Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  December 2014

Bo Ta “Capta Nificacion di e Scritura”?

Bo Ta “Capta Nificacion di e Scritura”?

“El a habri nan mente completamente pa nan capta nificacion di e Scritura.”LUC. 24:45.

1, 2. Con Hesus a fortalece su discipelnan dia el a resucita?

TABATA e dia cu Hesus a resucita. Dos di su discipelnan tabata cana bay un pueblito cu tabata keda un 11 kilometer for di Jerusalem. Como cu nan no tabata sa cu Hesus a resucita, ainda nan tabata lamenta su morto. Diripiente, Hesus a aparece, a cuminsa cana hunto cu nan y a consola nan. Con el a consola nan? Wel, “cuminsando cu Moises y tur e Profetanan, el a splica nan e cosnan tocante su mes den henter e Scritura.” (Luc. 24:13-15, 27) Y segun cu e tabata splica nan e Scritura na un manera bon cla, nan a keda asina emociona cu ta comosifuera nan curason tabata na candela.Luc. 24:32.

2 E mesun anochi ey, e dos discipelnan aki a bolbe bek Jerusalem y a conta e otro discipelnan loke a pasa cu nan. Y mientras nan tabata papiando, Hesus a aparece na nan tur. E discipelnan a haya miedo y tabata duda cu tabata Hesus mes. Con Hesus a fortalece nan? Bijbel ta bisa cu Hesus “a habri nan mente completamente pa nan capta nificacion di e Scritura.”Luc. 24:45.

3. Kico por desanima nos, y kico por yuda nos keda cu nos goso den sirbishi?

3 Mescos cu e discipelnan ey, nos tambe sa sinti nos tristo.  Podise nos ta desanima pasobra aunke nos ta haci hopi den e trabou di Señor, nos no ta mira fruta di nos trabou. (1 Cor. 15:58) Of por parce cu e personanan cu nos ta studia Bijbel cu ne no ta haci suficiente progreso. Y algun di nan hasta ta rechasa Jehova. Awor, con nos por keda cu nos goso den sirbishi? Algo cu lo por yuda nos ta un bon comprondemento di e ilustracionnan di Hesus cu nos ta haya den Bijbel. Pesey, laga nos analisa tres di e ilustracionnan ey y wak kico nos por siña for di nan.

E SEMBRADOR CU TA DRUMI

4. Kico ta e splicacion di e ilustracion di Hesus tocante e sembrador cu ta drumi?

4 Lesa Marco 4:26-29. Kico ta e splicacion di e ilustracion tocante e sembrador cu ta drumi? E sembrador ta representa e predicadornan di e Reino. E simia ta e mensahe di Reino cu ta ser predica na hende sincero. E sembrador tin un rutina normal; e ta “drumi tur anochi y lanta tur mainta.” Ta tuma tempo pa un simia crece: for di tempo cu a plant’e te na cosecha. Durante e periodo ey, “e simia ta spruit y crece bira grandi.” E crecemento aki ta tuma luga “di su mes”, gradualmente y den etapa. Den e mesun manera, un persona ta crece den sentido spiritual gradualmente y den etapa. Ora un persona progresa te na e punto cu e ta sintie motiva pa sirbi Dios, e ta duna fruta den e sentido cu e ta dedica su bida na Jehova y batisa.

5. Dicon Hesus a conta e ilustracion tocante e sembrador cu ta drumi?

5 Dicon Hesus a conta e ilustracion aki? Hesus ta yuda nos compronde cu Jehova ta esun cu ta laga e berdad crece den curason di hende cu ta “dispuesto pa acepta e berdad.” (Echo. 13:48; 1 Cor. 3:7) Nos ta planta y muha e simia di e berdad, pero nos no tin influencia riba su crecemento. Nos no por oblig’e p’e crece ni p’e bay mas lihe. Mescos cu e sembrador, nos no sa con e crecemento ta tuma luga. Debi cu nos ta ocupa cu nos cosnan diario, hopi bes nos no ta ripara cu e simia di Reino ta crece den curason di un persona. Pero cu tempo e simia por duna fruta, y e discipel nobo ey ta cuminsa yuda nos den e trabou di cosecha.Juan 4:36-38.

6. Kico nos mester admiti relaciona cu crecemento spiritual?

6 Kico nos por siña for di e ilustracion aki? Prome, nos tin cu admiti cu nos no tin influencia riba e crecemento spiritual di un studiante di Bijbel. Si nos ta modesto, nos lo no pone presion riba un studiante pa e batisa. Nos ta haci tur loke nos por pa yuda y apoya un studiante, pero e decision pa dedica su bida na Jehova ta un decision cu e mes tin cu tuma. Dedicacion na Jehova mester ta motiva pa amor pa Jehova, di otro manera e no ta aceptabel pa Jehova.Sal. 51:12; 54:6; 110:3.

7, 8. (a) Ki les mas nos ta siña for di e ilustracion di Hesus tocante e sembrador cu ta drumi? Duna un ehempel. (b) Kico e ilustracion aki ta siña nos tocante Jehova y Hesus?

7 Di dos, si nos compronde e les tras di e ilustracion aki, esaki lo evita cu nos ta desanima ora nos no mira fruta di nos trabou mesora. Si, nos mester tin pasenshi. (Sant. 5:7, 8) Si nos a haci nos best pa yuda e studiante y toch e no progresa, nos sa cu esey no ta pasobra nos no tabata bon maestro. Jehova ta permiti e simia di e berdad crece y duna fruta solamente den curason di hende humilde cu ta dispuesto pa haci cambio. (Mat. 13:23) Pues, nos no mester evalua nos sirbishi solamente a base di e resultadonan. Den bista di Jehova, e exito di nos sirbishi no ta depende di e manera cu hende ta reacciona na nos mensahe. Mas bien, Jehova ta balora e esfuersonan cu nos ta haci, sea cu e hendenan ta progresa of no.Lesa Lucas 10:17-20; 1 Corintionan 3:8.

 8 Di tres, no ta tur biaha nos ta ripara e cambionan cu ta tuma luga den curason di un persona. Por ehempel, un misionero tabata studia cu un pareha. E pareha a acerc’e y a bis’e cu nan kier bira publicador no batisa. El a corda nan cu pa cualifica, nan tin cu stop di huma. Pa su gran sorpresa, nan a bis’e cu nan tin varios luna sin huma. Dicon nan a stop di huma? Nan a realisa cu maske nan huma na un manera scondi, Jehova por mira nan y cu Jehova ta odia hipocresia. Pesey, nan curason a motiva nan pa tuma un decision, sea nan ta huma dilanti di e misionero of nan ta stop di huma. Nan amor pa Jehova cu a cuminsa crece a yuda nan tuma e decision corecto. Si, nan a crece den sentido spiritual aunke e misionero no tabatin niun idea di e cambionan grandi cu a tuma luga den nan curason.

E REDA

9. Kico ta e splicacion di e ilustracion tocante e reda?

9 Lesa Mateo 13:47 pa 50. Kico ta e splicacion di e ilustracion di Hesus tocante e reda? Hesus a compara e predicacion di e mensahe di Reino cu bahamento di un reda grandi na lama. Mescos cu un reda ta coy “tur sorto di pisca” y na gran cantidad, nos trabou di predica tambe ta atrae un gran cantidad di tur sorto di hende. (Isa. 60:5) E miyones di hendenan cu ta asisti na e congresonan y e Conmemoracion tur aña ta un prueba di esaki. Algun di nan ta manera “bon” pisca y ta bira parti di e congregacion cristian. Sinembargo, tin otronan cu ta manera pisca cu ‘no ta sirbi.’ Pues, no ta tur ta aceptabel pa Jehova.

Despues di lesa Mateo 13:47 pa 50, pensa con nos por aplica loke e textonan aki ta siña nos

Algun di e personanan cu ser atrai na e berdad lo bira sirbidor di Jehova (Wak paragraf 9-12)

10. Dicon Hesus a conta e ilustracion tocante e reda?

10 Dicon Hesus a conta e ilustracion aki? E separacion simbolico di pisca no ta referi na e huicio final durante e tribulacion grandi. Mas bien e ta resalta loke lo sosode durante e ultimo dianan di e mundo malbado aki. Hesus a mustra cu no ta tur hende cu sinti nan atrai na e berdad lo bira sirbidor di Jehova. Tin hopi hende cu ta asisti na nos reunionnan of ta studia Bijbel cu nos pero no ta dispuesto pa dedica nan bida na Jehova. (1 Rey. 18:21) Tin otronan a stop di asocia cu e congregacion cristian. Por ehempel, tin hobennan cu a ser lanta pa mayornan cristian pero nan no a cultiva un amor pa Jehova su normanan. Sea cual sea e situacion, Hesus a enfatisa cu cada persona tin cu tuma su mes decision. Y esnan cu tuma e decision corecto ta ser considera como “rikesa di tur nacion.”Hag. 2:7.

11, 12. (a) Kico nos por siña for di e ilustracion tocante e reda? (b) Kico e ilustracion aki ta siña nos tocante Jehova y Hesus?

11 Kico nos por siña for di e ilustracion tocante e reda? Si nos compronde e les tras di e ilustracion aki bon, nos lo no keda demasiado tristo of desilusiona ora un studiante di Bijbel of un di nos yiunan no kier sirbi Jehova a pesar di tur esfuerso cu nos ta haci pa yud’e. E echo cu un persona a acepta un estudio di Bijbel of a lanta den e berdad no ta nifica cu automaticamente e ta bira amigo di Jehova. Si e no ta dispuesto pa somete su mes na e autoridad di Jehova, e no por ta parti di e pueblo di Dios.

12 Esaki ta nifica cu esnan cu bandona e berdad nunca mas lo ser permiti pa bira parti di e congregacion cristian? Of e ta nifica cu no tin speransa pa hende cu no a dedica nan bida ainda na Jehova? No. Tanten cu e tribulacion grandi no cuminsa, tin oportunidad pa e hendenan ey bira amigo di Jehova. Pesey, Jehova ta haci un apelacion na nan bisando: “Bolbe cerca mi, y lo mi bolbe cerca boso.” (Mal. 3:7) Y tin un otro ilustracion di Hesus cu ta enfatisa esaki: esun di e yiu perdi.Lesa Lucas 15:11-32.

 E YIU PERDI

13. Kico ta e splicacion di e ilustracion tocante e yiu perdi?

13 Kico ta e splicacion di e ilustracion tocante e yiu perdi? E tata bondadoso den e ilustracion aki ta representa Jehova, nos amoroso Tata celestial. E yiu homber cu a pidi e tata su herencia y cu despues a malgasta esaki ta simbolisa e personanan cu ta desvia y bay for di e congregacion cristian. Nan ta bira parti di e mundo di Satanas cu ta manera “un pais leu”, aleha for di Jehova. (Efe. 4:18; Col. 1:21) Cu tempo, algun di nan ta realisa cu nan a comete un eror grave y nan ta dicidi di bolbe den e organisacion di Jehova. Esaki ta rekeri esfuerso. Pero como cu e personanan aki ta humilde y ta sinceramente arepenti di loke nan a haci, Jehova ta pordona nan y ta ansioso pa ricibi nan atrobe den su organisacion.Isa. 44:22; 1 Ped. 2:25.

14. Dicon Hesus a conta e ilustracion tocante e yiu perdi?

14 Dicon Hesus a conta e ilustracion aki? Uzando e bunita ilustracion aki, Hesus a mustra cu Jehova kier pa esnan cu a desvia bolbe cerca dje. E tata den e ilustracion semper a keda cu speransa cu su yiu lo bolbe. Ora cu for di “leu” el a mira su yiu ta bin, el a core bay contr’e. E ilustracion aki mester motiva hende cu a bandona e berdad pa bolbe na Jehova sin tarda. Por parce dificil pa bolbe pasobra kisas nan tin berguensa y ta spiritualmente zwak. Pero e esfuerso ta bale la pena; Jehova, Hesus y e angelnan den cielo ta keda masha contento ora personanan asina bolbe cerca Jehova.Luc. 15:7.

15, 16. (a) Ki lesnan nos por siña for di e ilustracion di Hesus tocante e yiu perdi? Duna algun ehempel. (b) Kico e ilustracion aki ta siña nos tocante Jehova y Hesus?

15 Kico nos por siña for di e ilustracion tocante e yiu perdi? Nos mester imita e ehempel di Jehova. Ora un persona bin bek den congregacion, nos no mester ta “demasiado husto” y nenga di dun’e un bonbini. Pasobra e unico cos cu nos ta logra cu esey ta “ruina”, of daña, nos relacion cu Jehova. (Ecl. 7:16) Un otro les cu nos por siña ta cu ora un persona bandona e congregacion cristian, nos mester mir’e como “un carne perdi” y no como  un caso perdi. (Sal. 119:176) Pues, si nos topa un persona cu a bandona e congregacion pero cu no ta expulsa, nos mester haci tur nos esfuerso pa yud’e bin bek. Sea cu e ta expulsa of no, nos mester informa e ancianonan di biaha pa nan por dun’e e yudansa necesario. Si nos ta haci asina, nos ta demostra cu nos a compronde y kier aplica e les cu tin tras di e ilustracion di Hesus tocante e yiu perdi.

16 E yiunan perdi cu bolbe den nos tempo ta masha agradecido pa e misericordia cu Jehova ta demostra na nan y pa e amor y apoyo cu nan ta ricibi di e rumannan den congregacion. Un ruman homber cu tabata 25 aña expulsa a bisa: “For di dia cu mi a ser restaura, mi goso a sigui aumenta segun cu Jehova ta ‘refresca mi.’ (Echo. 3:19) E rumannan ta apoya mi y nan ta masha amoroso. Awor mi tin un dushi famia spiritual.” Un ruman muher hoben cu a bolbe na Jehova despues di a keda cinco aña inactivo a bisa: “Mi no por describi con mi a sinti ora mi a experencia e amor cu Hesus a papia di dje. Ser parti di e organisacion di Jehova ta un privilegio unico!”

17, 18. (a) Ki lesnan practico nos a siña for di e tres ilustracionnan cu nos a analisa? (b) Kico nos mester ta determina pa haci?

17 Ki lesnan practico nos a siña for di e ilustracionnan aki? Prome, nos tin cu admiti cu ta Jehova so por laga un persona crece spiritualmente. Pues, esey no ta den nos man. Di dos, no ta realistico pa nos spera cu tur hende cu ta asocia cu nos of cu ta studia Bijbel cu nos lo sirbi Jehova. Finalmente, hasta si algun ruman bandona e berdad y bira lomba pa Jehova, nunca nos mester pensa cu nan lo no bolbe mas. Y ora nan bolbe, laga nos ricibi nan na un manera cu ta refleha Jehova su punto di bista.

18 Laga nos tur sigui busca conocemento, comprondemento y sabiduria. Pesey, segun cu bo ta lesa e ilustracionnan di Hesus, puntra bo mes: Kico ta e splicacion di e ilustracion aki? Dicon e ta registra den Bijbel? Con mi por aplica loke e ta siña mi? Y kico e ta siña mi tocante Jehova y Hesus? Di e manera ey, nos ta demostra cu di berdad nos ta compronde loke Hesus a bisa.