Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  December 2014

Pa Nos Por Sobrevivi, Nos Mester Ta Uni

Pa Nos Por Sobrevivi, Nos Mester Ta Uni

“Nos ta parti di un curpa.”EFE. 4:25.

1, 2. Con Dios kier pa nos tur ador’e?

BO TA un hoben cu ta forma parti di e hermandad mundial di testigonan di Jehova? Si ta asina, bo por tin sigur cu bo ta un persona masha valioso pa e congregacion cristian. Tur aña, un gran cantidad di hoben ta batisa rond mundo. Ta un goso pa mira asina tanto hoben uza nan bida pa sirbi Jehova!

2 Como hoben, casi sigur bo ta gusta pasa tempo hunto cu otro hobennan. Ta berdad cu nos ta sinti nos bon ora nos ta disfruta di momentonan agradabel hunto cu hende di nos edad. No obstante, sea cu nos ta hoben of hende di edad of sea loke sea nos rasa, cultura, posicion social of educacion, Dios kier pa nos ador’e hunto. Apostel Pablo a skirbi cu e boluntad di Dios ta pa “tur sorto di hende ser salba y yega na un conocemento exacto di e berdad.” (1 Tim. 2:3, 4) Ademas, Revelacion 7:9 ta mustra cu ta hende di “tur nacion, tribu, pueblo y idioma” ta adora Dios.

3, 4. (a) Ki actitud hopi hoben tin awendia? (b) Con Pablo a describi e congregacion cristian na Efesionan 4:25?

3 Tin un diferencia grandi entre e hobennan cu ta sirbi Jehova y otro hobennan. Hopi hoben cu no ta sirbi Jehova ta  pensa solamente riba nan mes y ta interesa unicamente den loke nan kier. Algun investigador a bisa cu awendia hobennan ta mas egoista cu nunca. E manera cu nan ta papia y loke nan ta bisti ta mustra cu nan no tin respet pa hende mas grandi cu nan; nan ta pensa cu e hendenan aki ta ouderwets.

4 Nos ta mira e actitud ey tur caminda. Pesey, hobennan cu kier agrada Jehova tin cu haci tur nan esfuerso pa evita e actitud ey. Den prome siglo tambe Pablo mester a spierta e cristiannan pa nan evita un actitud asina, cu el a describi como “e spirito cu awor ta obra den e yiunan di desobediencia.” (Lesa Efesionan 2:1-3.) Nos ta elogia nos hobennan cu ta haci caso di e spiertamento aki y cu ta traha hunto cu nan rumannan den congregacion. Nan actitud ta demostra cu nan ta compronde loke Pablo a bisa, esta, cu nos tur ta “parti di un curpa”, e congregacion cristian. Pues, nos mester traha den union cu otro. (Efe. 4:25) Y segun cu e fin di e mundo aki ta yega mas cerca, ta bira mas importante ainda pa nos ta uni. Awor, laga nos trata algun ehempel biblico cu lo yuda nos mira dicon ta asina importante pa nos ta uni.

NAN A KEDA UNI

5, 6. Kico nos por siña for di e relato di Lot y su yiu muhernan?

5 Den pasado, Jehova su sirbidornan a haya nan cu varios situacion dificil. Pero Jehova a yuda nan y a proteha nan ora nan tabata uni y a yuda otro. Pesey, Dios su sirbidornan di awe, sea cu nan ta hoben of di edad, nan sigur por siña un les for di e ehempelnan biblico aki. Laga nos trata e ehempel di Lot.

6 Lot y su famia tabata den peliger pasobra nan tabata biba den Sodoma, un stad cu tabata a punto di ser destrui. Algun angel di Dios a urgi Lot pa bandona e stad y busca refugio den e seronan. Nan a bis’e: “Huy pa bo salba bo bida.” (Gen. 19:12-22) Lot cu su dos yiu muhernan a obedece. Lamentablemente, otro miembronan di su famia si no a haci caso. Por ehempel, Lot su futuro yernonan a kere cu ta chansa, of wega, Lot tabata haci ora cu el a bisa nan cu nan mester a bandona e stad. Esey a costa nan nan bida. (Gen. 19:14) Lot cu su dos yiu muhernan so a sobrevivi, pasobra nan a obedece Dios y a keda uni.

7. Con e echo cu e pueblo di Dios tabata uni ora nan a sali for di Egipto a beneficia nan?

7 Laga nos wak un otro ehempel. Ora e Israelitanan a sali for di Egipto, nan no a haci esey den varios grupito independiente cu a coy nan mes rumbo. Y ora Jehova a parti e lama, Moises no a pasa meymey di e lama su so ni cu djis un par di Israelita. Mas bien, cu e proteccion di Jehova, henter e nacion a pasa hunto cu ne. (Exo. 14:21, 22, 29, 30) Y “un multitud di tur clase di hende” cu no tabata Israelita tambe a bay hunto cu nan. Nan tur a keda hunto como un solo grupo. (Exo. 12:38) Imagina bo cu un par di hende, por ehempel un grupo di hoben, lo a dicidi di scoge nan mes rumbo, kisas tumando un ruta cu nan a pensa tabata mihor. Esey sigur lo tabata algo bobo ya cu nan lo no tabatin e proteccion di Jehova.1 Cor. 10:1.

8. Con e pueblo di Dios a mustra cu nan tabata uni den tempo di Jehosafat?

8 Den tempo di Rey Jehosafat, e pueblo di Dios a haya nan cu un enemigo masha fuerte cu kier a ataca nan: “un multitud grandi” cu a bin for di luganan den cercania. (2 Cro. 20:1, 2) Con nan a reacciona? Wel, nan no a bay purba di vence nan enemigo riba nan mes forsa; mas bien, nan a confia den Jehova y a busca refugio  den dje. (Lesa 2 Cronicanan 20:3, 4.) Y nan no a haci esaki individualmente, cada persona na su manera. Bijbel ta bisa cu “henter Juda tabata para dilanti di SEÑOR, cu nan yiu chikitonan, nan esposanan y nan yiunan.” (2 Cro. 20:13) Si, henter e pueblo, tanto hoben como adulto, a keda hunto, a confia den Jehova y a sigui su guia. Y Jehova a proteha nan di nan enemigonan. (2 Cro. 20:20-27) Esaki ta un bon ehempel cu ta mustra con e pueblo di Dios por enfrenta oposicion como grupo!

9. Kico nos ta siña tocante union for di e cristiannan di prome siglo?

9 E cristiannan di prome siglo tambe a sirbi Dios hunto, den paz y harmonia. Por ehempel, hopi Hudiu y proselito cu a bira cristian tabata presta atencion na “siñansa di e apostelnan, na comparti tur loke nan tabatin cu otro, na come hunto y na haci oracion.” (Echo. 2:42) E union aki tabata specialmente bisto durante persecucion, na momentonan cu mas nan tabatin mester di otro. (Echo. 4:23, 24) Bo no ta di acuerdo cu ta hopi importante pa nos keda uni y coopera cu otro durante temponan critico?

LAGA NOS KEDA UNI SEGUN CU E DIA DI JEHOVA TA YEGA MAS Y MAS CERCA

10. Na ki tempo nos mester ta mas uni cu nunca?

10 Pronto, humanidad lo enfrenta un di e periodonan di mas scur di historia humano. Profeta Joel a describie como “un dia di scuridad y tiniebla.” (Joel 2:1, 2; Sof. 1:14) E tempo ey, e pueblo di Dios mester ta mas uni cu nunca. Hesus a bisa: “Tur reino cu ta dividi ta caba na nada.”Mat. 12:25.

11. Kico Salmo 122:3 y 4 ta siña nos tocante union? (Wak e prome plachi.)

11 Ora, e periodo scur aki cuminsa, nos mester ta realmente uni. Con asina? Wel, pa nos por haya un idea, ta bon pa analisa e manera cu e casnan di Jerusalem di antiguedad tabata construi. Nan tabata asina cerca di otro cu e salmista a describi Jerusalem como “un stad traha cu cas un riba otro.” Como cu e habitantenan tabata biba hopi cerca di otro, facilmente nan por a yuda otro y proteha otro y esey a laga nan sinti nan safe. Kisas ta e echo cu e casnan tabata asina cerca di otro a laga e salmista corda riba e union spiritual cu henter e nacion di Israel tabata disfruta di dje ora tur e tribunan tabata reuni pa adora Jehova hunto. (Lesa Salmo 122:3, 4.) Awe y durante e dianan dificil cu ta na caminda tambe ta masha importante pa e pueblo di Jehova keda hunto y uni.

12. Con nos por sobrevivi ora “Gog di tera di Magog” ataca e pueblo di Dios?

12 Awor, dicon ta asina importante pa nos ta uni durante e dianan dificil cu ta na caminda? Na Ezekiel capitulo 38, Bijbel ta profetisa cu e tempo ey “Gog di tera di Magog” lo ataca e pueblo di Jehova. E tempo ey, nos no mester laga nada causa division entre nos y siguramente nos lo no bay busca proteccion di e mundo aki. Mas bien, nos tin cu uni mas ainda cu otro. Claro cu nos lo no sobrevivi djis pasobra nos ta forma parti di un grupo. Cada un di nos individualmente tin cu demostra cu nos ta confia den Jehova y ta obedec’e. Si nos haci esey, Jehova y Hesus lo yuda nos sobrevivi e atake di Gog y drenta e mundo nobo. (Joel 2:32; Mat. 28:20) Pero kico di esnan cu separa nan mes for di e tou di Dios y coy nan mes rumbo? Nan lo ser salba?Mik. 2:12.

13. Ki les hobennan por siña for di loke nos a trata te asina leu?

13 Hoben, bo ta mira e peliger di aleha bo mes y sigui bo mes caminda manera hopi hoben sa haci? Nos ta acercando un  tempo den cua nos tur, tanto hoben como hende di mas edad, lo tin mester di otro. Pesey, awor ta tempo pa nos fortalece nos amistad cu nos rumannan y sirbi Jehova hunto den union, esaki ta vital pa nos por ser salba den futuro.

“NOS TA PARTI DI UN CURPA”

14, 15. (a) Cu ki proposito Jehova ta entrena tanto hoben como hende grandi awendia? (b) Ki conseho Jehova ta duna nos pa yuda nos keda uni?

14 Jehova ta yuda nos pa nos por “sirbie schouder cu schouder.” (Sof. 3:8, 9, NW) Si, e ta preparando nos pa futuro ora cu lo e cumpli cu su proposito pa “reuni tur cos atrobe den Cristo.” (Lesa Efesionan 1:9, 10.) Jehova kier pa tur su criaturanan, tanto esnan den cielo como esnan riba Tera, ta uni como un solo famia cu ta ador’e. Y no tin duda cu Jehova lo logra esaki. Y hobennan por forma parti di e famia ey pa semper. Kico di abo hoben? Bo ta mira e importancia di keda uni cu e organisacion di Jehova?

15 Jehova ta siña nos pa, for di aworaki, nos ta uni pa asina nos por biba na paz cu otro den e mundo nobo. Bes tras bes, e Scritura ta anima nos pa “preocupa pa otro”, pa “tene tierno cariño pa otro”, pa “sigui consola otro” y “fortalece otro.” (1 Cor. 12:25; Rom. 12:10; 1 Tes. 4:18; 5:11) Jehova sa cu nos ta imperfecto y cu esey por stroba nos di keda uni cu otro. Pesey, e ta urgi nos pa sigui “pordona otro libremente.”Efe. 4:32.

16, 17. (a) Kico ta un proposito di nos reunionnan? (b) Kico hobennan por siña for di e ehempel di Hesus?

16 Jehova ta uza nos reunionnan tambe pa yuda nos keda uni. Un di e propositonan di nos reunionnan ta loke Hebreonan 10:24 y 25 ta trece padilanti, esta, pa “stimula otro pa mustra amor y haci bon obra.” Tuma nota cu meta di nos reunionnan ta pa nos por “anima otro”, mucho mas ainda ora nos ta mira cu “e dia ta yega cerca.”

17 Hesus a pone un bon ehempel pa nos pasobra e tabata gusta reuni hunto cu e pueblo di Dios. Ora e tabatin 12 aña di edad, el a asisti na un reunion grandi den tempel hunto cu su mayornan. Pero na un dado momento, su mayornan a perd’e. Acaso el a bay asocia cu otro hobennan? No. Jose y Maria a hay’e den e tempel, papiando cu e maestronan tocante e Scritura.—Luc. 2:45-47.

18. Con oracion por fortalece nos union?

 18 Un otro manera cu nos por fortalece nos union ta door di haci oracion pa nos rumannan. Ora nos ta haci oracion specifico pa nan, nos ta keda consciente cu ta importante pa preocupa pa nos rumannan. Y no ta cristiannan maduro so mester stima nan rumannan, anima nan na reunion y haci oracion pa nan. Hoben, abo tambe ta haci e cosnan ey pa asina yuda fortalece e union den congregacion? Si ta asina, esey ta yuda bo keda mas uni cu bo rumannan y leu di e mundo di Satanas ora cu esaki yega na su fin.

Nos tur por haci oracion pa nos rumannan den fe (Wak paragraf 18)

SIGUI DEMOSTRA CU “NOS TA PARTI DI UN CURPA”

19-21. (a) Den ki situacion nos ta demostra mas ainda cu nos ta parti di un solo curpa? Duna algun ehempel. (b) Kico nos ta siña for di e manera cu nos rumannan ta yuda otro ora di desaster?

19 Tin hopi ehempel cu ta mustra cu awe tambe Jehova su pueblo “ta uni.” (Rom. 12:5) Nos ta mira evidencia cla di esaki durante tempo di calamidad. Na december 2011, un tormenta tropical a asota e isla Mindanao di Filipinas y causa inundacion pisa. Riba un solo anochi, mas cu 40.000 cas a keda inunda; entre esakinan tabatin casnan di nos rumannan tambe. E sucursal di e pais a bisa cu “prome cu nan comitenan di yudansa por a cuminsa cu nan trabou, ya rumannan di otro area a cuminsa manda yudansa” via sucursal.

20 Asina tambe, ora un temblor fuerte y despues un tsunami a asota e parti oost di Japon, e rumannan a sufri un gran perdida. Algun ruman a perde tur cos. Por ehempel, Yoshiko, un ruman muher cu tabata biba un 40 kilometer for di e Salon di Reino, a perde su cas completo. El a bisa: “Nos a keda sorprendi ora nos a haya sa cu e superintendente di circuito y un otro ruman homber a bin wak con a bay cu nos un dia despues di e temblor.” Cu un smile grandi riba su cara, Yoshiko a sigui bisa: “Nos a aprecia masha hopi con nos congregacion a percura na un manera excelente pa nos necesidadnan spiritual. Fuera di esey, nos a haya jas, sapato, tas y pidjama.” Un miembro di e comite di yudansa a comenta: “Rumannan rond di Japon a traha hunto pa yuda otro. Tabatin rumannan cu a bin for di Merca pa yuda. Ora a puntra nan dicon nan a haci e biahe largo ey, nan a bisa: ‘Nos ta sinti nos uni cu nos rumannan na Japon, y nan mester di yudansa.’” Bo no ta orguyoso cu bo por forma parti di un organisacion cu ta asina interesa den su miembronan? Bo por ta sigur cu Jehova ta hopi contento di mira con uni su sirbidornan ta.

21 Si for di aworaki nos ta uni cu otro, nos lo ta prepara pa hunto nos enfrenta situacionnan dificil cu lo bin den futuro. Y si acaso mes nos perde contacto cu nos rumannan di otro partinan di mundo, nos lo tin nos rumannan local. Fumiko, un ruman muher na Japon cu a sobrevivi un tifon, a bisa: “E fin ta hopi cerca. Pues, nos mester sigui yuda nos rumannan segun cu nos ta spera e tempo cu lo no tin ningun desaster mas.”

22. Con union cu nos rumannan lo beneficia nos den futuro?

22 Awor nos mester haci esfuerso pa keda uni pa asina nos por ta prepara pa sobrevivi fin di e mundo malbado aki. Jehova lo salba su pueblo, mescos cu el a haci den pasado. (Isa. 52:9, 10) Pesey, sea cu bo ta hoben of un persona adulto, corda cu lo bo ser salba si bo keda uni cu e pueblo di Dios. Un otro cos cu por yuda nos sobrevivi ta si nos tin aprecio pa loke nos a ricibi caba. E siguiente articulo ta mustra dicon esey ta importante.