Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2015

Dicon Nos Ta Conmemora e Cena di Señor?

Dicon Nos Ta Conmemora e Cena di Señor?

“Sigui haci esaki na mi memoria.”1 COR. 11:24.

1, 2. Kico Hesus a haci e anochi di 14 di nisan di aña 33? (Wak e prome plachi.)

TABATA e anochi di 14 di nisan di aña 33, y luna yen tabata ilumina Jerusalem. Hesus cu su apostelnan a caba di celebra e Pasco Hudiu pa conmemora con Jehova a libra Israel for di Egipto un 1.500 aña prome. Despues di esey, Hesus a establece un cena special cu su 11 apostelnan fiel pa conmemora su morto; e tabata sa cu lo e muri prome cu e dia ey termina. *Mat. 26:1, 2.

2 Hesus a haci un oracion, despues el a pasa e pan sin zuurdeeg pa e apostelnan y a bisa nan: “Tuma, come.” Despues, el a coy un copa di biña, bolbe gradici Dios y bisa nan: “Boso tur bebe for di dje.” (Mat. 26:26, 27) Hesus no a duna nan nada mas di come ni di bebe despues di esaki, pero el a papia si di hopi cos importante cu nan durante e anochi historico ey.

3. Ki preguntanan e articulo aki lo contesta?

3 Asina Hesus a establece e Conmemoracion anual di su morto cu Bijbel ta yama tambe “e Cena di Señor.” (1 Cor. 11:20)  Algun pregunta cu ta surgi relaciona cu esey ta: Pakico nos tin cu conmemora e morto di Hesus? Kico e pan y e biña ta representa? Con nos por prepara nos mes pa e Conmemoracion di Hesus su morto? Ken mester come e pan y bebe di e biña? Y con cristiannan ta mira nan speransa?

PAKICO NOS TA CONMEMORA E MORTO DI HESUS?

4. Kico Hesus a logra cu su morto?

4 Como descendiente di Adam, nos a hereda pica y morto. (Rom. 5:12) No tin niun hende imperfecto cu por duna Dios un rescate pa libra su mes of pa libra otro hende. (Sal. 49:6-9) Sinembargo, ora Hesus a muri, el a ofrece un rescate cu Dios por a acepta: Hesus su curpa perfecto y su sanger. El a entrega su bida pa nos y a presenta e balor di e rescate ey na Dios. Kico el a logra cu esey? Cu nos por ser libra for di pica y morto y haya bida eterno.—Rom. 6:23; 1 Cor. 15:21, 22.

5. (a) Kico ta mustra cu Dios y Cristo ta stima nos? (b) Pakico nos mester ta presente na e Conmemoracion di e morto di Hesus?

5 Dios a demostra su amor pa hende ora el a entrega su Yiu como e rescate. (Juan 3:16) Hesus tambe a demostra cu e ta stima nos ora el a entrega su bida como un sacrificio pa nos. For di prome cu Hesus a bin na Tera, tempo cu e tabata sirbi como Dios su “trahador experto”, su “delicia tabata den e yiunan di hende.” (Prov. 8:30, 31) Esta agradecido nos ta pa loke Jehova y su Yiu a haci pa nos! Esey ta motiva nos pa ta presente na e Conmemoracion di e morto di Hesus y asina obedece su instruccion pa ‘sigui haci esaki na mi memoria.’—1 Cor. 11:23-25.

KICO E PAN Y E BIÑA TA REPRESENTA?

6. Con nos mester mira e pan y e biña di e Conmemoracion?

6 Ora Hesus a establece e Conmemoracion, e no a haci un milager y cambia e pan y e biña den su carni y su sanger literal. El a bisa di e pan: “Esaki ta representa mi curpa.” Y el a bisa di e copa di biña: “Esaki ta representa mi ‘sanger di e pacto’, cu lo mi drama pa hopi hende.” (Mar. 14:22-24) Ta bisto anto cu nos mester mira e pan y e biña simplemente como emblema.

7. Kico e pan sin zuurdeeg ta representa?

7 E anochi sumamente importante ey di aña 33, Hesus a uza e pan sin zuurdeeg cu a resta di e cena di Pasco Hudiu. (Exo. 12:8) Tin biaha Bijbel ta uza zuurdeeg pa representa pica. (Mat. 16:6, 11, 12; Luc. 12:1) Pues, Hesus a uza pan sin zuurdeeg pasobra esey apropiadamente a representa su curpa sin pica. (Heb. 7:26) Ta pesey nos tambe ta uza pan sin zuurdeeg na e Conmemoracion.

8. Kico e biña ta representa?

8 E biña cu Hesus a uza dia 14 di nisan di aña 33 a representa su sanger, of bida, y mescos ta conta pa e biña cu nos ta uza awe na e Conmemoracion. El a muri na Golgota, un luga pafo di Jerusalem, y a drama su sanger pa “pordon di pica di hopi hende.” (Mat. 26:28; 27:33) Pues, e pan y e biña ta simbolisa e sacrificio cu Hesus a ofrece na fabor di humanidad obediente. Si realmente nos ta aprecia e regalo precioso ey, nos lo prepara nos mes pa conmemora e Cena di Señor tur aña.

ALGUN MANERA PA PREPARA NOS MES PA E CONMEMORACION

9. (a) Pakico ta importante pa nos sigui e programa di lesamento di Bijbel di e Conmemoracion? (b) Kico e rescate ta nifica pa bo?

9 Con nos por prepara nos mes pa e Conmemoracion? Un manera cu nos por prepara nos mes ta door di sigui e programa di lesamento di Bijbel cu tin den e foyeto Analisá e Skritura Tur Dia. Segun cu  nos ta lesa e relatonan di Bijbel, nos por medita riba loke Hesus a haci un poco prome cu su morto. * Un ruman muher a skirbi: “Nos ta spera ansiosamente pa e Conmemoracion yega. Cada aña cu pasa, e ta bira mas special. Mi ta corda cu mi a cuminsa sinti un aprecio profundo pa e rescate ... na momento cu mi tabata na e funerario y tabata mira mi kerido tata difunto ... Ta berdad cu mi tabata sa tur e textonan relaciona cu e tema ey y mi por a splica nan bon bon. Pero, ta ora mi a sinti e dolor cu morto di mi tata a causa mi, mi a bin compronde realmente kico e rescate precioso lo logra pa nos, y esey tabata un gran consuelo pa mi.” Pesey, ora nos ta prepara pa e Conmemoracion, ta bon pa nos reflexiona riba e manera cu e sacrificio di Hesus lo libra nos for di e castigo di pica y morto.

Sigui e programa di lesamento di Bijbel pa Memorial pa asina prepara bo curason pa e Conmemoracion (Wak paragraf 9)

10. Kico mas nos por haci pa prepara nos mes pa e Conmemoracion?

10 Un otro manera cu nos por prepara nos mes pa e Conmemoracion ta door di aumenta nos actividad di sirbishi, kisas trahando como pionero auxiliar durante temporada ey. Nos por purba di invita mas tanto hende posibel pa bin na e Cena di Señor. Nos lo sinti un goso ora nos ta papia tocante Jehova, tocante su Yiu y tocante e bendicionnan cu ta spera hende cu ta agrada Jehova y ta alab’e.—Sal. 148:12, 13.

11. Con algun ruman di Corinto a tuma di e emblemanan di e Conmemoracion na un manera indigno?

11 Segun cu nos ta prepara nos mes pa e Cena di Señor, ta bon pa medita riba loke apostel Pablo a skirbi e congregacion cristian na Corinto. (Lesa 1 Corintionan 11:27-34.) Pablo a bisa cu si un hende come e pan of bebe di e biña na un manera indigno, e ta “culpabel pa loke ta e curpa y e sanger di Señor.” Pues, prome cu un persona ungi tuma di e pan y e biña, e mester “samina su mes cuidadosamente” y haci sigur cu Dios ta aproba su comportacion. Pasobra si no ta asina, y toch e tuma di e emblemanan, e ora ey e “ta come y bebe condenacion contra su mes.” Debi na comportacion inapropia, hopi di e cristiannan di Corinto tabata “debil y malo, y  basta a bay sosega [den morto spiritual].” Kisas algun di nan a come y bebe asina tanto prome of durante e Conmemoracion cu nan no tabata alerta, ni den sentido spiritual ni mental. Nan a mustra falta di respet pa e ocasion, y pesey nan no tabatin e aprobacion di Dios ora nan a tuma di e emblemanan.

12. (a) Cu kico Pablo a compara e Conmemoracion, y ki spiertamento el a duna e rumannan cu ta tuma di e pan y e biña? (b) Si un ruman cu ta tuma di e pan y e biña a comete un pica serio, kico e mester haci?

12 Pablo a compara e Conmemoracion cu un comemento cu varios invitado, y el a spierta esnan cu tabata come: “Boso no por ta bebe di e copa di Jehova y di e copa di demoño; boso no por ta come na ‘e mesa di Jehova’ y na e mesa di demoño.” (1 Cor. 10:16-21) Si un ruman cu ta tuma di e pan y e biña na e Cena di Señor a comete un pica serio, e mester bay cerca e ancianonan pa haya yudansa spiritual. (Lesa Santiago 5:14-16.) Den caso cu e persona ungi ey a ‘produci fruta cu ta mustra cu el a arepenti’, e ora ey lo e no ta demostrando un falta di respet pa e sacrificio di Hesus si e tuma di e pan y e biña.—Luc. 3:8.

13. Pakico ta bon pa nos haci oracion tocante e speransa cu Dios a duna nos?

13 Lo ta bon tambe pa ora nos ta prepara nos mes pa e Conmemoracion, nos medita hunto cu oracion pa haci sigur di e speransa cu Dios a duna nos. Niun sirbidor dedica di Jehova y fiel siguidor di su Yiu lo no kier tuma di e emblemanan di e Conmemoracion sin cu e tin prueba convencente cu e ta un cristian ungi. Esey lo ta un falta di respet pa e sacrificio di Hesus. Pero, con un persona por determina si e tin cu tuma di e emblemanan of no?

KEN LO MESTER TUMA DI E PAN Y E BIÑA?

14. Ken tin mag di tuma di e pan y e biña na e Conmemoracion?

14 E rumannan cu ta tuma di e pan cu e biña ta completamente convenci cu nan ta forma parti di e pacto nobo. Hesus a bisa di e biña: “E copa aki ta representa e pacto nobo a base di mi sanger.” (1 Cor. 11:25) Via profeta Jeremias, Dios a bisa cu lo e cera un pacto nobo cu tabata diferente for di e pacto di Ley cu el a cera cu e Israelitanan. (Lesa Jeremias 31:31-34.) Dios a cera e pacto, of alianza, nobo aki cu e unginan, e Israel spiritual. (Gal. 6:15, 16) E sacrificio di Hesus a haci e pacto aki valido mediante e sanger cu el a drama. (Luc. 22:20) Hesus ta e Mediador di e pacto nobo, y e unginan leal cu ta den e pacto nobo lo ricibi un herencia celestial.—Heb. 8:6; 9:15.

15. Ken ta den e pacto di Reino, y si nan keda fiel, ki privilegio nan lo tin?

15 E unginan sa cu nan ta forma parti tambe di e pacto di Reino. (Lesa Lucas 12:32.) Hesus a cera e pacto aki cu su siguidornan fiel cu a keda hunto cu ne y cu tambe a “sufri mescos cu ne.” (Flp. 3:10) Y debi na e pacto di Reino aki, tur ungi fiel lo reina hunto cu Cristo pa semper den cielo. (Rev. 22:5) Pesey ta na su luga cu e cristiannan aki ta tuma di e pan y e biña durante e Cena di Señor.

16. Duna un splicacion cortico kico Romanonan 8:15 pa 17 ta nifica.

16 Solamente e personanan cu tin e testimonio di spirito santo cu nan ta yiu di Dios tin mag di tuma di e emblemanan di e Conmemoracion. (Lesa Romanonan 8:15-17.) Tuma nota cu Pablo a uza e palabra Arameo “Abba”, cu ta un nomber di cariño cu un mucha lo a uza pa su tata y ta refleha tanto e cariño di e palabra “papi” como e respet di e palabra “tata.” Pues, e palabra “Abba” ta expresa e relacion special  cu e unginan tin cu Jehova despues cu nan a ricibi “un spirito di yiu adopta.” Jehova su spirito “ta duna testimonio hunto cu [nan] spirito”, di manera cu nan sa sigur cu nan ta su yiunan ungi. Esaki no kiermen cu nan ta djis perde smaak di biba riba Tera. Mas bien, nan ta sigur cu si nan keda fiel te na morto, nan lo ta rey den cielo hunto cu Hesus. Awe, ta un poco so di e 144.000 siguidornan di Cristo cu “a ser scogi pa Esun Santo”, Jehova, a keda riba Tera. (1 Juan 2:20; Rev. 14:1) Nan relacion cu Jehova ta asina bon cu nan por bis’e: “Abba, Tata!”

APRECIA BO SPERANSA

17. Ki speransa e unginan tin, y con nan sa cu nan ta ungi?

17 Si bo ta un cristian ungi, e speransa celestial lo ta un di e cosnan cu bo ta menciona frecuentemente den bo oracionnan personal. Y e Scritura lo tin un nificacion special pa bo. Por ehempel, ora Bijbel ta papia di e matrimonio den cielo entre Hesucristo y su “bruid”, bo sa cu esey ta aplica na bo y bo ta anhela pa e momento ey yega. (2 Cor. 11:2; Juan 3:27-29; Rev. 21:2, 9-14) Ora Jehova ta expresa su amor pa su yiunan spiritual den su Palabra, bo sa cu ta cu bo e ta papia. Y ora Bijbel ta duna instruccion na Dios su yiunan ungi, spirito santo ta motiva bo pa obedece e instruccionnan ey y bisa den bo curason: Esaki ta aplica na mi. Asina e spirito santo di Dios ta “duna testimonio” na bo cu bo tin e speransa di bay cielo.

18. Ki speransa e ‘otro carnenan’ tin, y kico bo ta pensa di esey?

18 Di otro banda, si bo ta forma parti di e “multitud grandi” di “otro carne”, Dios a duna bo e speransa di biba riba Tera. (Rev. 7:9; Juan 10:16) Sigur bo ta gusta medita riba loke Bijbel ta bisa tocante bida den Paradijs. Y bo ta spera ansiosamente pa disfruta di paz hunto cu bo famia y otro hendenan husto. Ademas, lo bo anhela pa e dia yega ora cu lo no tin hamber, pobreza, sufrimento, maleza ni morto mas. (Sal. 37:10, 11, 29; 67:6; 72:7, 16; Isa. 33:24) Y tambe lo bo ta ansioso pa yama bonbini na bo sernan keri cu lo resucita y cu lo tin e speransa di biba pa semper riba Tera. (Juan 5:28, 29) Siguramente, bo ta agradecido na Jehova pa e speransa maraviyoso aki. Aunke bo no ta tuma di e pan y e biña, bo ta asisti na e Conmemoracion pa mustr’e cu bo ta hopi agradecido pa e sacrificio di rescate di Hesucristo.

ABO LO T’EY NA E CONMEMORACION?

19, 20. (a) Kico bo tin cu haci pa bo speransa bira realidad? (b) Dicon lo bo no kier perde e Conmemoracion?

19 Sea cu bo speransa ta pa biba riba Tera of den cielo, esaki por bira realidad solamente si bo demostra fe den Jehova Dios, den Hesucristo y den e rescate. Na e Conmemoracion, lo bo tin oportunidad pa medita riba bo speransa y riba e importancia di e morto di Hesus. Pues, pone como meta pa bo ta un di e miyones di hendenan rond mundo cu lo asisti na e Cena di Señor. Esaki lo tuma luga na un Salon di Reino of na un otro luga, diabierna 3 di april 2015, despues cu solo baha.

20 Ora nos prepara nos mes pa asisti na e Conmemoracion cu un actitud corecto, nos lo ta mas agradecido ainda pa e sacrificio di rescate di Hesus. Si nos scucha e discurso di e Conmemoracion cu atencion, nos lo ser motiva pa mustra amor na nos prohimo y conta nan cuanto Jehova ta stima nos y kico ta su proposito pa nos. (Mat. 22:34-40) Pues, no perde e Cena di Señor!

^ par. 1 Pa e Hebreonan, un dia nobo a cuminsa ora solo baha y a termina cu e siguiente bahada di solo.

^ par. 9 Wak e foyeto Guia pa Studia e Palabra di Dios, seccion 16.