Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2015

Nan A Ofrece Nan Mes di Buena Gana pa Sirbi—Na New York

Nan A Ofrece Nan Mes di Buena Gana pa Sirbi—Na New York

UN PAR di aña pasa, Cesar cu su casa, Rocio, tabatin un bida comodo na California. Cesar tabata traha full-time den e ramo di ventilacion, calefaccion y airco, y Rocio tabata traha part-time na un oficina di dokter. Nan tabatin nan mes cas, y nan no tabatin yiu. Pero algo a cambia nan bida. Kico a sosode?

Na october 2009, e sucursal di Merca a manda un carta pa tur congregacion den e pais. Den e carta nan a anima rumannan cu ta specialisa den un cierto ofishi pa ofrece nan mes como boluntario pa sirbi temporalmente na Betel, pa asina nan yuda cu e trabou di expansion di e facilidadnan di sucursal na Wallkill, New York. Hasta rumannan cu a pasa e edad pa sirbi na Betel por a yena e solicitud. Cesar cu Rocio a conta: “Debi na nos edad, nos tabata sa cu nunca mas nos lo haya un oportunidad asina pa sirbi na Betel. Pues, pa nada di mundo nos lo no kier a perde e chens aki!” Di biaha e pareha a yena nan solicitud.

Algun di e boluntarionan cu ta traha na Warwick

Mas cu un aña a pasa, sin cu Cesar cu Rocio a tende algo di Betel. Asina mes, nan a haci algun cos pa simplifica nan bida. Cesar a conta: “Nos a transforma nos garashi den un apartamento pa nos por a huur e cas cu otro hende. Despues nos a sali for di e cas di nos soño—un cas di 200 meter cuadra cu nos a traha apenas algun aña prome—y nos a bay biba den e apartamento di 25 meter cuadra.” Cesar a sigui bisa: “E cambionan aki cu nos a haci lo a permiti nos pa bay Betel, si nos haya invitacion.” Kico a pasa despues? Rocio a conta: “Un luna despues cu nos a bay biba den nos apartamento, nos a haya un invitacion pa sirbi como boluntario temporal na Wallkill. Nos a mira bon cla cu ora nos a simplifica nos bida, nos a duna Jehova algo p’e bendiciona.”

Jason, Cesar y William

JEHOVA TA BENDICIONA NAN SACRIFICIO

Mescos cu Cesar cu Rocio, cientos di ruman a haci sacrificio pa nan por yuda cu e trabou di construccion cu ta tumando luga den e estado di New York.  Algun ta apoyando e trabou di expansion na Wallkill, mientras cu un grupo grandi tin e privilegio di yuda cu construccion di e sede mundial na Warwick. * Hopi pareha casa a bay laga nan cas comodo, nan bon trabou y hasta nan animalnan domestico pa sirbi Jehova plenamente. Con Jehova a reacciona? El a bendiciona nan spirito di sacrificio propio? Claro cu si!

Way

Tuma por ehempel Way, un electricien, cu su casa Debra. Nan tur dos tin casi 60 aña di edad, y nan a bende nan cas y mayoria di nan pertenencianan na Kansas y a bay biba na Wallkill pa sirbi como commuter. * Aunke nan mester a haci varios cambio den nan bida pa logra esey, nan ta sinti cu e sacrificionan tabata bale la pena. Debra a bisa di su trabou na Betel: “Tin biaha mi ta sinti comosifuera mi ta den un di e escenanan di Paradijs di nos publicacionnan cu ta mustra con nos rumannan ta traha cas.”

Melvin cu Sharon a bende nan cas y nan pertenencianan na South Carolina pa nan por a bay traha na Warwick. Aunke no tabata facil pa haci e sacrificionan ey, nan ta sinti cu ta un privilegio pa por yuda cu un proyecto historico asina. Nan a bisa: “Bo ta sinti bo hopi bon, pasobra bo sa cu bo ta logrando algo cu lo beneficia bo rumannan rond mundo.”

Kenneth

Kenneth, un contratista pensiona, cu su casa Maureen, tin rond di 55 aña. Nan a muda for di California pa bin traha riba e proyecto di Warwick. Pa nan por a haci esey, nan a laga un ruman muher den congregacion cuida nan cas y nan a pidi nan famianan tira bista riba e tata di Kenneth cu ya tabata basta grandi. Acaso ta duel nan cu nan mester a haci sacrificio pa sirbi na Betel? No! Kenneth a bisa: “Nos ta sacando hopi beneficio. Ta claro cu nos ta haya nos cu cierto desafio, pero nos ta hibando un bida cu ta duna nos hopi satisfaccion, y di curason nos ta recomenda tur ruman cu por pa purba e tipo di sirbishi aki.”

CON PA SUPERA OBSTACULO

Mayoria di ruman cu a ofrece nan mes pa yuda tabatin cu supera cierto obstaculo. Por ehempel, William cu Sandra, kendenan ta riba 60 aña, tabata disfruta di un bida comodo na Pennsylvania. Nan tabatin un compania di traha pieza di mashin cu tabatin 17 trahador y cu tabata bay bon. Nan tabata sirbi den e congregacion caminda nan a lanta for di chikito, y mayoria di nan famianan tabata biba den e area ey. Pues, ora e oportunidad a presenta pa nan sirbi como commuter na Wallkill, nan tabata sa cu  esey lo a nifica yama tur hende ayo, si, tur loke nan tabata custumbra cu ne nan mester a laga atras. William ta reconoce cu esey tabata e reto di mas grandi pa nan. Pero despues di a haci hopi oracion, e pareha a dicidi di muda toch, y esey ta un paso cu nan no ta lamenta. William a bisa: “No tin nada cu bo por compara cu e goso di por forma parti di algo asina y di sirbi hunto cu e famia di Betel. Ami cu Sandra ta mas feliz cu nunca!”

Algun di e parehanan cu ta traha na Wallkill

Ricky cu tabata un director di proyectonan di construccion na Hawai, a haya un invitacion pa bin yuda cu e proyecto di Warwick como commuter. Su casa, Kendra, tabata kier p’e acepta e invitacion. Pero nan tabatin un preocupacion grandi: ki efecto e cambio aki lo tin riba nan yiu homber Jacob di 11 aña. Nan tabata puntra nan mes si lo ta sabi pa e famia bay biba na e estado di New York y si nan yiu homber lo por a adapta su mes na e ambiente totalmente diferente ey.

Ricky a conta: “Un di nos prioridadnan tabata pa haya un congregacion cu hobennan spiritualmente fuerte. Nos tabata kier pa Jacob tin bon asociacion.” Pero finalmente, e congregacion cu nan a bay tabatin poco mucha pero varios betelita. Ricky a sigui conta: “Despues di nos prome reunion eynan, mi a puntra Jacob kico e tabata pensa di e congregacion nobo, ya cu no tabatin ningun mucha di su edad. E di cu mi: ‘Papi, no worry. E mucha hombernan di Betel lo ta mi amigonan.’”

Jacob cu su mayornan a cera amistad cu e betelitanan di nan congregacion

Y asina a sosode. E betelitanan hoben a cera amistad cu Jacob. Cu ki resultado? Ricky a conta: “Un anochi, mi a pasa banda di e camber di mi yiu y mi a mira cu e luz ta cendi ainda. Mi a kere cu lo mi a gar’e ta hunga video game, luga ta Bijbel e tabata lesa. Ora mi a puntr’e ta kico e ta haciendo, el a bisa mi: ‘Mi ta un betelita hoben, y mi ta bay lesa e Bijbel den un aña.’” Di mes Ricky cu Kendra ta hopi contento, no solamente pasobra Ricky por participa den e trabou di construccion na Warwick, sino tambe pasobra e decision cu nan a tuma pa muda tin un bon efecto riba e spiritualidad di nan yiu.—Prov. 22:6.

NAN TA LAGA NAN FUTURO DEN JEHOVA SU MAN

Luis y Dale

Cu tempo, e proyectonan di construccion na Wallkill y Warwick lo termina. Pues, e rumannan cu nan a invita pa bin yuda sa cu nan sirbishi di Betel tambe lo yega na su fin. Acaso nan ta preocupa y ta puntra nan mes kico nan lo haci of unda nan lo bay despues? Niun rato so! Hopi di nan ta sinti mescos cu dos pareha di Florida cu tin 50 y pico aña. John,  un manager di un compania di construccion, cu su esposa, Carmen, ta sirbi como boluntario temporal na Warwick. Nan a bisa: “Te cu awor nos a mira con Jehova a duna nos tur loke nos tabatin mester. Pues, nos tin sigur cu Jehova no a trece nos te aki, pa despues e bandona nos.” (Sal. 119:116) Luis kende ta diseña sistema di sprinkler pa paga candela, y su esposa, Quenia, ta sirbi na Wallkill. Nan a bisa: “Nos a mira caba con Jehova su man generoso a satisface tur nos necesidadnan material. Aunke nos no sa con, ki ora ni na unda, nos tin sigur cu lo e sigui percura pa nos.”—Sal. 34:10; 37:25.

 “ASINA TANTO BENDICION, CU BOSO LO NO TIN SUFICIENTE LUGA PA CONTEN’E”

John y Melvin

Mayoria di ruman cu a ofrece nan mes pa yuda cu e trabou di construccion na New York lo por a haya suficiente motibo pa no bin yuda. Pero nan a pone Jehova na prueba, manera e ta invita nos pa haci: “Pone mi na prueba [y wak] si mi lo no habri pa boso e bentananan di cielo, y basha asina tanto bendicion, cu boso lo no tin suficiente luga pa conten’e.”—Mal. 3:10.

Kico di abo? Bo tambe lo pone Jehova na prueba y wak con e ta bendiciona bo ricamente? Haci oracion y analisa si bo por yuda, sea na New York of na cualkier otro proyecto di construccion teocratico. Si bo haci esey, lo bo mira con Jehova ta recompensa bo.—Mar. 10:29, 30.

Gary

Dale cu Cathy, di Alabama, sinceramente ta recomenda e tipo di sirbishi aki. Dale ta un ingeniero civil, y nan ta sirbiendo na Wallkill. Nan a bisa: “Si bo tin e curashi di purba algo nobo, algo cu bo no ta custumbra di haci, lo bo haya e oportunidad di mira con e spirito di Jehova ta obra.” Awor, kico bo tin cu haci si bo kier ofrece bo mes? Dale a bisa: “Simplifica, simplifica y, despues, simplifica un poco mas. Hamas lo bo lamenta esey!” Gary, di North Carolina, a traha 30 aña como supervisor den trabou di construccion. E cu su casa, Maureen, a bisa cu un di e bendicionnan cu nan ta disfruta di dje na Warwick ta cu nan ta “haya chens di cera conoci y traha cu hopi ruman excelente, kendenan a pasa casi henter nan bida ta sirbi Jehova na Betel.” Gary a agrega: “Pa sirbi na Betel, bo tin cu hiba un bida simpel, y esey ta e mihor manera di biba den e mundo aki.” Jason, kende tabata traha pa un contratista cu ta instala sistemanan di coriente, y su esposa, Jennifer, di Illinois, ta bisa cu traha na Wallkill riba un proyecto di Betel ta “echt duna bo un idea con bida lo ta den e mundo nobo.” Jennifer a agrega: “Ta masha emocionante pa sinti cu Jehova ta aprecia tur loke bo ta haciendo y cu esey ta manera un inversion pa e futuro cu e ta preparando pa nos. Ademas, Jehova ta percura pa bo ser recompensa ricamente.”

^ par. 6 Wak e Anuario de los testigos de Jehová 2014, pagina 12 pa 13.

^ par. 7 Rumannan cu ta part-time commuter ta traha un of mas dia pa siman na Betel, pero nan tin nan propio fuente di entrada y ta biba pafo di Betel.