Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2015

 FOR DI NOS ARCHIVO

“Un Temporada Hopi Special”

“Un Temporada Hopi Special”

NA AÑA 1870, un grupito na Allegheny, cu awe ta parti di Pittsburgh (Pennsylvania), a cuminsa studia Bijbel. Bou di direccion di Charles Taze Russell, nan a analisa e doctrina di e rescate, y mesora nan a ripara cu esaki tabata un punto central den e proposito di Jehova. Nan a keda masha emociona ora nan a siña cu e sacrificio di Cristo ta habri e caminda pa salbacion, anto hasta pa hende cu ainda no a tende di Hesus. Gratitud a motiva nan pa sigui conmemora e morto di Hesus tur aña.—1 Cor. 11:23-26.

Despues Ruman Russell a cuminsa publica e revista Zion’s Watch Tower,cu a defende e siñansa di e rescate como e expresion principal di e amor di Dios. E Toren di Vigilancia a referi na e epoca di Conmemoracion di e morto di Cristo como “un temporada hopi special” y a anima su lectornan pa conmemor’e sea na Pittsburgh of cualkier otro caminda den gruponan priva. E revista a bisa cu Cristo lo ta hunto cu nan, “hasta si ta apenas dos of tres persona di e mesun fe precioso aki t’ey presente”, of uno so.

Cada aña, mas y mas hende tabata bin Pittsburgh pa e Conmemoracion, of Memorial. Riba e invitacion tabatin para: “Lo bo sinti bo bonbini akinan.” Si, Studiantenan di Bijbel di e area ey gustosamente tabata duna cuminda y alohamento na nan rumannan spiritual. Na 1886, despues di Memorial nan a tene un “Reunion General” (un tipo di congreso) di varios dia. E Toren di Vigilancia a urgi: “Bin cu un curason yen di amor pa e Doño, pa su rumannan y pa su berdad.”

Un schema cu nan tabata uza pa pasa e pan y e biña di Memorial na e Tabernakel di London

Durante varios aña, e Studiantenan di Bijbel na Pittsburgh tabata tene congreso pa hende cu a pone fe den e rescate y asisti na Memorial. Segun cu e cantidad di Studiante di Bijbel a crece, asina tambe e asistencia y cantidad di reunion pa Memorial cu nan tabata tene rond mundo a aumenta. Ray Bopp, kende tabata di e eclecia (congregacion) di Chicago, a conta cu den decada di 1910 tabata dura varios ora pa pasa e pan y e biña entre e cientos di hendenan cu a asisti, ya cu casi tur hende tabata come di e pan y bebe di e biña.

Ki emblema, of simbolo, nan tabata uza? Aunke E Toren di Vigilancia a indica cu Hesus a uza biña durante e Cena di Señor, pa un tempo e revista a recomenda pa uza juice di druif fresco of di rasenchi herbi, pa no hinca esnan cu tabata “debil den carni” den tentacion. Pero, nan tabatin biña mes tambe pa esnan cu tabata sinti cu ta “biña fermenta mester a uza.” Cu tempo, e Studiantenan di Bijbel a bin compronde cu biña cora puro ta e simbolo apropia pa representa e sanger di Hesus.

E pida papel y e potlood aki a pasa di cel pa cel den un prizon na Nicaragua pa conta e asistencia na Memorial

E Conmemoracion tabata un oportunidad pa reflexiona seriamente riba e nificacion di e morto di Hesus. Pero, den algun congregacion tabata reina un  ambiente di tristeza durante e discurso, y ora e programa a caba, tur hende tabata sali bay sin papia niun palabra. Pesey e buki Jehovah, publica na 1934, a splica cu e rumannan no mester a tene e Memorial “cu tristeza”, concentrando riba Hesus su morto doloroso, sino mas bien “cu goso”, ya cu for di 1914 e ta goberna como Rey.

Rumannan cu a reuni den e campo di trabou forsa na Moldovia (Rusia) pa tene Memorial na 1957

Na 1935 a bin un clarificacion tocante ken e “multitud grandi” describi na Revelacion 7:9 tabata. Esey tabatin un gran efecto riba e celebracion di Memorial. Te cu e tempo ey, e sirbidornan di Jehova tabata considera e multitud grandi como un grupo di cristian dedica pero cu menos celo. E aña ey nan a compronde cu e multitud grandi aki tabata sirbidornan fiel di Jehova cu tin e speransa di biba pa semper den un paradijs riba Tera. Poco despues di e clarificacion aki, Ruman Russell Poggensee a samina su curason cuidadosamente y a admiti: “Jehova no a uza su spirito santo pa duna mi e yamada pa biba den cielo.” Tanto e como hopi otro ruman mas a stop di come di e pan y bebe di e biña, pero si nan a sigui asisti na Memorial.

Durante e “temporada hopi special” ey, nan tabata organisa campañanan special di predica y tur ruman por a demostra nan aprecio pa e rescate di Cristo participando den nan. Na 1932, e Bulletin a spierta cristiannan pa nan no ta “santo di Memorial”, esta, rumannan cu ta djis asisti na reunion y tuma di e simbolonan pero cu no ta predica. Mas bien, nan mester tabata “trahadornan autentico”, es decir, nan mester a predica e mensahe di e berdad. Na 1934, e Bulletin a haci un yamada pa e rumannan traha como pionero auxiliar puntrando: “Nos lo alcansa 1.000 [pionero auxiliar] durante e temporada di Memorial?” Relaciona cu e unginan, e Informant a comenta: “Nan goso lo ta completo solamente si nan ta participa den e trabou di predica e Reino.” Cu tempo, esaki lo a conta tambe pa esnan cu tabatin e speransa di biba riba Tera. *

Harold King a skirbi poesia y cantica tocante Memorial ora e tabata den cachot

Pa tur testigo di Jehova, e Conmemoracion di e morto di Cristo ta e celebracion di mas importante di aña. Nan ta ten’e hasta bou di circunstancianan dificil. Por ehempel, na 1930, Pearl English cu su ruman muher, Ora, a cana un 80 kilometer pa asisti na Memorial. E misionero Harold King, cu tabata den cachot den prizon na China, a skirbi poesia y cantica tocante Memorial y a uza aros cu rasenchi pa traha e pan y e biña. Anto cu curashi rumannan di Oost Europa, Centro America y Africa a celebra e Conmemoracion di e morto di Hesus durante di guera y persecucion. No ta importa na unda nos ta biba of den ki situacion nos ta, nos tur ta reuni hunto pa honra Jehova Dios y Hesucristo durante e temporada special di Memorial.

^ par. 10Bulletin su nomber a bira despues Informant y awe e yama Nos Ministerio di Reino.