Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2015

Semper Confia den Jehova

Semper Confia den Jehova

“Confia den dje na tur tempo, o pueblo.”—SAL. 62:8.

1-3. Dicon Pablo tabata convenci cu e por a confia den Jehova? (Wak e prome plachi.)

E CRISTIANNAN di prome siglo na Roma tabata biba den un epoca hopi peligroso. Nan tabata ser persigui cruelmente. E Romanonan a culpa nan di a cende e stad na candela na aña 64 y tambe a acusa nan di ta odia hende. Tur dia e cristiannan tabata enfrenta e posibilidad di ser aresta y tortura. Hasta algun di nan a ser habraca pa bestia. Otronan a ser claba na staca y kima bibo pa sirbi como iluminacion pa e stad durante anochi.

2 Durante e periodo teribel ey, apostel Pablo tabata den prizon na Roma pa di dos biaha. Kisas el a puntra su mes si su rumannan cristian lo a bin yud’e, ya cu e ta corda cu den un situacion anterior niun hende no a bin. E mes a skirbi Timoteo: “Den mi prome defensa ningun hende no a bin na mi banda, ma nan tur a bandona mi; mi ta spera cu Dios lo no tene nan responsabel pa esey.” Pero el a reconoce cu, a pesar di tur cos, e no a keda sin yudansa. El a skirbi: “Señor a para band’i mi y a duna mi poder.” Si, Jehova, mediante nos Señor Hesus, a duna Pablo e poder cu e tabatin mester. Y con esaki a yud’e?  Pablo di: “El a libra mi for di boca di leon.”—2 Tim. 4:16, 17. *

3 Pablo lo mester a sintie hopi anima ora el a corda con Jehova a yud’e e biaha ey. Pues, e tabatin confianza cu Jehova lo a dun’e e forsa pa supera e prueba cu e tabata aden y cualkier otro cu lo a presenta den futuro. Pesey e por a sigui bisa cu conviccion: “Señor lo libra mi di tur loke ta malo.” (2 Tim. 4:18) Si, Pablo tabata sa di experencia cu hasta ora otro hende no por yuda nos, Jehova cu Hesus semper t’ey pa sostene nos.

OPORTUNIDADNAN PA NOS CONFIA DEN JEHOVA

4, 5. (a) Ken semper t’ey pa yuda bo? (b) Con bo por fortalece bo amistad cu Jehova?

4 Bo a yega di haya bo den un situacion dificil y a sinti bo bo so, sin niun hende pa yuda bo? Kisas bo a perde trabou of bo tabatin un problema di salud of cualkier otro prueba. Of si bo ta un hoben, kisas bo a haya bo cu presion na scol. Podise bo a pidi un hende yuda bo, pero bo a keda decepciona pasobra e persona no a duna bo e yudansa cu bo tabatin mester. Naturalmente, tin problemanan cu niun ser humano no por yuda bo resolve. Kico nos por haci e ora ey? Bijbel ta conseha nos pa “confia den [Jehova].” (Prov. 3:5, 6) E conseho ey ta realistico? Claro cu si! Den Bijbel nos por lesa hopi relato cu ta convence nos cu Jehova realmente ta yuda su pueblo.

5 Pesey, si bo no haya e yudansa cu bo a spera di hende, no carga rencor. Mas bien, haci manera Pablo. Mira situacionnan dificil como oportunidadnan pa confia den Jehova y pa experencia den bo propio bida su cuido amoroso. Cu ki resultado? Esaki lo aumenta bo confianza den dje y fortalece bo amistad cu ne.

CONFIANZA TA IMPORTANTE PA NOS AMISTAD CU JEHOVA

6. Dicon no ta facil pa confia den Jehova ora nos tin un problema dificil?

6 Kisas bo tin un problema dificil cu ta angustia bo. Si bo a haci tur loke ta na bo alcance pa resolve e problema y bo a pidi Jehova yuda bo, bo por ta trankil pasobra bo sa sigur cu lo e yuda bo. (Lesa Salmo 62:8; 1 Pedro 5:7.) De echo, nos no por ta amigo di Dios si nos no tin e confianza ey den dje. Pero, nos tin cu admiti cu tin biaha esaki no ta facil. Dicon? Un motibo ta cu no ta semper Jehova ta contesta nos oracionnan mesora.—Sal. 13:1, 2; 74:10; 89:46; 90:13; Hab. 1:2.

7. Dicon Jehova no ta contesta tur nos oracionnan di biaha?

7 Pero, dicon Jehova no ta reacciona di biaha riba tur nos oracionnan? No lubida cu Bijbel ta compara e relacion cu nos tin cu Jehova manera esun di un yiu cu su tata. (Sal. 103:13) Un mucha no por spera cu su tata ta dun’e di biaha tur loke e pidi. E tata sa cu tin biaha loke e yiu ta pidi ta djis un deseo pasahero. Otro biaha, e tata ta dicidi di warda pa e momento mas adecuado pa cumpli cu su peticion. Por ta tambe cu e peticion no ta na e mucha su bienestar ni na bienestar di otro hende. Si e tata mester duna e mucha di biaha tur loke e pidi, e tata ta bira su esclavo. Asina tambe, Jehova por dicidi di warda pa contesta nos oracionnan pasobra e sa cu esey ta mihor pa nos. E tin derecho di haci esey, pasobra e ta nos Creador sabi, nos Doño amoroso y nos Tata celestial. Ademas, nos no mester lubida cu ta nos ta sirbi Dios, y no ta e ta sirbi nos.—Compara cu Isaias 29:16; 45:9.

8. Kico Jehova ta priminti nos?

 8 Un otro factor cu nos mester considera ta cu Jehova sa precies kico cada persona por wanta y kico nan no por wanta. (Sal. 103:14) Pues, e no ta spera di nos cu nos lo persevera riba nos mes forsa; e ta nos Tata y ta ofrece nos su yudansa. Claro cu tin biaha nos lo por sinti cu nos no por mas. Pero Jehova ta priminti nos cu si e problema ta asina grandi cu nos no por soport’e, lo e duna nos un salida. (Lesa 1 Corintionan 10:13.) Pues, ta un consuelo pa sa cu nos por tin e confianza cu Jehova sa precies cuanto cos nos por wanta.

9. Kico nos mester haci si e yudansa di Jehova no ta yega di biaha despues cu nos haci oracion?

9 No bira desespera si, despues di haci oracion, Jehova su yudansa no yega di biaha. Tene pasenshi. Corda cu Jehova ta ansioso pa yuda nos, pero e tambe ta warda cu pasenshi pa e mihor momento pa duna nos loke nos tin mester. Ta manera Isaias 30:18 (BPK) ta bisa: “SEÑOR ta buska un chèns pa mustra boso su bondat. L’E lanta pa tene kompashon ku boso, pasobra SEÑOR ta un Dios di hustisia. Felis tur ku ta sper’É.”

“BOCA DI LEON”

10-12. (a) Ki circunstancianan dificil un cristian cu ta cuida un miembro di famia cu ta malo por hay’e cu ne? (b) Si nos ta confia den Jehova durante momentonan dificil, kico lo pasa cu nos amistad cu ne? Duna un ehempel.

10 Si bo ta pasando den un problema serio, kisas bo ta sinti bo mescos cu Pablo: casi den “boca di leon.” (2 Tim. 4:17) Den momentonan asina por ta mas dificil pa confia den Jehova, pero ta net e ora ey esaki ta mas necesario cu nunca. Por ehempel, supone cu bo ta cuidando un miembro di famia cu tin hopi tempo malo. Bo ta haci bo best pa sigui padilanti, y bo a pidi Dios yuda bo wanta e situacion y tuma bon decisionnan. * Jehova ta sigura bo den su Palabra cu e ta mira cu su mes wowo kico ta pasando y cu lo e duna bo tur loke bo mester pa wanta y sigui fiel. Esey no ta duna bo un poco trankilidad?—Sal. 32:8.

11 Pero tin biaha por parce cu Jehova no ta yudando bo. Podise e dokternan mes no ta di acuerdo kico ta e mihor tratamento pa bo. Of bo a pensa cu bo famia lo a yuda bo, pero en bes di esey nan ta haci e situacion pio. Si ta asina, no entrega. Sigui confia den Jehova; sigui pidie duna bo forsa; sigui hala cerca dje. (Lesa 1 Samuel 30:3, 6.) Despues, ora bo mira bek con Jehova a yuda bo, bo amistad cu ne lo ta mas fuerte.

12 Linda a experencia esaki. * El a cuida su mayornan durante nan ultimo añanan di bida. El a conta: “Durante e añanan ey tabatin ocasion cu ni ami ni mi casa ni mi ruman homber no tabata sa kico pa haci. Tin biaha nos tabata sinti nos desampara. Pero awor cu e situacion a pasa, nos ta mira mas cla con Jehova a sostene nos tur e tempo ey. El a fortalece nos y a duna nos precies loke nos tabatin mester, hasta na momentonan cu tabata parce cu nos no tabatin mas opcion.”

13. Con confianza den Jehova a yuda Rhonda wanta un tragedia tras di otro?

13 Nos pleno confianza den Jehova por yuda nos hasta ora nos ta haya nos cu un tragedia tras di otro. E caso di Rhonda ta demostra esey. Net ora cu su casa, cu no tabata testigo di Jehova, a cuminsa cu tramitenan pa divorcio, dokternan a saca afo cu  Rhonda su ruman homber tabatin un maleza grave cu yama lupus. Un par di luna despues, e casa di e ruman homber a muri. Rhonda a cuminsa recupera di e golpinan duro ey y a bira pionero regular, pero poco tempo despues su mama a muri. Kico a yud’e wanta tur e tragedianan ey? El a splica: “Mi tabata comunica cu Jehova tur dia y tabata busca su guia hasta den e decisionnan di mas chikito. Esey a haci Jehova mas real ainda pa mi. Mi a siña depende riba dje, en bes di riba mi mes of hasta riba otro hende. Y Jehova di berdad a yuda mi. El a duna mi tur loke mi tabatin mester. M’a haya sa kico kiermen cana man teni cu Jehova.”

Hasta algun situacion cu surgi den famia por pone nos amistad cu Jehova na prueba (Wak paragraf 14-16)

14. Ki confianza un cristian por tin ora nan expulsa un miembro di su famia?

14 Pensa awor riba un otro situacion dificil. Supone cu un miembro di bo famia ser expulsa. Bo sa kico Bijbel ta bisa tocante e manera cu mester trata hende expulsa. (1 Cor. 5:11; 2 Juan 10) Pero como cu bo ta stima e persona ey, por parce hopi dificil of hasta imposibel pa obedece Jehova. * Kico lo bo haci? Bo tin e confianza cu bo Tata celestial lo duna bo e forsa pa keda fiel na dje y obedece e mandamento di Bijbel? Lo bo considera e situacion aki como un oportunidad pa fortalece bo amistad cu Jehova?

15. Dicon Adam a desobedece Jehova?

15 Relaciona cu esaki, pensa un rato riba e prome homber, Adam. Di berdad el a kere cu e por a desobedece Jehova y sigui  biba? No, pasobra Bijbel ta bisa cu Adam “no a ser gaña.” (1 Tim. 2:14) Wel, dicon el a come di e fruta cu Eva a dun’e? Pasobra e tabata stima su casa mas cu Jehova. Pesey el a scucha su casa en bes di scucha Jehova.—Gen. 3:6, 17.

16. Ken nos mester stima mas, y dicon?

16 Acaso esaki ta nifica cu nos no mag di stima nos famia? Claro cu no! Loke e ta nifica ta cu nos mester stima Jehova mas cu cualkier otro persona. (Lesa Mateo 22:37, 38.) En realidad, sea cu nos famia ta sirbi Jehova of no, e mihor manera pa yuda nan ta di stima Jehova mas cu tur cos. Pues, sigui fortalece bo amor pa Jehova y bo confianza den dje. Y si bo ta preocupa pa e comportacion di bo famia expulsa, conta Jehova esey, y desahoga bo mes cerca dje. * (Rom. 12:12; Flp. 4:6, 7) Aunke e situacion aki ta pone bo sufri hopi, mir’e como un oportunidad pa hala mas cerca Dios y asina fortalece bo amistad cu ne. Y esaki lo yuda bo realisa cu obedece Jehova semper ta e mihor opcion.

MIENTRAS CU NOS TA WARDA RIBA JEHOVA

Keda ocupa den e trabou di predica y asina demostra bo confianza den Jehova (Wak paragraf 17)

17. Kico nos por ta sigur cu Jehova lo haci pa nos ora nos ta mantene nos mes ocupa den e trabou di predica?

17 Dicon Jehova a libra Pablo “for di e boca di leon”? E mes a bisa: “Pa mediante di mi e obra di predicacion por keda efectua cabalmente y tur nacion por tende e mensahe.” (2 Tim. 4:17) Jehova a duna nos tambe e encargo pa predica “e bon noticia”, y e ta yama nos su “compañero[nan] di trabou.” (1 Tes. 2:4; 1 Cor. 3:9) Si nos, mescos cu Pablo, mantene nos mes ocupa den e trabou di predica, nos por ta sigur cu Jehova lo duna nos tur loke nos tin mester. (Mat. 6:33) Laga nos confia den su promesa y ser mas activo posibel den e predicacion. Esey lo yuda nos keda trankil mientras cu nos ta warda riba su yudansa.

18. Con nos por aumenta nos confianza den Jehova y fortalece nos amistad cu ne?

18 Pues, probecha di e tempo cu nos tin awor pa fortalece nos amistad cu Jehova y aumenta nos confianza den dje. Si un situacion ta yena nos cu angustia, consider’e como un oportunidad pa hala mas cerca Jehova. Lesa, studia y medita riba e Palabra di Dios. Haci oracion continuamente, y mantene bo mes ocupa cu actividadnan spiritual. No stop di confia den Jehova; lo e yuda bo wanta e dificultadnan actual y esnan cu lo bin den futuro.

^ par. 2 Nos no sa si Pablo tabata kiermen boca di un leon literal of si e tabata referi na un situacion peligroso.

^ par. 10 Tin varios articulo cu a sali pa yuda cristiannan ora nan ta malo of nan tin cu cuida un miembro di famia cu ta malo. Wak e revista ¡Despertad! di 8 di februari 1994, Spièrta! 8 di februari 1997, ¡Despertad! di 22 di mei 2000 y 22 di januari 2001.

^ par. 12 A cambia e nombernan.

^ par. 14 Wak e articulo “Expulsion Ta un Muestra di Amor” den e revista aki.

^ par. 16 Tin varios articulo cu a sali pa yuda nos ora un miembro di famia bandona Jehova. Wak E Toren di Vigilancia di 1 di september 2006, pagina 17-21 y 15 di januari 2007, pagina 17-20.