Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Ban Haci Nos Paradijs Spiritual Mas Bunita

Ban Haci Nos Paradijs Spiritual Mas Bunita

“Lo mi haci e luga di mi pianan glorioso.”—ISA. 60:13.

CANTICA: 102, 75

1, 2. Den e Scritura Hebreo, na kico e palabra “banki pa pia” por referi?

JEHOVA DIOS a bisa: “Cielo ta mi trono, y Tera ta e banki pa mi pia.” (Isa. 66:1) El a bisa tambe: “Lo mi haci e luga di mi pianan glorioso.” (Isa. 60:13) Con Jehova ta haci e banki pa su pia bunita? Y kico esaki ta nifica pa nos cu ta biba riba e “banki pa [su] pia”?

2 Den e Scritura Hebreo, e palabra “banki pa pia” ta ser uza tambe pa describi e antiguo tempel di Israel. (1 Cro. 28:2; Sal. 132:7) E tempel ey tabata e centro di adoracion berdadero riba Tera. Pesey e tabata asina bunita den bista di Jehova y tabata duna gloria na e luga di sosega su pia.

3. (a) Kico e gran tempel spiritual ta? (b) Ki tempo el a cuminsa funciona?

3 Awe, e centro di adoracion berdadero ya no ta un tempel cu man di hende a traha, sino un tempel spiritual. E tempel ey ta duna mas gloria na Jehova cu cualkier edificio literal. Kico e tempel spiritual aki ta? E ta e areglo cu Dios a crea pa nos por reconcilia cu ne, bira su amigo y sirbie, un areglo cu ta funciona danki na e sacrificio di Hesucristo. El a cuminsa funciona na aña 29 di e prome siglo ora cu Hesus a ser batisa y ungi como Sumo Sacerdote di Jehova su gran tempel spiritual.—Heb. 9:11, 12.

4, 5. (a) Segun Salmo 99, kico ta loke mas e sirbidornan di Jehova ta desea di haci? (b) Kico cada un di nos mester puntra nos mes?

 4 Nos ta hopi agradecido cu Jehova a crea un areglo cu ta permiti nos alab’e. Nos ta demostra nos gratitud na Jehova ora nos ta papia cu otro hende tocante su nomber y tocante e sacrificio di rescate di su Yiu. Esta emocionante cu tin mas cu ocho miyon cristian berdadero ta duna gloria na Jehova tur dia! Tin hende religioso ta kere cu nan lo alaba Dios despues di nan morto, ora nan bay cielo. Pero esey ta un ekibocacion. Como testigo di Jehova, nos sa cu nos mester alab’e awor, aki riba Tera.

5 Di e manera ey nos ta sigui e ehempel di e fiel sirbidornan di Jehova di pasado describi na Salmo 99:1 pa 3 y 5 pa 7. (Les’e.) Manera e salmo ey ta indica, Moises, Aaron y Samuel a apoya, cu henter nan curason, e areglo cu Dios tabatin den nan tempo pa adoracion berdadero. Awe, e resto di e rumannan ungi di Hesus ta sirbi fielmente den e patio terenal di e tempel spiritual. Despues nan lo bay cielo pa sirbi como sacerdote hunto cu Hesus. Ademas, tin miyones di “otro carne” cu ta apoya nan fielmente. (Juan 10:16) E dos gruponan ey ta adora Jehova hunto aki riba Tera —e banki pa su pia—aunke cada un tin un speransa diferente. Pero cada un di nos mester puntra nos mes: Mi ta apoya Jehova su areglo pa adoracion berdadero cu henter mi curason?

KEN TA SIRBI NA DIOS SU TEMPEL SPIRITUAL?

6, 7. (a) Ki problema a desaroya poco despues cu e congregacion cristian a ser forma? (b) Kico Jehova a haci hopi siglo despues?

6 Menos cu un siglo despues cu e congregacion cristian a keda estableci, e apostasia profetisa a cuminsa desaroya. (Echo. 20:28-30; 2 Tes. 2:3, 4) Esey a pone cu a bira mas y mas dificil pa mira ken tabata sirbi Jehova na su tempel spiritual. Ken tabata su berdadero sirbidornan? Despues di hopi siglo, e momento a yega pa Jehova clarifica e asunto ey mediante su Rey recien instala, Hesucristo.

7 Na aña 1919, e personanan cu tabatin e aprobacion di Jehova y cu tabata sirbi na su tempel spiritual a keda identifica claramente. Nan a ser refina spiritualmente, es decir, nan a haci cierto ahuste pa asina nan manera di adora Jehova por a bira mas aceptabel p’e. (Isa. 4:2, 3; Mal. 3:1-4) Na e momento ey, un vision cu apostel Pablo a mira mas cu 1.800 aña prome a cuminsa cumpli.

8, 9. Kico ta e paradijs cu apostel Pablo a mira den un vision?

8 Nos ta haya e vision di Pablo na 2 Corintionan 12:1 pa 4. (Les’e.) Pablo a referi na loke el a mira den e vision sobrenatural ey como un revelacion, ya cu esey tabatin di haber cu algo cu lo a tuma luga den futuro. Pablo “a ser hiba na e di tres cielo”, caminda el a mira un paradijs. Kico e paradijs ey ta? E apostel a mira un paradijs fisico (e paradijs cu lo bin pronto riba Tera), un paradijs spiritual (cu nos lo experencia plenamente den e mundo nobo) y un paradijs celestial (e condicionnan maraviyoso cu ta existi den cielo den “e paradijs di Dios”).—Luc. 23:43; Rev. 2:7.

9 Pero dicon Pablo a bisa cu el a “tende palabranan cu no por ser papia y cu hende no mag ripiti”? Pasobra no tabata e momento p’e splica en detaye e cosnan maraviyoso cu el a mira den e vision. Pero awe si tin mag. Jehova ta permiti nos papia di e bendicionnan cu su pueblo ta disfruta di dje.

10. Dicon e paradijs spiritual y e tempel spiritual no ta mescos?

 10 Como testigo di Jehova, nos tin custumber di papia di nos “paradijs spiritual.” Pero na kico esaki ta referi? E ta referi na e ambiente spiritual, trankil y agradabel cu Dios ta duna su pueblo y cu ta permiti nan disfruta di paz cu ne y cu nan rumannan. Pues, e paradijs spiritual y e tempel spiritual no ta mescos. E tempel spiritual ta e areglo cu Jehova a establece pa adoracion berdadero. E paradijs spiritual ta identifica bon cla ken ta esnan cu tin e aprobacion di Dios y cu ta sirbie na su tempel spiritual.—Mal. 3:18.

11. Ki privilegio nos tin awe como cristiannan berdadero?

11 Esta emocionante pa sa cu for di aña 1919, Jehova a duna hende imperfecto e privilegio di yuda cultiva y extende e paradijs spiritual riba Tera! Abo ta participa den e trabou maraviyoso aki? Bo ta sinti bo motiva pa sigui colabora cu Jehova pa haci e luga caminda e ta sosega su pia mas bunita?

E ORGANISACION DI JEHOVA TA BIRA CADA DIA MAS BUNITA

12. Con bin nos sa cu Isaias 60:17 a cumpli? (Wak e prome plachi.)

12 Bijbel a profetisa cu lo a sosode un transformacion maraviyoso, si, lo tabatin cambio- y ahustenan den e parti terenal di e organisacion di Jehova cu lo a pone bira mas bunita. (Lesa Isaias 60:17.) Cristiannan mas jong of mas nobo den e berdad kisas a lesa of tende di e cambionan ey. Pero meymey di nos tin hopi ruman cu a mira e transformacion maraviyoso ey cu nan mes wowo. Pesey mes nan ta convenci cu Jehova ta uzando nos Rey Hesus pa guia y dirigi Su organisacion y cu lo e no laga nos na caya. Laga e rumannan ey conta bo algun di nan experencianan; esey sigur lo fortalece bo fe y confianza den Jehova.

13. Segun Salmo 48:12 pa 14, ki responsabilidad nos tur tin?

13 Sin importa cuanto tempo nos tin den e berdad, nos tin cu conta otro hende tocante e organisacion di Jehova. E solo echo cu ta existi un paradijs spiritual meymey di e mundo cruel y malbado aki ta un milager. Nos tin un conocemento hopi valioso cu nos mester pasa pa “e proximo generacion.” Pa cuminsa, nos mester conta nan tocante e cosnan maraviyoso cu e organisacion di Jehova, representa pa “Sion”, a haci. Ademas, nan mester sa e berdad tocante nos paradijs spiritual.—Lesa Salmo 48:12-14.

14, 15. (a) Menciona algun ahuste cu a tuma luga den e organisacion den decada di 1970. (b) Con e cambionan ey a beneficia nos?

14 Cristiannan cu tin hopi aña den e berdad tabatin e oportunidad di mira algun ahuste cu a haci e parti terenal di e organisacion di Jehova mas bunita. Por ehempel, nan ta corda tempo cu e congregacionnan tabatin un sirbidor di congregacion en bes di un cuerpo di anciano, tempo cu paisnan tabatin un sirbidor di sucursal en bes di un Comite di Sucursal y tempo cu e organisacion tabata ser dirigi pa e presidente di Sociedad Watch Tower en bes di e Cuerpo Gobernante cu nos conoce awe. Aunke tur e ruman hombernan ey tabatin e apoyo di assistentnan fiel, ta un persona so tabata responsabel pa tuma decisionnan final, sea den congregacion, na sucursal of na e sede mundial di testigonan di Jehova. Pero den decada di 1970, e rumannan a haci cierto ahuste pa asina grupo di anciano carga e responsabilidad di tuma decision en bes di un solo persona.

15 E cambionan aki a duna bon resultado, y esey tabata di spera tambe. Dicon?  Pasobra e rumannan a compronde e Scritura mas mihor y a sigui e patronchi cu tabatin den dje. Awor, en bes di tin un persona so cu ta tuma tur decision, nos tin grupo di anciano cu ta manera “regalo” di Jehova. Cada un di e ancianonan ey tin cualidadnan cu ta complementa otro y esey ta beneficia henter e organisacion.—Efe. 4:8; Prov. 24:6.

Jehova ta ofrece hende rond mundo e guia cu nan tin mester asina tanto (Wak paragraf 16, 17)

16, 17. Cua di e ahustenan recien cu tabatin den e organisacion bo a gusta mas, y dicon?

16 Pero e transformacion no a keda te eynan. Recientemente tabatin algun ahuste den e diseño, contenido y sistema di distribui nos publicacionnan. Esta dushi pa ofrece e hendenan publicacionnan atractivo y practico den sirbishi! Ademas, cada biaha cu nos ta uza e tecnologia di mas moderno (manera e website jw.org) pa plama e mensahe di e berdad, nos ta demostra cu nos tin e mesun interes cu Jehova, esta, di yuda hende rond mundo haya e guia cu asina tanto nan tin mester.

17 Nos ta mira tambe e beneficio di e ahuste cu tabatin den e reunionnan di congregacion cu a permiti nos haya mas tempo pa Adoracion Como Famia of pa estudio personal. Y nos ta aprecia e cambionan cu a haci den e programanan di asamblea y di congreso. Hopi biaha nos ta tende e rumannan bisa cu cada aña e programanan aki ta bira mas mihor. Anto pa no papia mes di e cantidad di scolnan biblico cu tin awor cu ta capacita nos pa sirbi Dios mihor. Esta contento nan ta haci nos! Den tur e ahustenan aki nos ta mira con e man di Jehova ta dirigi su organisacion. Ta bisto cu e ta sigui haci e paradijs spiritual cu nos ta disfruta di dje cada biaha mas bunita.

NOS TUR POR YUDA HACI E PARADIJS SPIRITUAL MAS BUNITA

18, 19. Con nos por yuda haci nos paradijs spiritual mas bunita?

18 Ta un honor cu Jehova ta permiti nos yuda haci nos paradijs spiritual mas bunita. Pero con nos por haci esaki? Wel, ora nos ta predica e bon noticia di Reino cu entusiasmo y ta haci mas hende discipel. Cada biaha cu nos yuda un hende bira un sirbidor di Jehova, ta comosifuera nos ta extende, of rek, e fronteranan di e paradijs spiritual.—Isa. 26:15; 54:2.

19 Un otro manera cu nos ta haci nos paradijs spiritual mas bunita ta ora nos ta haci esfuerso pa mehora nos personalidad cristian. Di e manera ey nos ta haci e paradijs aki mas atractivo pa hende pafo di e organisacion. Hopi biaha, e prome cos cu ta atrae hende na e organisacion—y di mes na Jehova y Hesus—no ta nos conocemento di Bijbel, sino nos conducta limpi y pacifico.

Bo tambe por yuda extende e fronteranan di e paradijs spiritual (Wak paragraf 18, 19)

20. Na harmonia cu Proverbionan 14:35, kico mester ta nos deseo?

20 Esta contento Jehova y Hesus lo mester ta sinti nan ora nan ta mira nos bunita paradijs spiritual awe! E goso cu nos ta sinti awor p’e echo cu nos ta yuda haci e paradijs aki mas bunita ta apenas un muestra di e goso cu nos lo sinti despues ora cu nos comberti e Tera den un paradijs literal. Keda corda loke Proverbionan 14:35 ta bisa: “Rey tin delicia den un sirbidor sabi.” Laga nos semper actua sabi y sigui traha duro pa haci e paradijs spiritual mas bunita.