Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Nan A Ofrece Nan Mes di Buena Gana pa Sirbi na Rusia

Nan A Ofrece Nan Mes di Buena Gana pa Sirbi na Rusia

NA AÑA 1991, testigonan di Jehova na Rusia tabata hopi contento mes. Nan religion a ser reconoci oficialmente pa gobierno despues di hopi aña di prohibicion. Ta ken por a imagina e tempo ey cu e cantidad di testigo di Jehova na Rusia lo a bira 10 biaha mas tanto y cu awe nan ta rond di 170.000 publicador. Entre e grupo grandi aki di predicador diligente tin rumannan cu a bin di afo pa yuda den e trabou di cosecha spiritual. (Mat. 9:37, 38) Laga nos cera conoci cu algun di nan.

RUMANNAN HOMBER CAPAZ TA YUDA FORTALECE E CONGREGACIONNAN

Matthew di Gran Britania tabatin 28 aña dia cu nan a kita e prohibicion na Rusia. Na un congreso cu el a bay e aña ey, el a tende den un discurso cu e congregacionnan na Oost Europa tabatin mester di yudansa urgente. E orador a papia di un congregacion na St. Petersburg, Rusia, caminda e publicadornan tabatin cientos di estudio, pero solamente un sirbidor ministerial y niun anciano. Matthew a conta: “Despues di e discurso ey, mi no por a stop di pensa riba Rusia. Pues, mi a papia cu Jehova tocante mi deseo di bay biba eynan.” El a spaar poco placa, bende mayoria di su cosnan, y na 1992 el a bay biba na Rusia. Con a bay cu ne eynan?

Matthew

Matthew a bisa: “E idioma tabata un reto. Mi no por a hiba un combersacion tocante Bijbel cu e hendenan.” Un otro reto grandi tabata pa haya un luga di biba. E di: “Mi no ta ni corda mas cuanto biaha mi tabatin cu muda di un dia pa otro.” A pesar di e obstaculonan inicial ey, Matthew ta bisa: “E mihor decision di mi bida tabata di muda pa Rusia.” Dicon? El a bisa: “Akinan mi a siña confia mas den Jehova y mi a mira con el a guia mi den hopi manera.” Cu tempo Matthew a bira anciano y pionero special, y awor e ta traha na sucursal, cerca di St. Petersburg.

Na 1999, cu 25 aña di edad, Hiroo a gradua di e Scol di Entrenamento Ministerial na Japon. Un di e instructornan a anim’e pa bay sirbi den exterior. Hiroo a tende cu tabatin hopi necesidad di predicador na Rusia, y el a dicidi di cuminsa siña Ruso. Pero el a haci un cos mas. El a conta: “Mi a bay biba na Rusia pa seis luna. Como cu eynan winter ta hopi pisa, mi a bay den november pa wak si mi  tabata por cu e friu.” Despues di a pasa e winter eynan, el a bay bek Japon y a hiba un bida hopi simpel pa e por a spaar suficiente placa p’e bay biba bek na Rusia, pero e biaha aki permanentemente.

Hiroo cu Svetlana

Hiroo tin awor 12 aña na Rusia, y el a sirbi den varios congregacion. Den algun di nan, e tabata e unico anciano pa atende mas cu 100 publicador. Den un congregacion, tur siman e tabatin cu dirigi e Scol di Ministerio Teocratico, e Estudio di Toren di Vigilancia, cinco Estudio di Buki di Congregacion y tambe haci mayoria di e partinan den Reunion di Sirbishi. Ademas, e tabatin cu haci hopi bishita di pastoreo. Cordando riba e tempo ey, Hiroo a bisa: “Mi ta sinti mi hopi feliz di por a yuda e rumannan bira spiritualmente mas fuerte.” Con el a beneficia di sirbi caminda tin mas necesidad di predicador? El a conta: “Prome cu mi a bay Rusia, mi tabata anciano y pionero. Pero for di dia cu mi ta akinan, mi ta sinti comosifuera mi a cera un amistad completamente nobo cu Jehova. Mi a siña confia mas den dje den tur aspecto di mi bida.” Na 2005, Hiroo a casa cu Svetlana, y nan dos ta traha pionero keto bay.

Michael cu Olga hunto cu Marina cu Matthew

Matthew, di 34 aña, cu su ruman homber Michael, di 28 aña, ta di Canada. Nan a bishita Rusia y a keda sorprendi ora nan a mira masha hopi hende interesa na reunion pero masha poco ruman homber pa dirigi reunion. Matthew a bisa: “E congregacion cu mi a bishita tabatin un asistencia di 200 hende, pero ta un anciano di edad avansa y un sirbidor ministerial jong so tabata dirigi tur e reunionnan. Mesora mi a haya gana di bay biba eynan pa yuda e rumannan.” Na 2002, el a muda pa Rusia.

Cuater aña despues, Michael tambe a bin biba na Rusia, y el a ripara cu ainda tabatin mester di mas ruman homber. Como cu e tabata sirbidor ministerial, nan a encarg’e cu cuenta, literatura y teritorio. Pero tambe nan a pidie duna discurso publico, haci trabou cu normalmente e secretario di congregacion ta haci y yuda organisa asamblea y traha Salon di Reino. Awe, ainda tin mester di hopi yudansa den e congregacionnan. Awor Michael ta anciano y aunke e tin masha hopi cos di haci, e ta bisa: “Mi ta sinti un gran satisfaccion di por yuda e rumannan. Esaki ta e mihor manera pa uza mi bida.”

Mientrastanto, Matthew a casa cu Marina, y Michael a casa cu Olga. Nan cuater ta sigui apoya e congregacionnan, hunto cu hopi otro ruman cu a bin pa yuda.

RUMANNAN MUHER DILIGENTE TA YUDA DEN E COSECHA

Tatyana

Na 1994, tempo cu Tatyana tabatin 16 aña, seis pionero special di Polonia, Republica Checo y Slovakia a cuminsa sirbi den su congregacion na Ucrania. Tatyana ta corda nan cu cariño y a bisa: “E pioneronan aki tabata diligente y amabel; semper bo por a papia cu nan y nan tabata conoce Bijbel hopi bon.” El a mira con Jehova a bendiciona nan spirito di sacrificio propio y a pensa: Mi kier ta manera nan.

E ehempel di e pioneronan a anima Tatyana pa uza su vakantie di scol pa bay traha hunto cu otro rumannan den e teritorionan aisla di Ucrania y Belarus caminda nunca testigonan di Jehova a yega di predica. E tabata gusta e biahenan ey di predicacion asina tanto cu el a cuminsa traha plan pa bay biba na Rusia pa predica. Prome, Tatyana a bay eynan pa un tempo cortico pa bishita un ruman muher cu tambe a bin di exterior y pa busca trabou pa e por a mantene su mes. Despues, na aña 2000, el a muda definitivamente pa Rusia. E cambio tabata dificil?

Tatyana a contesta: “Como cu ami so no por a paga un apartamento, mi mester a huur un camber  y biba cu otro hende den cas. Mi tin cu bisa cu esey no tabata facil at all. Tabatin momentonan cu mi kier a bay mi pais bek. Pero bes tras bes Jehova a yuda mi mira e bentahanan di sigui padilanti den mi sirbishi.” Awe, Tatyana ta sirbi como misionero na Rusia. El a conclui: “Tur e añanan cu mi a pasa pafo di mi pais a permiti mi biba experencianan inolvidabel y mi a haya hopi amigo nobo. Pero riba tur cos, e añanan aki a haci mi fe mas fuerte.”

Masako

Masako, di Japon, ta un ruman muher di 50 y pico aña. Semper el a soña pa bira misionero, pero el a kere cu nunca lo e por a logra esey pasobra e tabatin hopi problema di salud. Sinembargo, ora cu su salud a drecha un poco, el a dicidi di bay biba na Rusia pa apoya e trabou di predica. Aunke no tabata facil p’e haya un luga adecuado pa biba y un trabou stabiel, el a logra mantene su mes den e trabou di pionero dunando les di Japones y haciendo trabou di limpieza. Kico a dun’e e forsa pa sigui padilanti den su sirbishi?

Despues di a pasa 14 aña na Rusia, Masako a bisa: “E goso cu mi ta haya den e trabou di predica ta compensa e dificultadnan cu mi ta pasa aden. Ta hopi emocionante pa predica den luganan caminda tin necesidad di publicadornan di Reino.” Y el a agrega: “Den transcurso di añanan, Jehova a duna mi tur loke mi tabatin mester: cuminda, paña y un dak riba mi cabes. Pa mi, esey tabata manera un milager.” Fuera di apoya e congregacionnan na Rusia, Masako a predica tambe na Kirghizstan y a yuda gruponan di habla Ingles, Chines y Uigur. Actualmente, e ta sirbi como pionero na St. Petersburg.

FAMIANAN TA APOYA E OBRA Y HAYA BENDICION

Inga cu Mikhail

Debi na insiguridad economico, hopi famia ta bay biba den exterior pa subi nan nivel di bida. Pero tin famia ta muda pa nan por haci mas pa Jehova, manera Abraham cu Sara a haci den pasado. (Gen. 12:1-9) Esey ta e caso di Mikhail cu Inga, un  pareha casa di Ucrania cu a bay biba na Rusia na aña 2003. No a tarda mucho cu nan a haya varios hende cu tabata busca e berdad.

Mikhail a conta: “Un biaha nos a bay predica den un region caminda niun testigo di Jehova no a yega di predica. Un homber di edad a habri porta y puntra nos: ‘Predicador boso ta?’ Ora nos a contest’e cu si, el a bisa: ‘Mi tabata sa cu un dia boso lo bin. Ta imposibel pa e palabranan di Hesus keda sin cumpli.’ Anto e homber a cita Mateo 24:14.” Mikhail a agrega: “Den e region ey nos a topa tambe un grupo di mas o menos 10 muher bautista, hende sincero cu sed pa e berdad. Nan tabatin e buki Biba pa Semper, y nan tabata uz’e tur weekend pa studia Bijbel. Nos a keda hopi ora cerca nan y a contesta nan preguntanan, canta canticanan di Reino cu nan y hasta come hunto cu nan. E bishita ey ta un di e recuerdonan di mas bunita cu mi tin.” Segun Mikhail cu Inga, e echo cu nan a bay sirbi na Rusia—caminda tin mas necesidad di publicador di Reino—a hala nan mas cerca di Jehova, a laga nan sinti mas amor pa hende y a duna nan gran satisfaccion den bida. Awor nan ta den e trabou di circuito.

Oksana, Aleksey y Yury

Na 2007, Yury cu Oksana, un pareha jong di Ucrania, a bishita e sucursal di Rusia hunto cu nan yiu homber Aleksey, cu awor tin 13 aña. Eynan, nan a mira un mapa di Rusia cu tabata indica areanan grandi caminda no tin niun congregacion asigna pa predica. Oksana a bisa: “Ora nos a mira e mapa ey, nos a realisa mas cu nunca con grandi e necesidad di predicador tabata. Esey a yuda nos tuma e decision di muda pa Rusia.” Kico mas a yuda nan? Yury a bisa: “Tambe nos a lesa e articulo ‘Abo Por Sirbi den un Campo Stranhero?’ y otro articulonan similar. * Nos a bishita e area na Rusia cu sucursal a recomenda nos como un bon luga pa bay sirbi, y nos a busca trabou y cas eynan.” Na 2008 nan a bay biba na Rusia.

Na cuminsamento, no tabata facil pa nan haya trabou. Tambe nan mester a cambia varios biaha di apartamento. Yury a conta: “Bes tras bes nos tabata pidi Jehova den oracion pa no laga e situacion ey desanima nos, anto nos tabata sigui predica. Nos a confia cu Jehova lo yuda nos, y e no a laga nos na caya. Nos a mira cu nos mes wowo con Jehova ta cuida su sirbidornan ora nan ta pone e interesnan di Reino na prome luga. E sirbishi aki a fortalece nos famia spiritualmente y a haci nos mas uni.” (Mat. 6:22, 33) Y ki efecto e trabou di predica aki—caminda tin mas necesidad di publicador—tabatin riba nan yiu Aleksey? Segun Oksana: “Esaki a yud’e masha hopi. El a dedica su mes na Jehova y a batisa cu nuebe aña. Awor e ta traha pionero auxiliar ki ora cu e tin vakantie di scol, ya cu e ta mira e gran necesidad cu tin akinan. Su amor y entusiasmo pa sirbishi ta haci nos hopi feliz.” Awe, Yury cu Oksana, kendenan tin rond di 35 aña, ta sirbi como pionero special.

“UN COS SO TA DUEL MI”

Manera e comentarionan di e rumannan aki ta mustra, ora bo muda pa un otro area of pais pa predica, bo mester tin pleno confianza den Jehova. Ta berdad cu e rumannan cu a dal e paso ey a topa cu obstaculo, pero tambe nan a sinti e gran alegria di hiba e bon noticia di Reino na hende di curason sincero. Abo lo por bay biba caminda tin necesidad di mas publicador di Reino pa yuda den e trabou di cosecha? Si bo dicidi di haci esey, sigur lo bo sinti mescos cu Yury, kende a bisa lo siguiente tocante e decision cu el a tuma pa bay sirbi caminda tin necesidad di yudansa: “Un cos so ta duel mi, y esey ta cu mi no a haci esaki mas prome.”

^ par. 20 Wak E Toren di Vigilansia di 15 di october 1999, pagina 23 pa 27.