Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2015

Bo Por Gana e Bataya Contra Satanas

Bo Por Gana e Bataya Contra Satanas

“Tuma boso posicion contra [Satanas], firme den fe.” —1 PED. 5:9.

1. (a) Dicon Satanas ta ataca nos cu asina tanto rabia? (b) Con bin nos sa cu nos por gana e bataya contra Satanas?

SATANAS ta bringando un guera contra e unginan cu ta riba Tera y e “otro carne[nan].” (Juan 10:16) E kier caba cu mas tanto sirbidor di Jehova posibel den e poco tempo cu a ked’e. (Lesa Revelacion 12:9, 12.) Nos lo por gana e bataya aki contra Satanas? Sigur cu si! Bijbel ta hasta bisa nos con: “Opone Diabel, y lo e huy for di boso.”—Sant. 4:7.

2, 3. (a) Dicon ta cumbini Satanas cu hende ta kere cu e no ta existi? (b) Dicon abo sa sigur cu Satanas ta existi?

2 Hopi hende ta haci bofon di e idea cu Satanas ta existi. Nan ta pensa cu Satanas y e demoñonan ta sernan imaginario cu bo ta haya den buki, pelicula di horor y video game, y cu hende inteligente no ta kere den e cosnan ey. Pero bo ta kere cu Satanas cu su compinchinan ta rabia cu hende ta pensa cu nan no ta personanan real? No. Al contrario! E mes ta plama e idea ey, pasobra asina ta mas facil p’e gaña e hendenan cu ta duda cu e ta existi.—2 Cor. 4:4.

3 Pero nos cu ta sirbidor di Jehova no ta entre e hendenan cu Satanas ta gaña. Nos sa sigur cu e ta existi. Con nos por  sa? Wel, Bijbel ta bisa nos cu ta Satanas a papia cu Eva via di un colebra. (Gen. 3:1-5) Ta Satanas a papia cu Jehova y a cuestiona Job su motibo pa sirbi Dios. (Job 1:9-12) Ta Satanas a purba di laga Hesus cay den tentacion. (Mat. 4:1-10) Y despues cu e Reino a nace na 1914, ta Satanas “a bay pa bringa” contra e resto di e unginan riba Tera. (Rev. 12:17) E bataya ey ta sigui te awe: Diabel ta purba di caba cu e fe di e resto di e 144.000 y cu e fe di e otro carnenan. Pa gana e bataya aki, nos mester opone, of resisti, Satanas y mantene nos fe firme. E articulo aki lo presenta tres manera cu nos por haci esey.

RECHASA ORGUYO

4. Con Satanas a demostra cu e ta yen di orguyo?

4 Satanas no ta niun tiki humilde. E tabatin e tribilidad di cuestiona Jehova su derecho di goberna y establece su mes como un dios rival. Esta un muestra di orguyo y arogancia! Pesey mes nos mester rechasa orguyo y cultiva humildad. Asina nos ta resisti Satanas. (Lesa 1 Pedro 5:5.) Pero kico ta orguyo? Semper e ta algo malo?

5, 6. (a) Orguyo semper ta malo? Splica. (b) Ki tipo di orguyo ta peligroso? (c) Duna algun ehempel biblico di orguyo cu ta peligroso.

5 Segun un diccionario, orguyo ta un sintimento di confianza y respet propio. Tambe orguyo por ta “un sintimento di satisfaccion cu bo tin pasobra abo of un persona cu bo ta pega cu ne a haci algo bon of tin algo bon.” No tin nada malo den esey. Apostel Pablo a bisa e rumannan na Tesalonica: “Nos ta papia cu orguyo di boso den e congregacionnan di Dios pa motibo cu boso ta demostra perseverancia y fe den tur e persecucion- y tribulacionnan cu boso ta pasa aden.” (2 Tes. 1:4) Pues, ta normal—y hasta probechoso—pa nos sinti nos orguyoso di e logronan di otro hende of di nos mes. Nos no tin nodi sinti berguensa di nos famia, nos cultura of nos pais.—Echo. 21:39.

6 Di otro banda, tin un tipo di orguyo cu por daña nos relacion cu otro hende y specialmente nos amistad cu Jehova. E tipo di orguyo ey por pone nos rechasa bon conseho en bes di acept’e humildemente. (Sal. 141:5) E orguyo aki por pone un hende kere cu e ta masha cos of haya e actitud arogante di kere—hopi biaha sin motibo—cu e ta mihor cu otro hende. Jehova ta odia e tipo di orguyo ey. (Eze. 33:28; Amos 6:8) En cambio, Satanas lo mester ta supercontento ora e mira hende ta imita su arogancia door di gaba tocante nan mes. Djis imagina con el a gosa ora cu hombernan manera Nimrod, Farao y Absalon tabata gaba pa motibo di orguyo incorecto. (Gen. 10:8, 9NW; Exo. 5:1, 2; 2 Sam. 15:4-6) Orguyo a hunga un rol tambe den e caida di Cain. Jehova Dios mes a conseh’e, pero e tabata mucho orguyoso pa acepta e coreccion aki. E tabata terco y a pasa por halto di e spiertamento di Jehova, y esey a hib’e directamente na desaster.—Gen. 4:6-8.

7, 8. (a) Kico ta racismo, y dicon nos por bisa cu e ta un forma di orguyo? (b) Splica con orguyo por kibra e paz di e congregacion.

7 Awe, hende ta demostra orguyo na varios manera cu ta perhudica otronan. Por ehempel, ora hende ta racista. Segun un diccionario, racismo ta e desprecio cu un persona ta sinti pa hende di otro rasa y ta “e creencia cu hende di algun rasa ta superior pasobra nan tin cualidadnan y habilidadnan cu otro rasanan no tin.” Orguyo di rasa a hiba na disturbio, guera y hasta na matamento masal di cierto grupo di hende.

 8 Claro cu cosnan asina no ta tuma luga den e congregacion cristian. Sinembargo, tin biaha orguyo por provoca desacuerdo entre rumannan, y facilmente esaki por sali for di man. Ta asina a pasa cu algun cristian di prome siglo. Pa e motibo ey discipel Santiago a haci nan e pregunta penetrante aki: “Di unda e bringamento y pleitamento cu tin den boso ta bin?” (Sant. 4:1) Pues, si nos ta menosprecia algun ruman of ta sinti cu nos ta mihor cu nan, nos lo por bisa of haci algo cu ta hurt nan. (Prov. 12:18) Ta bisto anto cu orguyo por kibra e paz di e congregacion.

9. Con Bijbel ta yuda nos combati racismo y otro formanan incorecto di orguyo? (Wak e prome plachi.)

9 Si nos tin e tendencia di pensa cu nos ta mihor cu otro hende, nos tin cu corda cu Jehova ta odia “hende cu ta orguyoso di curason.” (Prov. 16:5) Tambe lo ta bon pa nos analisa nos curason y puntra nos mes: Mi ta sinti cu mi rasa, mi pais of mi cultura ta mihor cu di otro hende? Si nos ta laga orguyo nacional of di rasa influencia nos, nos ta pasa por halto di e echo cu ta “for di un hende [Dios] a traha tur nacion.” (Echo. 17:26) Den un sentido, nos tur ta di e mesun rasa, pasobra nos tur a bin di e mesun tata: Adam. Pesey ta bobo pa kere cu algun rasa ta mihor cu otro. Esey ta loke e Diabel kier pa nos pensa, pasobra asina e ta haya chens di caba cu nos amor y union cristian. (Juan 13:35) Pues, pa gana e bataya contra Satanas, nos tin cu rechasa orguyo y arogancia.—Prov. 16:18.

RECHASA MATERIALISMO Y NO STIMA E MUNDO

10, 11. (a) Dicon lo por ta facil pa cuminsa stima e mundo aki? (b) Con Demas kisas a demostra amor pa mundo?

10 Satanas ta “gobernante di e mundo aki.” Henter e mundo ta den su poder. (Juan 12:31; 1 Juan 5:19) Ta logico cu hopi di e cosnan cu ta popular den mundo awe ta bay contra di e normanan di Dios. Naturalmente, esey no kiermen cu tur loke tin den mundo ta malo. Sinembargo, nos por ta sigur cu Satanas lo uza e mundo aki pa probecha di nos deseonan y pone nos peca, of lo e purba di laga nos stima mundo y neglisha nos adoracion di Jehova.—Lesa 1 Juan 2:15, 16.

11 Algun cristian di prome siglo a stima mundo. Un di nan tabata Demas. Pablo a skirbi tocante dje: “Demas a bandona mi—ya cu el a stima e mundo aki.” (2 Tim. 4:10) Bijbel no ta bisa precies kico di mundo a atrae Demas y pon’e bandona Pablo. Kisas el a cuminsa stima cosnan material mas cu su sirbishi na Jehova. En todo caso, Demas a perde e oportunidad di haya privilegionan spiritual emocionante. Anto a cambio di kico? E mundo aki lo por a ofrec’e algo cu ta mas valioso cu e bendicionnan cu Jehova lo por a dun’e como compañero di Pablo?—Prov. 10:22.

12. Con nos por bira victima di “e poder engañoso di rikesa”?

12 Algo similar por pasa cu nos. Como cristian, nos tin e deseo natural di percura pa nos necesidadnan material y di nos famia. (1 Tim. 5:8) Ademas, Jehova a traha nos cu e deseo di biba den un luga agradabel. Nos por mira esaki na e echo cu el a duna Adam cu Eva un bunita paradijs pa nan biba aden. (Gen. 2:9) Pero Satanas ta purba di haci mal uzo di e deseonan ey. E ta haci esaki mediante “e poder engañoso di rikesa.” (Mat. 13:22) E ta laga hende kere cu placa of cos material lo haci nan feliz of duna nan exito. Pero esey ta un gran mentira, y e por pone nos perde e cos di mas valioso cu nos tin: nos amistad cu  Jehova. Hesus a spierta su discipelnan: “Ningun hende no por ta esclavo di dos doño, pasobra sea lo e odia esun y stima e otro of lo e pega na esun y desprecia e otro. Boso no por ta esclavo di Dios y di Rikesa.” (Mat. 6:24) En realidad, nos no por ta esclavo di placa, pasobra si ta asina, nos a stop di sirbi Jehova. Esey ta net loke Satanas kier pa nos haci. Nunca permiti placa of cos material bira mas importante cu nos amistad cu Jehova. Pa nos por gana e bataya contra Satanas, nos mester tin un punto di bista balansa di cos material.—Lesa 1 Timoteo 6:6-10.

RECHASA INMORALIDAD SEXUAL

13. Ki opinion robes hopi hende tin di matrimonio y sex?

13 Un otro trampa di Satanas ta inmoralidad sexual. Awe, hopi hende ta pensa cu fieldad na nan casa—y hasta matrimonio—ta cos cu a bay fo’i moda y cu ta kita nan libertad. Por ehempel, un actriz famoso a bisa: “Ta imposibel pa un homber of un muher tin un solo pareha. Mi no conoce niun hende cu ta fiel na su pareha of cu lo kier ta fiel.” Un otro actor a bisa: “Mi no ta sigur cu nos ta traha pa pasa henter nos bida cu e mesun persona.” Pero matrimonio ta un regalo di Dios. Diabel lo mester ta hopi contento cada biaha cu e tende un hende famoso papia cu menosprecio di matrimonio. Satanas no ta niun tiki interesa den apoya e areglo di matrimonio. Al contrario! E kier pa esaki fracasa. Pesey, pa nos gana e bataya contra Satanas, nos mester respeta matrimonio.

14, 15. Con nos por rechasa inmoralidad sexual?

14 Sea cu nos ta soltero of casa, nos mester rechasa tur tipo di pica sexual. Ta berdad cu e bataya no ta facil. Por ehempel, si bo ta un hoben, kisas bo ta tende bo compañeronan di scol gaba con nan ta manda mensahe-, potret- of videonan sexual via telefon. E practica ey nan ta yama sexting, y den algun pais nan ta consider’e mescos cu pornografia di mucha. Otro hobennan ta conta cu orguyo con nan ta haci sex cu ken cu nan kier. Bijbel ta bisa cu “esun cu ta practica fornicacion ta peca contra su mes curpa.” (1 Cor. 6:18) Malezanan transmiti sexualmente a causa basta sufrimento y morto. Ademas, segun un encuesta bou di hobennan soltero, mayoria di nan cu a perde nan virginidad a bisa cu nan ta lamenta esey. Pues, e mundo di entretenimento kier laga nos kere cu un hende por kibra ley di Dios y comete inmoralidad sexual sin niun consecuencia of daño. Pero esaki no ta berdad. Hende cu ta kere esey ta bira victima di “e poder engañoso di pica.”—Heb. 3:13.

15 Kico bo por haci si bo tin problema pa resisti e tentacion pa comete inmoralidad sexual? Pa cuminsa, reconoce cu bo tin un debilidad. (Rom. 7:22, 23) Despues pidi Dios duna bo forsa pa resisti. (Flp. 4:6, 7, 13) Evita situacionnan cu por hiba na inmoralidad. (Prov. 22:3) Anto ora e tentacion presenta, rechas’e sin pensa dos biaha.—Gen. 39:12.

16. (a) Con Hesus a reacciona riba e tentacionnan di Satanas? (b) Kico nos por siña for di e ehempel di Hesus?

16 Hesus tabata un bon ehempel pa nos den resisti tentacion. E no a laga e promesanan di Satanas engañ’e. Ademas, e no a para pensa riba nan mes. Mas bien, el a contest’e di biaha cu e palabranan: “Ta para skirbi.” (Lesa Mateo 4:4-10.) Hesus tabata conoce e Palabra di Dios bon y ta pesey e por a actua di biaha y cita textonan  di Bijbel ora Satanas a purba di lag’e cay den tentacion. Pa nos gana e bataya contra Satanas, nos mester percura pa nos no cay den e tentacion pa comete inmoralidad sexual.—1 Cor. 6:9, 10.

PERSEVERA Y LO BO GANA

17, 18. (a) Ki otro armanan Satanas ta uza, y dicon esaki no ta un sorpresa pa nos? (b) Kico lo pasa cu Satanas, y con esaki ta anima bo pa persevera?

17 Orguyo, materialismo y inmoralidad sexual ta tres di e armanan cu Satanas ta uza pa ataca nos. Pero e tin hopi mas. Por ehempel, algun cristian ta haya oposicion di nan famia, of nan compañeronan di scol ta haci bofon di nan. Otronan ta biba den paisnan caminda gobierno ta purba di prohibi e trabou di predica. E dificultadnan ey no ta un sorpresa pa nos, pasobra Hesus a spierta su discipelnan: “Tur hende lo odia boso pa motibo di mi nomber, ma esun cu persevera te na fin lo ser salba.”—Mat. 10:22.

Satanas lo ser destrui pa semper (Wak paragraf 18)

18 Con nos por gana e bataya contra Satanas? Hesus a bisa: “Pa medio di boso perseverancia, boso lo gana boso alma.” (Luc. 21:19) Corda cu niun hende no por haci nos nada cu lo causa nos daño permanente. Niun hende no por kibra nos amistad cu Dios, a menos cu nos mes permiti esey. (Rom. 8:38, 39) Kico si un sirbidor di Dios muri? Acaso esey ta un victoria pa Satanas? Di ningun manera! Jehova a priminti cu lo e resucita su sirbidornan. (Juan 5:28, 29) En cambio, Satanas si no tin futuro. Despues cu destrui su mundo malbado, lo e ser benta den abismo pa 1.000 aña. (Rev. 20:1-3) Na final di Hesus su Reinado di Mil Aña lo laga Satanas “sali for di su prizon” pa un periodo cortico, y lo e purba pa di ultimo biaha gaña humanidad perfecto. Pero e ora ey lo e ser destrui pa semper. (Rev. 20:7-10) Contrario na Satanas, abo tin un futuro briyante bo dilanti. Tuma bo posicion contra Satanas, firme den fe. Bo por gana e bataya contra dje.