Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2015

Pregunta di Lector

Pregunta di Lector

Ken ta Gog di Magog menciona den e buki di Ezekiel?

Pa hopi aña, nos publicacionnan a bisa cu Gog di Magog ta e nomber cu ta referi na Satanas e Diabel despues cu a sac’e for di cielo. E splicacion aki tabata basa riba e echo cu e buki di Revelacion ta bisa cu Satanas e Diabel ta e lider di e atake mundial contra e pueblo di Dios. (Rev. 12:1-17) Pues, nos a pensa cu Gog mester ta un otro nomber profetico pa Satanas.

Pero e splicacion ey a lanta varios pregunta importante. Pa cuminsa, Jehova a bisa Gog con e ta bay destruye: “Lo mi duna bo como cuminda na tur sorto di parha di rapiña y na bestia di mondi.” (Eze. 39:4) Despues Jehova a agrega: “Riba e dia ey lo mi duna Gog un luga pa dera ayanan na Israel ... Asina nan lo dera Gog ayanan, hunto cu henter su multitud.” (Eze. 39:11) Pero con ta posibel cu “parha di rapiña” y “bestia di mondi” por come Satanas cu ta un criatura spiritual? Con por dera Satanas riba Tera? Ademas, Bijbel ta bisa bon cla cu Satanas lo ser benta den abismo pa 1.000 aña. Lo e no ser comi ni dera.—Rev. 20:1, 2.

Di otro banda, Bijbel ta bisa nos cu na fin di e 1.000 aña Satanas lo ser libra for di e abismo, y “lo e sali bay pa gaña e nacionnan na e cuater skinanan di Tera, Gog y Magog, y pa reuni nan hunto pa e guera.” (Rev. 20:8) Pero si Satanas ta Gog, con e por gaña Gog? Pues, e “Gog” menciona den e profecia di Ezekiel y den e buki di Revelacion no ta referi na Satanas.

Ken anto ta Gog di Magog? Pa contesta e pregunta ey, nos tin cu compronde for di e Scritura ta ken ta ataca e pueblo di Dios. Bijbel ta menciona tres atake: di “Gog di ... Magog”, di “e rey di noord” y di “e reynan di Tera.” (Eze. 38:2, 10-13; Dan. 11:40, 44, 45; Rev. 17:14; 19:19) Acaso esakinan ta atakenan separa? Probablemente cu no. Bijbel ta referi sin duda na e mesun atake pero bou di un otro nomber. Con nos por sa? Pasobra Bijbel ta bisa nos cu tur e nacionnan di Tera lo ta envolvi den e atake final aki cu lo start e guera di Armagedon.—Rev. 16:14, 16.

 Ora nos compara tur e textonan aki den Bijbel cu ta papia di e atake final contra di e pueblo di Dios, nos por mira claramente cu e nomber Gog di Magog no ta referi na Satanas, sino na un coalicion, of grupo, di nacion. Ta ken lo dirigi e coalicion aki? Lo ta e “rey di noord”? Nos no sa sigur. Pero parce cu e splicacion ey ta cuadra cu loke Jehova ta bisa Gog: “Lo bo bin for di bo luga, for di e partinan mas aleha di noord, abo y hopi pueblo hunto cu bo, nan tur riba cabay, un multitud grandi y un ehercito poderoso.”—Eze. 38:6, 15.

Asina tambe profeta Daniel, kende a biba den e mesun tempo cu Ezekiel, a bisa lo siguiente tocante e rey di noord: “Rumornan for di pariba y for di noord lo molesti’e, y cu gran furia e lo sali pa destrui y caba cu hopi hende. Y e lo lanta su tentnan real entre e lamanan y e bunita Sero Santo; ma e lo yega na su fin, y ningun hende lo no yud’e.” (Dan. 11:44, 45) Esaki ta casi mescos cu loke e buki di Ezekiel ta bisa cu Gog lo haci.—Eze. 38:8-12, 16.

Kico lo sosode como resultado di e atake final aki? Daniel ta conta nos: “E tempo ey, Miguel [Hesucristo], e gran prins cu [desde aña 1914] ta proteha e yiu hombernan di bo pueblo, lo lanta [na Armagedon]. Y lo tin un tempo di angustia [e tribulacion grandi] manera nunca tabatin for di tempo cu tabata existi un nacion te na e tempo ey; y e tempo ey bo pueblo, tur hende cu su nomber wordo haya skirbi den e buki, lo wordo rescata.” (Dan. 12:1) Revelacion 19:11-21 tambe ta duna un descripcion similar di loke Hesus, e representante di Dios, lo haci.

Pero ken e “Gog y Magog” aki ta cu Revelacion 20:8 ta papia di dje? Na fin di e 1.000 aña lo tuma luga un prueba final y lo tin hende cu ta rebela contra Jehova. Nan lo actua cu e mesun odio asesino cu “Gog di ... Magog”, e coalicion di nacionnan cu a ataca e pueblo di Dios un poco prome cu Armagedon. Pero e resultado pa tur dos grupo di enemigo di Jehova lo ta precies mescos: morto eterno. (Rev. 19:20, 21; 20:9) Pesey, tur cos ta indica anto cu ta e hendenan cu rebela na final di e 1.000 aña Bijbel ta yama “Gog y Magog.”

Como studiante diligente di e Palabra di Dios, nos ta ansioso pa sa ta ken lo asumi e papel di “e rey di noord” den futuro cercano. Pero sin importa ken ta esun cu lo encabesa e grupo di nacion cu lo ataca e pueblo di Dios, nos ta sigur di dos cos: (1) Gog di Magog cu su ehercitonan lo ser derota y destrui, y (2) nos Rey, Hesucristo, lo salba e pueblo di Dios y hiba nan den un mundo nobo di berdadero paz y siguridad.—Rev. 7:14-17.