Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Esaki Ta Nos Luga di Adoracion

Esaki Ta Nos Luga di Adoracion

“E celo cu mi tin pa bo cas lo kima manera candela.”—JUAN 2:17.

CANTICA: 127, 118

1, 2. (a) Na unda e sirbidornan di Jehova di pasado tabata rindi adoracion na dje? (b) Kico Hesus tabata pensa di e tempel di Jehova na Jerusalem? (c) Kico nos lo trata den e articulo aki?

JEHOVA su sirbidornan semper tabatin un luga caminda nan tabata ador’e. Por ehempel, Abel kisas a uza un altar pa ofrece sacrificio na Dios. (Gen. 4:3, 4) Noe, Abraham, Isaak, Jacob y Moises tambe a traha altar. (Gen. 8:20; 12:7; 26:25; 35:1; Exo. 17:15) E Israelitanan a traha un tabernakel riba instruccion di Jehova. (Exo. 25:8) Siglonan despues, nan a traha un tempel pa rindi adoracion na Jehova. (1 Rey. 8:27, 29) Despues cu e Hudiunan a regresa for di exilio na Babilonia, nan tabata reuni regularmente den sinagoga. (Mar. 6:2; Juan 18:20; Echo. 15:21) Anto den e prome siglo, e cristiannan tabata tene reunion na cas di diferente miembro di e congregacion. (Echo. 12:12; 1 Cor. 16:19) Awe, e pueblo di Jehova ta reuni den miles di Salon di Reino, y eynan nan ta siña tocante Jehova y rindi adoracion na dje.

2 Hesus tabatin asina un gran amor y respet pa e tempel di Jehova na Jerusalem cu el a laga e discipelnan corda riba e palabranan profetico aki: “E celo cu mi tin pa bo cas lo kima  manera candela.” (Juan 2:17; Sal. 69:9) Naturalmente, nos no por bisa cu un Salon di Reino ta e “cas di [Jehova]” manera e tempel di Jerusalem tabata. (2 Cro. 5:13; 33:4) Pero toch nan ta luganan cu merece tur nos respet. Den e articulo aki nos lo trata algun principio biblico cu ta siña nos con nos mester comporta nos mes na nos Salonnan di Reino, con pa cuida nan y con nos por yuda financia nan. *

MUSTRA RESPET PA ADORACION PURO

3-5. (a) Kico ta e funcion di un Salon di Reino? (b) Con nos mester mira nos reunionnan?

3 Un Salon di Reino ta e centro di adoracion puro den e comunidad caminda e ta situa. Eynan nos ta tene reunionnan semanal caminda nos ta ricibi cuminda spiritual for di Jehova y tambe animacion y instruccion for di su organisacion. Na moda di papia, Jehova y Hesus ta invita nos tur siman pa bin come na “e mesa di Jehova.” (1 Cor. 10:21) Esey ta un invitacion hopi special, y nos mester dun’e e importancia cu e merece.

4 Jehova ta haya cu ta hopi importante pa nos ta na reunion pa ador’e y pa anima otro. Ta pesey el a inspira apostel Pablo pa urgi nos pa no keda sin bay nos reunionnan. (Lesa Hebreonan 10:24, 25.) Acaso nos ta mustra respet pa Dios si nos ta falta reunion sin cu tin un bon motibo pa esey? Nos no solamente mester ta regularmente na reunion, pero tambe nos mester bin reunion bon prepara y participa den nan cu entusiasmo. Asina nos ta mustra Jehova cuanto aprecio nos tin p’e y pa tur loke e ta percura.—Sal. 22:22.

5 E manera cu nos ta comporta nos na reunion y ta cuida nos Salon di Reino ta demostra cuanto respet nos tin pa Jehova. Nos kier pa nos conducta trece alabanza pa e nomber di Jehova, cu normalmente ta skirbi riba e borchi cu tin pafo di Salon di Reino.—Compara cu 1 Reynan 8:17.

6. Kico algun hende a bisa di nos Salonnan di Reino y di e personanan cu ta asisti na e reunionnan eynan? (Wak e prome plachi.)

6 Ora nos ta trata nos Salonnan di Reino cu respet, otronan cu no ta testigo di Jehova ta ripara esaki. Por ehempel, un homber na Turkia a bisa: “M’a gusta con limpi y na ordo tur cos tabata na e Salon di Reino cu mi a bishita. E hendenan tabata nechi bisti, tabatin un smile riba nan cara y a trata mi hopi amabel. Esey a impresiona mi masha hopi.” E homber a sigui bay reunion cu regularidad y poco tempo despues el a batisa. Den un stad na Indonesia, un congregacion a tene un open house prome cu nan a dedica un Salon di Reino nobo y a invita e bisiñanan y funcionarionan di gobierno. Hasta e alcalde a bin, y el a keda hopi impresiona ora el a mira con bon traha e edificio tabata, e diseño practico y e bunita hardin. El a comenta: “E echo cu e salon aki ta asina limpi ta demostra cu boso ta hende cu di berdad tin fe.”

Nos comportacion lo por mustra un falta di respet pa Dios (Wak paragraf 7, 8)

7, 8. Con nos ta mustra respet pa Jehova ora nos ta na Salon di Reino?

7 Nos ta demostra respet pa Jehova, kende ta esun cu ta invita nos na nos reunionnan, mediante nos forma di bisti, e manera cu nos ta cuida nos apariencia y nos comportacion. Pesey nos tin cu evita extremo den esakinan. Tin ruman ta hopi streng relaciona cu loke por y loke no por haci na Salon di Reino, mientras cu otro rumannan no ta worry mes cu esey. Aunke Jehova kier pa nos y nos invitadonan sinti comodo  na Salon di Reino, nos no mester haci nada cu ta mustra falta di respet pa e reunionnan. Por ehempel, nos no ta bisti paña slordig of mucho casual, ni sinta manda mensahe di telefon, papia of come durante reunion. Ademas, mayornan mester siña nan yiunan cu e Salon di Reino no ta caminda di core ni hunga.—Ecl. 3:1.

8 Ora Hesus a mira hende ta haci negoshi den e tempel, el a bira hopi rabia y a saca nan pafo. (Juan 2:13-17) Nos ta bay Salon di Reino pa adora Jehova y pa siña tocante dje. Pesey nos no mester uza e reunionnan pa haci negoshi ni pa trata asuntonan cu no tin nada di haber cu cosnan spiritual.—Compara cu Nehemias 13:7, 8.

NOS TA YUDA CU CONSTRUCCION DI MAS SALON DI REINO

9, 10. (a) Con e organisacion di Jehova a percura pa traha Salonnan di Reino nobo? (b) Kico a logra durante e ultimo añanan? (c) Kico e organisacion di Jehova a haci pa yuda congregacionnan cu no tin fondo pa traha nan mes Salon di Reino?

9 E organisacion di Jehova ta haci gran esfuerso pa traha mas Salon di Reino. Tin miles di boluntario cu ta yuda diseña, traha y renoba nan. Cu ki resultado? Desde 1 di november 1999 te cu awor a traha mas cu 28.000 bunita Salon di Reino rond mundo. Esey ta nifica cu durante e ultimo 15 añanan e rumannan a traha rond di 5 Salon di Reino pa dia.

10 Jehova su organisacion a bin cu un programa pa uza rumannan boluntario y contribucion pa traha Salon di Reino na luganan cu tin mester di nan. E areglo amoroso aki ta basa riba e principio di Bijbel cu ta anima cristiannan cu tin di mas pa yuda esnan cu tin di menos pa asina por tin “un balansa.” (Lesa 2 Corintionan 8:13-15.) Sin e programa aki, hopi congregacion cu no tabatin suficiente fondo nunca lo por a traha nan mes Salon di Reino.

11. (a) Kico algun ruman a bisa tocante nan Salon di Reino nobo? (b) Con bo ta sinti bo ora bo pensa riba loke e programa mundial di construccion di Salon di Reino ta logrando?

11 Un congregacion na Costa Rica cu a beneficia di e programa aki a skirbi lo siguiente: “Ora nos wak nos Salon di Reino, ta manera un soño. Nos no por kere cu den ocho dia so nos bunita salon a keda cla te den e ultimo detaye. Esaki tabata posibel danki na e bendicion di Jehova, e areglonan di e organisacion y e apoyo di nos rumannan stima. E luga di adoracion aki ta un bunita joya cu Jehova a regala nos. Nos ta hopi contento mes.” E comentarionan ey no ta conmove bo? Rond mundo tin miles di ruman cu tambe ta sinti nan hopi contento y agradecido cu nan propio Salon di Reino. Ta bisto cu e programa mundial aki di construccion tin e bendicion di  Jehova, pasobra asina cu nan caba cu un salon nobo, hopi mas hende ta cuminsa bin reunion pa siña tocante nos Creador amoroso.—Sal. 127:1.

12. Con nos por yuda cu construccion di mas Salon di Reino?

12 Hopi ruman tabatin e oportunidad di yuda cu trahamento di un Salon di Reino, y nan a disfruta masha hopi di esey. Pero kico si nos circunstancianan no ta permiti nos bay yuda na e luga di construccion? Wel, kisas nos por contribui cu donacion pa traha mas Salon di Reino. Ora nos ta haci tur loke nos por pa apoya e trabou aki, nos ta sinti e goso di duna y, mas importante ainda, nos ta alaba Jehova. Di e manera ey nos ta sigui e ehempel di sirbidornan di Dios di tempo biblico cu tabata ansioso pa contribui pa yuda traha nan luganan di adoracion.—Exo. 25:2; 2 Cor. 9:7.

NOS MESTER TENE NOS SALON DI REINO LIMPI

13, 14. Menciona algun principio biblico cu ta mustra cu nos mester tene nos Salon di Reino limpi y na ordo.

13 Jehova ta un Dios limpi y santo. E ta un Dios di ordo. Pesey nos tin cu tene nos Salon di Reino limpi y na ordo pa e refleha e cualidadnan di Jehova. (Lesa 1 Corintionan 14:33, 40.) Bijbel ta indica cu limpieza fisico ta estrechamente liga cu limpieza spiritual y cu santidad. (Rev. 19:8) Pues, si nos kier pa Jehova acepta nos sirbishi, nos mester percura pa nos adoracion, nos manera di pensa, nos accionnan y hasta nos curpa ta limpi.

14 Ora nos ta tene nos Salon di Reino limpi y na ordo, nos lo invita hende libremente na nos reunionnan, sin sinti berguensa debi na e estado di nos salon. Si nos ta bisa  nan cu pronto nos ta bay biba den un mundo limpi, nan ta spera cu nos luga di reunion tambe ta limpi. Asina e hendenan ta mira cu nos mes ta practica loke nos ta predica y cu nos ta adora un Dios santo y limpi, kende pronto lo transforma e Tera aki den un bunita paradijs.—Isa. 6:1-3; Rev. 11:18.

15, 16. (a) Dicon kisas ta dificil pa tene e Salon di Reino limpi? (b) Dicon ta importante pa tene nos salon limpi? (c) Ki programa di limpieza di salon bo congregacion tin? (d) Ki privilegio nos tur tin?

15 No ta tur hende ta duna e mesun importancia na limpieza. Algun hende a lanta den luganan caminda tin tur servicio basico y ta facil pa haya productonan di limpieza. Otro hende a lanta caminda cayanan ta di tera y no tin suficiente awa. Pero sin importa unda nos ta biba of kico e hendenan den nos area ta pensa di limpieza, nos mester haci tur loke ta na nos alcance pa nos Salon di Reino ta limpi y na ordo, ya cu e ta carga e nomber di Jehova y ta e luga caminda nos ta ador’e.—Deu. 23:14.

16 Limpieza di Salon di Reino mester ta un cos organisa. E cuerpo di anciano mester traha un programa pa e congregacion y percura pa semper tin suficiente producto y articulo di limpieza disponibel. Asina, semper nos Salonnan di Reino ta mustra bunita. Tin algun trabou di limpieza cu mester tuma luga despues di cada reunion, mientras cu tin otro cos cu mester haci cu menos frecuencia. Si tin bon organisacion y supervision, lo no tin cosnan cu ta keda sin haci. Tur miembro di congregacion tin e privilegio di coopera cu limpieza di salon.

NOS SALONNAN MESTER DI MANTENCION

17, 18. (a) Kico algun sirbidor di Dios di pasado a haci pa cuida luganan di adoracion? (b) Dicon nos mester tene nos Salonnan di Reino den bon estado?

17 Sirbidornan di Jehova ta haci tur nan esfuerso pa mantene nan luganan di adoracion den bon estado. Rey Joas di Juda a duna ordo na e sacerdotenan pa uza e placa cu e pueblo a contribui na e cas di Jehova pa “drecha e dañonan na e cas, na unda cu nan [a] haya cualkier daño.” (2 Rey. 12:4, 5) Mas cu 200 aña despues, Rey Josias tambe a uza e contribucion di tempel pa laga drecha e cas di Jehova.—Lesa 2 Cronicanan 34:9-11.

18 Algun Comite di Sucursal ta raporta cu e hendenan den nan pais no tin custumber di tene edificio den bon estado. Kisas ta pasobra no tin suficiente recurso ni hende cu sa con pa haci e trabou. Sinembargo, nos tin cu corda cu si nos no mantene nos Salonnan di Reino, nan lo bay atras mas lihe y duna un mal impresion na e comunidad local. Di otro banda, ora nos tur den congregacion ta haci nos best pa tene e Salon di Reino den bon estado, Jehova ta ricibi e gloria cu e merece y nos no ta malgasta e fondonan cu nos rumannan ta contribui cu ne pa traha salon.

Nos mester tene nos Salon di Reino limpi y den bon estado (Wak paragraf 16, 18)

19. Kico bo tin pensa di haci pa apoya e luga caminda bo ta adora Jehova?

19 Un Salon di Reino ta un luga dedica na Jehova. Pesey, nos no por bisa cu e ta di un cierto persona of congregacion, a pesar cu legalmente e acta di propiedad ta bisa esey. E principionan cu nos a analisa den e articulo aki ta mustra cu nos tur tin cu percura pa e salon cumpli cu e proposito pa cua a trah’e. Nos ta haci esey ora nos ta mustra e debido respet durante reunion, ora nos ta duna contribucion pa traha mas salon y ora nos ta yuda tene nos Salonnan di Reino limpi y den bon estado. Asina tur hende lo ripara cu mescos cu Hesus, nos tin gran aprecio pa e luga caminda nos ta adora nos Dios, Jehova.—Juan 2:17.

^ par. 2 Aunke e articulo aki ta papia na prome luga di Salonnan di Reino, e principionan cu nos lo trata ta conta tambe pa Salonnan di Asamblea y otro edificionan cu nos ta uza pa adora Jehova.