Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2015

 FOR DI NOS ARCHIVO

Amor Tabata Reina den e Cafetaria Aki

Amor Tabata Reina den e Cafetaria Aki

ESTA contento nos ta sinti ora nos bin hunto na asamblea y congreso pa come na e bankete di Jehova! Pero tin un cos mas cu ta contribui na nos alegria na e ocasionnan ey: e dushi momentonan cu nos ta pasa comiendo cuminda hunto cu nos rumannan.

Na september 1919, e Studiantenan di Bijbel a tene un congreso di ocho dia na Cedar Point (Ohio, Merca). E rumannan a haci areglo cu varios hotel pa duna alohamento y cuminda na e delegadonan. Pero a bin asina tanto hende cu mayoria di e waiternan di un hotel a kita. E manager di e cafetaria tabata asina desespera cu el a puntra si tin delegado hoben cu por a duna un man, y hopi ruman a ofrece nan mes. Sadie Green tabata un di nan. El a bisa: “Tabata prome biaha cu mi a traha como waiter, pero nos a pasa hopi dushi.”

Sierra Leone, 1982

Den e añanan cu a sigui, masha hopi ruman—entre nan un cantidad di hoben—a traha cu smaak den cushina na congreso preparando cuminda pa e rumannan. E trahamento cu otro ruman a motiva hopi hoben pa pone metanan spiritual. Esaki ta loke a pasa cu Gladys Bolton, kende a traha den cafetaria na un congreso na 1937. El a bisa: “Mi a conoce rumannan di otro luga y nan a conta mi con nan tabata vence nan problemanan. E ora ey mi a pone e meta di bira pionero.”

Beulah Covey, un otro delegado, a bisa: “E rumannan tabata haci e trabou asina bon cu tur cos tabata cana smooth.” Pero e trabou di prepara y sirbi cuminda tabatin su retonan. Tuma, por ehempel, loke a pasa cu Ruman Angelo Manera na 1969. Ta ora cu el a yega e Dodger Stadium na Los Angeles (California), el a haya sa cu t’e tabata esun encarga cu cafetaria. El a admiti: “M’a haya e shock di mi bida!” Anto pa e congreso ey, nan mester a coba un canal di 400 meter pa pasa un tubo di gas pa e cushina.

Frankfurt, Alemania, 1951

Na 1982, na Sierra Leone, boluntarionan diligente mester a limpia e tereno prome y despues traha e cafetaria cu e materialnan cu nan tabatin disponibel. Na 1951, na e congreso na Frankfurt (Alemania), e rumannan tabatin un idea hopi ingenioso:  nan a huur un locomotief (un tipo di trein) pa genera stoom pa keinta 40 wea grandi pa cushina cu ne. E rumannan a sirbi 30.000 cuminda pa ora. Pa alivia e trabou di e 576 boluntarionan cu tabata laba tayo, esnan cu a asisti na e congreso a bin cu nan mes cuchiu cu forki. Na Yangon (Myanmar), e cokinan a tene consideracion cu e delegadonan internacional y a uza menos pica den e platonan cu nan a sirbi nan.

“NAN TA COME PARA”

Na aña 1950 na un congreso na Merca, Annie Poggensee tabata warda den un rij largo den solo pa su cuminda. Mientras cu e tabata warda el a experencia lo siguiente: “Cu hopi atencion m’a scucha e combersacion interesante entre dos ruman muher cu a bin cu barco for di Europa.” Nan tabata papia tocante con Jehova a yuda nan yega na e congreso. Annie a bisa: “E tempo largo cu nan mester a warda den rij—y e calor—a pasa manera nada pa nan. No tabatin niun hende mas feliz cu e dos rumannan aki.”

Seul, Sur Korea, 1963

Con e rumannan a logra sirbi miles di hende cuminda durante e pausa di merdia? Na hopi di e congresonan aki, nan tabata arma tent grandi y pone rij di mesa halto pa e rumannan come para y asina caba lihe pa traha luga pa otronan. Un persona cu no tabata testigo di Jehova a comenta: “E religion aki ta straño! Nan ta come para.”

Autoridadnan militar y civil a keda impresiona cu e manera organisa y eficiente cu tur cos tabata cana. Despues cu personal di ehercito Mericano a inspecciona nos cafetaria na Yankee Stadium na New York City, nan a recomenda Comandante Faulkner di Departamento di Guera Britanico p’e tambe haci un inspeccion similar. Pues, na 1955, e cu su casa a asisti na e Asamblea “Reino Triunfante” na Twickenham (Inglatera). El a bisa cu e por a mira cu amor tabata reina den e cafetaria aki.

Pa decadanan, miles di ruman a prepara cuminda nutritivo y economico pa tur cu a asisti na congreso. Pero e problema tabata cu nan mester a traha hopi ora y hasta perde parti di e programa. Pesey, na fin di e decada di 1970, a simplifica e areglo di cuminda den hopi pais. Anto, for di 1995 a pidi tur hende pa bin cu nan mes cuminda. Asina e boluntarionan cu tabata prepara y sirbi cuminda por a disfruta di e programa spiritual y di e compania di e rumannan. *

Jehova stima su sirbidornan cu ta traha duro pa sirbi nan rumannan. Kisas tin ruman ta sinti nostalgia pa e dushi tempo cu nan a traha den cafetaria. Pero un cos no a cambia: Te ainda amor ta e ingrediente principal di nos congresonan.—Juan 13:34, 35.

^ par. 12 Naturalmente, ainda tin mester di boluntario pa yuda den e otro departamentonan di congreso.