Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  November 2014

“Awor Boso Ta e Pueblo di Dios”

“Awor Boso Ta e Pueblo di Dios”

“Un tempo boso no tabata un pueblo, ma awor boso ta e pueblo di Dios.”1 PED. 2:10.

1, 2. Ki cambio a tuma luga na Pentecoste di aña 33, y ken a bira miembro di e pueblo nobo di Jehova? (Wak e prome plachi.)

PENTECOSTE di aña 33 tabata un dia grandi pa e pueblo di Jehova riba Tera. Riba e dia ey, un cambio historico a tuma luga. Jehova a forma un nacion nobo, esta, “e Israel di Dios”, of Israel spiritual. (Gal. 6:16) Pa scoge e miembronan di e nacion ey, Jehova a uza su spirito santo. Pa prome biaha for di tempo di Abraham, no tabata necesario pa circuncida e hombernan di e pueblo di Dios mas. Dicon no? Wel, Pablo a splica kico lo a identifica cada miembro di e nacion nobo ey. El a skirbi: “Su circuncision ta circuncision di curason, pa medio di spirito.”Rom. 2:29.

2 E prome miembronan di e nacion nobo di Dios tabata e apostelnan y mas cu shen discipel di Cristo cu a reuni hunto den un camber ariba na Jerusalem. (Echo. 1:12-15) Dios a drama su spirito santo riba nan, y asina nan a bira yiu adopta di Dios. (Rom. 8:15, 16; 2 Cor. 1:21) E suceso aki a duna prueba cu Dios a acepta e sacrificio di Cristo y cu e pacto nobo a drenta na vigor, cu Cristo como e mediador. (Luc. 22:20; lesa Hebreonan 9:15.) Pues, e discipelnan ungi aki a bira miembro di Jehova su nacion nobo, su pueblo nobo.  Spirito santo a capacita nan pa predica na diferente idioma. Ora cu e suceso aki a tuma luga, tabatin na Jerusalem hopi hudiu y hende cu a comberti y bira hudiu; nan a bin for di tur skina di e Imperio Romano pa celebra e Fiesta di Simannan, of Pentecoste. Tur e hendenan aki a tende y compronde na nan mes idioma e mensahe “tocante e obranan magnifico di Dios” cu e cristiannan ungi pa spirito santo tabata predica.Echo. 2:1-11.

E PUEBLO NOBO DI DIOS

3-5. (a) Kico Pedro a bisa e hudiunan riba dia di Pentecoste? (b) Kico a contribui na crecemento di e nacion nobo di Jehova durante su prome añanan?

3 Jehova a uza apostel Pedro pa invita e hudiunan y hende cu a comberti na hudaismo pa bira miembro di e nacion recien forma aki, esta, e congregacion cristian. Riba e dia di Pentecoste, Pedro, cu curashi, a bisa e hudiunan cu nan mester acepta Hesus, pasobra ‘Dios a haci e Hesus aki, cu nan a claba na staca, tanto Señor como Cristo.’ Ora e hendenan a puntra Pedro kico nan mester haci, el a contesta nan: “Arepenti, y cada un di boso batisa den nomber di Hesucristo pa boso por haya pordon di boso picanan. Y boso lo ricibi e spirito santo cu Dios ta duna libremente.” (Echo. 2:22, 23, 36-38) Riba e dia ey, un 3.000 hende a bira parti di e nacion nobo di Israel spiritual. (Echo. 2:41) Despues di esey, e apostelnan a sigui predica cu entusiasmo y mas y mas hende a acepta e berdad. (Echo. 6:7) E nacion nobo tabata creciendo.

4 Despues, e discipelnan di Hesus a hiba e mensahe pa e Samaritanonan, y cu bon resultado. Felipe, un predicador di e bon noticia, a batisa hopi di nan pero nan no a ricibi spirito santo di biaha. E cuerpo gobernante na Jerusalem a manda apostel Pedro cu apostel Juan pa bay bishita e rumannan nobo aki, y nan a “pone man riba nan, y nan a cuminsa ricibi spirito santo.” (Echo. 8:5, 6, 14-17) Pues, e Samaritanonan aki tambe a bira miembro ungi di Israel spiritual.

Pedro a predica na Cornelio y su famia (Wak paragraf 5)

5 Na aña 36, Jehova a bolbe uza Pedro pa invita un otro grupo pa bira parti di e nacion nobo di Israel spiritual. Esaki a sosode ora cu Pedro a predica na un oficial di ehercito Romano, Cornelio, y tambe na su famia- y amigonan. (Echo. 10:22, 24, 34, 35) Bijbel ta bisa cu “mientras cu Pedro tabata papia ainda ..., spirito santo a baha riba tur esnan [cu no tabata hudiu] cu tabata tende e palabra di Dios. Y e creyentenan circuncida cu a bin hunto cu Pedro a keda asombra, pasobra Dios a drama su spirito santo—su regalo—riba hende di e nacionnan tambe.” (Echo. 10:44, 45) Pues, djey padilanti, creyentenan cu no tabata hudiu ni circuncida tambe por a bira parti di e nacion nobo di Israel spiritual.

 “UN PUEBLO PA CARGA SU NOMBER”

6, 7. Con e miembronan di e nacion nobo mester a demostra cu nan ta ‘un pueblo pa carga Jehova su nomber’, y te na ki grado nan a haci esey?

6 Na un reunion cu e cuerpo gobernante di e cristiannan di e prome siglo a tene na aña 49, discipel Santiago a declara: “Simeon [Pedro] a conta detayadamente con Dios pa prome biaha a dirigi su atencion na e nacionnan pa saca for di nan un pueblo pa carga su nomber.” (Echo. 15:14) E pueblo nobo aki cu lo a carga Jehova su nomber lo a inclui tanto hudiu como no hudiu. (Rom. 11:25, 26a) Mas despues, Pedro a skirbi: “Un tempo boso no tabata un pueblo, ma awor boso ta e pueblo di Dios.” Y el a describi kico lo ta nan tarea, bisando: “Boso ta ‘un rasa scogi, sacerdotenan cu ta sirbi como rey, un nacion santo, un pueblo pa un propiedad special, pa boso proclama tur caminda e cualidadnan excelente’ di esun cu a yama boso for di scuridad na su luz maraviyoso.” (1 Ped. 2:9, 10) Nan mester a alaba Jehova publicamente y declara su nomber. Cu curashi, nan mester a sirbi como testigo di nan Dios, e Soberano di universo.

7 Mescos cu tabata e caso cu Israel natural, Jehova a yama e miembronan di Israel spiritual “e pueblo cu mi a forma pa mi mes [pa] declara mi alabanza.” (Isa. 43:21) Cu curashi, e prome cristiannan ey a proclama cu Jehova ta e unico Dios berdadero y cu tur e otro diosnan cu hende tabata adora e tempo ey ta falso. (1 Tes. 1:9) Si, nan a duna testimonio di Jehova y di Hesus “na Jerusalem, den henter Judea y Samaria, y te na e parti mas leu di Tera.”Echo. 1:8; Col. 1:23.

8. Ki spiertamento apostel Pablo a duna e pueblo di Dios den e prome siglo?

8 Den e prome siglo, apostel Pablo tabata un miembro yen di curashi di e ‘pueblo pa carga Jehova su nomber.’ Hasta dilanti di un grupo di filosofo pagano, el a defende Jehova como e Soberano di universo, y sin miedo el a mustra cu Jehova ta “e Dios cu a traha mundo y tur loke tin den dje” y cu e ta e “Señor di cielo y Tera.” (Echo. 17:18, 23-25) Casi na final di Pablo su tercer biahe como misionero, el a spierta e pueblo di Dios: “Mi sa cu despues cu mi no t’ey mas, lobo feroz lo drenta meymey di boso, y nan lo no trata e tou cu ternura, y for di meymey di boso mes lo lanta hombernan cu lo troce e berdad pa pone e discipelnan bay nan tras.” (Echo. 20:29, 30) Y asina a sosode. Pa final di e prome siglo, e apostasia aki cu el a profetisa ya a manifesta su mes claramente.1 Juan 2:18, 19.

9. Kico a pasa cu e pueblo di Dios despues cu e apostelnan a muri?

9 Despues di morto di e apostelnan, e apostasia ey a plama den tur congregacion y asina e iglesianan di cristiandad a lanta. En bes di ta ‘un pueblo pa carga Jehova su nomber’, e cristiannan falso aki a saca e nomber di Dios for di hopi di nan traduccionnan di Bijbel. Ademas, nan a sigui ritonan pagano y a deshonra Dios cu nan siñansanan falso, nan supuesto “gueranan santo”, nan corupcion y inmoralidad sexual. Pues, pa siglonan Jehova tabatin djis un par di sirbidor fiel riba Tera pero no un grupo organisa cu tabata “un pueblo pa carga su nomber.”

E PUEBLO DI DIOS TA BOLBE NACE

10, 11. (a) Kico Hesus a profetisa den su comparacion di trigo y mal yerba? (b) Con e comparacion di Hesus a cumpli despues di 1914, y cu ki resultado?

10 Hesus a conta e comparacion di trigo y mal yerba pa profetisa cu debi na e apostasia lo bay ta dificil pa identifica e religion berdadero. El a bisa cu  “mientras cu e hendenan tabata drumi”, Diabel lo a sembra mal yerba den e cunucu caminda e Yiu di hende a sembra simia di trigo. Tur dos mata lo a crece hunto te na “conclusion di e era.” Hesus a splica cu “e bon simia” ta representa “e yiunan di Reino, pero e mal yerba ta e yiunan di e Malbado.” Durante e tempo di fin, e Yiu di hende lo a manda su “cosechadonan”, e angelnan, pa separa e trigo simbolico for di e mal yerba. Despues e angelnan lo a recoge e yiunan di Reino. (Mat. 13:24-30, 36-43) Con esaki a sosode? Y con Jehova a bolbe haya un pueblo riba Tera?

11 E “conclusion di e era” a cuminsa na 1914. E tempo ey tabatin apenas un 5.000 cristian ungi riba Tera. Durante e guera cu a cuminsa e aña ey, “e yiunan di Reino” ey, den sentido spiritual, ainda tabata prizonero di Babilonia e Grandi. Na 1919, Jehova a libera nan, y e diferencia entre nan y e “mal yerba”, of cristiannan falso, a bira hopi bisto. Manera Isaias a profetisa, el a trece “e yiunan di Reino” hunto den un pueblo organisa. Na Isaias 66:8 nos ta lesa: “Un tera por nace den un dia? Un nacion por wordo haya den un momento? Asina cu Sion a haya dolor di parto, el a haya su yiunan tambe.” Den e contexto aki, Sion ta Jehova su organisacion di angelnan den cielo. Sion “a haya su yiunan”, na moda di papia, ora cu e nacion di yiunan ungi riba Tera a ser forma.

12. Con e unginan a demostra cu ta nan awe ta ‘un pueblo pa carga Jehova su nomber’?

12 Mescos cu e cristiannan di e prome siglo, e “yiunan di Reino” ungi awe ta testigonan di Jehova. (Lesa Isaias 43:1, 10, 11.) Como tal, nan ta destaca como diferente pa motibo di nan bon conducta cristian y pa motibo cu nan ta predica “e bon noticia aki di e Reino ... como testimonio pa tur nacion.” (Mat. 24:14; Flp. 2:15) Di e manera ey nan a yuda miyones di hende haya e aprobacion di Jehova.Lesa Daniel 12:3.

 “LAGA NOS BAY CU BOSO”

13, 14. Kico esnan cu no ta ungi mester haci pa Jehova acepta nan adoracion, y con Bijbel a profetisa esaki?

13 Nos a mira den e articulo anterior cu den Israel di antiguedad Jehova a acepta adoracion di hende cu no tabata Israelita, pero e stranheronan ey tabatin cu uni cu e pueblo cu Dios a cera un pacto cu ne. (1 Rey. 8:41-43) Awe ta mescos. Esnan cu no ta Israelita spiritual tin cu uni cu e pueblo di Jehova, “e yiunan di Reino”, esta, e testigonan ungi di Jehova.

14 Dos profeta di pasado a indica cu hopi hende lo bin adora Jehova hunto cu su pueblo den e tempo di fin aki. E prome tabata Isaias, kende a profetisa: “Hopi pueblo lo bin bisa: ‘Ban, laga nos subi bay na e sero di SEÑOR, na e cas di e Dios di Jacob, pa e siña nos tocante di su camindanan, y pa nos cana den su bereanan.’ Pasobra e ley lo sali for di Sion, y e palabra di SEÑOR for di Jerusalem.” (Isa. 2:2, 3) E di dos profeta, Zacarias, tambe a profetisa cu “hopi pueblo y nacionnan poderoso lo bin pa busca e SEÑOR di ehercitonan na Jerusalem, y pa pidi e fabor di SEÑOR.” El a describi nan como “dies homber for di tur e nacionnan” cu, simbolicamente, lo coge bisti di Israel spiritual tene y bisa: “Laga nos bay cu boso, pasobra nos a tende cu Dios ta cu boso.”Zac. 8:20-23.

15. Den ki sentido e ‘otro carnenan’ ta “bay cu” Israel spiritual?

15 E ‘otro carnenan’ ta “bay cu” Israel spiritual den e sentido cu nan tambe ta participa den e trabou di predica e bon noticia di Reino. (Mar. 13:10) Nan ta bira parti di e pueblo di Dios. Hunto cu e unginan, nan ta forma “un tou” bou di guia di “e bon wardador”, Cristo Hesus.Lesa Juan 10:14-16.

BUSCA PROTECCION CERCA E PUEBLO DI JEHOVA

16. Con Jehova lo dirigi asunto pa e fase final di e “tribulacion grandi” cuminsa?

16 Despues di destruccion di Babilonia e Grandi, lo tin un atake total contra e pueblo di Jehova. Pa nos por sobrevivi e atake ey, nos lo tin mester di e proteccion di Jehova. E atake aki lo hiba na Armagedon, e fase final di e “tribulacion grandi.” Ta Jehova mes lo dirigi asuntonan riba Tera y dicidi na ki momento e confrontacion final aki ta cuminsa. (Mat. 24:21; Eze. 38:2-4) E tempo ey, Gog lo ataca “e pueblo cu ta reuni for di e nacionnan”, esta, e pueblo di Jehova. (Eze. 38:10-12) E atake ey lo ta e señal pa Jehova ehecuta huicio contra Gog y su compinchinan. Jehova lo demostra claramente cu e ta e Soberano y lo santifica su nomber, pasobra e ta bisa: ‘Lo mi haci mi mes conoci den bista di hopi nacion; y nan lo sa cu ami ta Jehova.’Eze. 38:18-23.

Durante e “tribulacion grandi”, nos lo tin cu keda cerca di nos congregacion (Wak paragraf 16-18)

17, 18. (a) Ki instruccion e pueblo di Jehova lo ricibi ora Gog ataca nos? (b) Si nos kier pa Jehova proteha nos, kico nos tin cu haci?

17 Ora Gog cuminsa ataca, Jehova lo bisa su sirbidornan: “Bin, mi pueblo, drenta den bo cambernan y cera bo portanan bo tras; sconde pa un poco tempo, te ora indignacion pasa.” (Isa. 26:20) Durante e tempo crucial ey, Jehova lo instrui nos kico pa haci pa nos ser proteha. Y  ta posibel cu e “cambernan” tin di haber cu nos congregacionnan local.

18 Pues, si nos kier pa Jehova proteha nos durante e tribulacion grandi, nos tin cu acepta cu Jehova tin un pueblo riba Tera awe y cu el a organis’e den congregacionnan. Pues, nos mester keda uni cu e pueblo di Jehova y percura pa nos keda cerca di nos congregacion. Mescos cu e salmista, laga nos declara di henter nos curason: “Salbacion ta di [Jehova]; bo bendicion sea riba bo pueblo!”Sal. 3:8.