta of mainta trempan.” Kico nan mester a haci den tal caso? El a bisa nan: “Keda vigila.” Di manera cu, aunke nos tin hopi tempo ta warda, nos no mester pensa cu e fin lo tarda hopi mas of lo no yega nunca.

12. (a) Kico Habacuk a puntra Jehova? (b) Kico Jehova a contest’e?

12 Pensa un rato riba profeta Habacuk, kende a haya e encargo di spierta e habitantenan di Jerusalem cu e stad lo ser destrui. Otro profetanan prome cu ne ya tabatin basta aña ta predica e mesun mensahe ey. E situacion a bira asina grave cu e malbadonan tabata oprimi hende husto y tur caminda tabata reina inhusticia. Pesey no ta un sorpresa cu Habacuk a puntra Jehova: “Te ki tempo, o SEÑOR, lo mi sclama pa yudansa?” En bes di bisa e profeta ki dia e fin lo a bin, Jehova a primintie: “E lo no tarda.” Tambe Jehova a bisa Habacuk pa “sper’e.”—Lesa Habacuk 1:1-4; 2:3.

13. (a) Kico Habacuk lo por a pensa? (b) Dicon lo tabata peligroso p’e pensa asina?

13 Imagina bo si Habacuk a cansa di warda y a pensa: Mi tin años ta tende tocante e destruccion di Jerusalem. Kico si ainda falta hopi tempo pa esey sosode?  Pakico ami tin cu sigui profetisa comosifuera ta mañan e destruccion ta bin? Mi ta laga esey pa otro hende. Si Habacuk a pensa asina, lo el a perde e bon relacion cu e tabatin cu Jehova, y kisas hasta perde su bida ora cu e Babilonionan a destrui Jerusalem.

14. Dicon nos lo ta masha agradecido cu Jehova a spierta nos pa keda alerta?

14 Awor, imagina cu bo ta den e mundo nobo. Tur loke a ser profetisa pa e ultimo dianan a sosode manera Jehova a bisa. Mas bo medita riba esey, mas confianza bo ta haya den Jehova y den e promesanan cu ainda falta pa cumpli. (Lesa Josue 23:14.) Jehova, e Dios cu tin control absoluto riba tempo, a trece e fin na e mihor momento. Esta agradecido nos lo ta e tempo ey cu el a spierta su pueblo pa keda alerta!—Echo. 1:7; 1 Ped. 4:7.

SIGUI PREDICA MIENTRAS NOS TA SPERA E FIN

Abo ta predica e bon noticia cu entusiasmo? (Wak paragraf 15)

15, 16. Dicon nos mester haci nos maximo esfuerso pa predica durante e tempo di fin aki?

15 Nos por tin sigur cu e organisacion di Jehova lo sigui corda nos riba e urgencia di e tempo. Pero e recordatorionan ey no ta solamente pa tene nos ocupa den e sirbishi di Dios, sino tambe pa yuda nos keda corda cu e señal di e presencia di Cristo ta cumpliendo y cu nos mensahe ta urgente. Kico ta e mihor cos cu nos por haci mirando den ki tempo nos ta biba? Wel, sigui busca prome e Reino y e husticia di Dios, y predica e bon noticia cu entusiasmo!—Mat. 6:33; Mar. 13:10.

16 Un ruman muher a yega di bisa hopi aña pasa: “Ora nos ta predica e bon noticia di e Reino di Dios, nos ... por yuda rescata hende di un morto sigur durante e binidero catastrofe mundial.” Y si tin un hende cu sa di kico e ta papiando, ta e ruman muher ey, pasobra na 1945, e cu su casa a sobrevivi un di e pio desasternan maritimo den historia dia cu e barco luhoso Wilhelm Gustloff a sink. Miles di hende a muri. Pero pa straño cu por parce, hasta den un situacion asina grave, tin hende ta lubida loke realmente ta importante. E ruman muher ta corda con segun cu e barco tabata sink un señora tabata yora: “Mi maletanan! Mi maletanan! Mi joyas! Tur mi joyas a keda den camber. M’a perde tur cos!” En cambio, otro pasaheronan cu si a compronde kico tabata importante a risca nan bida pa scapa personanan cu a cay den e awanan friu di lama. Mescos cu e otro pasaheronan ey, nos ta haci nos maximo esfuerso pa scapa mas tanto hende posibel. Pa nos, e trabou di predica ta hopi urgente pasobra nos sa  cu e desaster di mas grandi den historia ta na caminda y nos kier pa nan sobrevivi.

Tuma decisionnan cu ta yuda bo concentra riba e trabou di predica cu ta urgente (Wak paragraf 17)

17. Dicon nos por bisa cu e fin por yega un ora pa otro?

17 E cosnan cu ta pasa awe ta mustra sin duda cu e profecianan di Bijbel ta cumpliendo y cu e fin ta hopi cerca. Pues, no pensa cu ainda falta hopi tempo mas pa “e dies cachonan” y “e bestia salbahe” ataca Babilonia e Grandi, e imperio mundial di religion falso. (Rev. 17:16) Corda cu ta Dios ta esun cu lo “hinca den nan curason” e idea pa ataca religion falso, y esey por sosode un ora pa otro, sin previo aviso. (Rev. 17:17) Kiermen, fin di e mundo malbado di Satanas lo no tarda hopi mas pa bin. Pesey nos mester haci caso di e spiertamento di Hesus: “Presta atencion na boso mes pa boso curason nunca bira demasiado carga cu comemento di mas, bebemento di mas y e inkietudnan di bida, y diripiente e dia ey sorprende boso manera un trampa.” (Luc. 21:34, 35; Rev. 16:15) Laga nos sirbi Jehova cu un sentido di urgencia, y nos por tin sigur cu lo e “obra pa esun cu ta spera riba dje.”—Isa. 64:4.

18. Ki pregunta nos lo analisa den e siguiente articulo?

18 Mientras nos ta warda riba e fin di e mundo malbado aki, laga nos haci caso di e conseho di discipel Judas: “Rumannan stima, fortalece boso santisimo fe y haci oracion bou di guia di spirito santo pa asina boso por keda den e amor di Dios, mientras cu boso ta spera riba e misericordia di nos Señor Hesucristo, cu bida eterno na bista.” (Judas 20, 21) Pero con nos por demostra cu nos ta prepara pa biba den e mundo nobo cu Dios a priminti y cu di berdad nos ta desea p’e yega pa caba? Esey ta e topico cu nos lo trata den e siguiente articulo.

^ par. 1 Na pagina 200 di e buki Kico Bijbel Ta Siña Realmente? tin un lista di profecia tocante e Mesias y nan cumplimento.