Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  October 2014

“Keda cu Boso Mente Fiha Riba e Cosnan di Ariba”

“Keda cu Boso Mente Fiha Riba e Cosnan di Ariba”

“Keda cu boso mente fiha riba e cosnan di ariba, no riba e cosnan cu ta riba Tera.”COL. 3:2.

1, 2. (a) Kico ta mustra cu e congregacion di Colosas den prome siglo tabata na peliger? (b) Ki conseho Pablo a duna e rumannan na Colosas?

DEN prome siglo, e congregacion cristian di Colosas tabata na peliger. Algun ruman tabata bisa cu tur hende mester a sigui e Ley di Moises. Otronan tabata promove ascetismo, e filosofia pagano cu ta bisa cu hende mester priva nan mes di e placernan di bida. Pesey, pa contraresta e siñansanan falso aki, apostel Pablo a skirbi un carta animante pa spierta e Colosensenan. El a bisa nan: “Tene cuidou pa ningun hende no ... gara [boso den trampa] pa medio di filosofia y engaño vano cu ta basa riba tradicion di hende, segun e cosnan basico di mundo y no segun e siñansanan di Cristo.”—Col. 2:8.

2 Si e cristiannan ungi di e tempo ey tabata fiha nan mente riba “e cosnan basico di mundo”, nan lo tabata rechasando e provision cu Jehova a percura pa nan por a ser salba. (Col. 2:20-23) Pa yuda nan cuida nan amistad precioso cu Dios, Pablo a conseha nan: “Keda cu boso mente fiha riba e cosnan di ariba, no riba e cosnan cu ta riba Tera.” (Col. 3:2) Si, e rumannan di Cristo mester a keda corda riba nan speransa di por biba pa semper den cielo.—Col. 1:4, 5.

3. (a) Ki speransa cristiannan ungi tin? (b) Ki preguntanan nos lo contesta den e articulo aki?

 3 Awe tambe cristiannan ungi ta keda cu nan mente fiha riba Dios su Reino celestial y riba nan speransa pa bira “heredero hunto cu Cristo.” (Rom. 8:14-17) Pero kico di ‘e otro carnenan’, esta, e cristiannan cu tin speransa di biba pa semper riba Tera? (Juan 10:16) Ki nificacion Pablo su palabranan tin pa nan? Si, con nan por keda cu nan mente fiha riba “e cosnan di ariba”? Abraham y Moises tabata dos sirbidor di Dios cu a keda cu nan mente fiha riba e cosnan di ariba a pesar di nan problemanan. Kico nos por siña for di nan ehempel?

KICO KIERMEN FIHA NOS MENTE RIBA E COSNAN DI ARIBA?

4. Den ki manera e otro carnenan por keda cu nan mente fiha riba e cosnan di ariba?

4 Aunke e otro carnenan no tin speransa pa bay biba den cielo, nan tambe por keda cu nan mente fiha riba e cosnan di ariba. Con? Poniendo Jehova Dios y su Reino na prome luga den nan bida. (Luc. 10:25-27) Pa logra esey, nos tin cu sigui e ehempel di Cristo. (1 Ped. 2:21) Mescos cu nos rumannan den prome siglo, nos tambe ta haya nos cu rasonamento falso, tur sorto di filosofia y tendencia materialista den e mundo malbado aki di Satanas. (Lesa 2 Corintionan 10:5.) Pero como imitadornan di Hesus, nos mester keda vigila y proteha nos mes di tur loke por daña nos relacion cu Jehova.

5. Con nos por analisa nos mes pa saca afo con nos ta pensa tocante cosnan material?

5 Nos a permiti e mundo su punto di bista di cosnan material afecta nos? Por lo general, loke nos ta pensa y haci ta demostra kico nos ta stima. Hesus a bisa: “Caminda bo tesoro ta, eynan bo curason tambe lo ta.” (Mat. 6:21) Pesey, pa nos por haya sa kico tin den nos curason, ta bon pa de bes en cuando nos analisa nos mes. Puntra bo mes: Mi ta pensa hopi riba placa? Mi ta preocupa demasiado tocante haya un mihor trabou, haci negoshi of un estilo di bida mas comodo? Of mi ta haci esfuerso pa mantene un wowo simpel cu ta enfoca riba cosnan spiritual? (Mat. 6:22) Hesus a indica cu si nos interes principal ta pa “montona tesoro riba Tera”, nos ta pone nos spiritualidad, of nos relacion cu Jehova, na peliger.—Mat. 6:19, 20, 24.

6. Con nos por evita cu nos tendencianan imperfecto ta domina nos?

6 Como cu nos ta imperfecto, ta facil pa nos haci loke ta malo. (Lesa Romanonan 7:21-25.) Si nos no tin Jehova su spirito santo, facilmente nos por haya nos envolvi den “obranan cu ta pertenece na scuridad.” Esakinan por ta, entre otro, “paranda y buracheria, ... inmoralidad sexual y conducta sinberguensa.” (Rom. 13:12, 13) Pa nos por gana e lucha contra “e cosnan cu ta riba Tera”—e cosnan cu ta atrae e carni—nos tin cu keda cu nos mente fiha riba e cosnan di ariba. Pero esaki ta rekeri esfuerso. Pesey, apostel Pablo a bisa: “Mi ta golpia mi curpa y ta domin’e manera un esclavo.” (1 Cor. 9:27) Ta claro anto cu nos mester ta estricto cu nos mes si nos kier keda riba e caminda cu ta hiba na bida. Awor, laga nos wak kico dos homber fiel di antiguedad a haci pa “agrada Dios.”—Heb. 11:6.

ABRAHAM “A PONE FE DEN JEHOVA”

7, 8. (a) Ki desafionan Abraham cu Sara a confronta? (b) Riba kico Abraham a fiha su mente?

7 Ora Jehova a manda Abraham muda cu su famia pa Canaan, el a obedece di  biaha. Debi na Abraham su fe y obediencia, Jehova a cera un pacto cu ne. El a bis’e: “Lo mi haci bo un nacion grandi, y lo mi bendiciona bo.” (Gen. 12:2) Sinembargo, añanan a pasa sin cu Abraham su casa, Sara, a sali na estado. Acaso Jehova a lubida e promesa cu el a haci na Abraham? Ademas, nan bida na Canaan no tabata facil. Abraham y su famia a bandona nan cas y nan otro famianan na Ur, un stad prospero na Mesopotamia. Nan a biaha mas cu 1.600 kilometer pa yega Canaan, caminda nan tabata biba den tent, tin biaha sin suficiente cuminda y coriendo peliger di ser atraca. (Gen. 12:5, 10; 13:18; 14:10-16) A pesar di tur e cosnan ey, nan no a pensa di bay bek Ur caminda nan tabatin un bida comodo.Lesa Hebreonan 11:8-12, 15.

8 Abraham no a enfoca riba “e cosnan cu ta riba Tera”; mas bien, el “a pone fe den Jehova.” (Gen. 15:6NW) Si, el a fiha su mente riba e cosnan di ariba: El a enfoca riba e promesanan di Dios. Y Jehova a mira Abraham su fe, pesey el a bis’e: “‘Wak na e cielonan y conta e streanan, si bo por conta nan.’ Y El a bis’e: ‘Asina bo descendientenan lo ta.’” (Gen. 15:5) Esta un animacion pa Abraham! Jehova no a lubid’e! Cada biaha cu e tabata wak e streanan den cielo, e tabata corda cu Jehova a priminti di hacie un nacion grandi. Y na Jehova su debido tempo Abraham a haya un yiu homber, manera Jehova a primintie.—Gen. 21:1, 2.

9. Con nos por imita Abraham?

9 Mescos cu Abraham, nos tambe ta spera riba cumplimento di e promesanan di Dios. (2 Ped. 3:13) Si nos no keda cu nos mente fiha riba e cosnan di ariba, nos por cuminsa sinti cu e promesanan aki ta tarda pa cumpli y nos por cuminsa baha man na actividadnan spiritual. Laga nos duna un ehempel. Kisas den pasado bo a yega di haci sacrificio pa por traha pionero of pa haci mas pa Jehova den un of otro manera. Si ta asina, nos ta elogia bo pa esey. Pero ainda bo ta haciendo esey? Corda cu Abraham a keda cu su mente fiha riba “e stad cu tin berdadero fundeshi.” (Heb. 11:10) El “a pone fe den Jehova, y pa e motibo ey Dios a consider’e un homber husto.”Rom. 4:3.

MOISES A MIRA “ESUN CU TA INVISIBEL”

10. Ki crianza y educacion Moises a haya?

10 Moises tabata un otro homber cu a keda cu su mente fiha riba e cosnan di ariba. Como hoben, el a ser cria como miembro di e famia real di Egipto tempo cu Egipto tabata e nacion di mas poderoso na mundo. Bijbel ta bisa cu el ‘a ser educa den tur e sabiduria di e Egipcionan.’ Debi na e educacion halto aki, Moises “tabata un homber poderoso den echo y palabra.” (Echo. 7:22) Bo por imagina cuanto posibilidad e tabatin su dilanti? Pero Moises tabata interesa den algo mucho mas importante: e boluntad di Dios.

11, 12. Ki educacion Moises a balora masha hopi mes, y con nos por sa esey?

11 Tempo cu Moises tabata mas chikito, su mama Jocabed siguramente a siñ’e tocante e Dios di e Hebreonan. Pa Moises, e conocemento di Jehova tabata mucho mas valioso cu rikesa material. Pesey, boluntariamente el a rechasa e privilegio- y oportunidadnan cu lo e por a disfruta di dje como miembro di e famia di Farao. (Lesa Hebreonan 11:24-27.) No tin duda, e educacion spiritual cu Moises a haya y su fe a motiv’e pa fiha su mente riba e cosnan di ariba.

 12 Si, aunke Moises a haya e mihor educacion cu hende por a haya den su tempo, e no a uza esaki pa bira poderoso, famoso ni rico na Egipto. Dicon nos por sa esey? Pasobra Bijbel ta bisa cu el ‘a nenga di ser yama yiu di e yiu muher di Farao y a scoge pa ser maltrata hunto cu e pueblo di Dios en bes di gosa di e placernan pasahero di pica.’ Ta claro anto cu Moises a uza su educacion spiritual pa haci e boluntad di Jehova.

13, 14. (a) Ki cualidadnan Moises mester a cultiva prome cu e por a libera e pueblo di Jehova? (b) Kico nos tambe tin cu haci?

13 Moises tabata echt interesa den Jehova y Su pueblo. Tempo cu e tabatin 40 aña di edad, el a pensa cu e tabata cla pa libera e pueblo di Dios for di sclavitud na Egipto. (Echo. 7:23-25) Pero prome cu Jehova por a duna Moises e asignacion ey, Moises mester a cultiva cualidadnan manera humildad, pasenshi, suavidad y dominio propio. (Prov. 15:33) Moises mester a haya entrenamento pa e por a soporta e prueba- y dificultadnan cu tabata sper’e. Y 40 aña como wardador di carne lo a dun’e e entrenamento necesario pa cultiva e cualidadnan aki.

14 Awor, e entrenamento practico cu Moises a ricibi a yud’e? Si. Bijbel ta bisa cu Moises a bira “masha humilde, mas cu tur homber cu tabatin riba superficie di Tera.” (Num. 12:3) Como cu el a cultiva humildad, e por tabatin pasenshi cu tur sorto di hende cu tabata bin cerca dje cu nan problemanan. (Exo. 18:26) Di mes manera, nos tambe tin cu cultiva cierto cualidadnan cu lo yuda nos sobrevivi “e tribulacion grandi” y drenta Dios su husto mundo nobo. (Rev. 7:14) Anos ta bay bon cu tur hende, hasta cu esnan cu ta rabia of sinti nan ofendi lihe? Ta bon pa nos haci caso di e conseho di apostel Pedro, kende a urgi su compañeronan den fe: “Honra tur sorto di hende, stima henter e hermandad.”1 Ped. 2:17.

LAGA NOS KEDA CU NOS MENTE FIHA RIBA E COSNAN DI ARIBA

15, 16. (a) Dicon ta masha importante pa nos keda cu nos mente fiha riba e cosnan corecto? (b) Dicon ta importante pa cristiannan tin un bon conducta?

15 Nos ta bibando den un ‘tempo critico, dificil pa trata cu ne.’ (2 Tim. 3:1) Pues, pa nos por keda spiritualmente lanta, nos tin cu keda cu nos mente fiha riba e cosnan corecto. (1 Tes. 5:6-9) Laga nos wak con anos por haci esaki den tres aspecto di bida.

16 Nos conducta: Pedro a reconoce e importancia di un bon conducta. El a bisa: ‘Mantene un conducta excelente meymey di hende di e nacionnan, pa ora nan mira boso obranan excelente cu nan mes wowo, como resultado di esey, nan glorifica Dios.’ (1 Ped. 2:12) Sea cu nos ta na cas, na trabou, na scol, ta recrea of ta den sirbishi, nos ta haci nos maximo esfuerso pa duna gloria na Jehova mediante un bon conducta. Ta berdad cu, como hende imperfecto, nos tur ta haci fout. (Rom. 3:23) Pero si nos sigui “lucha e bon lucha di fe”, nos por gana e lucha contra nos carni imperfecto.—1 Tim. 6:12.

17. Con nos por imita e actitud mental cu Hesus tabatin? (Wak e prome plachi.)

17 Nos actitud: Pa nos por tin un bon conducta, nos mester tin un actitud corecto. Apostel Pablo a bisa: “Mantene den boso e actitud mental aki cu tabatin tambe den Cristo Hesus.” (Flp. 2:5) Ki actitud Hesus tabatin? E tabata un persona humilde. Y su humildad a motiv’e pa duna lo mihor di dje na Jehova. Su  mente tabata constantemente riba e trabou di predica e bon noticia di Reino. (Mar. 1:38; 13:10) Pa Hesus, e Palabra di Dios tabatin e autoridad final. (Juan 7:16; 8:28) El a studia e Scritura Santo diligentemente pa e por a cita for di dje, defend’e y splic’e na hende. Si nos kier ta hende cu ta pensa mescos cu Hesus, nos mester studia Bijbel y predica e bon noticia cu entusiasmo y humildad.

Hesus su mente tabata constantemente riba e trabou di predica e bon noticia di e Reino di Dios (Wak paragraf 17)

18. Con nos por apoya e trabou di Jehova?

18 Nos apoyo: Jehova su proposito ta pa ‘den nomber di Hesus tur rudia dobla—di esnan den cielo, di esnan riba Tera y di esnan bou di Tera.’ (Flp. 2:9-11) Aunke Hesus tin un posicion importante den cielo, e ta somete su mes humildemente na Jehova. (1 Cor. 15:28) Nos tambe mester haci mescos. Con? Apoyando e trabou di Jehova di henter nos curason, ‘haciendo hende di tur nacion discipel.’ (Mat. 28:19) Ademas, nos ta “haci loke ta bon pa cu tur hende”, tanto pa hende en general como pa nos rumannan den fe.—Gal. 6:10.

19. Kico nos mester ta determina pa haci?

19 Nos ta masha contento cu Jehova ta recorda nos pa keda cu nos bista fiha riba e cosnan di ariba. Pesey, nos ta sigui “core cu perseverancia e careda cu tin nos dilanti.” (Heb. 12:1) Pues, laga nos ta determina pa ‘traha cu henter nos alma, comosifuera pa Jehova’, sabiendo cu e lo recompensa nos esfuerso.—Col. 3:23, 24.