Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2015

 STORIA DI BIDA

Nos A Haya un Mihor Carera

Nos A Haya un Mihor Carera

AMI cu Gwen a cuminsa siña balia tempo nos tabatin cinco aña. E tempo ey nos no tabata conoce otro ainda. Pero segun cu nos a crece, nos tur dos a scoge pa un carera den ballet. Pero ora nos a yega e top di nos profesion, nos a dicidi di stop cu ne por completo. Kico a pone nos tuma e decision ey?

David: Ami a nace na 1945 na Shropshire, Inglatera. Mi tata tabatin un boerderij den un area trankil di cunucu. Despues di scol, mi tabata gusta duna galiña cuminda, piki webo y cuida e baca- y carnenan. Den vakantie, mi tabata yuda cu e trabou di cosecha, y tin biaha mi tabata core nos tractornan.

Pero pocopoco un otro interes a cuminsa domina mi bida. For di tempo mi tabata chikito, mi tata a ripara cu asina cu mi tende muziek mi kier a balia. Pesey ora mi tabatin 5 aña, el a bisa mi mama pa hiba mi un scol di baile pa mi siña tap dancing. Mi maestro di baile a haya cu mi tabatin e potencial pa bira un bailarin di ballet, y el a siña mi esey tambe. Cu 15 aña, mi a gana un beca pa bay e prestigioso Royal Ballet School na London. Eynan m’a topa Gwen, y e maestronan a haci nos pareha di baile.

Gwen: Ami a nace na London na 1944. Tempo mi tabata chikito, mi tabatin hopi fe den Dios. M’a purba di lesa Bijbel, pero mi no a compronde mucho. Mas prome, tempo mi tabatin cinco aña, m’a cuminsa bay les di baile. Seis aña despues, mi a gana un competencia di baile unda cu henter Gran Britania por a participa. E premio tabata un puesto den e seccion junior di e Royal Ballet School. E scol aki tabata situa na White Lodge, un bunita mansion di siglo 18 na Richmond Park, poco pafo di London. Eynan m’a bay scol y tambe haya les di ballet cerca maestronan renombra. Cu 16 aña, mi a pasa pa nivel senior di e Royal Ballet School cu tabata keda den centro di London y ta eynan m’a topa David. Dentro di algun luna, nos dos tabata balia hunto den escenanan di ballet presenta den operanan na e Royal Opera House na Covent Garden, London.

Nos a biaha rond mundo como bailarin profesional di ballet

David: Si, manera Gwen a conta, nos a haya chens di balia na e famoso Royal Opera House y tambe hunto cu e London Festival Ballet (cu awor yama English National Ballet). Un di e coreografnan di e Royal Ballet School a lanta un grupo internacional na Wuppertal (Alemania) y a scoge nos dos pa bay cu ne como bailarin. Durante nos carera, nos a balia den theaternan rond mundo, y nos a presenta cu celebridadnan manera Margot Fonteyn y Rudolf Nureyev. E tipo di bida  competitivo aki ta haci bo un hende orguyoso, y nos tabata completamente dedica na ballet.

Gwen: Henter mi mente y mi curpa tabata dedica na baliamento. Ami cu David tabatin e mesun ambicion di yega e top di nos profesion. Mi tabata gusta ora cu mi fans tabata pidi pa mi firma, ricibi bouquet di flor y tende aplauso di e publico. Den e mundo di theater, mi tabata rondona pa hopi inmoralidad, humamento y bebemento. Anto mescos cu otronan den mi profesion, mi tabata depende hopi riba mi amuletonan di suerte.

UN CAMBIO DRASTICO

Dia nos a casa

David: Despues di hopi aña como bailarin, m’a cansa di biaha di un luga pa otro. M’a lanta riba un boerderij, pues m’a cuminsa anhela un bida mas trankil. Pesey, na 1967 m’a stop cu mi carera y cuminsa traha na un boerderij grandi banda di cas di mi mayornan. E cunukero a laga mi huur un cas chikito cu e tabatin. E ora ey m’a yama Gwen na e theater y a pidie pa casa cu mi. Esey tabata un decision dificil p’e, ya cu el a haya promocion pa bailarina solista y su carera tabata progresa bon. Pero toch el a bisa si y a casa cu mi y a bin biba den cunucu; un bida cu e no tabata sa net nada di dje.

Gwen: Si, tabata hopi dificil pa mi custumbra cu e bida di boerderij. Mester a chica lechi y duna porco y galiña cuminda den tur tipo di tempo, sea tabata friu of calor. Esaki tabata completamente un otro bida. David a cuminsa un curso di nuebe luna na un scol di crio di bestia p’e por a siña e metodonan mas nobo cu nan tabata uza den e ramo ey, y mi tabata keda mi so te anochi ora e yega cas. Rond di e tempo ey, nos prome yiu muher a nace; nos a yam’e Gilly. David a conseha mi pa siña core auto, y un dia cu mi tabata bishita e pueblito pega cu nos, m’a mira Gael, kende m’a topa tempo cu e tabata traha den un tienda den nos area.

Na cuminsamento di nos bida casa riba boerderij

Gael a invita mi pa bin su cas pa bebe te. Nos tabata wak potret di casamento di otro, y riba su potret tabatin un grupo para dilanti di un luga cu yama Salon di Reino. M’a puntr’e ta ki sorto di misa esey ta. Ora el a bisa mi cu e cu su casa ta testigo di Jehova, m’a bira hopi contento, pasobra mi tabatin un tanta cu tambe tabata Testigo. Pero mi tabata corda tambe cu mi tata tabata hopi rabia cu mi tanta debi cu e tabata den e religion ey y hasta a tira su bukinan den bari di sushi. Semper m’a puntra mi mes dicon mi tata, cu tabata un persona hopi amabel, tabata trata mi tanta asina malo.

 Porfin m’a haya chens di sa kico tabata e diferencia entre e religion di mi tanta y e siñansanan di iglesia. Gael a mustra mi loke Bijbel ta siña realmente. M’a keda asombra ora m’a haya sa cu hopi doctrina, manera Trinidad y alma inmortal, ta contrario na loke Bijbel ta bisa. (Ecl. 9:5, 10; Juan 14:28; 17:3) Y pa prome biaha m’a mira e nomber di Dios, Jehova, den Bijbel.—Exo. 6:3, NW.

David: Gwen a conta mi kico e tabata siña. Y m’a corda con mi tata tabata bisa mi ora mi tabata mucha cu mi mester lesa Bijbel. Pues, ami cu Gwen a bay di acuerdo pa studia Bijbel cu Gael y su casa, Derrick. Despues di seis luna nos a bay biba na Oswestry, den e mesun condado di Shropshire, ya cu nos a haya chens di huur nos propio boerderij chikito. Eynan Deirdre, un Testigo di e area, a sigui studia Bijbel cu nos. Deirdre tabatin hopi pasenshi, ya cu na prome instante nos progreso tabata slow. Nos tabata hopi ocupa cu e cuido di nos bestianan. Pero pocopoco e berdad a saca raiz den nos curason.

Gwen: Un obstaculo grandi cu ami mester a supera tabata supersticion. Isaias 65:11 a yuda mi compronde con Jehova ta mira hende cu, na moda di papia, ta drecha mesa pa “e dios di suerte.” (BPK) A tuma tempo y hopi oracion pa mi por a deshaci di tur amuleto y talisman di suerte cu mi tabatin. Ademas, ora m’a siña cu “ken cu halsa su mes, lo keda humilia, y ken cu humilia su mes, lo keda halsa”, m’a bin realisa ki tipo di hende Jehova ta busca pa sirbie, esta, hende humilde. (Mat. 23:12) Mi kier a sirbi e Dios aki cu tabata asina interesa den nos cu el a duna su Yiu precioso como rescate. Rond di e tempo ey m’a haya un yiu muher mas y tabata hopi emocionante pa siña cu nos famia por a biba pa semper den un paradijs riba Tera.

David: Ora m’a mira e manera maraviyoso cu profecianan di Bijbel tabata cumpli—por ehempel, esnan cu tin na Mateo capitulo 24 y den e buki di Daniel—m’a keda convenci cu esaki ta e berdad. M’a realisa cu nada den e mundo aki no por para banda di un bon relacion cu Jehova. Pues, cu tempo m’a bira menos ambicioso. M’a bin compronde cu mi casa y mi yiunan tabata mesun importante cu mi. Filipensenan 2:4 a convence mi cu mi no mester pensa riba mi mes ni riba mi deseo di haya un boerderij mas grandi. Mas bien, mi mester pone e sirbishi di Jehova na prome luga den mi bida. Tambe m’a stop di huma. Reunion tabata diasabra anochi, y esey tabata net ora di chica lechi. Anto e Salon di Reino tabata keda un dies kilometer leu. Pero cu yudansa di Gwen, nunca nos no a falta reunion, ni nos no a keda sin sali cu nos yiu muhernan den sirbishi di veld tur diadomingo mainta, despues cu nos caba di chica lechi di e bacanan.

 Nos famianan no tabata contento cu e cambio cu nos a haci. E tata di Gwen a keda seis aña largo sin papia cu ne. Mi mayornan tambe a purba di stop nos di asocia cu e Testigonan.

Gwen: Jehova a yuda nos wanta tur e retonan ey. Cu tempo, e rumannan di Congregacion Oswestry a bira nos famia nobo, y cu amor nan a apoya nos durante nos pruebanan. (Luc. 18:29, 30) Nos a dedica nos bida na Jehova y a batisa na 1972. Mi kier a yuda mas tanto hende posibel conoce e berdad, pues m’a cuminsa traha pionero.

UN MIHOR CARERA

David: E añanan cu nos tabatin e boerderij tabata fisicamente pisa; spiritualmente, nos a purba di pone un bon ehempel pa nos yiunan. Pero cu tempo, debi na reduccion di subsidio di gobierno, nos mester a entrega e boerderij. Nos no tabatin cas ni entrada, y nos di tres yiu muher tabatin apenas un aña. Nos a pidi Jehova yuda nos y guia nos. E ora ey nos a haya e idea pa habri un scol di baile y asina uza nos talento pa cria nos famia. Nos esfuerso pa pone Jehova na prome luga a duna fruta: nos tres yiu muhernan a cuminsa traha pionero ora nan a caba scol. Gwen tambe tabata pionero, pues e por a apoya nan tur dia.

Despues cu nos dos yiunan mas grandi, Gilly cu Denise, a casa, nos a cera e scol di baile. Nos a skirbi sucursal pa puntra unda nos por a bay yuda. Nan a bisa nos cu tin necesidad den parti zuidoost di Inglatera. Cu un yiu so na cas, esta, Debbie, mi tambe a cuminsa traha pionero. Cinco aña despues, sucursal a pidi nos bay yuda algun congregacion mas pa noord. Despues cu Debbie a casa, nos a traha dies aña den e programa di construccion internacional. Nos a sirbi na Zimbabwe, Moldovia, Hungria y Côte d’Ivoire. Despues nos a regresa Inglatera pa yuda cu construccion di e Betel di London. Anto debi na mi experencia cu boerderij, nan a pidi mi bay yuda na e boerderij cu Betel tabatin e tempo ey. Actualmente, nos ta sirbi como pionero den e parti noordwest di Inglatera.

Nos a disfruta hopi di traha riba proyectonan di construccion internacional

Gwen: Nos prome carera tabata ballet, y esey tabata dushi pero pasahero. Nos di dos carera—esun mas importante—ta nos sirbishi na Jehova, y esey ta haci nos realmente feliz y ta eterno. Ainda nos ta un bon pareha, pero no den ballet, sino den e trabou di pionero. Esaki ta permiti nos yuda hopi hende siña berdadnan precioso cu por scapa nan bida, y esey ta duna nos un felicidad sin igual. E “carta[nan] di recomendacion” aki ta mihor cu cualkier fama den mundo. (2 Cor. 3:1, 2) Si nos no a haya e berdad, nos lo tabatin solamente recuerdo, potret bieu y algun programa di theater di nos carera anterior.

David: Un carera den e sirbishi di Jehova a haci un diferencia grandi den nos bida. Ami sa cu esey a yuda mi bira un mihor esposo y tata. Bijbel ta bisa nos cu Miriam, Rey David y otronan a expresa nan felicidad cu baile. Anto nos, hunto cu hopi hende mas, ta anhela di balia di alegria den e mundo nobo di Jehova.—Exo. 15:20; 2 Sam. 6:14.