Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2015

Imita Hesus Su Curashi y Bon Huicio

Imita Hesus Su Curashi y Bon Huicio

“Aunke boso no a mir’e nunca, boso ta stim’e. Aunke boso no ta mir’e aworaki, toch boso tin fe den dje.”1 PED. 1:8.

1, 2. (a) Kico nos mester haci pa haya salbacion? (b) Kico por yuda nos keda riba e caminda cu ta hiba na bida eterno?

ORA nos a bira discipel di Cristo, ta comosifuera nos a cuminsa un biahe. E biahe ey ta hiba nos na bida eterno, sea den cielo of riba Tera. Hesus a bisa: “Esun cu persevera te na fin ta esun cu lo ser salba.” (Mat. 24:13) Si, pa nos haya salbacion, nos tin cu keda fiel na Dios “te na fin”, sea ta fin di nos bida of fin di e mundo malbado aki. Pero nos tin cu tene cuidou si pa mundo no kita nos atencion of pone nos perde caminda. (1 Juan 2:15-17) Con nos por keda riba e bon caminda durante nos biahe?

2 Nos tin cu sigui e ehempel perfecto di Hesus. El a mustra nos e caminda cu ta hiba na bida. Ora nos ta studia loke Bijbel ta bisa di su biahe, nos por haya sa ki sorto di persona e ta. Anto nos lo por siña stim’e y pone fe den dje. (Lesa 1 Pedro 1:8, 9.) Corda cu apostel Pedro a bisa cu Hesus a laga un ehempel pa nos sigui su pasonan fielmente. (1 Ped. 2:21) Si nos imita e ehempel di Hesus cuidadosamente, nos lo yega nos destinacion,  esta, “e meta” di nos fe: nos salbacion. * Den e articulo anterior, nos a siña con nos por imita e ehempel di Hesus y mustra humildad y ternura. Laga nos analisa awor con nos por sigui su pasonan y mustra curashi y bon huicio.

HESUS TIN CURASHI

3. Kico ta curashi, y con nos por cultiv’e?

3 Curashi ta un sintimento di confianza cu ta duna nos fortaleza y ta yuda nos wanta prueba. Un persona cu curashi ta persevera a pesar di contratiempo, e ta defende loke ta corecto y e ta soporta sufrimento cu dignidad y confianza. Curashi ta estrechamente liga cu temor, speransa y amor. Den ki manera? E temor di desagrada Dios lo duna nos e forsa pa vence temor di hende. (1 Sam. 11:7; Prov. 29:25) Berdadero speransa ta yuda nos wak futuro cu confianza y no enfoca riba nos pruebanan. (Sal. 27:14) Amor ta motiva nos pa sacrifica nos mes pa otro hende hasta ora nos bida ta na peliger. (Juan 15:13) Kico lo yuda nos haya curashi? Nos tin cu confia den Dios y sigui e pasonan di su Yiu.—Sal. 28:7.

4. Con Hesus a demostra curashi ora e tabatin 12 aña? (Wak e prome plachi.)

4 Tempo cu Hesus tabata jong, el a demostra curashi y a defende loke ta corecto. Un biaha, ora e tabatin 12 aña, e tabata “den tempel, sinta meymey di e maestronan.” (Lesa Lucas 2:41-47.) E maestronan religioso ey tabata bon versa den e Ley di Moises y tambe den e tradicionnan hudiu cu eigenlijk a stroba hende di obedece e Ley. Pero Hesus no tabatin miedo; e no a laga nan conocemento pon’e keda keto. Al contrario, el a sigui “haci nan pregunta”, y no pregunta cu normalmente un mucha curioso ta haci. Nos por imagina cu Hesus a haci preguntanan profundo cu a pone nan pensa. Anto si e maestronan ey a kere cu nan por a coy Hesus den trampa cu preguntanan controversial, nan a dal nan dede duro. Con nos por sa? Wel, Bijbel ta bisa cu tur esnan cu tabata scuch’e—incluyendo e maestronan—a keda asombra “di e contestanan cu e tabata duna y di cuanto cos e tabata compronde.” Si, cu curashi Hesus a defende e Palabra di Dios.

5. Menciona algun manera cu Hesus a demostra curashi durante su sirbishi.

5 Hesus a demostra curashi den varios manera durante su sirbishi. Por ehempel, sin miedo el a bisa e hendenan cu e lidernan religioso tabata gaña nan cu nan siñansanan falso. (Mat. 23:13-36) El a para firme contra e mal influencia di mundo. (Juan 16:33) El a sigui predica, a pesar cu opositornan tabata pone presion riba dje p’e stop. (Juan 5:15-18; 7:14) Anto dos biaha el a saca e hendenan for di tempel cu tabata mustra falta di respet pa e adoracion di Jehova.—Mat. 21:12, 13; Juan 2:14-17.

6. Con Hesus a demostra curashi riba e ultimo dia di su bida riba Tera?

6 Ta bon tambe pa nos reflexiona riba e curashi cu Hesus a demostra ora el a hay’e cu prueba, ya cu esey por fortalece nos fe. Por ehempel, wak kico a sosode riba e ultimo dia di su bida riba Tera. E tabata sa kico lo a bay pasa cu ne despues cu Judas lo a traicion’e. Toch, na e cena di Pasco Hudiu el a bisa Judas: “Loke bo ta haciendo, caba di hacie pa caba.” (Juan 13:21-27) Despues, den e Hofi di Getsemani, ora e soldaatnan a bin pa aresta Hesus, e no tabatin miedo di identifica su mes. Aunke su propio bida tabata na peliger, el a proteha su discipelnan bisando e soldaatnan pa laga nan bay. (Juan 18:1-8) Ora e tabata dilanti di  Sanedrin, e no tabatin miedo di confirma cu e tabata e Cristo y e Yiu di Dios, maske e tabata sa cu e sumo sacerdote tabata busca un motibo pa mat’e. (Mar. 14:60-65) Hesus a mantene su integridad na Dios te na morto riba e staca di tormento. Pesey, prome cu el a hala su ultimo rosea, e por a bisa: “Tur cos a cumpli!”—Juan 19:28-30.

IMITA HESUS SU CURASHI

7. (a) Hobennan, kico boso ta pensa di e echo cu boso ta testigo di Jehova? (b) Con boso por demostra cu boso tin curashi?

7 Con nos por imita Hesus su curashi? Na scol. Hoben, bo por demostra cu bo tin curashi ora bo ta cla pa laga bo compañeronan di klas y otro hende sa cu bo ta un testigo di Jehova. Asina bo ta mustra cu bo ta orguyoso di carga e nomber di Jehova, hasta si hende ta tenta bo. (Lesa Salmo 86:12.) Kisas hende ta pone presion riba bo pa bo kere den evolucion. Pero bo tin motibonan solido pa confia cu loke Bijbel ta bisa tocante creacion ta berdad. Bo por uza e foyeto Dios Realmente Ta Interesa den Nos? of The Origin of Life—Five Questions Worth Asking pa duna un contesta convencente na esnan cu kier sa e “motibo di e speransa cu [bo] tin.” (1 Ped. 3:15) Si bo haci esey, lo bo sinti bo bon pasobra bo a defende e Palabra di Dios cu curashi.

8. Menciona algun motibo cu nos tin pa predica cu curashi.

8 Den sirbishi. Como cristian berdadero, Jehova ta fortalece nos pa sigui “papia cu curashi.” (Echo. 14:3) Dicon nos por predica cu curashi? Pa varios motibo. Di prome, nos sa cu loke nos ta predica ta e berdad pasobra e ta basa riba Bijbel. (Juan 17:17) Di dos, “nos ta compañero di trabou di Dios”, y el a duna nos su spirito santo pa apoya nos. (1 Cor. 3:9; Echo. 4:31) Di tres, ora nos ta haci esfuerso pa papia cu mas tanto hende posibel tocante e bon noticia, nos ta demostra nos devocion na Jehova y nos amor pa prohimo. (Mat. 22:37-39) Pesey nos ta demostra curashi y no ta laga niun hende silencia nos. Al contrario, nos ta determina pa saca na cla e mentiranan religioso cu ta ciega hende pa haya sa e berdad. (2 Cor. 4:4) Nos lo sigui predica e bon noticia a pesar cu e hendenan ta indiferente, ta haci bofon di nos of ta persigui nos.—1 Tes. 2:1, 2.

9. Con nos por demostra curashi ora nos ta enfrenta prueba?

9 Ora nos ta enfrenta prueba. Nos confianza den Dios ta duna nos e fe y curashi necesario pa wanta dificultad. Naturalmente nos ta sinti nos masha tristo ora un ser keri muri, pero nos no ta perde speransa. Nos tin confianza cu e “Dios di tur consuelo” lo fortalece nos. (2 Cor. 1:3, 4; 1 Tes. 4:13) Kisas nos tin dolor ora nos ta gravemente malo of herida, pero nos lo rechasa cualkier tratamento cu ta bay contra di principionan biblico. (Echo. 15:28, 29) “Hasta si nos curason ta condena nos” ora nos ta deprimi, nos lo no entrega, pasobra nos ta confia den Jehova, e Dios cu “ta cerca di e hende di curason kibra.” *1 Juan 3:19, 20; Sal. 34:18.

HESUS A DEMOSTRA BON HUICIO

10. Kico bon huicio ta encera, y con un cristian cu tin bon huicio ta papia y actua?

10 Bon huicio ta conecta cu discernimento. E ta encera cu un hende tin e capacidad di distingui loke ta bon for di loke ta malo y ta scoge pa haci loke ta corecto. (Heb. 5:14) Un cristian cu tin bon huicio ta tuma decisionnan cu lo fortalece su relacion cu Dios. E ta papia y actua na maneranan cu  ta agrada Dios. E ta scoge palabranan cu ta anima otro hende na luga di ofende nan. (Prov. 11:12, 13) Ademas, e “no ta rabia lihe.” (Prov. 14:29) E ta “cana den rectitud”, es decir, e ta percura p’e keda riba e caminda corecto durante henter su bida. (Prov. 15:21) Con nos por desaroya bon huicio? Nos tin cu studia e Palabra di Dios y pone na practica loke nos ta siña. (Prov. 2:1-5, 10, 11) Mas cu tur cos, nos ta studia y imita e ehempel di Hesus, kende semper a actua cu bon huicio.

11. Con Hesus a demostra na su manera di papia cu e tabatin bon huicio?

11 Hesus a demostra bon huicio den tur loke el a bisa y haci. Su manera di papia. Ora Hesus tabata predica e bon noticia, el a scoge “palabranan yen di gracia” cu a laga su oyentenan babuca. (Luc. 4:22; Mat. 7:28) E tabatin e custumber di laga e Palabra di Dios papia p’e. El a lesa y cita for di dje y tabata sa precies cua texto pa uza pa cada situacion. (Mat. 4:4, 7, 10; 12:1-5; Luc. 4:16-21) Ademas, Hesus a splica e Scritura na un manera cu su palabranan tabatin un efecto profundo riba hende. Por ehempel, despues di su resureccion, el a papia cu dos discipel cu tabata riba caminda pa Emaus y “a splica nan e cosnan tocante su mes den henter e Scritura.” Con nan a reacciona? Despues e discipelnan a bisa: “Nos curason no tabata manera na candela ... segun cu e tabata splica nos e Scritura na placa chikito?”—Luc. 24:27, 32.

12, 13. Menciona algun ehempel cu ta demostra cu Hesus tabata slow pa rabia y tambe rasonabel.

12 Su emocionnan y actitud. Bon huicio a yuda Hesus controla su emocionnan, y pesey e tabata slow pa rabia. (Prov. 16:32) E tabatin un “genio suave.” (Mat. 11:29) Semper Hesus a tene pasenshi cu su discipelnan, a pesar di nan defectonan. (Mar. 14:34-38; Luc. 22:24-27) Y el a keda calmo hasta ora hende a trat’e inhustamente.—1 Ped. 2:23.

13 Bon huicio a yuda Hesus pa ta rasonabel. E tabata sa precies kico e Ley di Moises tabata bisa, pero tambe el a compronde e intencion di e reglanan di e Ley ey, y esaki a influencia e manera cu el a trata hende. Por ehempel, laga nos wak e relato na Marco 5:25 te cu 34 (Les’e.) tocante un muher cu tabatin “un sangramento.” E muher a pasa meymey di un multitud di hende, mishi cu e paña di Hesus y a cura. Segun e Ley, e tabata impuro y no tabatin mag di mishi cu ningun hende. (Lev. 15:25-27) Pero Hesus no a rabia cu ne. Pasobra Hesus a compronde cu e cualidadnan manera “misericordia y fieldad” ta cualidadnan mas importante di e Ley. (Mat. 23:23) Hesus a bis’e bondadosamente: “Mi yiu, bo fe a cura bo. Bay na paz, sea salud y cu e maleza penoso aki no molestia bo mas.” Esta un bunita ehempel! Hesus su bon huicio a motiv’e pa mustra bondad.

14. Kico tabata e cos di mas importante pa Hesus, y kico el a haci pa cumpli cu su asignacion?

14 Su prioridadnan. Hesus a demostra cu e tin bon huicio ora el a scoge e caminda corecto y a pega na esey. E trabou di predica e bon noticia tabata e cos di mas importante p’e, y el a haci esey su carera. (Luc. 4:43) Pues, Hesus a tuma decisionnan cu a yud’e keda enfoca riba su asignacion y cumpli cu ne. Por ehempel, el a scoge pa tene su bida simpel ya asina e por a dedica tur su tempo y energia na siña hende e berdad. (Luc. 9:58) E tabata consciente tambe cu e mester a entrena su discipelnan pa nan por a sigui predica despues di su morto. (Luc. 10:1-12; Juan 14:12) Anto el a priminti nan cu lo el a yuda nan den e trabou di predica “te na conclusion di e era aki.”—Mat. 28:19, 20.

 IMITA HESUS SU BON HUICIO

Prome cu bo papia, pensa kico e hendenan mester y den kico nan ta interesa (Wak paragraf 15)

15. Con nos manera di papia por demostra cu nos tin bon huicio?

15 Con nos por imita Hesus y actua cu bon huicio? Nos manera di papia. Ora nos ta papia cu nos rumannan, semper nos ta purba di anima nan. Nos ta evita di uza palabranan cu ta laga nan sinti nan malo of cu ta kibra nan. (Efe. 4:29) Ora nos ta papia cu hende tocante e Reino di Dios, nos ta percura pa nos palabranan ta “sasona cu salo”, es decir, nos ta papia cu tacto. (Col. 4:6) Prome cu nos presenta nos mensahe den e trabou di cas pa cas, nos ta trata di pensa kico e hendenan mester y den kico nan ta interesa, despues nos ta scoge nos palabranan di acuerdo cu esey. No lubida cu palabranan amabel por “habri porta” pa e hendenan scucha nos, y yega na nan curason. Ademas, ora nos tin cu splica nos creencianan, nos ta laga Bijbel papia pa nos. E ta nos autoridad. Pues, nos ta cita y lesa for di dje ki ora cu nos haya un oportunidad. Nos sa cu e palabranan di Bijbel ta mucho mas convencente cu cualkier cos cu nos mes bisa.—Heb. 4:12.

16, 17. (a) Con nos por demostra cu nos ta slow pa rabia y rasonabel? (b) Con nos por sigui enfoca riba e trabou di predica?

16 Nos emocionnan y actitud. Bon huicio ta yuda nos controla nos emocionnan ora nos ta bou di presion, y asina nos lo ta “slow pa rabia.” (Sant. 1:19) Ora un hende ofende nos, nos lo purba di compronde dicon el a papia y actua asina. E ora ey lo ta mas facil pa nos keda calmo y “laga un ofensa pasa.” (Prov. 19:11) Tambe bon huicio ta yuda nos pa ta rasonabel. Nos mester ta realista y no spera perfeccion for di nos rumannan. Mas bien, nos lo corda cu kisas nan ta enfrenta problemanan cu nos no ta na altura di dje. Nos lo ta dispuesto pa scucha nan opinion, y ora ta posibel, nos ta sede, es decir, nos no ta keda insisti riba nos punto di bista.—Flp. 4:5.

17 Nos prioridadnan. Como discipel di Hesus, nos sa cu predicacion di e bon noticia ta e privilegio di mas grandi cu nos por tin. Pues, nos lo kier tuma decisionnan cu lo yuda nos sigui enfoca riba e trabou di predica. Nos ta scoge pa tene cosnan spiritual na prome luga. Nos ta hiba un bida simpel ya nos por dedica nos tempo y energia na e trabou mas importante di predica e bon noticia prome cu e fin yega.—Mat. 6:33; 24:14.

18. Con nos por keda riba e caminda cu ta hiba na bida eterno, y kico abo ta determina pa haci?

18 Esta dushi e tabata pa por a medita riba algun bunita cualidad di Hesus! Imagina cuanto beneficio mas nos lo por saca si nos studia su otro cualidadnan y siña con nos por ta mas manera e. Pues, laga nos ta determina pa sigui su pasonan fielmente. Si nos haci esey, nos lo keda riba e caminda cu ta hiba na bida eterno y nos lo hala mas cerca Jehova, Esun cu Hesus a imita perfectamente.

^ par. 2 E palabranan di 1 Pedro 1:8 y 9 tabata dirigi na cristiannan cu tin e speransa celestial, pero nan ta aplica tambe na cristiannan cu tin e speransa di biba pa semper riba Tera.

^ par. 9 Wak algun ehempel di rumannan cu a enfrenta prueba pisa cu curashi den E Toren di Vigilancia di 1 di december 2000, pagina 24-28; Spierta! di 8 di mei 2003, pagina 18-21 y ¡Despertad! di 22 di januari 1995, pagina 11-15.