Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2015

Laga Jehova Fortalece y Proteha Boso Matrimonio

Laga Jehova Fortalece y Proteha Boso Matrimonio

“Si SEÑOR no warda e stad, ta envano e guardia ta keda lanta.”—SAL. 127:1b.

1, 2. (a) Dicon 24.000 Israelita a perde nan herencia maraviyoso? (b) Kico nos ta siña for di e suceso ey?

UN POCO prome cu e nacion di Israel a drenta e Tera Priminti, miles di homber Israelita a comete inmoralidad sexual cu “e yiu muhernan di Moab.” Como resultado, Jehova a ehecuta 24.000 Israelita. E hombernan ey a warda asina tanto tempo pa ricibi nan herencia, y ora cu nan tabata a punto di hay’e, nan a perde tur e bendicionnan maraviyoso ey pasobra nan a cay den tentacion y a comete inmoralidad. Tristo, no?—Num. 25:1-5, 9.

2 E ehempel ey “a ser skirbi como spiertamento pa nos cu ta biba na final di e tempo aki.” (1 Cor. 10:6-11) Awe, den e fase final di “e ultimo dianan”, e sirbidornan di Dios ta a punto di drenta e mundo nobo. (2 Tim. 3:1; 2 Ped. 3:13) Pero, lamentablemente algun sirbidor di Jehova no a keda alerta y a cay den e trampa di inmoralidad. Y awor nan ta cosecha e consecuencianan amargo di nan conducta inmoral, y si nan no arepenti, nan por hasta perde e oportunidad di biba pa semper den Paradijs riba Tera.

3. Dicon parehanan casa tin mester di e guia y proteccion di Jehova? (Wak e prome plachi.)

3 E mundo di awe ta obsesiona cu sex, y pesey rumannan casa  tin mester di Jehova su guia y proteccion pa proteha nan matrimonio. (Lesa Salmo 127:1.) Den e articulo aki nos lo analisa con un pareha por fortalece nan matrimonio. Nan tin cu (1) proteha nan curason, (2) hala cerca Dios, (3) cultiva e personalidad nobo, (4) mantene bon comunicacion cu otro y (5) satisface e necesidadnan emocional y sexual di otro.

PROTEHA BO CURASON

4. Kico a pone algun cristian comete inmoralidad?

4 Kico a pone algun cristian comete inmoralidad? Hopi biaha e problema ta cuminsa cu un hende su wowo. Hesus a splica: “Ken cu sigui wak un muher cu pasion, ya caba a comete adulterio cu ne den su curason.” (Mat. 5:27, 28; 2 Ped. 2:14) Hopi ruman cu a cay den e trampa di inmoralidad a baha nan normanan moral door di wak pornografia, lesa bukinan erotico of wak cosnan moralmente indecente riba Internet. Otronan tabata wak peliculanan, obranan teatral of programanan di television cu ta pasa escenanan di sex abiertamente. Y algun hasta a bishita nightclubnan, shownan caminda hende ta kita sunu of luganan pa haya masashi erotico.

5. Dicon nos tin cu proteha nos curason?

5 Ademas, tin cristian cu a cay den tentacion pasobra nan a busca atencion cerca un persona cu no ta nan casa. Nos ta biba den un mundo caminda tur cos mag y hende ta busca pa satisface tur nan impulsonan sexual. Pues ta masha facil pa nos curason traicionero y desespera pone nos haya sintimentonan romantico pa un hende cu no ta nos casa. (Lesa Jeremias 17:9, 10.) Hesus a spierta: “For di curason ta sali pensamento malicioso, matamento, adulterio, fornicacion.”—Mat. 15:19.

6, 7. (a) Kico por sosode si nos laga deseo inapropia desaroya den nos curason? (b) Con nos por evita di cay den inmoralidad sexual?

6 Unabes deseo inapropia desaroya den curason traicionero di dos persona cu ta gusta otro, nan lo por cuminsa papia tocante asuntonan cu eigenlijk ta cu nan casa so nan mester papia. Lo no dura hopi pa nan cuminsa busca mas y mas excuus pa topa otro y pa pasa tempo hunto. Kisas nan ta pretende cu nan a topa otro pa puro casualidad. Pero, pocopoco, nan ta haya mas sintimento pa otro, y nan normanan moral ta baha y ta bira mas dificil pa nan haci loke ta corecto. Mas intimo nan relacion bira, mas dificil ta pa nan stop, a pesar cu nan sa cu loke nan ta haci ta malo.—Prov. 7:21, 22.

7 Pocopoco nan ta lubida completamente riba e normanan moral di Jehova. Y loke a cuminsa como un combersacion inocente a bira mucho mas: tenemento di man, sunchimento, cariciamento y mishimento di otro na un manera cu ta stimula deseo sexual. Pero tur e tipo di expresionnan di cariño ey ta cosnan cu un persona tin mag di haci solamente cu su casa. Al final, cada un di nan ta “ser atrai y seduci [of, “captura comosifuera cu as”, nota, NW] pa su mes deseo.” Dado momento, nan deseo ta bira asina intenso cu e ta “duna luz na pica”: Nan ta comete inmoralidad sexual. (Sant. 1:14, 15) Esta un final tristo! E dos personanan ey por a evita tur esaki si nan a laga Jehova proteha nan matrimonio. Jehova ta siña nos respeta matrimonio como un union sagrado. Pero con nos por desaroya e respet ey?

HALA CERCA DIOS

8. Con nos amistad cu Jehova ta proteha nos contra inmoralidad?

8 Lesa Salmo 97:10. Amistad cu Jehova  ta un proteccion contra inmoralidad. Mas nos siña tocante Jehova su bunita cualidadnan y purba di imit’e “como yiunan stima, y sigui cana den amor”, mas facil lo ta pa nos rechasa ‘fornicacion y tur sorto di impureza.’ (Efe. 5:1-4) Parehanan casa sa cu “Dios lo husga esnan cu ta comete fornicacion y adulterio.” Pesey nan tin cu haci nan maximo esfuerso pa keda fiel na otro.—Heb. 13:4.

9. (a) Dicon Jozef por a resisti tentacion inmoral? (b) Kico nos por siña for di e ehempel di Jozef?

9 Algun cristian a baha nan normanan moral door cu nan a cuminsa asocia despues di ora di trabou cu coleganan cu no ta Testigo. Otro rumannan a haya nan cu tentacion na trabou mes. Esey ta loke a pasa cu e hoben Jozef. Mientras cu e tabata traha, el a ripara cu e casa di su doño tabata gust’e. Dia aden dia afo, e muher tabata purba di convenc’e pa drumi cu ne. Finalmente, “e muher a coge Jozef tene na su paña, bisando: ‘Drumi cu mi!’” Pero Jozef a nenga y a core bay lag’e. Kico a yuda Jozef resisti e tentacion ey y keda fiel na su principionan? Wel, e tabata determina pa no daña su amistad cu Dios, y esey a proteha su pureza y integridad. Su posicion firme a pon’e perde su trabou y el a ser encarcela inhustamente, pero Jehova a bendicion’e. (Gen. 39:1-12; 41:38-43) Sea ta na trabou of cualkier otro caminda, nos tin cu evita situacionnan cu por pone nos cay den tentacion y bira infiel na nos casa.

CULTIVA E PERSONALIDAD NOBO

10. Con e personalidad nobo ta proteha un matrimonio?

10 E personalidad nobo, “cu a ser crea segun e boluntad di Dios den berdadero husticia y lealtad”, ta proteha un pareha casa pa no comete inmoralidad sexual. (Efe. 4:24) Esnan cu bisti e personalidad nobo aki ta “mata”, na moda di papia, nan mal inclinacionnan. Con asina? Den e sentido cu nan ta lucha contra di practicanan manera “fornicacion, impureza, pasion [descontrola], mal deseo y golosidad.” (Lesa Colosensenan 3:5, 6.) Aki e palabra “mata” ta indica cu nos mester tuma medidanan drastico pa domina deseonan sexual inapropia. Nos lo evita tur loke por lanta deseo sexual pa un persona cu no ta nos casa. (Job 31:1) Ora nos ta biba segun e normanan di Dios, nos ta siña “odia loke ta malo” y “pega na loke ta bon.”—Rom. 12:2, 9.

11. Con e personalidad nobo por fortalece un matrimonio?

11 Ora nos bisti e personalidad nobo, nos ta refleha e cualidadnan di Jehova Dios. (Col. 3:10) Ora un esposo y esposa cultiva “tierno compasion, bondad, humildad, suavidad y pasenshi”, nan matrimonio lo bira fuerte y Jehova lo bendiciona nan. (Col. 3:12) Tambe nan lo biba den paz y harmonia si nan “laga e paz di Cristo reina den [nan] curason.” (Col. 3:15) Y un pareha cu tin “tierno cariño pa otro” lo “tuma e iniciativa” pa duna otro atencion y respet.—Rom. 12:10.

12. Ki cualidadnan abo ta haya ta importante pa un matrimonio feliz?

12 Ora a puntra un pareha cua ta e cualidadnan cu ta yuda haci nan matrimonio feliz, Sid, e esposo, a contesta: “E cualidad principal cu semper nos ta trata di cultiva ta amor. Y nos a ripara cu suavidad tambe ta masha importante.” Su casa, Sonja, tabata di acuerdo cu ne y a agrega: “Sin duda, amabilidad tambe ta un cualidad esencial. Y nos tur dos ta purba di ta humilde, maske esey no ta facil tur ora.”

 MANTENE BON COMUNICACION CU OTRO

13. Kico ta un factor clave pa un matrimonio stabiel, y dicon?

13 Parehanan cu ta papia cu otro na un manera cariñoso ta haci nan matrimonio mas stabiel. Esey sigur ta un factor clave. Lamentablemente, tin esposo of esposa ta mustra mas respet ora cu nan ta papia cu hende straño cu ora nan ta papia cu nan mes casa. Y algun hasta ta trata nan bestianan di cas mihor cu nan casa. Figura bo! Ora den un matrimonio tin “amargura malicioso, rabia, furia, gritamento y papiamento di cos ofensivo”, esey ta debilita nan relacion. (Efe. 4:31) Pues, en bes di debilita nan relacion door di critica otro y duna comentarionan sarcastico constantemente, nan tin cu fortalece nan matrimonio door di papia cu otro na un manera cariñoso, tierno y compasivo.—Efe. 4:32.

14. Kico nos mester evita di haci?

14 Comunicacion ta importante pa un bon matrimonio. Ta berdad cu Bijbel ta bisa cu tin “un tempo pa keda keto.” (Ecl. 3:7) Pero esey no kiermen cu bo tin cu ignora otro, y stop di papia cu otro. Un esposa na Alemania a bisa: “Bou di e circunstancia ey, silencio por hurt bo casa.” Y el a agrega: “Aunke no ta semper facil pa keda trankil bou di stress, no ta bon tampoco pa bo perde cabes. Lo bo por bisa of haci algo sin pensa cu por hurt bo casa, y esey simplemente ta haci e situacion pio.” Parehanan no ta resolve nan problemanan si nan ta grita otro of keda sin papia cu otro. Na luga di esey, nan por fortalece nan relacion si nan ta resolve desacuerdonan di biaha pa esey no bira pleitonan cu no tin fin di caba.

15. Con bon comunicacion por fortalece un matrimonio?

15 Un matrimonio ta bira mas fuerte tambe ora un pareha ta tuma tempo pa comparti nan sintimento y opinion cu otro. Pero corda cu e manera cu nos ta bisa algo ta mes  importante cu e cos cu nos ta bisa. Pesey, hasta den situacionnan dificil, haci esfuerso pa papia na un manera bondadoso y pa papia cu un tono amabel. Ta mas facil e ora ey pa bo casa scucha bo. (Lesa Colosensenan 4:6.) Un pareha por fortalece nan matrimonio si nan ta papia “solamente loke ta bon pa edifica segun e necesidad di e momento, pa ... comparti loke ta probechoso” cu nan casa.—Efe. 4:29.

Un pareha por fortalece nan matrimonio door di tin bon comunicacion cu otro (Wak paragraf 15)

SATISFACE E NECESIDADNAN EMOCIONAL Y SEXUAL DI OTRO

16, 17. Dicon ta importante pa parehanan casa ta atento pa e necesidadnan emocional y sexual di otro?

16 Parehanan por edifica un matrimonio fuerte tambe ora nan ta mas preocupa pa satisface e necesidadnan di nan casa cu esnan di nan mes. (Flp. 2:3, 4) Tanto esposo como esposa mester ta atento pa e necesidadnan emocional y sexual di nan casa.—Lesa 1 Corintionan 7:3, 4.

17 Lamentablemente, tin casa no ta cariñoso cu nan pareha of no ta expresa ternura den nan relacionnan intimo. Algun hende homber ta pensa cu ta hombernan debil so ta tierno y suave cu nan casa. Pero Bijbel ta bisa: “Esposonan, biba cu boso esposanan cu comprension.” (1 Ped. 3:7BS) Un esposo tin cu compronde cu pa e satisface e necesidadnan emocional y sexual di su casa no ta basta p’e djis tene relacion sexual cu ne. E esposa lo disfruta mas di relacion sexual cu su casa si tur otro ora e esposo ta cariñoso cu ne y ta mustra cu e ta stim’e. Ora tur dos ta tene cuenta cu otro y ta demostra amor y cariño, lo ta mas facil pa nan satisface otro emocional- y fisicamente.

18. Con esposo y esposa por fortalece nan laso matrimonial?

18 No tin ningun excuus pa un hende ta infiel na su casa, pero falta di ternura por pone un esposo of esposa bay busca cariño cerca un otro persona y tene relacion sexual cu ne. (Prov. 5:18; Ecl. 9:9) Pesey Bijbel ta conseha parehanan casa pa “no nenga di cumpli cu e deber ey [di satisface necesidad di otro]” a menos cu ta cu consentimento di otro pa un tempo so. Dicon? “Pa Satanas no laga boso kai den piká en kaso ku boso no tin dominio propio [BPK].” (1 Cor. 7:5) Lo ta hopi tristo si un pareha mester laga Satanas probecha di nan falta di “dominio propio” y pone un di nan cay den tentacion y comete adulterio. Di otro banda, si en bes di busca nan “mes beneficio”, nan ta busca “esun di e otro persona” y satisface su necesidadnan emocional y sexual como muestra di nan amor y no como un deber, nan lo fortalece nan laso matrimonial.—1 Cor. 10:24.

SIGUI FORTALECE BOSO MATRIMONIO

19. Nos mester ta determina pa haci kico, y dicon?

19 E mundo nobo ta den porta. Pues, no ta e momento pa cay den tentacion, ya cu esey por resulta mes fatal pa nos cu e tabata pa e 24.000 Israelitanan riba e Sabananan di Moab. Despues di describi e suceso bergonsoso y lamentabel ey, Bijbel ta spierta nos: “Laga esun cu ta kere cu e ta para, tene cuidou pa e no cay.” (1 Cor. 10:12) Pues, ta hopi importante pa nos proteha nos matrimonio y keda fiel na Jehova y na nos casa. (Mat. 19:5, 6) Awor, mas cu nunca, nos tin cu ‘haci tur nos esfuerso pa Dios haya nos finalmente sin mancha, sin defecto y na paz.’—2 Ped. 3:13, 14.