Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2015

Nos Liberacion Ta Cerca

Nos Liberacion Ta Cerca

“Para stret y lanta boso cabes, pasobra boso liberacion ta yegando cerca.”—LUC. 21:28.

CANTICA: 133, 43

1. Kico a sosode na Jerusalem na aña 66? (Wak e prome plachi.)

IMAGINA bo esaki: Ta aña 66 di e prome siglo y bo ta un cristian den Jerusalem. Hopi cos a pasa. Tur cos a cuminsa ora cu e procurador Romano Floro a coy 17 talento di moneda for di e tesoro sagrado di e tempel. E Hudiunan a bira furioso y mesora a rebeldia. Nan a mata e soldaatnan Romano cu tabata na Jerusalem y a declara nan independencia for di Roma. Pero Roma a reacciona rapidamente. Dentro di tres luna, e gobernador Romano di Siria, Cestio Galo, ya tabata para na e portanan di Jerusalem hunto cu 30.000 soldaat. E areanan pafo di stad a cay hopi lihe den nan poder, y e rebeldenan Hudiu a haya nan obliga ta bay sconde den e tempel. E ora ey e soldaatnan Romano a cuminsa kibra e muraya di pafo di e area di tempel. Henter e stad a drenta den panico. Anto abo ta wak tur esaki sosode. Kico ta pasa den bo mente?

2. (a) Kico e cristiannan cu tabata den Jerusalem mester a haci na aña 66? (b) Con nan a logra sali for di e stad?

2 Sin duda, e suceso aki ta laga bo corda riba e spiertamento y instruccion cu Hesus a duna su discipelnan añanan prome: “Ora boso mira Jerusalem rondona pa ehercito, boso por ta sigur e ora ey cu su desolacion a yega cerca. E ora ey laga esnan cu ta na Judea  huy bay den sero, laga esnan cu ta den stad sali bay y esnan cu ta den cunucu no mester drenta stad.” (Luc. 21:20, 21) Pero con bo por sali for di Jerusalem si e stad ta rondona pa soldaat? Wel, diripiente algo increibel ta sosode: E ehercito Romano ta bandona Jerusalem. Manera Hesus a profetisa, Dios a corta e duracion di e atake. (Mat. 24:22) Awor ta bo chens pa obedece e instruccionnan di Hesus. Mesora bo ta huy bay na e seronan cu ta keda na e otro banda di Riu Jordan, hunto cu tur e otro cristiannan fiel cu ta biba den Jerusalem y den e luganan rond di dje. * Mas despues, na aña 70, un otro ehercito Romano a marcha bin Jerusalem y a destrui e stad. Pero abo a keda sano y salvo. Dicon? Pasobra bo a obedece Hesus.

3. (a) Ki situacion similar na esun di e cristiannan di e prome siglo nos lo pasa aden pronto? (b) Kico nos lo analisa den e articulo aki?

3 Pronto nos lo no tin nodi uza nos imaginacion; cada un di nos lo pasa den un situacion similar. E spiertamento di Hesus no tabata solamente pa e cristiannan di Jerusalem; el a uza e sucesonan ey pa indica tambe kico lo pasa ora cu diripiente e “tribulacion grandi” cuminsa. (Mat. 24:3, 21, 29) Pero tin un bon noticia: e “multitud grandi” lo sobrevivi e desaster mundial aki. (Lesa Revelacion 7:9, 13, 14.) Kico Bijbel ta bisa tocante loke ta bay sosode? Nos mester ta interesa den e contesta, pasobra nos bida ta den wega. Laga nos ban wak en detaye kico ta e sucesonan cu nos lo bay enfrenta den futuro cercano.

CUMINSAMENTO DI E TRIBULACION GRANDI

4. Con e tribulacion grandi lo cuminsa?

4 Con e tribulacion grandi lo cuminsa? Bijbel ta bisa cu esey lo ta cu e destruccion di “Babilonia e Grandi.” Segun e buki di Revelacion, “Babilonia e Grandi”—cu ta representa e religionnan falso di e mundo aki—ta manera un prostituta. (Rev. 17:5-7) Dicon? Pasobra su lidernan a mete, of prostitui nan mes, cu e dirigentenan politico di e mundo malbado aki. Na luga di apoya Hesus y su Reino, nan a apoya gobierno humano y a pasa por halto di e normanan di Dios djis pa nan por a haya mas influencia politico. Esta un contraste compara cu e cristiannan ungi, kendenan si a mantene nan mes puro manera un birgen, separa for di e gobiernonan! (2 Cor. 11:2; Sant. 1:27; Rev. 14:4) Pero ken lo destrui e religionnan falso ey? “E dies cachonan” di e “bestia salbahe color cora bibo.” Ken esakinan ta representa? E “bestia salbahe color cora bibo” ta representa Nacionnan Uni, y e dies cachonan ta representa tur e gobiernonan actual cu ta apoy’e. Jehova Dios lo hinca den nan curason “Su pensamento” pa caba cu Babilonia e Grandi.—Lesa Revelacion 17:3, 16-18.

5. Dicon nos por bisa cu ora Babilonia e Grandi ser destrui esaki no kiermen cu tur su miembronan lo muri?

5 Esaki kiermen cu ta tur e miembronan di religion falso lo muri ora Babilonia e Grandi ser destrui? Probablemente cu no. Con nos por sa? A base di loke Zacarias a profetisa tocante e tempo ey. El a skirbi tocante un homber cu anteriormente tabata pertenece na religion falso pero cu lo bisa: “Mi no ta profeta; mi ta un cunukero, pasobra un hende a bende mi como esclavo den mi hubentud.” Segun Zacarias, un hende lo puntra e homber: “Kico ta nifica e heridanan aki na bo pecho?” E homber lo contest’e: “Esakinan ta e heridanan cu mi a haya den cas di mi amigonan.” (Zac. 13:4-6) E relato aki ta duna di compronde cu hasta miembro di clero lo  bandona nan religion y haci comosifuera nunca nan no tabata pertenece na e religionnan ey.

6. Kico lo pasa cu e sirbidornan di Dios despues di destruccion di religion falso?

6 Pero kico lo pasa cu e sirbidornan di Dios e tempo ey? Hesus a bisa: “De echo, a menos cu Dios haci e dianan ey cortico, ningun hende lo ser salba, ma pa motibo di e scoginan, lo e haci e dianan ey cortico.” (Mat. 24:22) Manera nos a mira caba, Dios a “haci ... cortico”, of corta, e duracion di e tribulacion na Jerusalem di aña 66. Esaki a haci posibel cu “e scoginan”—e cristiannan ungi—por a huy for di e stad y e luganan rond di dje. Asina tambe Jehova lo corta e duracion di e parti inicial di e tribulacion grandi pa proteha “e scoginan.” Lo e no permiti e podernan politico, “e dies cachonan”, caba cu su pueblo. Mas bien, e atake inicial lo ser interumpi y lo tin un periodo cortico di calmo despues di e destruccion di tur religion falso.

UN PERIODO DI PRUEBA Y DI HUICIO

7, 8. (a) Despues di destruccion di religion falso, ki oportunidad nos lo tin? (b) Dicon e pueblo di Dios lo ta diferente for di tur hende na e tempo ey?

7 Kico lo sosode despues di destruccion di religion falso? Cada un di nos lo haya chens di demostra loke di berdad tin den nos curason. Mayoria di hende lo bay busca refugio cerca organisacionnan humano cu Bijbel ta compara cu “baranca den sero.” (Rev. 6:15-17) Cristiannan berdadero, en cambio, lo busca refugio cerca Jehova. Den e prome siglo, e periodo di calmo cu a sigui despues di e prome atake di e Romanonan no tabata un tempo pa e Hudiunan comberti masalmente na cristianismo. Mas bien, esaki tabata tempo pa e cristiannan obedece Hesus su instruccion y sali for di Jerusalem. Di igual manera, nos no mester spera cu durante e pausa cu lo tin den e tribulacion grandi un gran cantidad di hende diripiente lo drenta den e berdad. Mas bien, esey lo ta tempo pa nos demostra cu nos ta stima Jehova y ta apoya e rumannan di Cristo.—Mat. 25:34-40.

8 Aunke nos no sa ainda precies kico lo bay pasa durante e periodo di prueba ey, nos por spera cu nos lo tin cu haci cierto sacrificio. Den e prome siglo, e cristiannan mester a bay laga tur nan pertenencianan y pasa den situacionnan dificil pa nan por a sobrevivi. (Mar. 13:15-18) Nos ta dispuesto pa haci mescos? Nos lo ta cla pa haci loke sea ta necesario pa demostra nos lealtad na Jehova? Kisas nos no a para keto na esaki, pero den e tempo ey nos lo ta e uniconan cu lo no distancia nos mes for di nos religion y cu lo sigui sirbi nos Dios. Y nos lo tin cu sigui haci esey cueste loke cueste, mescos cu profeta Daniel a haci.—Dan. 6:10, 11.

9, 10. (a) Ki mensahe e pueblo di Dios lo anuncia den futuro cercano? (b) Con e enemigonan di e pueblo di Dios lo reacciona?

9 Lo no ta tempo mas pa predica “e bon noticia ... di e Reino.” E tempo pa predica e mensahe ey a pasa, ya cu nos lo ta na rand di “e fin.” (Mat. 24:14) Sin duda, nos mensahe lo bira e ora ey un mensahe fuerte di huicio. Kisas nos lo tin cu bisa e hendenan cu e mundo malbado di Satanas ta a punto di ser destrui completamente. Bijbel ta compara e mensahe aki cu piedra grandi di ijs of hagel. Manera Revelacion 16:21 ta bisa: “Piedra grandi di ijs, cu tabata pisa cada un mas o menos un talento, a cay for di cielo riba e hendenan. Y e hendenan a blasfema Dios pa motibo di e plaga di piedra di ijs, pasobra e plaga tabata masha destructivo.”

 10 Claro cu nos enemigonan lo tuma nota di loke nos ta haciendo. Jehova a inspira profeta Ezekiel pa splica kico e coalicion di nacionnan, yama Gog di Magog, lo haci: “Asina Señor DIOS ta bisa: ‘Lo sosode riba e dia ey cu lo drenta pensamentonan den bo mente, y lo bo traha un plan di maldad, y lo bo bisa: “Mi ta subi bay contra e tera di pueblitonan sin muraya. Mi ta bay contra un pueblo pacifico cu ta biba trankil, cu ta biba sin muraya y cu no tin grendel ni porta, pa coge botin y pa plunder, pa pone bo man contra e luganan bandona cu a wordo habita atrobe, y contra e pueblo cu ta reuni for di e nacionnan, kendenan a adkiri bestia y bienesnan y ta biba na e parti central di mundo.”’” (Eze. 38:10-12) Pues, e pueblo di Dios lo ta asina unico y diferente for di tur otro hende cu lo ta comosifuera nan ta biba den “e parti central di mundo.” Tur bista lo ta riba nan. E nacionnan lo no por resisti e tentacion aki. Nan lo core ataca e unginan di Jehova y e otro carnenan.

11. (a) Kico nos tin cu corda relaciona cu e secuencia di sucesonan durante e tribulacion grandi? (b) Con hende lo reacciona ora nan mira e señalnan den cielo?

11 Kico lo pasa despues di esey? Bijbel no ta bisa nos den ki secuencia precies e sucesonan lo tuma luga. Probablemente algun cos lo sosode mas o menos pareu. Hesus a bisa den su profecia tocante e conclusion di e mundo aki: “Lo tin señal den solo, luna y strea. E nacionnan riba Tera lo ta den angustia, sin sa kico pa haci pa motibo di e zonido fuerte di lama bruto, mientras cu hende ta desmaya di miedo y di ansha pa e cosnan cu lo bin riba e Tera habita, pasobra e podernan di cielo lo keda sacudi. Anto nan lo mira e Yiu di hende bin den un nubia cu poder y gran gloria.” (Luc. 21:25-27; lesa Marco 13:24-26.) Unda e señalnan spantoso ey lo sosode? Den cielo literal? Nos lo tin cu warda pa wak kico ta bay pasa. Pero un cos ta sigur, e señalnan ey lo causa teror y panico entre e enemigonan di Dios.

Nos ta wak futuro cu un actitud positivo, ya cu nos ta sigur di nos liberacion (Wak paragraf 12, 13)

12, 13. (a) Kico lo pasa ora Hesus bin “cu poder y gran gloria”? (b) Con e sirbidornan di Dios lo reacciona na e tempo ey?

12 Kico Hesus lo haci ora e bin “cu poder y gran gloria”? Lo e recompensa e hendenan cu ta leal y castiga esnan cu no a obedece Jehova. (Mat. 24:46, 47, 50, 51; 25:19, 28-30) Segun Mateo, Hesus a caba su profecia tocante e señal di e ultimo dianan cu e ilustracion di carne y cabrito. El a bisa: “Ora e Yiu di hende yega den su gloria y tur e angelnan hunto cu ne, lo e sinta riba su trono glorioso. Tur e nacionnan lo ser reuni su dilanti, y lo e separa hende for di otro, mescos cu un wardador ta separa carne for di cabrito. Y lo e pone e carnenan na su man drechi, ma e cabritonan na su man robes.” (Mat. 25:31-33) Kico lo pasa despues cu e carne- y cabritonan? Nan lo ser husga. E ilustracion ta indica cu e cabritonan, esta, hende infiel, “lo haya morto eterno.” Pero e carnenan, esta, hende fiel, “lo haya bida eterno.”—Mat. 25:46.

13 Con e cabritonan lo reacciona ora nan realisa cu nan lo muri pa semper? Nan “lo bati nan pecho di tristeza.” (Mat. 24:30) Pero con e rumannan di Cristo y e otro carnenan cu ta apoya nan lo reacciona? Cu pleno confianza den Jehova Dios y su Yiu, Hesucristo, nan lo haci loke Hesus a manda nan haci: “Ora e cosnan aki cuminsa sosode, para stret y lanta boso cabes, pasobra boso liberacion ta yegando cerca.” (Luc. 21:28) Si, nos lo tin un actitud positivo, ya cu nos ta sigur di nos liberacion.

 NAN LO BRIYA MANERA SOLO DEN E REINO

14, 15. (a) Kico lo pasa cu e unginan despues cu Gog di Magog cuminsa cu su atake? (b) Con tur e unginan lo ser reuni den cielo?

14 Kico lo pasa despues cu Gog di Magog cuminsa ataca e pueblo di Dios? Tanto Mateo como Marco ta splica nos: “[E Yiu di hende lo] manda e angelnan y lo reuni su scoginan for di e cuater skinanan di mundo, for di e punta di mas leu di Tera te na e punta di mas leu di cielo.” (Mar. 13:27; Mat. 24:31) Pues, Hesus a profetisa cu lo reuni e cristiannan ungi. Ki ora esaki ta sosode? Wel, esaki no ta referi na e momento cu nan a ser scogi of ungi. (Mat. 13:37, 38) Tampoco e no ta referi na e momento cu e resto di ungi riba Tera lo ricibi e seyo final; nan lo ricibi e seyo ey un poco prome cu e tribulacion grandi cuminsa. (Rev. 7:1-4) Hesus tabata referi mas bien na e momento cu e resto di e 144.000 lo ser hiba cielo. (1 Tes. 4:15-17; Rev. 14:1) Y esaki lo sosode despues cu Gog di Magog cuminsa cu su atake. (Eze. 38:11) E ora ey e palabranan di Hesus lo cumpli: “Na e tempo ey, e hustonan lo briya manera solo den e Reino di nan Tata.”Mat. 13:43. *

15 Hopi hende den cristiandad ta kere cu cristiannan fiel lo ser hiba cielo den nan curpa humano y cu Hesus lo bolbe den forma visibel pa goberna e Tera. Sinembargo, Bijbel ta bisa cu “e señal di e Yiu di hende” lo aparece den cielo y cu Hesus lo bin “riba e nubianan di cielo.” (Mat. 24:30) E dos expresionnan aki ta  duna di compronde cu su binida lo ta invisibel. Ademas, Bijbel ta bisa cu “curpa di carni y [weso] no por tin parti den e Reino di Dios.” Pues, prome cu e unginan bay cielo, nan tin cu ser “cambia, den un momento, den un frega di wowo, durante e ultimo trompet.” * (Lesa 1 Corintionan 15:50-53.) Kiermen, tur e fiel unginan cu ta riba Tera lo ser hiba cielo pareu, den un frega di wowo.

16, 17. Kico mester sosode prome cu e casamento di e Lamchi por tuma luga den cielo?

16 Unabes tur e 144.000 unginan ta den cielo, nan por cuminsa haci e preparacionnan final pa e casamento di e Lamchi. (Rev. 19:9) Pero prome cu e suceso feliz aki, tin un otro cos cu tin cu sosode. Corda cu Gog lo mira e pueblo di Dios como un grupo indefenso y lo atac’e un poco prome cu e ultimo unginan ser hiba cielo. (Eze. 38:16) Con e sirbidornan di Jehova riba Tera lo reacciona? Nan lo obedece e siguiente instruccion duna den tempo di Rey Jehosafat: “‘Boso no tin mester di bringa den e bataya aki; staciona boso mes, para y mira e salbacion di SEÑOR na boso fabor, o Juda y Jerusalem.’ No tene miedo ni desmaya.” (2 Cro. 20:17) Pero den cielo lo tin completamente un otro reaccion. Revelacion 17:14 ta bisa kico lo pasa ora cu tur e unginan lo ta eynan: “[E enemigonan di Dios] lo bringa contra e Lamchi, ma como cu e Lamchi ta Señor di señornan y Rey di reynan, lo e vence nan. Y esnan cu Dios a yama y scoge, y cu ta fiel na dje, tambe lo vence nan.” Pues, Hesus hunto cu e 144.000 reynan ungi den cielo lo bay rescata e pueblo di Dios riba Tera.

17 E rescate ey lo resulta den e guera di Armagedon cu lo engrandece e nomber santo di Jehova. (Rev. 16:16) E tempo ey, tur hende cu ta manera cabrito “lo haya morto eterno”, pero e multitud grandi lo sobrevivi e parti final di e tribulacion grandi. Porfin Tera lo ta liber di maldad! Awor cu tur preparacion ta cla, e suceso cu e ultimo parti di e buki di Revelacion ta papia di dje por tuma luga, esta, e casamento di e Lamchi. (Rev. 21:1-4) * Tur hende cu ta na bida riba Tera lo disfruta di e aprobacion di Dios y lo experencia su gran amor y generosidad. Esta un fiesta di casamento inolvidabel esey lo ta! Bo no ta anhela pa e dia ey yega pa caba?—Lesa 2 Pedro 3:13.

18. Cu tanto suceso emocionante nos dilanti, kico nos lo mester ta haciendo aworaki?

18 Cu asina tanto suceso emocionante na caminda, kico nos lo mester ta haciendo aworaki? Apostel Pedro a ser inspira pa skirbi: “Como cu ta di e manera aki tur e cosnan ey lo larga caba na nada, pensa riba ki sorto di hende boso mester ta. Boso mester ta hende di conducta santo y mester haci obranan cu ta demostra devocion na Dios, segun cu boso ta spera y corda semper riba e binida di e dia di Jehova! ... Pesey, mi rumannan stima, como cu boso ta spera riba e cosnan aki, haci tur boso esfuerso pa Dios haya boso finalmente sin mancha, sin defecto y na paz.” (2 Ped. 3:11, 12, 14) Laga nos mantene nos adoracion limpi, completamente separa for di religion falso, y apoya e Rey di Paz, Hesucristo.

^ par. 2 Wak E Toren di Vigilancia di 1 di april 2012, pagina 26 y 27.

^ par. 14 Wak E Toren di Vigilancia di 15 di juli 2013, pagina 13 y 14.

^ par. 15 E unginan cu lo ta na bida na e momento ey lo no bay cielo cu nan curpa di carni. (1 Cor. 15:48, 49) Probablemente Jehova lo laga nan curpa disparce mescos cu el a haci cu e curpa di Hesus.

^ par. 17 Salmo 45 tambe ta duna algun detaye tocante e secuencia di e sucesonan aki: Prome, e Rey ta bringa e guera, y despues e casamento ta tuma luga.