Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2015

Kico Por Yuda Nos Keda Moralmente Limpi?

Kico Por Yuda Nos Keda Moralmente Limpi?

“Limpia boso man, ... y purifica boso curason.” —SANT. 4:8.

1. Kico mundo ta pensa di pureza moral?

PUREZA moral a bay for di moda. Hopi hende ta pensa cu homosexualidad y relacion sexual entre hende cu no ta casa cu otro ta cosnan normal. Hasta den propaganda y den e mundo di entretenimento nan ta presenta esakinan como un estilo di bida aceptabel. (Sal. 12:8) Inmoralidad a plama asina tanto cu ta parce cu ta imposibel pa nos hiba un bida decente. Si bo a yega di pensa asina, no desanima. Cu yudansa di Jehova, nos por keda moralmente limpi, of decente, den un mundo inmoral.—Lesa 1 Tesalonicensenan 4:3-5.

2, 3. (a) Dicon ta asina importante pa lucha contra mal deseo? (b) Kico nos lo trata den e articulo aki?

2 E prome cos cu nos mester compronde ta cu pa hiba un bida moralmente limpi, nos mester rechasa deseonan inmoral. Dicon? Pasobra nan ta manera as cu ta atrae pisca na un anzue. Debi cu nos ta imperfecto, inmoralidad por ta hopi atractivo. Si nos no rechasa pensamento inmoral y mal deseo di biaha, nan por bira asina fuerte cu nos no ta logra resisti  nan. E ora ey, hasta un sirbidor di Jehova lo por actua riba su mal deseo y comete inmoralidad asina cu un oportunidad presenta. Manera Bijbel ta bisa: “Ora nutri e deseo, e ta duna luz na pica.”—Lesa Santiago 1:14, 15.

3 Lo bo keda sorprendi con lihe un deseo por crece y pone bo comete un pica serio. Pero ta un alivio pa sa cu si nos actua mesora y no laga mal deseo saca raiz den nos curason, nos por evita no solamente e pica di inmoralidad, sino tambe su consecuencianan amargo. (Gal. 5:16) Den e articulo aki nos lo bay trata tres cos cu por yuda nos den e lucha contra mal deseo: nos amistad cu Jehova, e consehonan di Bijbel y e yudansa di rumannan maduro den congregacion.

“HALA CERCA DIOS”

4. Dicon ta importante pa nos hala cerca Jehova?

4 Pa nos haya proteccion, nos tin cu hala cerca Dios. Y Bijbel ta bisa tur hende cu kier hala cerca dje: “Limpia boso man, ... y purifica boso curason.” (Sant. 4:8) Ora nos ta balora nos amistad cu Jehova, nos ta haci nos best pa tur nos accionnan y hasta nos pensamentonan agrad’e. Nos ta purba di tene nos curason limpi door di ocupa nos mente cu pensamentonan puro, decente y digno. (Sal. 24:3, 4; 51:6; Flp. 4:8) Jehova ta compronde cu nos ta imperfecto y cu nos ta inclina na sinti deseonan cu no ta bon. Pero nos tambe mester compronde cu Jehova ta sinti duele cada biaha cu nos laga pensamentonan inmoral drenta nos mente sin cu nos ta haci nada pa rechasa nan. (Gen. 6:5, 6) Si nos medita riba esaki, nos lo bira mas determina pa tene nos pensamentonan limpi.

5, 6. Con oracion por yuda nos lucha contra deseonan inmoral?

5 Jehova lo duna nos e yudansa necesario pa lucha contra pensamentonan inmoral si nos keda pidie yuda nos. Pa medio di oracion nos ta hala cerca dje y e, na su turno, tambe ta hala cerca nos. Lo e duna nos su spirito santo na abundancia pa duna nos e forsa pa resisti pensamentonan inmoral y asina keda limpi. Pues, bisa Jehova cu bo kier pa e meditacion di bo curason, esta, bo pensamentonan, agrad’e. (Sal. 19:14) Nos por pidie humildemente pa samina nos y yuda nos mira si nos tin cualkier “caminda di maldad”—cualkier deseo robes of pensamento incorecto —cu lo por hiba nos na pica. (Sal. 139:23, 24) Nos ta pidi Jehova continuamente pa yuda nos keda firme ora nos haya nos cu tentacion?—Mat. 6:13.

6 Tin biaha, nos crianza of conducta di pasado ta pone cu nos ta sinti nos mes atrai na cosnan cu Jehova ta condena. Hasta ora esey ta e caso, Dios por yuda nos haci e cambionan necesario pa asina nos por haci loke ta agrad’e. Tuma, por ehempel, Rey David. Despues cu el a comete adulterio cu Betsabe, el a roga Jehova: “Crea den mi un curason limpi, ... y renoba un spirito recto den mi.” (Sal. 51:10, 12) Aunke e deseo pa comete inmoralidad ta masha fuerte, Jehova por haci nos deseo pa obedec’e hasta mas fuerte cu mal deseo. Aunke mal deseo por ta hancra den nos curason y nos tin hopi problema pa tene nos pensamentonan limpi, Jehova por yuda nos obedece su mandamentonan y hiba un bida limpi. E por yuda nos domina pensamentonan impuro.—Sal. 119:133.

Si nos ripara cu un mal deseo ta cuminsa saca raiz den nos curason, nos tin cu ranc’e di biaha (Wak paragraf 6)

“CUMPLI CU E PALABRA”

7. Con Bijbel por proteha nos contra mal deseo?

7 Un di e maneranan cu Jehova ta contesta nos oracionnan ta pa medio di su  Palabra. E sabiduria di Bijbel ta “na prome luga puro.” (Sant. 3:17) Si nos ta lesa e Palabra di Dios tur dia y ta medita riba loke nos ta lesa, esey lo yuda nos proteha nos mente contra pensamentonan inmoral. (Sal. 19:7, 11; 119:9, 11) Ademas, den Bijbel nos ta haya ehempel- y consehonan util cu por yuda nos pa no entrega na mal deseo.

8, 9. (a) Kico a hiba un mucha homber na peca cu un muher inmoral? (b) Den ki situacionnan nos por aplica e spiertamento di Proverbionan capitulo 7?

8 Proverbionan 5:8 ta bisa: “Tene bo caminda leu for di [e muher inmoral], y no yega cerca di su porta di cas.” Un hende cu no ta haci caso di e conseho ey ta core peliger grandi, manera Proverbionan capitulo 7 ta mustra. Eynan nos ta lesa di un mucha homber cu a bay dal un keiro banda di e cas di un muher inmoral. Tabata birando anochi. E muher, cu kisas tabata bisti na un manera provocativo, a acerca e hoben, gar’e tene, sunch’e y bis’e cosnan cu a lanta deseonan den dje cu e no a logra resisti y como resultado el a tene relacion cu e muher. Parce cu e hoben no a sali for di cas cu e intencion di comete inmoralidad. E no tabatin experencia y tabata falta comprondemento. Pero awor e tabatin cu biba cu e consecuencianan  desastroso di su accion. Tabata mihor si el a keda leu for di e muher.—Prov. 7:6-27.

9 Algo similar lo por pasa cu nos? Por sosode cu nos ta actua cu falta di comprondemento y ta expone nos mes na situacionnan peligroso cu ta lanta deseonan incorecto den nos. Por ehempel, mas laat den anochi tin mas chens cu television ta presenta programanan cu no ta apropia pa cristian. Kico lo por pasa si nos ta sinta cambia canal djis pa wak kico tin na television? Ademas, ta peligroso pa click riba link di Internet cu nos no sa na cua website nan ta bay y pa bishita chat room of website cu tin propaganda pa wak pornografia of cu ta ofrece servicionan sexual. Cada bes cu nos bay riba websitenan asina, diripiente nos por haya nos cu cosnan inmoral. Lo no ta mas dificil e ora ey pa nos keda moralmente limpi?

10. Dicon flirtmento ta peligroso? (Wak e prome plachi.)

10 Bijbel ta duna nos conseho tambe tocante e manera pa trata cu e sexo opuesto. (Lesa 1 Timoteo 5:2.) E texto ey ta mustra bon cla cu flirtmento no ta bon. Tin hende ta pensa cu no tin nada malo si nan ta flirt cu mirada, gesto of body language, ya cu no tin ningun contacto fisico. Pero cristiannan ta duna atencion romantico solamente na nan casa of na e persona cu nan lo kier casa cu ne. Ora dos hende ta flirt cu otro, nan por cuminsa haya pensamentonan impuro cu por hiba na pica sexual serio. No balota e peliger ey. El a pasa cu hopi hende caba.

11. Ki bon ehempel Jozef a laga pa nos?

11 Jozef a laga un bon ehempel pa nos. Ora e casa di su doño, Potifar, a purba di seducie, el a rechas’e. Pero e muher no a stop. Tur dia e tabata pidi Jozef “pa ta cerca dje.” (Gen. 39:7, 8, 10) Segun un analista di Bijbel, ta comosifuera e muher a invita Jozef pa nan pasa un rato hunto nan dos so, cu e speransa cu Jozef lo a tuma e iniciativa pa bay mas leu. Pero Jozef tabata determina pa no duna e muher e impresion cu e tabata gusta e invitacion ey. E no a flirt cu e muher, y el a nenga di reacciona riba e flirtmento di e muher; asina el a evita cu mal deseo a crece den su curason. Finalmente, ora e casa di Potifar a purba di oblig’e pa tene relacion cu ne, Jozef no a dun’e ni un chens. El “a laga su paña den man di e muher y a huy, y a sali bay pafo.”—Gen. 39:12.

12. Dicon nos sa cu loke nos ta wak por afecta nos curason?

12 Bijbel ta spierta nos tambe cu nos wowo por afecta nos curason y crea mal deseo sexual. Hesus a bisa: “Ken cu sigui wak un muher cu pasion, ya caba a comete adulterio cu ne den su curason.” (Mat. 5:28) Corda cu ta esey ta loke a pasa cu Rey David: “For di riba dak el a mira un muher ta baña.” (2 Sam. 11:2) Na e momento ey e mester a bira su cara y pensa riba otro cos, pero e no a haci esey. Esaki a pon’e cuminsa desea e muher di un otro homber, y el a comete adulterio cu ne.

13. (a) Dicon nos mester cera un pacto cu nos wowonan? (b) Kico e pacto ey ta encera?

13 Si nos kier rechasa fantasianan inmoral, nos tin cu “cera un [pacto] cu [nos] wowonan”, manera Job a haci. (Job 31:1, 7, 9) Na moda di papia, nos ta palabra seriamente cu nos mes cu nos lo no permiti nos wowonan wak otro hende cu intencionnan inmoral. Esaki kiermen cu nos lo kita nos bista di biaha si nos mira un plachi sensual of erotico riba computer, borchi di propaganda, portada di revista of cualkier otro caminda.

14. Kico nos mester haci pa nos keda moralmente limpi?

 14 Kico si bo ta sinti cu den bo lucha contra mal deseo bo tin cu traha riba algun aspecto di loke nos a caba di trata? Wel, tuma accion mesora. Pone e conseho di e Palabra di Dios na practica; asina bo ta evita di comete pica y lo bo por keda puro.—Lesa Santiago 1:21-25.

“YAMA E ANCIANONAN”

15. Dicon ta importante pa nos pidi yudansa si nos tin problema den nos lucha contra mal deseo?

15 Kico si nos tin problema pa resisti mal deseonan sexual? No lubida cu nos tin rumannan maduro y capaz cu gustosamente lo yuda nos. Claro cu no ta facil pa papia tocante un asunto asina personal, pero si bo tuma un curashi y desahoga bo cerca un ruman maduro, lo e por yuda bo descubri peligernan cu kisas bo no a ripara prome. Kisas bo tin e tendencia di minimisa bo problema of hustifica bo accionnan. (Prov. 18:1; Heb. 3:12, 13) E ruman lo por yuda bo corigi e inclinacion ey. Esaki lo permiti bo haci e cambionan necesario pa bo no perde e aprobacion di Jehova.

16, 17. (a) Con e ancianonan por yuda hende cu tin problema pa resisti mal deseo? Duna un ehempel. (b) Dicon ta importante pa rumannan cu ta wak pornografia pidi yudansa di biaha?

16 E ancianonan den nos congregacion ta esnan mihor cualifica pa yuda nos. (Lesa Santiago 5:13-15.) Un hoben di Brazil tabatin hopi aña ta lucha contra mal deseo. El a conta: “Mi tabata sa cu Jehova no tabata gusta mi pensamentonan, pero mi tabatin hopi berguensa di conta un hende.” Afortunadamente, un anciano a realisa cu e hoben tabatin mester di yudansa y a anim’e pa laga e ancianonan yud’e. Cu ki resultado? E hoben a bisa: “E ancianonan tabata hopi cariñoso y comprensivo cu mi. Esey a sorprende mi, pasobra mi tabata sinti cu mi no a merece un trato asina. Nan a scucha mi cu atencion. Nan a uza Bijbel pa corda mi cu Jehova ta stima mi, y nan a haci oracion cu mi. Tur esey a yuda mi acepta e conseho cu nan a duna mi for di Bijbel.” Añanan despues, e hoben aki a haci bon progreso spiritual, y el a comenta: “Awor mi sa cu ta mihor bo busca yudansa en bes di lucha bo so contra mal deseo.”

17 Ta importante pa pidi yudansa specialmente si bo tin e custumber di wak pornografia. Mas bo tarda pa busca yudansa, mas grandi e chens ta bira cu mal deseo ta pone bo comete un pica cu ta haci daño na e hendenan rond di bo y susha e nomber di Jehova. Hopi ruman a pidi e ancianonan yuda nan y a acepta nan consehonan, ya cu nan kier a agrada Jehova y keda den e congregacion.—Sant. 1:15; Sal. 141:5; Heb. 12:5, 6.

NO ENTREGA!

18. Kico bo ta determina pa haci?

18 Jehova lo mester ta sintie hopi orguyoso di su sirbidornan, pasobra a pesar cu e mundo di Satanas ta bay di malo pa pio, nan si ta luchando duro pa rechasa mal pensamento y pa obedece Jehova su normanan moral halto. Pues, no entrega! Laga nos keda cerca di Jehova, y acepta e guia cu e ta duna nos pa medio di su Palabra y e congregacion cristian. Si nos keda moralmente limpi, nos lo sinti un gran paz y satisfaccion. (Sal. 119:5, 6) Y den futuro, despues cu Satanas ser elimina, nos lo tin e privilegio di biba pa semper den un mundo liber di su influencia inmoral.