Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2015

Uza Bo Imaginacion pa Imita Jehova

Uza Bo Imaginacion pa Imita Jehova

“Imita Dios, como yiunan stima.” —EFE. 5:1.

1. Ki capacidad nos tin cu por yuda nos imita e cualidadnan di Jehova?

JEHOVA a duna nos e capacidad di pone nos mes den sapato di otro hende. Es decir, te na cierto grado, nos por imagina nos mes un situacion aunke nos mes nunca no a pasa aden. (Lesa Efesionan 5:1, 2.) Con nos por uza e capacidad aki pa imita Jehova? Y dicon nos mester tene cuidou pa no uz’e robes?

2. Kico Jehova ta sinti ora e ta mira nos sufri?

2 Jehova a priminti nos un futuro maraviyoso sin niun sufrimento. E unginan fiel ta hopi contento cu Dios a priminti nan bida inmortal den cielo, y e “otro carne[nan]” leal di Hesus ta alegra den e speransa di biba pa semper riba Tera. (Juan 10:16; 17:3; 1 Cor. 15:53) Pero Jehova ta compronde bon cla ki angustia nos ta pasa aden, mescos cu el a compronde con e Israelitanan tabata sufri como esclavo na Egipto. Bijbel ta bisa cu “den tur nan afliccion e tabata afligi.” (Isa. 63:9) Siglonan despues di nan liberacion, ora nan tabata reconstrui e tempel, nan a ser menasa pa nan enemigonan. Pero Jehova a trankilisa su pueblo, bisando: “Esun cu mishi cu boso ta mishi cu [mi] pret’i wowo.” (Zac. 2:8)  Mescos cu un mama ta trata su baby cu cariño, asina Jehova ta proteha su sirbidornan cu cariño. (Isa. 49:15) Den un sentido, Jehova por pone su mes den luga di otro hende, y el a duna nos e mesun capacidad ey.—Sal. 103:13, 14.

HESUS A IMITA JEHOVA SU AMOR

3. Kico ta mustra cu Hesus tabata yen di compasion?

3 Hesus a sinti e dolor di otro hende, aunke e mes nunca no tabata den nan situacion. Por ehempel, e tabata sa cu hopi Hudiu tabatin un bida duro, ya cu e lidernan religioso a gaña nan y obliga nan obedece reglanan cu nan mes a traha. E hendenan tabatin miedo di e lidernan aki. (Mat. 23:4; Mar. 7:1-5; Juan 7:13) Hesus no tabatin miedo di e lidernan ey ni e no a kere nan mentiranan. Pero toch e por a compronde con e hendenan tabata sinti. Pesey, “ora el a mira e multitud, el a haya duele di nan, pasobra nan tabata [maltrata] y descuida, manera carne sin wardador.” (Mat. 9:36) Hesus tabata mescos cu su Tata; el a stima hende y tabata yen di compasion.—Sal. 103:8.

4. Kico Hesus tabata haci pa hende ora el a mira nan sufri?

4 Ora Hesus a mira hende sufri, el a yuda nan pasobra e tabata stima nan. E tabata pinto pinto su Tata. Por ehempel, despues di un biahe largo durante cua el a predica den hopi pueblo hunto cu su apostelnan, nan a dicidi di bay un luga solitario pa nan sosega. Pero ora nan a yega eynan, Hesus a topa un multitud grandi di hende ta ward’e. Con el a reacciona? El a haya duele di nan y a “cuminsa siña nan hopi cos.”—Mar. 6:30, 31, 34.

IMITA JEHOVA SU AMOR

5, 6. Kico nos mester haci pa imita e amor di Dios? Duna un ehempel. (Wak e prome plachi.)

5 Con nos por imita e amor di Jehova? Esey ta, entre otro, den e manera cu nos ta trata nos prohimo. Por ehempel, imagina bo un hoben cristian cu yama Alan. Alan ta pensa riba un ruman homber di edad cu no por bay di cas pa cas pasobra e no por cana bon y casi no por lesa pasobra e tin problema cu su bista. Alan ta corda cu Hesus a bisa: “Manera boso kier pa hende haci cu boso, boso mester haci mescos cu nan.” (Luc. 6:31) Pues, e ta puntra su mes: Kico mi kier pa hende haci cu mi? Su contesta franco ta: Mi kier pa nan hunga futbol cu mi. Ta claro cu e ruman di edad aki no por core y hunga bala. En realidad, e palabranan di Hesus ta indica cu Alan mester a puntra su mes: Si ami tabata e ruman homber ey, kico lo mi tabata kier pa hende haci cu mi?

6 Alan ta jong ainda, pero toch e por imagina situacionnan cu e mes nunca no pasa aden. Alan ta pasa tempo cu e ruman di edad y ta scucha bon ora e ta papia. Asina, pocopoco e ta cuminsa compronde kico e ta nifica pa bira bieu y no por lesa Bijbel mas ni cana di cas pa cas den sirbishi. Ta ora Alan cuminsa sinti e ruman su dolor, e por mira ki yudansa e ruman tin mester, y esey ta motiv’e pa yud’e. Nos tur por haci mescos. Pa imita e amor di Dios, nos tin cu pone nos mes prome den sapato di nos rumannan.—1 Cor. 12:26.

Imita Jehova y trata otro hende cu amor (Wak paragraf 7)

7. Con nos por sa ki dolor nos rumannan ta pasa aden?

7 No ta semper facil pa compronde e dolor di otro hende. Hopi hende ta sufri cosnan cu nos mes nunca no a pasa aden. Por ehempel, hopi di nos rumannan tin limitacionnan fisico debi na maleza, accidente of biehes. Otronan ta sufri di depresion, atake di panico of herida emocional pa motibo di un of otro tipo di abuso. Tin ruman ta mayor soltero of ta biba den cas cu  famia cu no ta sirbi Jehova. Tur hende tin un of otro problema, y hopi biaha ta problema cu nos mes no a yega di pasa aden. Den casonan asina, kico nos por haci? Con nos por imita e amor di Dios? Nos sa cu cada persona kisas tin mester di algo otro pa yuda nan. Pues, si nos scucha bon y purba di compronde e sintimentonan di e persona te caminda nos por, nos lo haya sa cua ta e mihor manera pa yud’e. Kisas nos por dun’e un poco animacion spiritual of haci algo practico p’e. Ora nos ta haci esey, nos ta imita Jehova.—Lesa Romanonan 12:15; 1 Pedro 3:8.

IMITA JEHOVA SU BONDAD

8. Kico a yuda Hesus trata hende cu bondad?

8 E Yiu di Dios a bisa: “E Haltisimo ... ta bondadoso hasta cu hende malagradecido y malbado.” (Luc. 6:35) Y Hesus a imita su Tata tempo e tabata riba Tera. Kico a yud’e trata hende cu bondad? Wel, Hesus a imagina su mes ki efecto loke e bisa y haci lo tabatin riba otro hende. Por ehempel, un biaha un muher conoci como pecador a bin cerca Hesus. E muher tabata yora asina tanto cu su lagrimanan a muha Hesus su pia. Hesus por a mira con malo e muher a sintie y cu el a arepenti di e cosnan malo cu el a haci. Y Hesus a realisa cu si e papia malo cu ne, esaki sin duda lo a kibra su curason. Pesey, el a elogia e muher pa e bon cu el a haci y a pordon’e. Hesus a hasta papia bondadosamente cu un fariseo cu no a gusta loke Hesus a haci pa e muher aki.—Luc. 7:36-48.

9. Kico por yuda nos imita Jehova su bondad? Duna un ehempel.

9 Con nos por imita Jehova su bondad? Apostel Pablo a skirbi: “Un esclavo di Señor no tin nodi pleita, pero e mester ta amabel [of, “yen di tacto”, segun e nota] cu tur hende.” (2 Tim. 2:24) Hende cu tin tacto sa con pa trata cu situacionnan delicado pa no hurt otronan. Imagina bo den e siguiente situacionnan y pensa con lo bo por ta bondadoso: Bo hefe no ta haci su trabou bon. Con lo bo reacciona? Un ruman ta bin reunion despues di basta luna. Kico lo bo bis’e? Un doño di cas den sirbishi ta bisa cu e ta mucho ocupa pa papia. Lo bo tin comprension p’e? Bo casa ta puntra bo: “Dicon bo no a bisa mi cu bo a traha plan pa diasabra?” Lo bo contest’e na un manera amabel? Si nos ta pone nos mes den sapato di otro hende y ta purba di imagina nos ki efecto nos palabranan lo tin riba nan, nos lo sa kico pa bisa y pa haci, y nos lo ta bondadoso manera Jehova.—Lesa Proverbionan 15:28.

IMITA JEHOVA SU SABIDURIA

10, 11. Kico por yuda nos imita e sabiduria di Dios? Duna un ehempel.

10 E echo cu nos tin e capacidad di imagina sucesonan cu nos mes no a experencia por yuda nos imita un di e cualidadnan mas sobresaliente di Jehova: su sabiduria. Jehova ta hopi sabi y, si e kier, e por mira kico lo bay pasa den futuro. Claro cu nos no por wak den futuro, pero nos por demostra sabiduria. Con? Prome cu nos tuma un decision, nos por pensa riba e posibel consecuencianan di loke nos ta bay haci. Nos no mester ta manera e Israelitanan. Nan no a pensa mes riba kico lo pasa si nan desobedece Dios. Nan no a pensa tampoco riba nan relacion cu Jehova. Moises a realisa esaki, y e tabata sa cu nan lo a bay desobedece Jehova a pesar di tur loke el a haci pa nan. Pesey, durante un reunion cu henter e nacion, el a recita un cantica cu a bisa en parte: “Nan ta un pueblo sin komprondementu, nan no tin idea  di nada. Si nan tabata un tiki sabí, nan lo mester a komprondé kon lo para ku nan.”—Deu. 31:29, 30; 32:28, 29, BPK.

11 Pues, pa nos imita e sabiduria di Dios, nos mester uza nos imaginacion y mira e posibel consecuencianan di loke nos ta haci. Por ehempel, ora dos persona ta cuminsa gusta otro, nan tin cu corda cu ora bo ta sinti bo atrai na un hende, ta hopi dificil pa controla bo sintimentonan y deseonan sexual. Nos lo no kier plania ni haci nada cu lo por perhudica nos relacion precioso cu Jehova. Tuma na pecho e siguiente palabranan inspira: “Hende sabí ta mira peliger i ta evit’é, esun sin eksperensia ta dal bai i haña su kastigu.”—Prov. 22:3, BPK.

NO HACI MAL UZO DI NOS IMAGINACION

12. Ki ora imaginacion por ta peligroso?

12 Un persona sabi ta controla su pensamentonan. Dicon? Pasobra nos imaginacion ta manera candela. Si nos uza candela cu cuidou, e ta hopi util. Nos por cushina cu ne y tambe haci otro cosnan. Pero candela descontrola ta peligroso y por kima un cas y mata e habitantenan. Asina tambe, nos imaginacion ta util si nos ta uz’e pa pensa riba cosnan cu nos ta siña for di Jehova. Pero imaginacion ta algo peligroso si nos ta uz’e pa alimenta mal deseo. Por ehempel, si nos ta blo pensa riba actonan inmoral, dado momento nos lo cuminsa haci nan di berdad. Pues, fantasianan inmoral por kibra nos amistad cu Jehova.—Lesa Santiago 1:14, 15.

13. Ki bida Eva probablemente a imagina pa su mes?

13 Ban wak con e prome muher, Eva, a alimenta su deseo pa come e fruta prohibi di “e palo di conocemento di bon y malo.” (Gen. 2:16, 17) E colebra a bisa Eva: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.” Eva a keda pensa riba esaki y “a mira cu e palo tabata bon pa cuminda, y cu e tabata un delicia pa bista.” Kico tabata e resultado? “El a coge di su fruta y a come.” Despues el a duna su esposo, y e tambe a come. (Gen. 3:1-6) Aparentemente, Eva a gusta e idea cu Satanas a bin cu ne: En bes di laga Dios bis’e kico ta bon y malo, e mes por a dicidi esey. Pues, Eva a haci mal uzo di su imaginacion. Via su esposo, Adam, “pica a drenta mundo, y morto pa medio di pica.”—Rom. 5:12.

14. Ki spiertamento Bijbel ta duna tocante inmoralidad sexual?

14 Eva su pica den e Hofi di Eden no a  envolve inmoralidad sexual. Pero Hesus a spierta nos pa no entretene nos mes cu fantasianan inmoral. El a bisa: “Ken cu sigui wak un muher cu pasion, ya caba a comete adulterio cu ne den su curason.” (Mat. 5:28) Pablo tambe a duna e spiertamento: “No plania di antemano pa satisface deseo di carni.”—Rom. 13:14.

15. Ki tipo di tesoro nos mester montona, y dicon?

15 Un otro fantasia peligroso ta di imagina nos mes ta bira rico, ya cu esaki por kita nos atencion for di e sirbishi di Jehova. E rikesa di un hende rico ta “manera muraya halto den su mes imaginacion.” E no ta dun’e berdadero proteccion. (Prov. 18:11) Hesus a conta un storia pa mustra cu un hende cu ta “montona tesoro pa su mes, ma no ta rico den bista di Dios” ta den un situacion sumamente lamentabel. (Luc. 12:16-21) Di otro banda, Jehova ta keda hopi contento ora nos ta haci cosnan cu ta agrad’e. (Prov. 27:11) Nos mes tambe lo ta feliz cu nos a haya Dios su aprobacion pa motibo cu nos a “montona tesoro den cielo.” (Mat. 6:20) No tin duda anto cu e tesoro di mas valioso cu nos por tin ta un bon relacion cu Jehova.

NO LAGA PREOCUPACION APODERA DI BO

16. Con nos por evita cu preocupacion ta apodera di nos?

16 Imagina bo cuanto preocupacion nos lo tabatin si nos tabata haci todo por todo pa bira rico den e mundo aki. (Mat. 6:19) Hesus a conta un ilustracion pa mustra cu “e inkietud di e era aki y e poder engañoso di rikesa” por stroba hende di pone e Reino di Dios na prome luga. (Mat. 13:18, 19, 22) Ademas, tin hende cu semper ta preocupa cu asunto di placa, mientras cu otronan ta den ansha pa tur cos malo cu lo por sosode. Sinembargo, e tipo di pensamentonan negativo ey por haci nos fisicamente malo of hasta pone nos cuminsa perde fe den Jehova. Pesey, laga nos confia den Jehova y corda cu “ansha den curason di hende ta hacie abati, ma un bon palabra ta hacie contento.” (Prov. 12:25) Nos por haya “bon palabra” di animacion cerca un hende cu ta compronde nos, y esey por haci nos curason contento. Pues, pa bo preocupa menos, papia cu un hende di confianza, sea bo mayornan, bo casa of un bon amiga of amigo cu ta mira cosnan for di e punto di bista di Dios.

17. Con Jehova ta yuda nos ora nos tin preocupacion?

17 Niun hende no ta compronde nos preocupacionnan mihor cu Jehova. Pesey Pablo a recomenda: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente pa medio di Cristo Hesus.” (Flp. 4:6, 7) Pues, si bo tin preocupacion, pensa riba tur e personanan cu t’ey pa proteha bo di cualkier daño spiritual: e rumannan, e ancianonan, e esclavo fiel, e angelnan, Hesus y Jehova mes.

18. Con nos imaginacion por yuda nos?

18 Manera nos a mira, nos ta imita Jehova ora nos ta uza nos capacidad pa compronde con otro hende ta sinti. (1 Tim. 1:11; 1 Juan 4:8) Nos lo ta mas feliz si nos ta mustra amor y bondad na otro hende, si nos ta pensa riba e consecuencianan di loke nos ta haci y si nos no ta laga preocupacion apodera di nos. Laga nos haci bon uzo di e regalo cu Dios a duna nos, esta, nos imaginacion, pa mira e futuro cu ta spera nos y pa imita Jehova su amor, bondad, sabiduria y felicidad.—Rom. 12:12.