Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2015

 STORIA DI BIDA

Bendicionnan “den Tempo Faborabel y den Tempo Dificil”

Bendicionnan “den Tempo Faborabel y den Tempo Dificil”

MI A nace na maart di aña 1930 y a lanta den un ambiente di famia y amigonan cu tabata sirbi Jehova fielmente. Esey tabata den e pueblito di Namkumba, cerca di e stad Lilongwe, caminda awe ta Malawi. Na aña 1942, mi a dedica mi bida na Dios y a batisa den un di nos bunita riunan. Durante e 70 añanan cu a sigui, mi a purba di haci loke apostel Pablo a anima Timoteo pa haci, esta, predica e palabra cu urgencia “den tempo faborabel y den tempo dificil.”—2 Tim. 4:2.

Nathan Knorr y Milton Henschel, representantenan di e oficina principal di testigonan di Jehova situa na Brooklyn, New York, a bishita Malawi pa prome biaha na cuminsamento di 1948. E bishita ey a stimula mi deseo pa traha den e sirbishi di tempo completo. Mi tin bunita recuerdo di e comentarionan masha animante di e rumannan ey. Ruman Knorr a duna e discurso titula “E Gobernante Permanente di Tur Nacion.” Tabatin 6.000 persona presente y, aunke nos tabata para den un tereno tur na lodo, nos a scucha cu hopi atencion.

Poco tempo despues, mi a conoce Lidasi, un ruman muher masha lief cu tambe a lanta den un famia testigo di Jehova. E tabatin e mesun meta cu mi: e sirbishi di tempo completo. Nos a casa na 1950, y pa 1953 nos tabatin dos yiu. Aunke esey a trece mas responsabilidad, nos a dicidi cu ami lo por a bira pionero regular. Dos aña despues, mi a haya un invitacion pa sirbi como pionero special.

Poco despues mi a haya e privilegio di bishita e congregacionnan como superintendente di circuito. Cu e bon apoyo di Lidasi, mi por a haci e trabou aki sin descuida nos famia su necesidadnan material y spiritual. * Sinembargo, ta nos tur dos kier a sirbi Jehova den e sirbishi di tempo completo. Nos a plania nos asuntonan bon, y cu cooperacion di nos cinco yiunan, Lidasi por a cuminsa sirbishi di tempo completo na aña 1960.

Asambleanan a fortalece nos pa e persecucion cu tabata na caminda

Nos a disfruta di e tempo faborabel ey, sirbiendo nos rumannan den varios congregacion. Nos asignacionnan a hiba nos for di e bunita bariga di e Seronan di Mulanje den zuid te na e oriyanan trankil di Lago Malawi, cu ta core canto di casi henter e parti oost di e pais. Tabatin un crecemento continuo den e cantidad di publicador y di congregacion den e circuitonan cu nos tabata sirbi.

 Na 1962 nos tabatin e Asamblea di Districto “Sirbidornan cu Curashi.” E siguiente aña, Ruman Henschel a bolbe bishita Malawi, y un 10.000 persona a asisti na un congreso special pafo di e stad Blantyre. Ora mi pensa bek riba e programanan special ey, mi ta realisa con nan a prepara nos y a fortalece nos tur na Malawi pa e tempo dificil cu tabata na caminda.

TEMPO DIFICIL

Gobierno a prohibi e actividadnan di testigonan di Jehova y a confisca e propiedad di sucursal

Na 1964 e testigonan di Jehova a cuminsa pasa den pruebanan teribel. E motibo tabata pasobra nan a nenga di participa den actividadnan politico. Mas cu 100 Salon di Reino y mas cu 1.000 cas di e rumannan a keda destrui den un ola di persecucion. Pero ami cu Lidasi por a sigui bishita e congregacionnan te ora cu gobierno di Malawi a prohibi e trabou di testigonan di Jehova na 1967. Nan a confisca e propiedad di sucursal na Blantyre, deporta e misioneronan y encarcela hopi di e rumannan local, incluso ami cu Lidasi. Despues cu nos a sali liber, nos a sigui discretamente cu nos trabou di circuito.

Un dia, den october 1972, rond di 100 miembro di e Malawi Youth League (un grupo politico arma) tabata na caminda pa bin nos cas. Pero un di nan a core yega prome cu e otronan y a bisa mi bay sconde pasobra e grupo kier a mata mi. Mi a bisa mi casa y mi yiunan pa nan bay sconde meymey di e palonan di bacoba cu tabatin eybanda, y ami mes a subi den un palo grandi di mango. For di eynan, mi a wak con nan a destrui nos cas y tur nos pertenencianan.

Como cu nos rumannan no tabata mete den politica, nan a kima nan casnan

E persecucion na Malawi a bira pio, y miles di nos mester a huy for di e pais. Nos famia a keda den un campo di refugiado den e parti west di Mozambique te cu juni 1974. Anto ami cu Lidasi a keda nombra como pionero special pa sirbi na Dómue, Mozambique, un pueblo cerca di e frontera di Malawi. Pero e siguiente aña Mozambique a haya su independencia for di Portugal, y nos—hunto cu hopi Testigo mas—a haya nos obliga ta bay Malawi bek cerca nos persiguidonan.

Despues di a regresa Malawi, ami cu mi casa a haya e asignacion pa bishita congregacionnan den e capital, Lilongwe. A pesar di e persecucion feroz y otro problemanan, e cantidad di congregacion den e circuitonan cu nos tabata sirbi a sigui aumenta.

JEHOVA SU SOSTEN AMOROSO

Na un ocasion, nos a yega un pueblito caminda net tabatin un reunion politico ta tuma luga. Algun di e hendenan cu tabata apoya e partido a haya sa cu nos ta testigo di Jehova, y nan a obliga nos di sinta meymey di e miembronan di e grupo politico conoci como Malawi Young Pioneers. Nos a roga Jehova pa yuda nos y guia nos den e  situacion peligroso aki. Ora e reunion a caba, nan a cuminsa bati nos. Un señora hende grandi a core bin y grita: “Por fabor, laga nan na paz! E homber aki ta mi subrino. Lag’e sigui cu su biahe.” Esun cu tabata encarga cu e reunion a bisa: “Laga nan bay!” Nos no sa dicon e señora a haci asina, ya cu e no tabata nos famia. Pero nos ta kere cu ta Jehova a scucha nos oracion.

Carchi di partido politico

Na 1981 nos a bolbe topa algun di e Malawi Young Pioneers. Nan a kita nos bais, maleta, cahanan di buki y filenan di circuito. Nos a logra scapa for di nan y a core bay sconde na cas di un anciano. Un biaha mas nos a haci oracion na Jehova, ya cu nos tabata hopi preocupa pa e informacion cu tabatin den e filenan cu nan a kita for di nos. Pero ora e Young Pioneers a wak den e filenan, nan a haya cartanan dirigi na mi for di tur parti di Malawi. Nan a spanta pasobra nan a pensa cu mi tabata un funcionario di gobierno. Pues, di biaha nan a bay entrega tur cos bek na e ancianonan local, manera nan a haya nan.

Un otro biaha, nos tabata crusando un riu den un boto. E doño di e boto tabata e presidente politico di e area, pues, el a dicidi di check tur pasahero pa wak si nan tabatin nan carchi di e partido politico na mando. Net ora e tabata casi yega na nos, el a mira un ladron cu autoridadnan tabata busca. Debi na e conmocion cu esaki a causa, el a stop di controla e carchinan di partido. Un biaha mas nos a sinti Jehova su sosten amoroso.

ARESTA Y ENCARCELA

Na februari 1984, mi tabata riba caminda pa Lilongwe pa hiba algun rapport pa e sucursal di Zambia. Un polis a para mi y rista mi tas. Como cu el a haya algun literatura biblico, el a hiba mi warda y a cuminsa bati mi. Despues el a mara mi cu cabuya y hinca mi den un cuarto hunto cu otro detenidonan cu a bay cera pasobra nan a haya nan cu cos horta.

E siguiente dia, e hefe di polis a hiba mi den un otro cuarto y a skirbi un declaracion cu a bisa: “Ami, Trophim R. Nsomba, a stop di ta un testigo di Jehova pa mi por haya mi libertad.” Mi a nenga di firma e declaracion y a bis’e: “No solamente mi ta cla pa bay cera, sino hasta pa muri. Mi ta—y ta sigui ta—un testigo di Jehova.” E hefe di polis a bira furioso, y el a dal su mokete riba mesa asina duro te cu un polis den e siguiente cuarto a core bin wak ta kico a pasa. E hefe a bis’e: “E homber aki ta nenga di firma cu el a stop di predica. Pues, lag’e firma cu e ta un testigo di Jehova, y nos lo mand’e Lilongwe pa nan cer’e ayanan.” Cuater dia largo mi casa stima no tabata sa mes unda mi ta, te ora cu algun ruman a logra cont’e kico a pasa cu mi.

Na e warda di polis na Lilongwe nan a trata mi basta bon. E hefe di polis a bisa mi: “Tuma, ata un tayo di aros, ya cu bo ta cera pa motibo di e Palabra di Dios. E otro hendenan akinan ta ladron.” Despues el a manda mi na e prizon Kachere, caminda mi a keda cinco luna cera.

 E director di e prizon ey tabata hopi contento cu mi a bin eynan pasobra e kier a cambia e pastoor cu tabatin y haci ami e “pastoor” di prizon. El a kita e pastoor y a bis’e: “Mi no kier pa un hende cu tabata cera pasobra el a horta su propio iglesia papia tocante e Palabra di Dios akinan.” Pues, mi a haya e encargo di duna e presonan les di Bijbel tur siman durante e reunionnan cu nan tabata organisa pa nan.

Pero lamentablemente, e bon trato no a dura mucho. Funcionarionan di prizon a interoga mi pa haya sa cuanto testigo di Jehova tabatin na Malawi. Como cu mi no a bisa nan esey, nan a golpia mi te ora mi a bay off. Un otro biaha, nan kier a sa unda nos oficina principal ta. Mi a bisa nan: “Mi ta bay duna boso e contesta, pasobra esey ta un pregunta facil.” E polisnan a bira contento y a cende nan tape recorder. Mi a splica nan cu Bijbel ta bisa unda nos oficina principal ta. Nan a keda sorprendi y a puntra mi: “Unda Bijbel ta bisa esey?”

Mi a contesta nan: “Na Isaias 43:12.” Nan a busca e texto y a les’e cu atencion: “‘Boso ta mi testigonan’, [Jehova] ta declara, ‘y ami ta Dios.’” Nan a lesa e versiculo ey tres biaha. Despues nan a puntra mi: “Con por ta cu e oficina principal di testigonan di Jehova ta den Bijbel y no na Merca?” Mi a bisa nan: “Testigonan di Jehova na Merca tambe ta mira e texto aki como un descripcion di nan oficina principal.” Ya cu mi no kier a bisa nan loke nan kier a tende, nan a transferi mi na e prizon Dzaleka, poco panort di Lilongwe.

BENDICIONNAN HASTA DEN TEMPO DIFICIL

Na juli 1984, mi a yega e prizon na Dzaleka unda tabatin 81 testigo di Jehova. E prizon tabata asina yen cu 300 preso mester a drumi riba vloer, tur preta. Cu tempo, nos cu ta Testigo a logra forma gruponan chikito pa analisa un texto di Bijbel. Cada dia, un miembro di e grupo tabata sugeri un otro texto. Esey a anima nos masha hopi mes.

Despues e director di prizon a aparta nos for di e otro presonan. Un wardador di preso a bisa nos den scondi: “No kere cu gobierno ta odia boso. Nos ta tene boso den prizon pa dos motibo: Di prome, gobierno no kier pa e Young Pioneers mata boso. Y di dos, como cu boso ta predica cu pronto lo bin un guera, gobierno tin miedo cu boso ta spanta e soldaatnan y cu nan lo huy bay.”

Rumannan ta ser hiba prizon despues cu a trata nan caso den corte

Na october 1984, nos tur tabatin cu presenta den corte, y nos a keda sentencia na dos aña di prizon. Manera prome, nan a pone nos hunto cu preso cu no tabata Testigo. Pero e director di prizon a spierta tur hende: “Testigonan di Jehova no ta huma. Pues, wardadornan di preso, wak pa boso no molestia nan, pidiendo nan sigaria, ni no manda nan bay busca pida carbon cendi pa cende boso sigaria. Nan ta hende di Dios. Tur testigo di Jehova mester haya cuminda dos bes pa dia, ya cu nan no ta akiden pasobra nan a comete un crimen sino pa motibo di nan creencianan.”

 Nos a beneficia di nos bon reputacion den otro maneranan tambe. Ora tabata scur of awa tabata yobe, e presonan no tabatin mag di cana rond pasobra tabatin mas chens cu nan lo a huy. Pero anos si nan tabata laga sali for di e edificio ki ora cu nos tabata kier. Nan tabata sa cu nos lo no a purba di huy. Por ehempel, un biaha cu nos tabata traha den cunucu, e wardador di preso cu tabata vigila nos a bira malo. Pues nos a carg’e y hib’e prizon bek pa haya tratamento. E funcionarionan di prizon tabata sa cu nan por a confia nos. Pues, tabata un bendicion pa mira con nos bon conducta a pone e wardadornan di preso glorifica e nomber di Jehova.—1 Ped. 2:12. *

TEMPO FABORABEL ATROBE

Dia 11 di mei 1985, mi a sali for di e prizon Dzaleka. Esta dushi di por tabata hunto cu mi famia atrobe! Nos ta gradici Jehova cu el a yuda nos mantene nos integridad durante e tempo dificil ey. Tabatin biaha cu nos a sinti mescos cu apostel Pablo, kende a skirbi: “Nos kier pa boso sa di e tribulacion cu nos a pasa aden ... Nos tabata teme pa nos bida. De echo, nos tabata convenci cu nos a ricibi e sentencia di morto. Esaki tabata pa nos no pone nos confianza den nos mes, sino den e Dios cu ta lanta hende for di morto. Pues, bon mira, el a rescata nos for di peliger di morto.”—2 Cor. 1:8-10.

Ruman Nsomba hunto cu su casa, Lidasi, dilanti di un Salon di Reino na 2004

Ta berdad cu tabatin ocasion cu a parce cu nos lo no a sobrevivi. Pero semper nos a pidi Jehova duna nos e curashi y sabiduria pa yuda nos mantene un actitud humilde pa asina nos por sigui trece gloria pa su gran nomber.

Jehova a bendiciona nos den su sirbishi tanto den tempo faborabel como den tempo dificil. Awe, ta hopi emocionante pa nos por mira e sucursal na Lilongwe cu nan a completa na aña 2000 y tambe e construccion di mas cu 1.000 Salon di Reino nobo den henter Malawi. Nos a haya asina tanto bendicion spiritual di Jehova cu pa ami cu Lidasi tin biaha ta parce manera cu ta soña nos ta soña. *

^ par. 7 Rumannan cu tin yiu menor di edad na cas no ta ser invita mas pa sirbi den e trabou di circuito.

^ par. 30 Pa mas informacion tocante e persecucion na Malawi, wak e Anuario de los testigos de Jehová 1999, pagina 171-223.

^ par. 34 Mientras nos tabata prepara e articulo aki, Ruman Nsomba a fayece na edad di 83 aña.