Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  November 2014

 FOR DI NOS ARCHIVO

Luz Ta Briya na Japon

Luz Ta Briya na Japon

Invitacion pa discurso publico cu nan a uza na Tokio; na Osaka, nan a benta e invitacionnan for di avioneta

DIA 6 di september 1926, un peregrino (superintendente biahero) Japones cu tabata biba na Merca a regresa Japon como misionero. Ora el a yega, tabatin un hende so pa ricibie: E unico persona cu tabatin un abonament riba E Toren di Vigilancia, un homber cu a cuminsa cu un grupo di estudio di Bijbel na e stad Kobe. Dia 2 di januari 1927, e Studiantenan di Bijbel a tene nan prome asamblea den e stad ey. Un total di 36 persona a asisti, y 8 a batisa. Esey tabata un bon comienso. Pero con e grupito aki lo por a hiba e luz di e berdad biblico na e 60 miyon habitantenan di Japon, cu ta mihor conoci como e Pais Caminda Solo Ta Sali?

Na mei 1927, e Studiantenan di Bijbel a organisa un campaña intenso pa anuncia un serie di discurso biblico. E prome discurso lo a tuma luga na Osaka, y e rumannan a pone borchinan di propaganda grandi y chikito tur caminda den e stad pa anuncia esey. Tambe nan a manda 3.000 invitacion na hendenan prominente, nan a parti 150.000 pamfleta y a pone anuncio den e corantnan mas lesa di Osaka y riba 400.000 carchi di trein. E dia di e discurso, dos avioneta a benta 100.000 pamfleta mas riba e stad. Kico tabata e resultado? E sala Asahi na Osaka tabata yen yen. Un 2.300 hende a scucha e discurso “E Reino di Dios Ta Cerca.” Rond di 1.000 hende a keda pafo pasobra no tabatin mas luga. Despues di e discurso, mas cu 600 hende a keda y a haya oportunidad pa haci pregunta. Durante e lunanan cu a sigui, e rumannan a tene discurso tambe na Kioto y otro stadnan den parti west di Japon.

Na october 1927, e Studiantenan di Bijbel a programa tres discurso na Tokio, e capital di Japon. Ey tambe nan a manda invitacion pa personanan prominente, manera e prome minister, miembronan di parlamento y lidernan religioso y militar. Ademas, nan a uza poster, pone anuncio den corant y parti 710.000 pamfleta. Un total di 4.800 persona a asisti na e discursonan ey.

PIONERONAN YEN DI ENTUSIASMO

Katsuo cu Hagino Miura

Pioneronan (cu e tempo ey tabata yama colporteur) a hunga un papel importante den predicacion di e mensahe di Reino di cas pa cas. E ruman muher Matsue Ishii, un di e prome pioneronan na Japon, hunto cu su esposo Jizo, a cubri 75 porciento di e pais: for di Sapporo (den noord) te na Sendai, Tokio, Yokohama, Nagoya, Osaka, Kioto, Okayama y Tokushima. Ruman Matsue y un otro ruman muher di edad, Sakiko Tanaka, tabata bisti nan mihor kimononan pa bishita funcionarionan halto di gobierno. Un biaha, un funcionario a pidi 300 ehemplar di e bukinan The Harp of God y Deliverance pa pone den bibliotheeknan di prizon.

Katsuo cu Hagino Miura a lesa e bukinan cu nan a tuma di Ruman Matsue, y e pareha a compronde mesora cu nan a haya e berdad. Nan a batisa na 1931  y a bira pionero. Haruichi cu Tane Yamada—y hopi di nan famianan—a acepta e mensahe di Reino un poco prome cu 1930. E pareha Yamada a bira pionero, y nan yiu muher, Yukiko, a bay sirbi na Betel na Tokio.

“JEHU” GRANDI Y “JEHU” CHIKITO

Seis pionero por a biba den un Jehu grandi

E tempo ey auto tabata masha caro y e camindanan tabata masha malo. Pues, un ruman homber cu yama Kazumi Minoura y otro pioneronan hoben tabata biba den cas riba wiel, un tipo di caravana sin motor. Nan a duna e caravananan aki e beinam Jehu, a base di e personahe biblico Jehu, cu despues a bira rey di Israel y cu tabatin e reputacion di core su garoshi masha duro mes. (2 Rey. 10:15, 16) Tabatin tres Jehu grandi, cada un tabata midi 2,2 meter largo, 1,9 meter hancho y 1,9 meter halto, y tabatin luga di drumi pa seis pionero. Ademas, na e sucursal di Japon nan a traha 11 Jehu chikito cu dos persona por a keda aden y cu un bais por a lastra. Kiichi Iwasaki, kende a yuda traha e Jehunan, a conta: “Cada Jehu tabatin un tent y tambe un bateria di auto pa por a haya coriente pa luz.” E pioneronan a laga e luz di e berdad briya den tur skina di Japon, for di Hokkaido den noord te na Kyushu den zuid, segun cu nan tabata pusha y lastra e Jehunan a traves di sero- y vayenan.

Dos pionero por a biba den un Jehu chikito

E ruman homber pionero Ikumatsu Ota a conta: “Ora nos yega un stad, nos tabata pone nos Jehu canto di un riu of riba un tereno bashi. Prome cos cu nos a haci tabata bishita e hendenan prominente di e stad, manera e alcalde, despues nos tabata ofrece e publicacionnan di cas pa cas. Y ora nos a caba di cubri e teritorio, nos tabata pasa pa e siguiente stad.”

Dia cu e grupo di 36 Studiante di Bijbel na Kobe a tene nan prome asamblea, esey tabata un “dia di cosnan chikito.” (Zac. 4:10) Cinco aña despues, na 1932, 103 pionero y publicador na Japon a entrega rapport; nan a laga mas cu 14.000 buki. Awe, den e stadnan grandi di Japon e rumannan a organisa predicacion den areanan publico, y un 220.000 publicador ta laga nan luz briya den e Pais Caminda Solo Ta Sali.—For di nos archivo na Japon.

Pintura di Kiichi Iwasaki, kende a traha e Jehunan na Betel di Japon