Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  November 2014

Pregunta di Lector

Pregunta di Lector

Con anciano y sirbidor ministerial ta ser nombra?

Den e prome siglo, apostel Pablo a bisa e ancianonan cu tabata sirbi den e congregacion di Efeso: “Presta atencion na boso mes y na henter e tou, meymey di cua spirito santo a nombra boso como superintendente pa pastorea e congregacion di Dios, cu el a cumpra cu sanger di su Yiu.” (Echo. 20:28) Con spirito santo ta envolvi den nombramento di anciano y sirbidor ministerial awe?

Di prome, spirito santo a motiva e escritornan di Bijbel pa skirbi kico ta e rekisitonan pa un ruman homber bira anciano of sirbidor ministerial. Na 1 Timoteo 3:1 pa 7 nos ta haya un lista di 16 rekisito pa anciano, y algun otro versiculo di Bijbel, manera Tito 1:5 pa 9 y Santiago 3:17 y 18, ta menciona algun rekisito mas. E rekisitonan pa sirbidor ministerial nos ta haya na 1 Timoteo 3:8 pa 10 y 12 pa 13. Di dos, tanto e rumannan cu ta haci recomendacion como esnan cu ta haci nombramento ta pidi Jehova specificamente pa laga spirito santo guia nan ora nan tin cu determina si un ruman ta cumpli cu e rekisitonan biblico na un grado rasonabel. Di tres, e ruman cu ta ser recomenda pa bira anciano of sirbidor ministerial mester demostra na e manera cu e ta hiba su bida cu el a cultiva e fruta di Dios su spirito santo. (Gal. 5:22, 23) Pues, e spirito di Dios ta envolvi den tur aspecto di e proceso di nombramento.

Pero ken realmente ta nombra e rumannan ey? Den pasado tabata manda tur recomendacion relaciona cu nombramento di anciano y sirbidor ministerial pa e sucursal concerni. Eynan, rumannan asigna pa e Cuerpo Gobernante tabata analisa e recomendacionnan aki y haci e nombramentonan apropia. Despues, sucursal tabata notifica e cuerpo di anciano di e decision. Anto e ancianonan, na nan turno, tabata informa e rumannan en cuestion di nan nombramento y tabata puntra nan si nan tabata dispuesto pa acepta e asignacion y si di berdad nan tabata cumpli cu e rekisitonan. Por ultimo, tabata haci un anuncio na e congregacion.

Den prome siglo tabatin biaha cu e apostelnan a haci nombramentonan specifico, manera ora cu nan a apunta shete homber pa supervisa e partimento di cuminda di tur dia pa e viudanan. (Echo. 6:1-6) Sinembargo, e ehempel aki no ta mustra cu e apostelnan a nombra anciano cu sirbidor ministerial, pasobra e shete hombernan ey kisas ya caba tabata sirbi como anciano prome cu nan a haya e tarea adicional aki. Pues, con e nombramento di anciano y sirbidor ministerial tabata tuma luga den prome siglo?

E Scritura no ta splica detayadamente con cada nombramento a tuma luga den e tempo ey, pero toch nos ta haya algun indicacion con esey a tuma luga. Bijbel ta bisa cu ora Pablo cu Barnabas tabata  biniendo cas bek for di nan prome biahe como misionero, “den cada congregacion nan a nombra algun homber pa sirbi como anciano. Nan tabata haci oracion y yuna, pa despues encarga e hombernan na Jehova, esun den ken nan a pone fe.” (Echo. 14:23) Añanan despues, Pablo a bisa su compañero di biahe Tito den un carta: “Mi a laga bo na Creta pa bo por corigi e cosnan cu tabata laga hopi di desea y pa bo nombra anciano den cada stad, manera mi a instrui bo.” (Tito 1:5) Anto ta parce cu Timoteo, kende a biaha hopi cu apostel Pablo, tambe a haya e mesun autoridad ey. (1 Tim. 5:22) Manera nos por mira den e casonan aki, ta e superintendentenan biahero tabata haci e nombramentonan, no e apostelnan y ancianonan na Jerusalem.

Cu e precedente biblico aki na mente, e Cuerpo Gobernante di testigonan di Jehova a ahusta e manera cu ta nombra anciano y sirbidor ministerial. Desde 1 di september 2014, esaki ta tuma luga di e siguiente manera: Cada superintendente di circuito ta repasa cuidadosamente e recomendacionnan di e ancianonan den su circuito. Durante su bishita na e congregacionnan, e lo haci esfuerso pa siña conoce e rumannan cu a ser recomenda y, si ta posibel, traha hunto cu nan den sirbishi. Despues di analisa e recomendacionnan hunto cu cada cuerpo di anciano, e superintendente di circuito tin e responsabilidad di nombra e ancianonan y sirbidornan ministerial den e congregacionnan di su circuito. Di e manera aki e proceso ta cuadra mas cu e patronchi di e prome siglo.

Un cuerpo di anciano y un superintendente di circuito ta analisa si un ruman homber ta cumpli cu e rekisitonan biblico (Malawi)

Kico ta e tarea di tur esnan envolvi den e proceso aki? Manera semper, ta “e esclavo fiel y prudente” tin e responsabilidad principal di duna cuminda na e sirbidornan di cas. (Mat. 24:45-47) Cu yudansa di spirito santo, e esclavo fiel ta investiga e Scritura pa sa con mester organisa e congregacion mundial y despues e ta duna instruccion con ta e manera practico pa aplica principionan biblico relaciona cu esey. E esclavo fiel ta nombra tambe tur superintendente di circuito y miembro di Comite di Sucursal. Cada sucursal, na nan turno, ta duna yudansa practico pa implementa e instruccionnan cu ta bin di e esclavo fiel. Cada cuerpo di anciano, di nan parti, tin e deber importante di evalua cuidadosamente si e ruman hombernan cu nan ta recomenda pa sirbi den e congregacion di Dios ta cumpli cu e rekisitonan biblico. Y por ultimo, cada superintendente di circuito tin e responsabilidad serio di analisa hunto cu oracion e recomendacionnan cu e cuerpo di anciano a haci y despues nombra e hombernan cu ta cumpli cu e rekisitonan.

Ora nos ta compronde con e nombramentonan ta tuma luga, nos ta mira mas mihor tambe con spirito santo ta envolvi den e proceso. Anto esaki ta duna nos mas confianza den e rumannan cu a ser nombra den congregacion y nos lo tin mas respet pa nan tambe.Heb. 13:7, 17.

 Ken ta e dos testigonan menciona den Revelacion capitulo 11?

Revelacion 11:3 ta papia di dos testigo cu lo a profetisa pa 1.260 dia. Despues e relato ta bisa cu e bestia salbahe lo a “vence nan y mata nan.” Pero pa gran sorpresa di tur mirones, despues di ‘tres dia y mey’ e dos testigonan aki ta ser resucita.Rev. 11:7, 11.

Ken e dos testigonan aki ta? E relato mes ta yuda nos identifica nan. Na prome luga, e relato ta bisa cu nan ta ser simbolisa pa “e dos palonan di oleifi y e dos kandelaarnan.” (Rev. 11:4) Esaki ta laga nos corda riba e kandelaar y dos mata di oleifi cu e profecia di Zacarias ta describi. Den e profecia ey, e matanan di oleifi a simbolisa “e dos unginan”, esta, Gobernador Zorobabel y Sumo Sacerdote Josue cu tabata ‘para banda di e Señor di henter Tera.’ (Zac. 4:1-3, 14) Na di dos luga, segun e relato e dos testigonan ta haci milagernan similar na esnan cu Moises y Elias a haci.—Compara Revelacion 11:5, 6 cu Numbernan 16:1-7, 28-35 y 1 Reynan 17:1; 18:41-45.

Kico ta loke e profecia di Revelacion y di Zacarias tin en comun? Den tur dos caso, e relatonan ta referi na e hombernan ungi cu a dirigi e pueblo di Dios durante un periodo di prueba. Pues, den cumplimento di Revelacion capitulo 11, esnan cu a predica pa tres aña y mey “bisti na paña di saco” ta e rumannan ungi cu a dirigi e pueblo di Dios durante e tempo cu e Reino di Dios a ser estableci den cielo na 1914. *

Despues cu nan a predica bisti na paña di saco, e unginan aki a ser mata simbolicamente ora cu nan a ser encarcela pa un periodo di tempo mas cortico: tres dia y mey. E enemigonan di e pueblo di Dios a kere cu nan a logra caba cu e obra di e dos testigonan pa semper, y esaki a haci e opositornan ey hopi contento.Rev. 11:8-10.

Sinembargo, manera e profecia a indica, na final di e tres dianan y mey simbolico, e dos testigonan a ser resucita: E unginan a ser libra for di prizon. Ademas, esnan cu a keda fiel a ricibi un nombramento special cerca Dios mediante nan Señor, Hesucristo. Na 1919, nan tabata entre esnan cu a ser nombra pa sirbi como un “esclavo fiel y prudente” cu lo a atende e necesidadnan spiritual di e pueblo di Dios durante e ultimo dianan.Mat. 24:45-47; Rev. 11:11, 12.

Un punto interesante ta cu Revelacion 11:1 y 2 ta conecta e sucesonan aki cu e periodo cu lo a midi, of inspecciona, e tempel spiritual. Malakias capitulo 3 ta menciona un inspeccion similar di e tempel spiritual, sigui pa un periodo di purificacion. (Mal. 3:1-4) Con largo e inspeccion y trabou di purificacion aki a dura? Esey a dura di 1914 te na principio di 1919. E periodo aki a inclui tanto e 1.260 dia (42 luna) como e tres dianan y mey simbolico menciona den Revelacion capitulo 11.

Nos ta masha contento cu Jehova a percura pa e trabou di purificacion spiritual aki tuma luga pa asina limpia un pueblo special pa haci obranan excelente. (Tito 2:14) Ademas, nos ta aprecia e bon ehempel di e unginan fiel cu a dirigi e pueblo di Dios durante e periodo di prueba ey y asina a sirbi como e dos testigonan simbolico. *

^ par. 14 E paña di saco cu e dos testigonan tin bisti ta indica aparentemente e manera humilde cu nan a persevera den anuncia e huicionan di Jehova. Ademas, nan tabata testigo cu a proclama su dia di venganza cu lo a resulta den tristeza pa e nacionnan.

^ par. 18 Pa mas informacion, wak E Toren di Vigilancia di 15 di juli 2013, pagina 22, paragraf 12.