Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Sirbi Jehova den “e Dianan Malo”

Sirbi Jehova den “e Dianan Malo”

ERNST, kende ta riba 70 aña a lamenta: “Cada bes mi ta haya mi cu mas problema di salud.” * E palabranan aki ta zona conoci? Si bo ta sinti cu bo salud ta bayendo atras y cu bo ta perdiendo energia pa motibo di edad, abo sigur lo compronde e palabranan di Eclesiastes capitulo 12. Den versiculo 1, e tempo di biehes ta ser yama “dianan malo.” Pero esey no kiermen cu bo tin cu hiba un bida di sufrimento. A pesar di bo edad, bo por tin un bida feliz, sirbiendo Jehova.

MANTENE BO FE FUERTE

Kerido rumannan di edad, boso no ta boso so den boso pruebanan. Den pasado, hopi sirbidor di Jehova tambe a enfrenta problemanan similar den nan biehes. Por ehempel, Isaak, Jacob y Ahias a perde nan bista. (Gen. 27:1; 48:10; 1 Rey. 14:4) Rey David tabata keda sinti friu maske cuanto nan a tap’e. (1 Rey. 1:1) Aunke cu Barzilai tabata hopi rico, e no tabata por a sinti smaak di cuminda ni disfruta di musica mas. (2 Sam. 19:32-35) Y tanto Abraham como Noemi a perde nan casa despues di tabatin hopi aña casa.—Gen. 23:1, 2; Ruth 1:3, 12.

Kico a yuda nan keda fiel na Jehova y no perde nan goso? Abraham, den su biehes, “a bira poderoso pa medio di su fe” den e promesanan di Dios. (Rom. 4:19, 20) Nos tambe tin mester di un fe fuerte. Y fe no ta depende di nos edad, capacidad ni circunstancianan di bida. Por ehempel, patriarca Jacob a sigui kere firmemente den e promesanan di Dios hasta ora e tabata debil, ciego y na cama. (Gen. 48:1-4, 10; Heb. 11:21) Awe tambe nos tin ehempelnan similar. Ines, di 93 aña, ta sufri di un maleza di musculo. A pesar di esey, e ta bisa: “Tur dia mi ta pensa riba Paradijs; esey ta yena mi cu speransa. Pa mi, cada dia ta un regalo di Jehova.” Esta un bunita actitud!

Pa nos fortalece nos fe, nos tin cu haci oracion, studia Bijbel y bay nos reunionnan. Profeta Daniel na edad avansa tabatin e custumber di haci oracion tres biaha pa dia y nunca no a stop di studia e Palabra di Dios. (Dan. 6:10; 9:2) Aunke Ana tabata viuda y di edad avansa, “nunca e no tabata falta tempel.” (Luc. 2:36, 37) Si boso ta bay reunion ora cu e curpa ta duna y ta participa den nan, boso lo haya mas animo y boso lo ta un animacion tambe pa tur esnan presente. No lubida cu Jehova semper ta balora boso oracionnan, aunke ya boso no por haci dje hopi ey mas p’e.—Prov. 15:8.

Sea hospitalario

Kisas hopi di boso, rumannan fiel, tin hopi gana di por tin boso bista pa lesa of e forsa pa bay reunion, pero boso ta ripara cu esey ta birando mas dificil of hasta imposibel. Kico boso por haci? Wel, concentra riba loke si boso por haci. Por ehempel, si boso no por bay reunion, kisas boso por scucha nan via telefon. Ingrid, un ruman di 79 aña cu no ta mira bon, ta prepara e reunionnan cu yudansa di e revista letter grandi cu un ruman homber di congregacion ta print p’e.

Probablemente boso tin algo cu otronan lo tin gana di haya mas di dje: tempo. Dicon boso no ta probecha di e tempo ey pa scucha grabacionnan di lesamento di Bijbel, di nos publicacionnan, di audiodrama of di discurso? Tambe boso por yama boso rumannan na telefon y combersa cu nan riba temanan spiritual. Asina boso lo disfruta di “un intercambio di estimulo.”—Rom. 1:11, 12.

KEDA ACTIVO DEN E TRABOU DI PREDICA

Predica e palabra

Christa, di mas cu 80 aña, ta lamenta: “Ta teribel ora cu bo no por ta activo mas manera antes.”  Pues, si boso ta sinti mescos cu ne, kico boso por haci pa keda cu boso goso? Peter, di 75 aña ta recomenda: “Tene un punto di bista positivo. Stop di keda pensa riba loke bo no por haci mas, y disfruta di loke si bo por haci.”

Con boso por sigui predica a pesar di boso edad? Heidi no por bay di cas pa cas mas manera antes, pero cu casi 90 aña el a siña uza computer pa skirbi carta. Algun ruman di edad ta predica mientras cu nan ta sinta na un parada di bus of den un parke. Y esnan cu ta biba den un cas di cuido tin nan mes teritorio: e personal medico cu ta traha eynan y e otro habitantenan.

Anima otro

Rey David, te den su biehes, ainda a haci hopi pa adoracion berdadero. El a haci donacion di placa y a organisa e trabounan pa construi e tempel. (1 Cro. 28:11–29:5) Di e mesun manera, boso tambe por keda na haltura di e progreso di e trabou mundial di predica y apoya esey te caminda boso circunstancianan ta permiti. Con asina? Wel, kisas boso por anima e pioneronan y otro publicadornan celoso di boso congregacion. Podise boso por duna nan un regalito, invita nan pa un snack of cuminda simpel of comparti algun palabra di animacion cu nan. Otro cos cu boso por haci ta di pidi Jehova den oracion pa yuda e hobennan, famianan, sirbidornan di tempo completo, rumannan cu ta malo y esnan cu tin responsabilidad di peso den e organisacion.

Nos kerido rumannan di edad, boso y boso sirbishi ta hopi valioso pa Jehova. No pensa nunca cu lo e benta boso afo. (Sal. 71:9) Nos Tata den cielo ta stima boso masha hopi mes. Pronto, nos edad lo sigui subi, pero sin “e dianan malo” cu biehes ta trece cu ne awe. Mas bien, nos lo ta yen di energia, nos lo tin salud perfecto y nos lo sigui sirbi nos Dios amoroso, Jehova, pa semper.

^ par. 2 A cambia algun nomber.