Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  December 2014

Bo Ta Balora Bo Herencia Spiritual?

Bo Ta Balora Bo Herencia Spiritual?

“Nos a acepta e spirito cu ta bin di Dios ... pa nos por compronde e cosnan cu Dios bondadosamente a duna nos.”1 COR. 2:12.

1. Ki actitud hopi hende sa desplega relaciona cu loke nan tin?

BO A yega di tende hende bisa: ‘Bo no sa kico bo tin te ora bo perd’e’? Esey a yega di pasa cu bo? Hopi hende, specialmente esnan cu for di chikito semper a haya tur cos, tin e tendencia di no balora loke nan tin. Por ehempel, un persona cu a lanta den un famia rico kisas ta mira e echo cu e tin hopi cos como algo normal. Esaki por ta e caso cu hobennan, cu debi na falta di experencia, no por discerni kico ta e cosnan cu tin berdadero balor den bida.

2, 3. (a) Ki actitud hobennan cristian mester evita? (b) Kico por yuda nos balora nos herencia spiritual?

2 Bo ta un teenager of un hoben di 20 pico aña di edad? Kico ta importante pa bo? Pa hopi hende den e mundo aki, loke ta mas importante den bida ta cos material, por ehempel un bon salario, un bunita cas of e ultimo aparatonan electronico. Si ta esakinan ta e unico cosnan cu bo ta interesa den dje, bo ta falta e cos di mas importante den bida: rikesa spiritual. Lamentablemente, miyones di hende awe no ta interesa den cosnan spiritual. Pues, si bo a lanta den e  berdad, balora e herencia spiritual cu bo a ricibi di bo mayornan; e ta algo hopi valioso. (Mat. 5:3) Falta di aprecio pa cosnan spiritual por tin consecuencianan tristo cu por afecta bo pa e resto di bo bida.

3 Pero esey no tin nodi pasa cu bo. Kico por yuda bo balora bo herencia spiritual? Laga nos trata algun ehempel biblico cu por yuda nos mira dicon ta sabi pa balora nos herencia spiritual. E analisis aki ta beneficia nos tur, tanto hoben como adulto.

NAN NO A BALORA NAN HERENCIA SPIRITUAL

4. Kico 1 Samuel 8:1-5 ta revela tocante e yiu hombernan di Samuel?

4 Den Bijbel, tin ehempel di algun persona cu no a balora e inmenso herencia spiritual cu nan a ricibi. Esey tabata e caso cu e yiunan di profeta Samuel. Samuel a sirbi Jehova for di chikito y semper e tabatin un bon relacion cu Jehova. (1 Sam. 12:1-5) El a pone un bon ehempel pa su yiunan Joel y Abias. Pero nan no a balora esaki y tabata haci loke ta malo. Bijbel ta bisa cu, contrario na nan tata, nan a “perverti husticia.”Lesa 1 Samuel 8:1-5.

5, 6. Kico a sosode cu e yiu hombernan y e nieto di Josias?

5 Esey tabata e caso tambe cu e yiu hombernan di Rey Josias. Josias tabata un Rey ehemplar cu a sirbi Jehova fielmente. Ora nan a haya e buki di Ley y a les’e p’e, mesora el a haci esfuerso sincero pa sigui e instruccionnan di Jehova. Si, el a elimina tur lastro di idolatria y spiritismo for di e pais y a anima e pueblo pa obedece Jehova. (2 Rey. 22:8; 23:2, 3, 12-15, 24, 25) No tin duda, el a laga un herencia spiritual valioso pa su yiu hombernan! Cu tempo, tres di su yiu hombernan y un di su nietonan a bira rey, pero nan no a balora e herencia spiritual cu nan a ricibi.

6 Despues cu Joacaz, yiu homber di Josias, a bira Rey, el a cuminsa haci “malo den bista di SEÑOR.” E tabatin tres luna so ta goberna ora cu un Farao Egipcio a laga encarcel’e. Joacaz a muri den prizon. (2 Rey. 23:31-34) Despues di Joacaz, su ruman homber Joakim a bira Rey y a goberna Jerusalem 11 aña largo. E tampoco no a balora e herencia spiritual cu el a ricibi for di su tata. Joakim tabata haci asina tanto maldad cu Jeremias a bisa di antemano cu “lo [e] wordo dera, manera ta dera burico.” (Jer. 22:17-19) E otro sucesornan di Josias, esta su yiu homber Sedekias y su nieto Joakin, tampoco no a haci mihor. Ningun di nan no a sigui e bon ehempel cu Josias a pone.2 Rey. 24:8, 9, 18, 19.

7, 8. (a) Con Salomon a desperdicia su herencia spiritual? (b) Ki les nos por siña for di e hendenan den tempo biblico cu no a balora nan herencia spiritual?

7 Rey Salomon tambe a haya un herencia spiritual hopi valioso cerca su tata David, kende a siñ’e stima Jehova. Toch cu tempo, Salomon a stop di balora loke el a ricibi. “Ora Salomon a bira bieu, su esposanan a haci su curason desvia pa sigui tras di otro diosnan; y su curason no tabata completamente dedica na SEÑOR su Dios, manera curason di su tata David tabata.” (1 Rey. 11:4) Consecuentemente, Salomon a perde aprobacion di Jehova.

8 Tur e hombernan aki a haya oportunidad pa siña conoce Jehova y haci loke tabata corecto. Pero nan no a probecha di e oportunidad ey. Di otro banda, tabatin hobennan cu si a balora nan herencia spiritual. Laga nos papia awor di algun di nan cu a pone bon ehempel pa nos hobennan di awe.

 NAN SI A BALORA NAN HERENCIA SPIRITUAL

9. Ki excelente ehempel e yiunan di Noe a pone? (Wak e prome plachi.)

9 Noe su yiunan a pone un excelente ehempel. Nan tata a haya e mandato pa construi un arca pa hende por sobrevivi e Diluvio. Noe su yiunan sigur a mira e importancia di haci e boluntad di Jehova y a coopera cu nan tata. Hunto, nan a construi e arca y a bay den dje prome cu e Diluvio a bin. (Gen. 7:1, 7) Kico tabata e resultado? Genesis 7:3 ta mustra cu tur “sorto [di bestia a keda] na bida riba superficie di henter Tera” debi cu nan a hinca nan den e arca. E rasa humano tambe a ser preserva. Debi cu e yiunan di Noe a balora nan herencia spiritual, nan tabatin e privilegio di yuda salba e rasa humano y reestablece adoracion berdadero riba Tera.Gen. 8:20; 9:18, 19.

10. Con cuater hoben Hebreo a demostra cu nan a balora nan herencia spiritual?

10 Siglonan despues, cuater hoben Hebreo tambe a demostra cu nan tabata sa kico tabata realmente importante den bida. Nan ta Ananias, Misael, Azarias y Daniel, kendenan na aña 617 prome cu Cristo a ser captura y hiba na Babilonia. E hobennan aki tabata inteligente y nan tabatin bunita apariencia. Tabata facil pa nan logra exito na Babilonia, pero nan no a busca esey. Nan no a lubida ken nan tabata; nan a balora nan herencia spiritual, esta, e berdadnan tocante Jehova cu nan a siña for di chikito. Pesey, Jehova a bendiciona nan ricamente.Lesa Daniel 1:8, 11-15, 20.

11. Con otro hende por a beneficia di loke Hesus a siña for di su Tata?

11 Pero e lista di persona cu a pone un bon ehempel lo no ta completo si nos no inclui Hesus, e Yiu di Dios. Hesus a siña hopi cos for di su tata y a balora tur loke el a siña. Su palabranan a refleha esey bon cla. El a bisa: “Loke e Tata a siña mi, mi ta papia.” (Juan 8:28) Y Hesus tabata kier pa otro hende tambe beneficia di su herencia spiritual. El a bisa e hendenan: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Luc. 4:18, 43) El a yuda su oyentenan mira e importancia di “no ta parti di mundo”, pasobra mundo en general no ta balora cosnan spiritual.Juan 15:19.

ABO TA BALORA BO HERENCIA SPIRITUAL?

12. (a) Dicon 2 Timoteo 3:14-17 ta aplica na hopi hoben awe? (b) Ki preguntanan hobennan cristian mester haci nan mes?

12 Mescos cu e hobennan cu nos a caba di papia di dje, kisas abo tambe a lanta den e berdad. Si ta asina, kisas loke Bijbel ta bisa tocante Timoteo ta aplica na bo tambe. (Lesa 2 Timoteo 3:14-17.) Bo mayornan a siña bo tocante e Dios berdadero y con pa agrad’e. Podise ta for di infancia nan a cuminsa siña bo e cosnan ey. Esey sigur a yuda bo haya e sabiduria necesario pa bo por ser salba “mediante fe den Cristo Hesus.” Ademas, loke nan a siña bo a yuda bo bira “completamente prepara” pa sirbi Dios. Pero awor e pregunta ta: Abo ta balora bo herencia spiritual? Kisas un analisis propio por yuda bo contesta e pregunta ey. Ta bon pa bo haci bo mes e siguiente preguntanan: Con e echo cu mi por ta parti di e multitud di fiel sirbidor di Jehova ta laga mi sinti? Mi ta orguyoso di ta un testigo di Jehova, un di e poco hendenan cu Dios conoce? Mi ta consciente cu e echo cu mi conoce e berdad ta un privilegio hopi grandi?

Con bo ta sinti bo di por ta parti di e multitud di fiel sirbidor di Jehova? (Wak paragrafnan 9, 10, 12)

13, 14. (a) Ki tentacion algun hoben cristian sa haya nan mes cu ne? (b) Dicon ta bale la pena pa resisti e tentacionnan ey? Duna un ehempel.

 13 Kisas tin algun hoben cu a lanta den e berdad cu no ta mira e diferencia grandi cu tin entre nos paradijs spiritual y Satanas su mundo scur. Algun di nan tin hasta gana di bay wak kico e mundo eyfo tin di ofrece. Pero, abo lo bula dilanti di un auto djis pa sa cuanto dolor esey por causa bo of si esey lo por causa bo morto? Claro cu no! Di mes manera, nos no tin nodi anda den “bagamunderia” di e mundo aki djis pa haya sa cuanto dolor esey por causa nos.1 Ped. 4:4.

14 Gener, un hoben na Asia cu a lanta den e berdad, a batisa cu 12 aña di edad. Pero despues, mundo a cuminsa atra’e. El a bisa: “Mi tabata kier tin e ‘libertad’ cu mundo ta ofrece.” Gener a cuminsa hiba un bida dobel y, ora e tabatin 15 aña di edad, ya e tabata haci hopi di e cosnan robes cu su mal amigonan tabata haci. E tambe tabata bebe y papia palabra malo. Hopi biaha, e tabata yega cas laat despues di a hunga weganan violento riba computer cu su amigonan. Pero cu tempo, el a bin realisa cu e mundo aki no ta duna berdadero satisfaccion. El a sinti cu su bida tabata bashi. Awor cu el a bin bek den congregacion, el a bisa: “Ainda mi tin cu lucha cu algun tentacion di e mundo aki, pero e bendicionnan cu mi ta ricibi sirbiendo Jehova ta bal mucho mas.”

15. Riba kico hobennan cu no a lanta den e berdad por reflexiona?

15 Claro cu den congregacion tin hobennan tambe cu no a lanta den e berdad. Si esey ta bo caso, pensa riba e privilegio maraviyoso cu bo tin awor di por conoce y sirbi e Creador. Di tur e miles di miyones di hende cu ta biba riba Tera, solamente un promedio di 1 di cada 1.000 persona tin conocemento exacto di e berdad, y abo ta un di nan. Si, ta un gran bendicion di por forma parti di e multitud di hende cu Jehova a hala cerca dje y na kendenan e ta revela su berdadnan biblico. (Juan 6:44, 45) Esey no mester laga nos sinti nos mes bon, sea loke sea e manera cu nos a haya e berdad? (Lesa 1 Corintionan 2:12.) Gener a bisa: “Mi ta haya kippevel ora mi pensa riba esey. Ken ami ta cu Jehova, e Doño di universo, ta mustra interes den mi?”  (Sal. 8:4) Un ruman muher cu ta biba den e mesun area cu Gener a bisa: “Un studiante ta sintie masha orguyoso si su maestro conoc’e. Nos no ta sinti nos mucho mas orguyoso cu Jehova, e Magnifico Instructor, conoce nos?”

KICO ABO LO HACI?

16. Ki decision sabi hobennan cristian por tuma awe?

16 Pensa riba bo maraviyoso privilegio di por sirbi Jehova. Lo bo no kier sigui haci tur bo esfuerso pa keda entre e poco hendenan cu a scoge e mihor caminda den bida? Di e manera ey, bo nomber tambe por ta riba e lista largo di Jehova su sirbidornan fiel. Esey sigur ta e decision di mas sabi cu bo por tuma; no sigui mayoria di hoben awe, cu ta tirando nan bida afo y cu no tin ningun futuro.2 Cor. 4:3, 4.

17-19. Kico por yuda bo tin un punto di bista balansa encuanto ser diferente?

17 Ta berdad cu no ta tur ora ta facil pa nos ta diferente for di e mundo. Pero si nos ta sabi, semper nos ta haci esfuerso pa ta diferente. Pensa riba un atleta cu a cualifica pa bay Olimpiada. Pa por a yega e nivel ey, sin duda e mester tabata diferente for di su pareunan. Probablemente, e mester a haci hopi sacrificio pa e por a dedica tempo y atencion na entrenamento. Ademas, su deseo pa ta diferente for di otro atleta a motiv’e pa train mas y mas pa alcansa su meta.

18 Mayoria di hende awe no ta pensa riba e consecuencianan cu nan por haya nan cu ne debi na nan echonan. Pero sirbidornan di Jehova ta diferente. Nos ta evita mundo su actividadnan cu por perhudica nos tanto moralmente como spiritualmente y daña nos relacion cu Jehova. Di e manera ey, nos por keda cu “un gara firme riba loke realmente ta bida.” (1 Tim. 6:19) E ruman muher cu nos a menciona anteriormente a bisa: “Si bo ta un persona cu ta para pa loke bo ta kere, na final di cuenta lo bo sinti bo bon. Ademas, di e manera ey, bo ta demostra cu bo tin e forsa pa bay contra e coriente di e mundo di Satanas. Ta comosifuera bo ta mira Jehova Dios smile cu bo pasobra e ta orguyoso di bo. Y bo ta sinti bo bon cu bo ta diferente!”

19 Un persona cu ta biba djis pa disfruta di e cosnan cu bida ta ofrece aworaki ta tirando su bida afo. (Ecl. 9:2, 10) Si bo ta un hoben y bo ta reflexiona seriamente riba e berdadero proposito di bida y tocante e privilegio cu Jehova ta duna nos di por biba pa semper, lo bo realisa cu ta sabi pa bo evita di ‘cana manera e nacionnan’ ta cana. Pues, scoge pa sirbi Jehova, y lo bo disfruta di un bida cu berdadero proposito.Efe. 4:17; Mal. 3:18.

20, 21. Con nos lo beneficia si nos ta tuma bon decision, y kico Jehova ta spera di nos?

20 Si nos ta hende cu ta tuma bon decision, nos por tin un bida feliz for di awor y bida eterno den Dios su mundo nobo. Nos no por ni imagina e bendicionnan maraviyoso cu ta spera nos. (Mat. 5:5; 19:29; 25:34) Pero e bendicionnan ey no ta bin automaticamente. Nos mester ta obediente na Dios pa nos por ricibi nan. (Lesa 1 Juan 5:3, 4.) Ta bale la pena pa haci esfuerso pa sirbi Jehova fielmente.

21 Nos no tin palabra pa describi cuanto cos nos a ricibi di Dios! Nos a haya conocemento exacto di su Palabra y bon comprondemento di e berdad tocante Jehova y su propositonan. Nos tin e privilegio di por carga su nomber y di ta su Testigo. Ademas, Dios ta priminti cu e ta na nos banda. (Sal. 118:7) Laga nos tur, sea cu nos ta hoben of di edad, sigui demostra cu nos ta balora nos herencia spiritual y cu nos ta desea di duna Jehova “gloria pa semper.”Rom. 11:33-36; Sal. 33:12.