Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Ta Importa si Hende Ta Wak Bo Trabou?

Ta Importa si Hende Ta Wak Bo Trabou?

BEZALEEL y Aholiab tabata sa di trabou di construccion. Sin duda, nan a traha masha hopi bloki mes tempo cu nan tabata esclavo na Egipto. Pero e añanan ey tabata tras di lomba. Awor nan a keda encarga cu construccion di e tabernakel y lo a bira experto den artesania. (Exo. 31:1-11) Pero lamentablemente, masha poco hende lo a mira e trabou excelente cu nan a haci. Bo ta kere cu nan a sinti nan frustra pasobra nan no a haya niun reconocemento pa nan trabou? Realmente a importa si hende a wak nan trabou of no? Ta importa ken ta wak bo trabou?

OBRANAN MAESTRO CU MASHA POCO HENDE A WAK

Algun di e articulonan di e tabernakel di berdad tabata obranan maestro. Por ehempel, pensa riba e kerubinnan di oro cu tabatin riba e tapa di e arca di pacto. Apostel Pablo a bisa cu e kerubinnan aki tabata “glorioso.” (Heb. 9:5) Nan lo mester tabata obranan hopi bunita.—Exo. 37:7-9.

Si awe un hende lo a descubri e articulonan cu Bezaleel y Aholiab a traha, nan lo a pone nan den e mihor museonan na mundo, caminda miyones di hende lo por a admira nan. Sinembargo, tempo cu a traha nan, cuanto hende realmente a haya chens di admira nan bunitesa? Masha poco, pasobra e kerubinnan tabata den e Santisimo, y ta e sumo sacerdote so tabata mira nan un biaha pa aña ora e tabata drenta ey den riba Dia di Expiacion.—Heb. 9:6, 7.

NOS MESTER DI ELOGIO DI OTRO HENDE?

Si abo tabata na luga di Bezaleel y Aholiab y bo a haci hopi esfuerso pa traha e obranan di arte fabuloso ey, con lo bo a sinti bo si ta un par di hende so a wak nan? Awendia, hende hopi biaha ta sinti cu nan a logra algo y cu nan esfuerso ta bale la pena solamente ora nan ta haya compliment of admiracion di otronan. Pero e sirbidornan di Jehova ta diferente. Mescos cu Bezaleel y Aholiab, loke ta duna nos satisfaccion ta e echo cu nos ta haci e boluntad di Jehova y tin su aprobacion.

Den tempo di Hesus, e lidernan religioso tabatin custumber di haci oracion publico pa impresiona hende. Pero Hesus a bisa cu nos no  mester haci oracion pa haya elogio di otro hende, mas bien nos mester haci esaki di curason pa Dios scucha nos. Kico lo ta e resultado? El a bisa: “Bo Tata, cu den secreto ta mira tur cos, lo recompensa bo.” (Mat. 6:5, 6) Pues, e cos di mas importante ta kico Jehova ta pensa di nos oracionnan y no kico hende ta pensa. Ta su opinion ta conta. Esaki ta e caso tambe cu cualkier otro cos cu nos ta haci p’e den nos sirbishi sagrado: No ta e elogio di otro hende ta loke ta conta, mas bien nos kier pa loke nos ta haci ta agrada Jehova, kende “den secreto ta mira tur cos.”

Ora nan a caba di traha e tabernakel, un nubia a “tapa e tent di reunion, y e gloria di SEÑOR a yena e tabernakel.” (Exo. 40:34) Esaki tabata un prueba cla cu Jehova a aproba e trabou. Con bo ta kere cu Bezaleel y Aholiab lo a sinti nan na e momento ey? Aunke nan nomber no tabata graba riba e articulonan cu nan a traha, nan lo a sinti un gran satisfaccion di sa cu Dios a bendiciona nan esfuerso. (Prov. 10:22) Anto segun cu añanan a pasa, nan lo mester a sinti nan hopi contento cu tur loke nan a traha a sigui ser uza den e adoracion di Jehova. Ora Bezaleel y Aholiab resucita den e mundo nobo, sin duda nan lo keda hopi contento ora nan tende cu a sigui uza e tabernakel pa 500 aña mas den adoracion berdadero.

Hasta si niun hende no ta wak bo trabou, Jehova si ta wak

Den nos tempo, e organisacion di Jehova tin artesano, musico, fotografo, pintor, traductor y escritor. Den un sentido, niun hende no ta “wak” nan trabou, ya cu nan ta haci esaki den forma anonimo. Mescos nos por bisa di gran parti di e trabou cu ta tuma luga den e mas cu 110.000 congregacionnan cu tin rond mundo. Ken ta mira tur e formularionan cu e sirbidor di cuenta ta yena tur fin di luna? Ken ta mira ora e secretario di congregacion ta prepara e rapport di sirbishi di e congregacion? Ken ta wak e ruman homber of ruman muher cu ta drecha algo na e Salon di Reino?

Bezaleel y Aholiab tabata artesanonan di nivel halto, pero nunca nan no a haya un trofeo, un medaya of un plakkaat cu nan por a blof cu ne pa e trabou briyante cu nan a haci. En cambio, nan a ricibi algo hopi mas valioso: e aprobacion di Jehova. Nos ta sigur cu Jehova si a wak nan trabou. Laga nos imita nan ehempel di humildad y ser diligente mescos cu nan.