Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2015

“Boso Tin Mester di Perseverancia”

“Boso Tin Mester di Perseverancia”

DESPUES cu Anita a batisa como un testigo di Jehova, su casa a cuminsa haci su bida imposibel. * Anita a conta: “E no tabata laga mi bay reunion y a prohibi mi hasta di menciona Dios. E tabata bira furioso si e djis tende e nomber Jehova.”

Ademas, tabata hopi dificil pa Anita siña su yiunan tocante Jehova. El a conta: “Mi no tabatin mag di adora Jehova den mi propio cas. Mi mester a studia cu e muchanan den scondi, y mi no tabatin mag di bay reunion cu nan.”

E situacion di Anita ta demostra cu oposicion di famia por pone nos lealtad na Jehova na prueba. Pero nos por haya nos tambe cu otro pruebanan, manera un enfermedad cronico of morto di un yiu of casa. Kisas un miembro di famia ta bira lomba pa Jehova. Kico por yuda bo keda fiel na Jehova den e tipo di situacionnan ey?

Apostel Pablo a contesta: “Boso tin mester di perseverancia.” (Heb. 10:36) Pero kico por yuda bo persevera?

ORACION TA YUDA NOS PERSEVERA

Un di e cosnan cu mas ta duna nos forsa pa soporta prueba ta di haci oracion na Jehova y confia den dje, manera e caso di Ana ta mustra. Riba un dialuna atardi, Ana a haya e noticia cu su casa a muri diripiente. Nan tabatin 30 aña casa. Ana a bisa: “El a bay traha y no a bolbe cas mas. E tabatin 52 aña so.”

Kico a yuda Ana trata cu e situacion? E echo cu e mester a bay traha atrobe a yud’e, ya cu su trabou tabata exigi hopi concentracion y esey a distrai su mente un poco. Pero esey no a kita e dolor cu e tabata sinti. El a conta: “Mi tabata desahoga mi curason cerca Jehova y tabata rog’e pa duna mi forsa pa trata cu mi perdida doloroso.” Jehova a contesta su oracionnan? Ana ta convenci di esey. El a bisa: “Despues cu mi caba di haci oracion, mi tabata sinti mi trankil y calmo. Mi ta convenci cu Jehova lo resucita mi casa den Paradijs.” —Flp. 4:6, 7.

Jehova, Esun cu semper ta scucha oracion, a priminti su sirbidornan cu lo e duna nan tur loke nan tin mester pa keda fiel na dje. (Sal. 65:2) Bo no ta haya cu e promesa aki ta fortalece nos fe? E no ta duna bo e forsa pa persevera?

E REUNIONNAN TA DUNA NOS ANIMO

Jehova ta duna nos animo via e congregacion. Por ehempel, tempo cu e congregacion na Tesalonica tabata sufri persecucion cruel, Pablo a urgi e cristiannan eynan pa nan “sigui anima otro y fortalece otro, manera de echo [nan tabata] haciendo caba.” (1 Tes. 2:14; 5:11) E Tesalonicensenan a logra supera e prueba di fe aki debi cu nan tabata hopi uni cu otro y tabata yuda otro cu amor. Nan perseverancia ta un excelente ehempel pa nos y ta siña nos kico por yuda nos persevera.

Pa nos por anima otro, nos mester tin un bon amistad cu nos rumannan den congregacion. (Rom. 14:19) Esey ta specialmente importante den temponan dificil. Pablo mes a pasa den hopi dificultad, pero Jehova a dun’e e forsa pa persevera. Tabatin biaha cu Dios a anima Pablo via su rumannan den fe. Por ehempel, ora Pablo a manda cumindamento pa algun miembro di e congregacion na Colosas, el a bisa lo siguiente di nan: “Nan a bira un fuente di gran consuelo pa mi.” (Col. 4:10, 11) Si, e amor cu e rumannan aki tabatin pa Pablo a motiva nan pa consol’e y fortalec’e ora cu mas e tabatin mester di esey. Probablemente bo tambe ta corda ocasionnan cu rumannan di bo congregacion a yega di bisa of haci algo cu a anima bo.

 E ANCIANONAN TA DUNA NOS APOYO

Un otro manera amoroso cu Jehova ta apoya nos ta pa medio di e ancianonan di congregacion. E hombernan maduro aki ta “manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isa. 32:2) Ta un consuelo pa sa cu e rumannan aki ta cla pa yuda nos. Abo ta haci bon uzo di e regalo aki di Jehova? E animacion y apoyo di e ancianonan por yuda bo persevera.

Claro cu e ancianonan no por soluciona tur nos problemanan. Nan ta hende imperfecto mescos cu nos. (Echo. 14:15) Pero asina mes, nos por sinti nos mas mihor ora nan ta haci oracion pa nos. (Sant. 5:14, 15) Por ehempel, ancianonan a anima un ruman homber na Italia cu tabata sufri pa hopi aña caba di un maleza di spier serio. E ruman a bisa: “E amor y cariño di e ancianonan y nan bishitanan frecuente a duna mi e forsa pa wanta.” Si bo ta sufriendo, Jehova kier pa bo pidi e ancianonan yuda bo.

MANTENE UN BON RUTINA SPIRITUAL

Pero tin mas cos cu por yuda nos persevera. Por ehempel, ta importante pa keda mantene un bon rutina spiritual. Considera e caso di John. Tempo e tabatin 39 aña, el a haya sa cu e tin un tipo di cancer cu no ta comun. El a admiti: “Mi no a haya ta husto cu mi a bira malo na un edad asina jong.” E tempo ey, John su yiu homber tabatin apenas tres aña. El a sigui conta: “Esey kiermen cu mi casa no solamente tabatin cu cuida nos yiu chikito, sino cuida ami tambe. Banda di esey, e tabatin cu yuda mi bay tur mi afspraaknan na hospital.” E tratamentonan di chemotherapie a laga John keda morto cansa y cu biramento di stoma. Riba dje, John su tata tabata malo y den fase terminal, pues e tabatin mester di cuido constante.

Kico a yuda John y su famia trata cu e situacion dificil aki? El a bisa: “Maske con cansa mi tabata, mi tabata percura pa nos famia sigui fielmente cu nos programa di actividadnan spiritual. Nos tabata bay tur reunion, nos tabata bay sirbishi tur siman y nos tabata tene nos estudio di famia tur biaha, hasta ora tabata dificil pa haci esey.” John a realisa cu un factor clave pa persevera bou di cualkier dificultad ta di sigui mantene su mes spiritualmente fuerte, es decir, percura pa e tin un bon relacion cu Jehova. Aunke na prome instante e tabata den shock y hopi preocupa, no a tarda mucho cu el a bira mas trankil. E tabata sa cu Jehova tabata stim’e y a dun’e e fortaleza necesario. Jehova por yuda abo tambe ora bo ta preocupa of tin miedo. John a bisa: “Jehova por haci bo fuerte, mescos cu el a haci ami fuerte.”

Ora bo ta sufri, corda riba e palabranan di Pablo: “Boso tin mester di perseverancia.” Confia den Jehova pa medio di oracion, desaroya un bon amistad cu e rumannan di bo congregacion, pidi e ancianonan yuda bo y mantene un bon rutina spiritual. Cu e sosten di Dios, bo por enfrenta cualkier prueba of circunstancia dificil, tanto awor como den futuro.

^ par. 2 A cambia algun nomber.