Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2015

Abo Lo “Keda Vigila”?

Abo Lo “Keda Vigila”?

“Keda vigila, pasobra boso no sa ni e dia ni e ora.”—MAT. 25:13.

1, 2. (a) Kico Hesus a bisa lo pasa durante e ultimo dianan? (b) Ki preguntanan nos lo analisa?

PURBA di imagina Hesus sinta riba Sero di Oleifi, cu bista riba e tempel di Jerusalem, mientras cu e tabata duna un di su profecianan di mas fascinante. E tabata hunto cu cuater di su apostelnan, esta, Pedro, Andres, Santiago y Juan, y nan a scuch’e cu hopi atencion. El a conta nan cosnan cu lo sosode leu aya den futuro—den e ultimo dianan di e mundo malbado aki—tempo cu lo e ta Rey di e Reino di Dios. El a splica nan cu durante e tempo emocionante ey su “esclavo fiel y prudente” lo represent’e riba Tera y lo duna su sirbidornan e cuminda spiritual cu nan mester.—Mat. 24:45-47.

2 Poco despues, como parti di e mesun profecia ey, Hesus a conta e ilustracion di e dies birgennan. (Lesa Mateo 25:1-13.) Den e articulo aki, nos lo analisa e siguiente preguntanan: (1) Kico nos ta siña for di e ilustracion ey? (2) Con e unginan fiel a sigui e conseho di e ilustracion, y cu ki resultado?  (3) Con cada un di nos por beneficia di e ilustracion ey di Hesus?

KICO E ILUSTRACION TA SIÑA NOS?

3. (a) Con nos publicacionnan tabata splica e ilustracion di e dies birgennan? (b) Kico lo por sosode si nos ta busca un nificacion simbolico pa cada detaye di e ilustracion?

3 Nos a mira den e articulo anterior cu ultimo añanan e esclavo fiel no ta concentra asina tanto mas riba busca e nificacion simbolico of profetico di relatonan biblico, sino mas bien riba e lesnan practico cu nos por saca for di nan. Por ehempel, antes nos publicacionnan tabata bisa cu hasta e detayenan chikito di e ilustracion di e dies birgennan—manera e lampi, e azeta, e boternan—tabatin un nificacion simbolico. Pero, lo ta posibel cu nos a concentra asina tanto riba e detayenan ey te cu nos a perde for di bista e mensahe simpel y urgente di e ilustracion? Manera nos lo bay mira, ta hopi importante pa haya contesta riba e pregunta aki.

4. (a) Ken ta e bruidegom, y con nos por sa esey? (b) Ken ta e birgennan, y con nos por sa esey?

4 Pues, kico Hesus kier a siña nos cu e ilustracion aki? Pa nos compronde esey, nos mester identifica na prome luga e personahenan principal. Ken ta e bruidegom? Esey ta Hesus. Nos sa esey pasobra mas prome Hesus a compara su mes cu un bruidegom. (Luc. 5:34, 35) Ken ta e birgennan? Nan ta e “tou chikito” di cristian ungi. Con nos por sa esey? Segun e ilustracion, e birgennan mester tabata prepara y cu nan lampinan cendi ora e bruidegom yega. Wel, Hesus a duna su siguidornan ungi casi e mesun instruccionnan ey. El a bisa nan: “Sea bisti y prepara y keda cu boso lampi cendi, y sea manera hende cu ta warda nan doño bin bek for di e fiesta di casamento.” (Luc. 12:32, 35, 36) Ademas, tanto apostel Pablo como apostel Juan a compara e siguidornan ungi di Cristo cu birgen puro. (2 Cor. 11:2; Rev. 14:4, nota) Pues, ta bisto cu Hesus a dirigi e conseho y spiertamento di e ilustracion di Mateo 25:1 pa 13 na su siguidornan ungi.

5. (a) Na ki tempo Hesus tabata referi ora el a conta e ilustracion di e dies birgennan? (b) Dicon nos ta yega na e conclusion ey?

5 Na di dos luga, nos mester sa ta na ki periodo di tempo e conseho di Hesus ta referi. Loke el a bisa na final di e ilustracion ta yuda nos sa esey. El a bisa: “E bruidegom a yega.” (Mat. 25:10) E Toren di Vigilancia di 15 di juli 2013 a splica cu den e profecia di Mateo capitulo 24 y 25 Hesus a referi ocho biaha na su binida, yegada of bolbemento, y cu e palabranan ey ta un traduccion di e mesun verbo Griego. Pues, den cada un di e referencianan ey, Hesus tabata papia di e momento durante e tribulacion grandi cu lo e bin pa husga y destrui e mundo malbado aki. Kiermen, ora Hesus a conta e ilustracion di e dies birgennan, e tabata referi na e tempo di fin. Pero e momento culminante di e ilustracion, esta, e yegada di e bruidegom, ta sosode durante e tribulacion grandi.

6. A base di e contexto, kico nos ta siña for di e ilustracion di e dies birgennan?

6 Pues, kico nos ta siña for di e ilustracion aki? Corda riba e contexto di e relato. Na Mateo capitulo 24, Hesus a caba di papia di “e esclavo fiel y prudente”, esta, un grupo chikito di homber ungi cu lo a dirigi e siguidornan di Cristo durante e ultimo dianan. Hesus a spierta e grupo ey cu nan mester keda fiel. Despues, den Mateo capitulo 25, Hesus a conta e  ilustracion di e dies birgennan como un spiertamento pa tur su siguidornan ungi cu ta biba den e ultimo dianan: Nan mester “keda vigila” pa nan no perde nan recompensa di bay cielo. (Mat. 25:13) Laga nos sigui analisa e ilustracion y wak kico e unginan a haci pa keda alerta.

E UNGINAN A SIGUI E CONSEHO DI E ILUSTRACION

7, 8. (a) Con bin e birgennan prudente tabata prepara? (b) Con e unginan a demostra cu nan ta prepara pa yegada di e Bruidegom?

7 E ilustracion di Hesus ta enfatisa cu e birgennan “prudente” si tabata cla pa e yegada di e bruidegom. Con bin? Pa dos motibo: nan a prepara nan mes bon y nan a keda vigila. Tur e dies birgennan mester a keda lanta durante anochi y warda yegada di e bruidegom; nan tabatin cu tene nan lampinan cendi y keda vigila te ora e yega. Pero contrario na e cinco birgennan “bobo”, esnan prudente si a prepara nan mes, ya cu nan a bay cu mas azeta den nan boter pa por si acaso esun den nan lampi caba. Kico di e unginan? Nan tambe a prepara nan mes pa ora Hesus yega?

8 Claro cu si! E unginan cu ta biba den e tempo di fin a haci mescos cu e birgennan prudente; nan a prepara nan mes pa cumpli fielmente cu nan asignacion te na fin. Nan a calcula e gasto di rindi sirbishi fiel y a realisa for di principio cu nan lo tin cu renuncia hopi beneficio material cu e mundo di Satanas ta ofrece. Nan ta determina pa sirbi Jehova fielmente, no djis pasobra e fin ta cerca, sino pa motibo cu nan ta stim’e y kier ta leal na dje y na Hesus. Nan ta mantene nan integridad y ta rechasa e actitud materialista, inmoral y egoista di mundo. Pues, mescos cu e birgennan prudente cu nan lampi, e unginan ta cla prepara y ta “briya como cargador di luz den mundo”, mientras cu nan ta warda cu pasenshi riba yegada di e Bruidegom, aunke por parce cu e ta tarda.—Flp. 2:15.

9. (a) Con Hesus a spierta su discipelnan pa e peliger di pega soño, y kico esey a indica? (b) Con e unginan a reacciona riba e grito: “Ata e bruidegom!”? (Wak tambe e nota.)

9 E birgennan prudente no solamente mester a prepara nan mes bon, pero tambe nan mester a keda vigila. Pero Hesus a bisa cu tur dies birgen “a cabisha y pega soño” ora nan tabata warda riba e bruidegom, cu aparentemente a tarda pa yega. Kico Hesus kier a siña cu esaki? Wel, esey a indica cu hasta un persona cu ta desea di keda alerta por “pega soño”, es decir, por bira debil den carni of ser distrai, mientras cu e ta warda riba e yegada di Cristo. E unginan fiel ta haci caso di e spiertamento ey y ta haci hopi esfuerso pa keda alerta. Den e ilustracion, tur e birgennan a reacciona ora cu meyanochi nan a tende: “Ata e bruidegom!” Pero ta esnan prudente so a keda vigila te na su yegada. (Mat. 25:5, 6; 26:41) Kico di e unginan fiel awe? Durante e ultimo dianan, nan tambe a reacciona riba e grito: “Ata e bruidegom!” Con? Nan a keda vigila y a reconoce e señal cu ta indica cu e Bruidegom ta casi yega. * Laga nos concentra awor riba e momento culminante di e ilustracion.

 RECOMPENSA PA ESNAN PRUDENTE Y CASTIGO PA ESNAN BOBO

10. E combersacion entre e birgennan ta lanta ki pregunta?

10 Kisas e parti mas straño di e ilustracion ta casi na final ora cu e birgennan prudente ta nenga di yuda esnan bobo. (Lesa Mateo 25:8, 9.) Esey ta hala nos atencion pasobra e ta lanta e pregunta: Dicon fiel cristiannan ungi lo nenga di yuda hende cu ta pidi yudansa? Wel, pa haya e contesta nos tin cu corda ta na ki tempo e ilustracion aki ta cumpli. Manera nos a wak caba, awor nos ta compronde cu Hesus, e Bruidegom, ta yega pa husga y ehecuta huicio casi na final di e tribulacion grandi. Pues, probablemente e combersacion entre e birgennan ta referi na loke lo tuma luga un poco prome cu e huicio ey. Dicon nos ta bisa esaki? Pasobra pa e tempo ey, ya e unginan fiel lo a haya nan seyo final.

11. (a) Kico lo sosode un poco prome cu e tribulacion grandi cuminsa? (b) Kico e birgennan prudente kier a indica ora nan a manda esnan bobo bay cumpra azeta?

11 Pues anto, prome cu e tribulacion grandi cuminsa, tur e unginan fiel lo a haya nan seyo final. (Rev. 7:1-4) Esey kiermen cu, for di e momento ey, ta sigur cu nan lo bay cielo. Pero pensa awor riba e añanan prome cu e tribulacion grandi cuminsa. Kico lo pasa cu e unginan cu no a keda vigila y a bira infiel? Nan lo no haya e seyo final, pues nan lo no bay cielo. Pa ora e tribulacion grandi cuminsa, ya otro cristiannan fiel lo a ser ungi y lo a reemplasa nan. Anto ora esnan cu a bira infiel mira e destruccion di tur religion falso, probablemente nan lo keda den shock. Dicon? Pasobra podise ta e ora ey nan lo realisa cu nan no ta cla pa yegada di e Bruidegom. Pero kico lo pasa si na e ora ey di anochi nan pidi yudansa tur desespera? E ilustracion di Hesus ta duna e contesta. E birgennan prudente ta nenga di duna esnan bobo un poco di nan azeta y ta manda nan bay cumpra cerca e bendedonan. Pero corda cu ta “meyanochi.” Ta ken lo bende nan azeta e ora ey? Niun hende! Loke e birgennan prudente kier bisa nan ta cu ya ta mucho laat pa nan haya yudansa.

12. (a) Durante e tribulacion grandi, kico lo pasa cu e unginan cu a bira infiel y no a haya e seyo final? (b) Ki final ta warda hende cu ta manera e birgennan bobo?

12 Asina tambe durante e tribulacion grandi, e unginan fiel no por yuda niun cu a bira infiel. Lo ta mucho laat. Kico lo pasa cu esnan infiel? Mescos cu a pasa cu e birgennan bobo cu a bay cumpra azeta. Hesus a conta: “E bruidegom a yega, y e birgennan cu tabata cla a drenta hunto cu ne den e fiesta di casamento, y porta a cera.” Ora Cristo yega den su gloria casi na final di e tribulacion, lo e reuni e unginan fiel den cielo. (Mat. 24:31; 25:10; Juan 14:1-3; 1 Tes. 4:17) Despues lo e cera porta, y esnan cu ta manera e birgennan bobo lo no por drenta. Na e momento ey kisas nan lo cuminsa sclama: “Señor, Señor, habri pa nos!” Pero nan lo haya e mesun contesta cu e personanan cu a ser husga como cabrito. Hesus lo bisa nan: “Di berdad mi ta bisa boso: Mi no conoce boso.” Esta un final lamentabel!—Mat. 7:21-23; 25:11, 12.

13. (a) Dicon nos no mester conclui cu hopi ungi lo bira infiel? (b) Dicon nos por bisa cu e ilustracion di Hesus ta revela su confianza den e unginan? (Wak e prome plachi.)

13 Acaso Hesus kier a bisa cu hopi ungi lo bira infiel y cu lo mester reemplasa  nan? No. Corda e ilustracion di “e esclavo fiel y prudente” cu Hesus a duna na Mateo capitulo 24. Eynan, el a papia di un esclavo malbado. Pero e no tabata kiermen cu e esclavo fiel y prudente lo bira un esclavo malbado; ta djis un spiertamento e tabata duna. Algo parecido ta sosode den e ilustracion di e dies birgennan. Cinco birgen tabata prudente y cinco tabata bobo. Di manera cu cada ungi tin cu dicidi si lo e ta prepara y si lo e keda vigila, of si lo e actua na un manera bobo y infiel. Apostel Pablo tambe a duna cristiannan ungi un spiertamento similar. (Lesa Hebreonan 6:4-9; compara cu Deuteronomio 30:19.) Aunke e spiertamento di Pablo tabata firme, el a demostra confianza den su rumannan pasobra el a bisa nan cu nan lo ricibi nan recompensa. E spiertamento cu Hesus ta duna e unginan den e ilustracion di e dies birgennan tambe ta demostra cu e tin confianza den nan. Cristo sa cu cada un di su siguidornan ungi por keda fiel y haya e recompensa celestial.

UN LES VALIOSO PA E OTRO CARNENAN

14. Con e “otro carne[nan]” tambe por beneficia di e ilustracion di e dies birgennan?

14 Hesus a dirigi e ilustracion di e dies birgennan na su siguidornan ungi. Acaso esey kiermen cu e “otro carne[nan]” no por siña nada for di dje? (Juan 10:16) Claro cu no! Corda cu e mensahe di e ilustracion ta hopi simpel y cla: “Keda vigila.” De echo, Hesus a yega di bisa: “Loke mi ta bisa boso, mi ta bisa tur hende: Keda vigila.” (Mar. 13:37) Hesus ta spera cu tur su discipelnan ta prepara pa sirbie fielmente y ta keda alerta. Pues, tur cristian mester imita e bon ehempel di e unginan y pone e trabou di predica na prome luga den nan bida. Nos mester corda tambe cu e birgennan bobo a pidi esnan prudente pa duna nan un poco di nan azeta. Pero esnan prudente no a duna nan. Kico nos ta siña for di esaki? Wel, nos no por spera cu otro hende lo ta fiel pa nos, keda den e berdad pa nos of keda alerta pa nos. Cada un di nos lo tin cu duna cuenta y rason na Hesus, e Hues husto apunta pa Jehova. Nos mester ta prepara, pasobra Hesus ta bin pronto.

No sea manera e birgennan bobo cu a pidi azeta, pasobra niun hende no por keda fiel pa nos ni keda vigila pa nos

15. Dicon e casamento di Cristo cu su bruid ta algo emocionante pa tur cristian?

15 Tur cristian ta hopi emociona cu e suceso mas importante di e ilustracion: e casamento. Despues di e guera di Armagedon, e unginan lo bira e bruid di Cristo den cielo. (Rev. 19:7-9) Tur hende riba Tera lo beneficia di e casamento celestial ey, pasobra debi na e union ey humanidad porfin lo tin un gobierno perfecto. Pesey, sea cu nos tin e speransa di biba den cielo of riba Tera, nos tur tin cu haci caso di e les di e ilustracion di e dies birgennan. Laga nos haci esfuerso sincero pa ta prepara y pa keda vigila, ya asina nos por disfruta di e futuro maraviyoso cu Jehova tin warda pa nos.

^ par. 9 Den e ilustracion tin un periodo di tempo entre e grito “Ata e bruidegom!” (versiculo 6) y e momento mes cu e bruidegom ta yega (versiculo 10). Durante e ultimo dianan, e unginan a keda alerta; nan a compronde e señal di e presencia di Cristo, pues nan sa cu Hesus ta goberna caba como Rey den e Reino di Dios. Pero toch nan tin cu keda vigila te ora cu e yega finalmente.