Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  October 2014

Laga Nos Balora Nos Privilegio di Por Traha Hunto cu Jehova

Laga Nos Balora Nos Privilegio di Por Traha Hunto cu Jehova

“Nos ta compañero di trabou di Dios.”1 COR. 3:9.

1. Con Jehova ta mira trabou, y kico esaki ta motiv’e pa haci?

JEHOVA ta un trahador cu ta gusta loke e ta haci. (Sal. 135:6; Juan 5:17) Y e ta desea pa su criaturanan inteligente, tanto e angelnan como hende, tin e mesun goso y satisfaccion ey. Pesey, el a duna nan trabou placentero pa haci. Por ehempel, el a permiti su Primogenito yud’e den e trabou di creacion. (Lesa Colosensenan 1:15, 16.) Bijbel ta bisa cu prome cu Hesus a bin na Tera como hende e tabata hunto cu Dios den cielo “manera un trahador experto.”—Prov. 8:30.

2. Kico ta indica cu semper e criaturanan celestial tabatin trabou importante y placentero pa haci?

2 For di principio te na fin, Bijbel ta mustra cu semper Jehova a duna e angelnan trabou pa haci. Despues cu Adam cu Eva a peca y Jehova a saca nan for di Paradijs, Jehova ‘a staciona parti pariba di e Hofi di Eden e kerubinnan y un spada tur na vlam di candela cu tabata bira den tur direccion’ pa ningun hende no pasa bay na e palo di bida. (Gen. 3:24) Y Revelacion 22:6 ta bisa cu Jehova “a manda su angel pa mustra su esclavonan e cosnan cu tin cu sosode pronto.”

 KI TRABOU DIOS A DUNA HENDE?

3. Con Hesus a sigui ehempel di su Tata tempo cu e tabata riba Tera?

3 Tempo cu Hesus tabata riba Tera, cu goso el a cumpli cu e trabou cu Jehova a dun’e. Y siguiendo ehempel di su Tata, el a duna su discipelnan asignacionnan importante. Anto pa lanta nan entusiasmo pa nan asignacion, el a bisa nan: “Di berdad berdad mi ta bisa boso: Esun cu pone fe den mi lo haci tambe e obranan cu mi ta haci; y lo e haci obranan mas grandi cu esakinan, pasobra mi ta bay cerca mi Tata.” (Juan 14:12) Y pa enfatisa e urgencia di e obranan ey, Hesus a splica nan: “Nos mester haci e obranan di esun cu a manda mi tanten cu ta di dia; ta bay bira anochi, y e ora ey ningun hende no por traha.”—Juan 9:4.

4-6. (a) Dicon nos por ta contento cu tanto Noe como Moises a cumpli cu e asignacion cu Jehova a duna nan? (b) Kico tur e asignacionnan cu Jehova a duna hende tin en comun?

4 Hasta prome cu Hesus a bin na Tera, Jehova a duna hende trabou pa haci cu ta duna satisfaccion. Aunke Adam cu Eva no a cumpli completamente cu e trabou cu Dios a duna nan, tabatin hende cu si a haci precies loke Jehova a manda nan. (Gen. 1:28) Noe, por ehempel, a haya instruccion specifico pa traha un arca pa preserva bida durante e Diluvio. El a haci conforme tur loke Jehova a orden’e. Y como cu el a cumpli exactamente cu loke Jehova a mand’e, nos ta na bida awe.—Gen. 6:14-16, 22; 2 Ped. 2:5.

5 Moises a haya instruccion specifico pa construi un tabernakel y organisa e sacerdocio. E tambe a haci manera Jehova a mand’e. (Exo. 39:32; 40:12-16) Y te awe nos ta beneficia di e echo cu el a cumpli fielmente cu su asignacion. Dicon? Wel, manera apostel Pablo a splica, e tabernakel y sacerdocio a prefigura “cosnan bon cu lo a bin” den futuro.—Heb. 9:1-5, 9; 10:1.

6 E asignacionnan cu Dios ta duna su sirbidornan ta varia segun e desaroyo di e cumplimento di su proposito. Pero semper e trabounan aki ta duna gloria na Jehova y beneficia hende cu ta pone fe den Jehova. Esaki sigur ta e caso cu e cosnan cu Hesus a logra, tanto prome cu el a bin na Tera como durante su bida aki riba Tera. (Juan 4:34; 17:4) E trabou cu nos tin awe tambe ta duna gloria na Jehova. (Mat. 5:16; lesa 1 Corintionan 15:58.) Dicon nos por bisa esey?

BALORA TUR ASIGNACION CU BO HAYA

7, 8. (a) Ki trabou cristiannan den nos tempo tin e privilegio di haci? (b) Con nos mester reacciona riba Jehova su guia?

7 Ta un privilegio cu Jehova ta invita nos, a pesar cu nos ta imperfecto, pa ta su compañero di trabou. (1 Cor. 3:9) E rumannan cu ta yuda den construccion di Salonnan di Asamblea, Salonnan di Reino y sucursalnan ta participa den e trabou literal di construccion, mescos cu Noe y Moises a haci. Sea cu bo ta traha den un proyecto pa renoba un Salon di Reino of pa construi nos oficina principal di e organisacion mundial na Warwick, New York, balora bo privilegio di por sirbi di e manera ey; esaki ta sirbishi sagrado. (Wak e prome plachi; esaki ta mustra con e oficina principal lo bira.) Aunke ta algun cristian so tin e privilegio di participa den e trabou literal di construccion, tur cristian por participa den e trabou di edifica hende, esta, e trabou di predica. E trabou aki tambe ta pa duna gloria na Jehova y beneficia humanidad obediente. (Echo. 13:47-49) E organisacion di Dios ta dirigi e trabou aki y ta instrui nos con pa haci esey di e mihor manera posibel. Esaki ta nifica cu tin biaha nos por haya un otro asignacion.

 8 Sirbidornan fiel di Jehova semper ta cla pa sigui guia di su organisacion. (Lesa Hebreonan 13:7, 17.) Tin biaha por sosode cu nos no ta compronde dicon nos tin cu cumpli cu un asignacion na un cierto manera. Toch, nos ta sigui guia di Jehova su organisacion pasobra nos sa cu e cambionan ta bin di Jehova y pesey esakinan semper lo duna bon resultado.

9. Ki bon ehempel ancianonan ta pone pa nan congregacion?

9 E manera cu ancianonan ta dirigi cosnan den congregacion ta mustra cu nan ta cla pa cumpli cu e boluntad di Jehova. (2 Cor. 1:24; 1 Tes. 5:12, 13) Nan ta dispuesto pa traha duro y pa sigui instruccion y pa ahusta na e maneranan nobo di predica e Reino di Dios. Aunke algun di nan kisas na prome instante tabatin nan dudanan encuanto e trabou di predica via telefon, na waf of na luganan publico, nan a mira cu esakinan ta duna bon resultado. Na Alemania, por ehempel, cuater pionero, entre nan un anciano cu yama Michael, a dicidi di bay predica den un teritorio di negoshi cu a ser neglisha pa hopi tempo. Michael a bisa: “Como cu nos tabatin varios aña sin predica den teritorio di negoshi, nos tabata hopi nervioso. Jehova mester a ripara esaki pasobra e mainta ey a bira un mainta inolvidabel; nos a pasa masha dushi mes den sirbishi. Nos tabata masha contento cu nos a sigui e sugerencianan cu nos a ricibi den Nos Ministerio di Reino y a depende riba Jehova su yudansa.” Abo ta ansioso pa test metodonan nobo di predica den bo teritorio?

10. Ki cambionan e organisacion di Jehova a haci recientemente?

10 Tin biaha tin cu haci cambio na Betel tambe. Recientemente, mester a cera algun sucursal chikito y a traslada nan actividadnan pa sucursalnan mas grandi. Esaki a nifica cu e rumannan cu tabata sirbi na e sucursalnan aki mester a haci cambio, pero no a dura mucho cu nan a mira e beneficionan di e cambionan ey. (Ecl. 7:8) E trahadornan entusiasma aki ta masha contento cu nan por forma parti di e historia moderno di e pueblo di Jehova.

11-13. Ki desafio algun ruman a haya nan cu ne debi na cambionan den e organisacion di Jehova?

11 Nos por siña algun les valioso for di e rumannan cu mester a haci cambio debi na fusion di algun sucursal. Algun di e rumannan ey tabatin decadanan ta sirbi na e sucursalnan aki. Un pareha casa cu tabata sirbi na un Betel chikito na America Central a haya invitacion pa bay Mexico y join e famia di Betel cu tabata casi 30 biaha mas grandi. Rogelio, e esposo, a bisa: “Tabata dificil pa nos despedi di nos famia- y amigonan.” Juan, un otro ruman cu tambe a haya invitacion pa bay Mexico, a bisa: “Ta comosifuera bo ta cuminsa di nobo; bo tin cu cera amistadnan nobo y adapta bo mes na maneranan di pensa y custumbernan nobo.”

12 E betelitanan di algun pais Europeo cu a haya invitacion pa join e Betel na Alemania tambe a haya nan cu hopi desafio. Tur hende cu ta gusta paisahe yen di sero por compronde cu tabata dificil pa bandona Suisa y laga e bunita seronan di Alpen atras. Y na prome instante, e rumannan cu tabata biba na Austria tabata sinti falta di e estilo di bida trankil cu nan tabata disfruta di dje.

13 Si, e rumannan cu a muda pa un otro pais mester a haci hopi cambio: Nan mester a custumbra cu un hogar nobo, traha hunto cu rumannan cu nan no tabata conoce prome y podise nan tabatin cu siña haci un otro tipo di trabou. Ademas, nan mester a custumbra cu un otro congregacion y predica den un teritorio nobo, y kisas hasta den un otro idioma. Tin biaha no ta facil pa haci cambionan asina. Toch,  hopi betelita a acepta e reto. Dicon nan a haci esey?

14, 15. (a) Con hopi ruman a demostra cu nan ta balora nan privilegio como compañero di trabou di Jehova, sea loke sea nan asignacion? (b) Den ki manera nan ta un bon ehempel pa nos tur?

14 Grethel a bisa: “Mi a acepta e invitacion pasobra esey tabata un manera pa mi mustra Jehova cu mi amor p’e ta mas importante pa mi cu un pais, edificio of cierto privilegio.” Dayska a bisa: “Ora mi a corda cu e invitacion a bin di Jehova, mi a bira hopi contento y acept’e di biaha.” André cu Gabriela ta di acuerdo cu ne. Nan a bisa: “Nos a mira esaki como un otro oportunidad pa pone nos deseonan personal un banda y sirbi Jehova. Nos a bisa nos mes: ‘Ora Jehova pone biento cambia di direccion, ta mihor bo hisa bela y bay cu e biento y no resistiele.’”

Nos privilegio di mas grandi ta cumpli cu e trabou cu Jehova a duna nos

15 Debi na fusion di algun sucursal, varios betelita a haya asignacion pa bay sirbi como pionero. Esaki tabata e caso ora cu e sucursalnan na Dinamarca, Noruega y Suecia a uni pa forma e sucursal di Scandinavia. Florian cu Anja tabata entre e rumannan aki, y nan a bisa: “Nos ta mira nos asignacion nobo como un reto interesante. Nos ta contento pa sirbi Jehova unda cu ta. Y honestamente nos tin cu bisa cu Jehova a bendiciona nos ricamente.” Aunke mayoria di nos nunca lo tin cu haci cambionan asina, con nos por imita e rumannan aki? Nos mester ta dispuesto pa haci cambio pa pone e Reino na prome luga den nos bida. (Isa. 6:8) Jehova semper ta bendiciona esnan cu ta balora nan privilegio como su compañero di trabou, sin importa unda nan sirbi.

LAGA NOS SIGUI DISFRUTA DI NOS PRIVILEGIO COMO COMPAÑERO DI TRABOU DI JEHOVA!

16. (a) Kico nos mester haci segun Galationan 6:4? (b) Kico ta e privilegio di mas grandi cu tur hende por tin?

16 Como cu nos ta imperfecto, nos tin e tendencia di compara nos mes cu otro hende. Pero e Palabra di Dios ta bisa pa nos concentra riba loke nos personalmente por haci. (Lesa Galationan 6:4.) No ta  nos tur por ta anciano, sirbidor ministerial, pionero, misionero of betelita. Sin duda, esakinan ta bunita privilegio. Pero e privilegio di mas grandi ta un privilegio cu nos tur por disfruta di dje: Nos tur por sirbi como compañero di trabou di Jehova, participando den e trabou di predica. Laga nos balora e privilegio aki!

17. Kico ta e realidad den e mundo malbado aki, y dicon esaki no mester desanima nos?

17 Den e mundo malbado aki di Satanas, kisas nos no por sirbi Jehova manera nos lo a desea. Podise tin circunstancianan cu no ta den nos man, manera por ehempel, nos responsabilidadnan di famia y nos salud, cu por stroba nos. Toch nos no mester desanima. Dicon no? Pasobra semper nos por predica tocante su nomber y su Reino. Loke ta mas importante pa Jehova ta cu nos ta haci tur loke nos por p’e. Y na mes momento, nos por haci oracion p’e bendiciona nos rumannan cu si por haci mas cu nos. Corda cu tur hende cu ta alaba Jehova su nomber ta precioso den su bista.

18. Kico nos mester ta dispuesto pa sacrifica, y dicon?

18 A pesar di nos debilidad- y imperfeccionnan, Jehova ta contento cu nos ta su compañeronan di trabou. Y anos ta balora e privilegio cu nos tin di por traha cu Jehova den e ultimo dianan aki. Pesey, nos ta dispuesto pa sacrifica nos interes- y deseonan personal, sabiendo cu, den e mundo nobo, Jehova lo permiti nos disfruta di “loke realmente ta bida.” E ora ey, nos lo biba pa semper y disfruta di paz y felicidad.1 Tim. 6:18, 19.

Bo ta balora bo privilegio di por sirbi? (Wak paragraf 16-18)

19. Kico Jehova a priminti nos pa futuro?

19 Pronto nos lo drenta e mundo nobo. Pesey, corda loke Moises a bisa e Israelitanan un poco prome cu nan a drenta e Tera Priminti: “SEÑOR bo Dios lo haci bo prospera abundantemente den henter e trabou di bo man.” (Deu. 30:9) Si, despues di Armagedon, manera Jehova a priminti, lo e duna e Tera na tur esnan cu tabata su compañeronan di trabou. E ora ey, nos lo haya un otro asignacion: Nos tin cu haci nos planeta un bunita paradijs.