Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2015

Cristo Ta Demostracion di e Poder di Dios

Cristo Ta Demostracion di e Poder di Dios

“Cristo ta demostracion di e poder ... di Dios.”—1 COR. 1:24.

1. Dicon Pablo a bisa cu Cristo ta demostracion di e poder di Dios?

JEHOVA a duna Hesucristo poder p’e haci cosnan extraordinario. E cuater Evangelionan ta duna detaye di algun di e milagernan ey, pero sin duda el a haci hopi mas. (Mat. 9:35; Luc. 9:11) Si, Jehova a manifesta su gran poder pa medio di Hesus. Pesey apostel Pablo a bisa: “Cristo ta demostracion di e poder y sabiduria di Dios.” (1 Cor. 1:24) Pero dicon e milagernan di Hesus ta asina importante pa nos?

2. Kico nos por siña for di e milagernan di Hesus?

2 Apostel Pedro a bisa cu Hesus a haci milager y “cosnan maraviyoso.” (Echo. 2:22) E obranan poderoso cu Hesus a haci riba Tera ta un muestra di cosnan mas grandi cu lo e haci na un escala mundial durante su Reinado di Mil Aña. Ademas, su milagernan ta yuda nos compronde su personalidad mihor y tambe esun di su Tata. Laga nos analisa tres di e milagernan ey y wak ki efecto nan por tin riba nos bida awor y den futuro.

 UN MILAGER CU TA DEMOSTRA HESUS SU GENEROSIDAD

3. (a) Ki situacion a pone cu Hesus a haci su prome milager? (b) Dicon loke Hesus a haci na Cana tabata un muestra di generosidad?

3 Hesus a haci su prome milager na un fiesta di casamento na Cana di Galilea. Kisas tabatin mas invitado cu nan a spera, y biña a caba. Esey a pone cara di e pareha recien casa na berguensa, ya cu nan tabatin e deber di mustra hospitalidad. Maria, mama di Hesus, tabata un di e invitadonan. Pa añanan el a medita riba e profecianan relaciona cu su yiu. E tabata sa cu Hesus lo a ser yama “Yiu di e Haltisimo.” (Luc. 1:30-32; 2:52) El a pidi Hesus yudansa pasobra el a kere cu e tabatin algun poder special? Nos no sa. Loke si tabata bisto ta cu tanto e como Hesus a sinti duele di e pareha y kier a yuda nan. Pesey, Hesus milagrosamente a cambia 380 liter (100 galon) di awa den biña di bon calidad. (Lesa Juan 2:3, 6-11.) Hesus tabatin e obligacion di haci e milager aki? No. El a haci esaki pasobra hende tabata importante p’e y pasobra e kier a imita e generosidad di su Tata.

4, 5. (a) Kico nos ta siña for di e prome milager di Hesus? (b) Kico e milager na Cana ta siña nos tocante futuro?

4 Hesus a produci biña di bon calidad pa un grupo grandi di hende. Kico nos ta siña for di e milager aki? Cu Hesus y Jehova ta interesa den e sintimentonan di hende y cu nan ta generoso. Ni e Tata ni e Yiu no ta pichiri. Djis imagina con Jehova lo uza su poder den e mundo nobo pa laga “tur pueblo” riba Tera disfruta di bon cuminda na abundancia.—Lesa Isaias 25:6.

5 Pensa un rato riba lo siguiente: Pronto Jehova lo duna tur hende riba Tera tur loke nan tin mester y hasta mas cu esey. Tur hende lo tin un cas bunita y bon cuminda. Nos ta anhela di mira tur e cosnan maraviyoso cu nos Dios generoso lo duna nos den Paradijs.

Ora nos ta duna di nos tempo generosamente, nos ta mustra cu nos ta imita Hesus (Wak paragraf 6)

6. (a) Con Hesus semper a uza su poder? (b) Con nos por imita su generosidad?

6 Hesus nunca a uza su poder pa satisface su propio deseonan. Ora Diabel a purba di lag’e cay den tentacion, el a nenga di uza su poder pa cambia piedra den pan pa beneficia su mes. (Mat. 4:2-4) Mas bien, el a uza su poder pa satisface e necesidadnan di otro hende. Con nos por imita Hesus su interes den hende? E mes a bisa: “Custumbra duna.” (Luc. 6:38) Nos por invita rumannan pa bin come y pasa un rato agradabel na nos cas? Kico si un ruman homber kier train su discurso despues di reunion of si un ruman kier haya yudansa pa mehora su sirbishi? Nos lo dedica suficiente tempo na nan? Ora nos ta generoso cu nos recursonan y cu nos tempo, nos ta demostra cu nos ta sigui e ehempel di Hesus.

 “TUR HENDE A COME Y KEDA SATISFECHO”

7. Ki problema lo keda existi tanten cu nos ta biba den e mundo di Satanas?

7 Pobreza no ta algo nobo. Jehova a bisa e Israelitanan cu semper lo tin hende pober den e pais. (Deu. 15:11) Y siglonan despues, Hesus a bisa: “Semper boso lo tin hende pober cerca boso.” (Mat. 26:11) Hesus tabata kiermen cu pobreza ta un problema sin solucion? No. Loke e kier a bisa ta cu pobreza lo keda existi tanten cu nos ta biba den e mundo di Satanas. Pero den e mundo nobo cos lo ta completamente diferente. E milagernan di Hesus ta un indicacion cu lo bin temponan mihor y cu ora e Reino ta goberna e Tera tur hende lo disfruta di cuminda na abundancia y keda satisfecho.

8, 9. (a) Dicon Hesus a alimenta miles di hende? (b) Kico bo ta sinti ora bo pensa riba e milager aki?

8 Un salmista a bisa lo siguiente di Jehova: “Bo ta habri bo man, y ta satisface e deseo di tur ser bibo.” (Sal. 145:16) Riba Tera, Cristo a imita su Tata, y como “e poder ... di Dios”, e tambe hopi biaha a habri su man pa satisface e necesidadnan di otro hende. E no a haci esey djis pa demostra cu e tabata poderoso, sino pasobra di berdad e tabata preocupa pa e hendenan, manera e relato di Mateo 14:14 pa 21 ta mustra. (Les’e.) Hopi hende di e stadnan den bisindario a sigui Hesus na pia. (Mat. 14:13) Ora a bira anochi, e discipelnan a mira cu e hendenan tabata hopi cansa y hambra. Pues, nan a recomenda Hesus pa manda e hendenan bay cumpra algo pa nan come. Kico Hesus a haci?

9 Hesus a haci un milager. Uzando cinco pan y dos pisca, el a alimenta mas o menos 5.000 hende, sin conta hende muher y mucha. E relato ta bisa cu “tur hende a come y keda satisfecho” y hasta a resta 12 macutu yen di pan. Pues, Hesus no a duna nan djis un pida pan. Mas bien, el a percura pa nan haya un bon cuminda cu a duna nan suficiente energia pa cuminsa cu nan biahe largo pa cas. (Luc. 9:10-17) Esta dushi pa wak cuanto compasion Hesus a demostra pa e famianan ey, incluso pa e muchanan! Bo no ta sinti bo conmovi ora bo pensa riba e cariño cu e tabatin pa hende?

10. Kico lo pasa pronto cu pobreza?

10 Awe, cientos di miyones di hende ta biba den pobreza pa motibo di mal maneho di gobernantenan corupto. Algun di nos rumannan tin masha poco pa come, y aunke nan no ta muri di hamber, no por bisa tampoco cu nan ta “keda satisfecho.” Pero pronto sirbidornan di Dios lo biba den un mundo sin corupcion y sin pobreza. Si abo tabatin poder, lo bo no a haci algo pa drecha e situacion? Nos Dios Todopoderoso, Jehova, tin e poder y e deseo di satisface nos necesidadnan. Y el a priminti cu pronto lo e caba cu tur sufrimento.—Lesa Salmo 72:16.

11. (a) Dicon bo por ta sigur cu Cristo pronto lo uza su poder na nos fabor? (b) Como testigo di Jehova, kico nos ta sinti nos motiva pa haci?

11 Ora Hesus tabata riba Tera, el a predica den un teritorio relativamente chikito pa tres aña y mey so. (Mat. 15:24) Pero como Rey den cielo, su teritorio lo abarca tur skina di e Tera. (Sal. 72:8) E milagernan di Hesus ta duna nos e confianza cu pronto lo e uza su poder na nos fabor. Y aunke nos no por haci milager, nos por uza nos tempo y energia pa siña hende tocante e futuro maraviyoso cu Bijbel ta priminti. Como testigo di Jehova, nos tin e deber di comparti e conocemento ey cu e  hendenan, pasobra nos sa kico ta bay pasa pronto. (Rom. 1:14, 15) Si nos medita riba loke e Reino di Dios lo haci pa humanidad, nos lo sinti nos motiva pa papia cu tur hende tocante e bon noticia ey.—Sal. 45:1; 49:3.

HESUS TIN CONTROL RIBA E FORSANAN DI NATURALEZA

12. Dicon nos por ta sigur cu Hesus sa perfectamente con e Tera ta funciona?

12 Hesus tabata banda di Jehova como e “trahador experto” durante creacion di e Tera y di tur loke tin riba dje. (Prov. 8:22, 30, 31; Col. 1:15-17) Ta pesey Hesus sa asina bon con e Tera ta funciona. E sa precies con pa uza y maneha e recursonan di nos planeta y con pa distribui nan na un manera husto.

Con e manera cu Hesus a uza su poder pa haci milager ta laga bo sinti? (Wak paragraf 13, 14)

13, 14. Duna un ehempel di e poder cu Hesus tin riba forsanan di naturaleza.

13 Riba Tera, Hesus a demostra di ta e poder di Dios ora el a domina e forsanan di naturaleza. Pensa riba loke el a haci ora cu un mal tempo a menasa bida di su discipelnan. (Lesa Marco 4:37-39.) Un experto riba tereno di Bijbel a comenta cu e palabra Griego den e buki di Marco pa “biento masha fuerte mes” ta ser uza pa describi un tormento of horcan. E ta referi na un tormento cu nubia preto, rafaganan fuerte di biento, strena y awasero cu ta causa inundacion. Despues cu e pasa ta keda un destruccion atras.

14 Imagina bo e escena: Cristo tabata asina ocupa cu su sirbishi cu el a keda morto cansa y a bay un soño profundo den e boto. Ni sikiera e olanan cu tabata dal contra e boto ni e zonido di e tormento no a lant’e for di soño; asina cansa e tabata. Pero su discipelnan tabata morto spanta, y nan a bay lant’e y a bis’e: “Nos ta cerca di muri!” (Mat. 8:25) Kico Hesus a haci? El a lanta para y a bisa e biento y e lama: “Silencio! Keda keto!” (Mar. 4:39) Anto mesora biento a baha y tur cos a calma completamente. Esta un gran ehempel di Hesus su poder riba forsanan di naturaleza!

15. Con Jehova a demostra cu e tin control completo riba e forsanan di naturaleza?

15 Hesus por a controla e forsanan di naturaleza pasobra Jehova tabata e Fuente di su poder. Pues, ta mas cu claro cu Jehova tambe por controla nan. Ban wak algun ehempel di esey. Prome cu Diluvio, Jehova a bisa: “Aki shete dia mas lo mi manda awasero riba Tera pa cuarenta dia y cuarenta anochi.” (Gen. 7:4) Despues, na Exodo 14:21, nos ta lesa cu Jehova “a haci e lama retira pa medio di un biento fuerte di pariba.” Y na Jonas 1:4 nos ta lesa cu Jehova “a lanta un biento duro riba lama, y tabatin un tormento grandi riba lama, asina cu e barco tabata core peliger di kibra.” E echo cu nos sa cu Jehova tin control completo riba naturaleza ta duna nos confianza. Ta bisto cu e futuro di planeta Tera ta den bon man.

16. Dicon ta trankilisante pa sa cu e Creador y su Yiu tin pleno poder riba forsanan di naturaleza?

16 Pues, nos Creador y su “trahador experto” tin poder extraordinario. Esey sigur ta trankilisa nos. Durante e 1.000 aña, ora cu tur nan atencion lo ta dirigi riba Tera, tur hende lo biba den siguridad. Desasternan natural, cu ta causa asina tanto sufrimento, lo pasa pa historia. Den e mundo nobo lo no tin motibo pa nos tin miedo di horcan, tsunami, erupcion di volcan of temblor. Lo yega e dia cu forsanan di naturaleza lo no haci daño mas na hende, pasobra “e tent di Dios lo ta cu humanidad.”  (Rev. 21:3, 4) Nos por ta sigur cu e poder di Dios, cu Cristo lo eherce, lo controla e forsanan di naturaleza durante e Reinado di Mil Aña.

IMITA JEHOVA Y HESUCRISTO

17. Den ki manera nos por imita Dios y Cristo awe?

17 Claro cu nos no tin e poder di preveni desaster natural. Ta Jehova y Hesus so por haci esey. Pero nos tur tin cierto poder si. Con nos por uz’e? Wel, nos por pone na practica e palabranan di Proverbionan 3:27. (Les’e.) Ora nos rumannan ta pasa den dificultad, nos por consola nan y apoya nan den sentido fisico, emocional y spiritual. (Prov. 17:17) Por ehempel, nos por yuda nan recupera di un desaster natural. Scucha loke un ruman viuda a bisa despues cu un horcan a causa daño grandi na su cas: “Mi ta hopi agradecido mes na Jehova y na su organisacion pa e yudansa fisico y spiritual cu nan a duna mi.” Tuma nota tambe di e comentario di un ruman muher soltera cu a sinti su mes hopi angustia despues di mira e daño cu su cas a sufri debi na un tormento. Ora el a haya yudansa di e rumannan, el a bisa: “Ta dificil pa mi describi mi sintimentonan, pero ... danki, Jehova!” Nos ta hopi contento cu nos ta forma parti di un hermandad cu realmente ta interesa den nos y den nos necesidadnan. Pero nos ta mas contento ainda pasobra Jehova y Hesucristo di berdad ta interesa den nos.

18. Con e amor cu a motiva Hesus pa haci milager ta laga bo sinti?

18 Hesus a duna prueba durante su sirbishi cu e ta e “demostracion di e poder ... di Dios.” Pero kico a motiv’e pa haci e milagernan ey? Nunca e no a uza su poder pa impresiona hende ni pa saca probecho personal. El a haci milager pasobra e tabata stima hende. Nos lo siña mas di esey den e siguiente articulo.