Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2015

“Si Kingsley Por, Mi Tambe Por”

“Si Kingsley Por, Mi Tambe Por”

KINGSLEY a cuminsa cu su parti di lesamento di Bijbel ora el a sinti un tik riba su schouder. Esaki tabata su prome parti den e Scol di Ministerio Teocratico. Cu hopi cuidou el a pronuncia cada palabra, sin falta niun silaba. Pero warda! Dicon e no tabata wak den su Bijbel?

Kingsley tabata ciego y a biba na Sri Lanka. E no tabata tende bon, y e mester a uza un rolstoel p’e por a move. Con el a siña conoce Jehova y logra cualifica pa participa den e Scol di Ministerio Teocratico? Laga mi splica.

E prome biaha cu mi a topa Kingsley, m’a keda impresiona pa e deseo cu e tabatin di siña e berdad cu tin den e Palabra di Dios. El a yega di studia Bijbel cu varios Testigo, y su ehemplar na braille di e buki Conocimentu cu Ta Hiba na Bida Eterno tabata tur gasta. * Mi a ofrec’e un estudio di Bijbel y el a acepta, pero tabatin dos problema grandi.

Prome, Kingsley tabata biba cu varios otro hende den un cas di cuido. Como cu semper tabatin zonido den background y Kingsley no tabata tende bon, mi tabatin cu papia masha duro mes. Pesey, tur hende den e cas di cuido tabata scucha nos estudio semanal.

 Di dos, Kingsley por a lesa y capta solamente un poco informacion den cada sesion di estudio. Pues, pa e periodo di estudio por ta mas productivo, e tabata prepara hopi bon. E tabata lesa e buki bes tras bes, busca e textonan den su Bijbel na braille y despues pensa con pa contesta e preguntanan. E metodo aki tabata hopi efectivo. Durante e estudio, e tabata sinta pia crusa riba un tapijt y tabata splica cu entusiasmo y cu stem masha duro mes loke el a compronde. No a dura mucho cu mi a cuminsa bishit’e dos biaha pa siman y cada estudio tabata dura dos ora.

KINGSLEY TA BAY REUNION Y TA PARTICIPA

Kingsley y Paul

Kingsley tabata ansioso pa bay reunion na Salon di Reino, pero esey no tabata facil. E tabatin mester di yudansa pa e sinta den su rolstoel, pa hinc’e den auto y pa baha drenta den Salon di Reino. Pero e rumannan tabata tuma turno pa yud’e y pa nan esey tabata un privilegio. Durante reunion, Kingsley tabata sinta cu un speaker na su horea, y e tabata scucha cu atencion y hasta duna comentario.

Despues cu Kingsley a studia pa un tempo, el a dicidi di skirbi su nomber den e Scol di Ministerio Teocratico. Dos siman prome cu su prome parti di lesamento di Bijbel, mi a puntr’e si el a practica. Mesora el a contesta mi: “Si, Ruman. M’a train un 30 biaha asina.” Mi a elogi’e pa su esfuerso y a puntr’e si mi por tende e lesamento. El a habri su Bijbel, pone su dede riba e texto di braille y cuminsa lesa. Pero mi a ripara cu su dedenan no tabata move riba e blachi manera un hende ciego ta haci normalmente. Luga, el a siña henter e lesamento di Bijbel fo’i su cabes.

Mi no por a kere. Awa tabata basha for di mi wowo segun cu mi tabata wak e cu atencion. Ora Kingsley a caba di lesa, mi a puntr’e con bin e por a corda tur e versiculonan ey asina bon siendo cu ta 30 biaha so el a train. El a contesta mi: “No, Ruman. M’a train e un 30 biaha pa dia.” Imagina bo! Mas cu un luna largo, Kingsley a sinta lesa riba su tapijt, y el a keda lesa e versiculonan te ora cu e tabata sa nan fo’i su cabes.

Por fin a yega e dia cu Kingsley tabatin su prome parti. Ora el a caba di lesa, e rumannan a bati man duro. Hopi ruman a yora ora nan a mira e determinacion di e studiante nobo aki di e scol. Un publicador, cu a stop di duna parti den scol pasobra e tabata bira nervioso, a pidi pa bolbe skirbi su nomber den scol. Dicon? El a bisa: “Si Kingsley por, mi tambe por.”

Dia 6 di september 2008, despues di a studia Bijbel pa tres aña, Kingsley a simbolisa su dedicacion na Jehova mediante bautismo. El a sirbi Dios fielmente te na su morto dia 13 di mei 2014, y el a muri cu e speransa di sigui sirbi Jehova den Paradijs cu vigor y salud perfecto. (Isa. 35:5, 6)—Segun e relato di Paul McManus.

^ par. 4 Publica na 1995. No ta disponibel mas.