Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2014

E Ultimo Enemigo, Morto, Lo Ser Elimina

E Ultimo Enemigo, Morto, Lo Ser Elimina

“E ultimo enemigo cu lo e caba cu ne ta morto.”—1 COR. 15:26.

1, 2. Ki sorto di bida Adam cu Eva tabatin na principio, y ki preguntanan e articulo aki lo contesta?

ORA Dios a crea Adam cu Eva, nan no tabatin ningun enemigo. Nan tabata perfecto y tabata biba den un paradijs. Como yiu di e Creador, nan tabatin un bon relacion cu ne. (Gen. 2:7-9; Luc. 3:38) E encargo cu Dios a duna nan a indica cuanto tempo nan lo a biba. (Lesa Genesis 1:28.) Pa cumpli cu e mandato di “yena e Tera” y cultiv’e, nan no tabatin nodi biba pa semper. Pero pa por a sigui cuida ‘tur ser bibo cu ta move riba Tera’ si nan lo mester a biba pa semper. Adam cu Eva lo por a disfruta di e asignacion aki pa tur eternidad.

2 Dicon anto nos situacion ta asina diferente awe? Con bin nos tin asina tanto enemigo cu ta stroba nos di ta feliz? Di unda esun di mas pio, morto, a bin? Con Dios lo caba cu e enemigonan aki? Den Bijbel nos ta haya contesta riba e preguntanan aki, y nos lo analisa nan den e articulo aki.

 UN SPIERTAMENTO BONDADOSO

3, 4. (a) Ki spiertamento Dios a duna Adam cu Eva? (b) Dicon tabata asina importante pa nan haci caso di e spiertamento ey?

3 Aunke Adam cu Eva tabatin e posibilidad di biba pa semper, nan no tabata inmortal. Pa nan por a keda na bida, nan tabatin cu hala rosea, come, bebe y drumi. Mas importante ainda, nan bida tabata depende di nan relacion cu Jehova, Esun cu a duna nan bida. (Deu. 8:3) Pa nan por a sigui disfruta di bida, nan mester a acepta e guia di Dios. Hasta prome cu Jehova a crea Eva, el a laga Adam compronde esaki bon cla. Con? Wel, “Dios a ordena e homber, bisando: ‘Di tur palo di e hofi bo mag come libremente, ma di e palo di conocemento di bon y malo lo bo no come, pasobra e dia cu bo come di dje, lo bo muri sigur.’”—Gen. 2:16, 17.

4 “E palo di conocemento di bon y malo” a representa e derecho cu Dios tin pa dicidi kico ta bon y kico ta malo. Claro, Adam tabata por a sinti kico ta bon y kico ta malo ya cu el a ser crea den e imagen di Dios y e tabatin un consenshi. Pero e palo mester a corda Adam cu Eva cu semper nan lo tabatin mester di e guia di Jehova. Si nan a come di e palo aki toch, ta comosifuera nan lo a bisa Dios: “Nos no tin mester di bo reglanan.” Cu ki resultado? Nan y nan descendientenan lo a muri, manera Dios a spierta nan.

CON MORTO A PASA PA E FAMIA HUMANO?

5. Dicon Adam cu Eva a desobedece Jehova?

5 Despues cu Dios a crea Eva, Adam a cont’e di e mandamento di Dios. Eva tabata sa esey asina bon cu despues e por a ripitie casi palabra pa palabra. (Gen. 3:1-3) El a ripitie na un colebra, cu en realidad tabata Satanas e Diabel, un yiu spiritual di Dios cu a laga e deseo pa poder y independencia domin’e. (Compara cu Santiago 1:14, 15.) Pa logra su proposito malbado, Satanas a bisa Eva cu Dios ta gaña. El a sigura Eva cu lo e no muri si e desobedece Dios, sino cu lo el a bira manera Dios. (Gen. 3:4, 5) Eva a ker’e y a come e fruta, demostrando asina cu e kier tabata independiente, y el a convence Adam tambe pa haci mescos. (Gen. 3:6, 17) Satanas a gañ’e. (Lesa 1 Timoteo 2:14.) Y maske Adam tabata sa cu ta malo pa come e fruta, toch el ‘a scucha su esposa.’ E colebra, Satanas e Diabel, a haci manera e tabata un amigo di Eva, pero en realidad e tabata un enemigo cruel cu tabata sa bon bon kico lo ta e consecuencianan teribel di su mentira.

6, 7. Con Jehova a atende e huicio di Adam cu Eva?

6 Pa motibonan egoista, tanto Adam como Eva a rebela contra Jehova, Esun cu a duna nan bida y tur loke nan tabatin. Claro cu Jehova tabata sa precies kico a sosode. (1 Cro. 28:9; lesa Proverbionan 15:3.) Pero el a laga Adam, Eva y Satanas demostra kico realmente nan tabata sinti p’e den nan curason. No tin duda cu loke nan a haci a duel Jehova, como nan Tata, masha hopi mes. (Compara cu Genesis 6:6.) Sinembargo, como Hues, Jehova mester a actua di acuerdo cu husticia y duna nan e castigo cu el a bisa nan cu nan lo haya.

7 Tocante e palo di conocemento di bon y malo, Dios a bisa Adam: “E dia cu bo come di dje, lo bo muri sigur.” Probablemente Adam a pensa cu “e dia” lo tabata un dia literal di 24 ora y  cu lo el a muri prome cu solo baha. Pero mas laat riba e dia ey, Jehova a papia cu Adam cu Eva. (Gen. 3:8) Ta comosifuera nan tabata den un sala di corte. Como Hues husto, el a scucha prome loke nan tabatin di bisa den nan defensa. (Gen. 3:9-13) Despues di esey, el a dicta sentencia y a condena e dos malhechornan na morto. (Gen. 3:14-19) Pero si el a mata Adam cu Eva mesora, su proposito pa hende lo no a cumpli. (Isa. 55:11) Aunke e efectonan di pica a aparece di biaha, Jehova a permiti Adam cu Eva biba suficiente largo pa nan haya yiu cu si lo por a haya un mihor futuro. Pero, den bista di Dios, ta comosifuera Adam cu Eva a muri riba e dia cu nan a peca. Y como cu pa Jehova mil aña ta manera un dia, en berdad nan a muri denter di un “dia.”—2 Ped. 3:8.

8, 9. Con pica a afecta e descendientenan di Adam? (Wak e prome plachi.)

8 Con loke Adam cu Eva a haci a afecta nan yiunan? Na Romanonan 5:12, apostel Pablo a splica: “Pa medio di un hende pica a drenta mundo, y morto pa medio di pica, y asina morto a pasa pa tur hende pasobra nan tur a peca.” Anto Pablo a agrega: “Mediante desobediencia di esun hende ey hopi a bira pecador.” (Rom. 5:19) E prome hende fiel cu a muri tabata Abel. (Gen. 4:8) Despues, e otro yiunan y nietonan di Adam a bira bieu y muri. Pues, humanidad a hereda pica y morto; dos enemigo cu hende no por scapa di dje. Aunke nos no sa precies con pica y morto a pasa fisicamente pa e descendientenan di Adam, nos por mira e consecuencia si.

9 Apropiadamente, Bijbel ta compara pica y morto cu un “velo cu ta tapa tur pueblo, si, e mantel cu ta habri over di tur nacion.” (Isa. 25:7) E tela pisa y sofocante ey ta tapa henter humanidad. No tin ni un hende cu por scapa di pica y morto. Ta pesey Bijbel ta bisa cu “den Adam tur ta muri.” (1 Cor. 15:22) Y pesey Pablo a puntra: “Ken lo libra mi di e curpa cu ta hiba mi na e morto aki?” Lo tabatin un persona cu por a haci esaki? *Rom. 7:24.

FIN DI PICA Y MORTO

10. (a) Menciona algun versiculo di Bijbel cu ta indica cu Jehova lo elimina morto. (b) Kico e versiculonan aki ta revela tocante Jehova y su Yiu?

10 Si, Jehova por a libra Pablo. Net despues cu Isaias a menciona “e velo”, el a skirbi: “E lo traga morto pa semper, y Señor DIOS lo seca awa di wowo for di tur cara.” (Isa. 25:8) Mescos cu un tata ta keda contento di por kita loke ta pone su yiunan sufri y seca nan wowo, asina tambe Jehova gustosamente lo caba cu e morto cu nos a hereda di Adam. Y e tin un persona cu ta yud’e: Hesus. Nos ta lesa na 1 Corintionan 15:22: “Mescos cu den Adam tur ta muri, asina tambe den Cristo tur lo haya bida.” Pablo mes tambe a contesta e pregunta ken lo libr’e. E di: “Mi ta gradici Dios cu lo e haci esaki pa medio di Hesucristo, nos Señor!” (Rom. 7:25) Ta bisto anto cu maske Adam cu Eva a peca, Jehova no a stop di stima humanidad. Y Hesus, kende Jehova a uza pa traha Adam cu  Eva, tampoco no a stop di stima hende. (Prov. 8:30, 31) Pero con e famia humano lo a ser libra di pica y morto?

11. Kico Jehova a haci pa yuda humanidad?

11 Ora Adam a peca, Jehova a sentenci’e na morto. Como resultado, tur hende a hereda imperfeccion y morto. (Rom. 5:12, 16) Nos ta lesa na Romanonan 5:18: “Mediante un delito e resultado tabata condenacion pa tur sorto di hende.” Kico Jehova por a haci pa elimina e condenacion ey sin pasa por halto di su mes normanan? Hesus a contesta e pregunta aki ora el a bisa: “E Yiu di hende [a bin] pa duna su alma como rescate a cambio di hopi hende.” (Mat. 20:28) E prome yiu spiritual di Jehova a nace como un hende perfecto riba Tera y lo a percura un rescate. Con e rescate aki lo a cumpli cu e normanan di husticia di Jehova?—1 Tim. 2:5, 6.

12. Con e rescate a cumpli cu e normanan di husticia di Jehova?

12 Hesus, como un hende perfecto, por a biba pa semper. Esey ta loke Jehova tabata kier pa Adam. E proposito di Jehova tabata pa yena e Tera cu e descendientenan perfecto di Adam. Hesus tabata stima su Tata y e descendientenan di Adam asina tanto cu e tabata dispuesto pa sacrifica su bida humano. Pues, el a sacrifica un bida cu a coresponde cu loke Adam a perde. Despues, Jehova a resucita Hesus cu un curpa spiritual. (1 Ped. 3:18) E rescate a cumpli cu Jehova su normanan di husticia, pasobra den un sentido Hesus a tuma e luga di Adam. E sacrificio di su bida perfecto a sirbi como un rescate, of pago, pa cumpra e famia humano bek y duna nan e futuro cu Adam a perde, esta, e posibilidad di biba pa semper. Pablo a splica: “Ta asina tambe ta para skirbi: ‘E prome hende, Adam, a bira un alma bibo.’ E ultimo Adam a bira un spirito cu ta duna bida.”—1 Cor. 15:45.

Abel, e prome hende cu a muri, lo beneficia di e rescate di Hesus (Wak paragraf 13)

13. Kico “e ultimo Adam” lo haci pa hende cu a muri?

13 Pronto, “e ultimo Adam” lo duna bida eterno na e descendientenan di Adam. Esaki lo inclui mayoria di hende cu a muri den pasado. Nan lo ser resucita pa bolbe biba riba Tera.—Juan 5:28, 29.

14. Con hende lo ser libra di imperfeccion?

14 Con humanidad lo ser libra di e imperfeccion cu nan a hereda? Jehova a forma un gobierno celestial, e Reino, cu ta consisti di “e ultimo Adam” y 144.000 persona scogi for di entre humanidad cu lo percura pa esey. (Lesa Revelacion 5:9, 10.) E 144.000 personanan cu lo goberna hunto cu Hesus den cielo tabata hende imperfecto, pues nan lo por compronde nan ciudadanonan. Durante e reinado di mil aña, nan cu Hesus lo yuda hende riba Tera alcansa perfeccion.—Rev. 20:6.

15, 16. (a) Kico ta “e ultimo enemigo”, y ki ora lo e ser elimina? (b) Segun 1 Corintionan 15:28, kico Hesus lo haci finalmente?

15 Na fin di e mil aña di gobernacion di Reino, humanidad obediente lo ser libra di e enemigonan cu e desobediencia di Adam a trece, esta, pica y morto. Bijbel ta bisa: “Mescos cu den Adam tur ta muri, asina tambe den Cristo tur lo haya bida. Ma cada un den su debido orden: Cristo, e prome fruta, despues esnan cu ta pertenece na Cristo [su cogobernantenan], durante su presencia. Anto, na final, ora cu e caba cu tur gobierno y tur autoridad y poder, lo e entrega e Reino na  su Dios y Tata. Pasobra e mester reina como rey te ora Dios pone tur enemigo bou di su pia. E ultimo enemigo cu lo e caba cu ne ta morto.” (1 Cor. 15:22-26) Si, porfin “e ultimo enemigo”, esta, morto hereda for di Adam, lo ser elimina pa semper. “E velo” pisa cu ta tapa henter e famia humano lo no t’ey mas.—Isa. 25:7, 8.

16 Apostel Pablo a conclui su resumen inspira cu e palabranan aki: “Ora cu tur cos keda someti na dje, e ora ey e Yiu mes tambe lo somete su mes na Esun cu a somete tur cos na dje, pa Dios por ta tur cos pa tur hende.” (1 Cor. 15:28) E gobernacion di Hesus lo a cumpli cu su proposito. Cu gran satisfaccion, Hesus lo entrega e autoridad bek na Jehova y presenta e famia humano perfecto na dje.

17. Kico lo pasa finalmente cu Satanas?

17 Kico lo pasa cu Satanas, esun cu a causa tur e miseria cu humanidad a pasa aden? Nos ta haya e contesta na Revelacion 20:7 pa 15. Despues di e mil aña, Satanas lo purba un biaha mas di gaña tur hende perfecto. Anto Diabel y tur esnan cu siguie lo ser elimina di unabes y pa semper. Esaki Bijbel ta yama “e di dos morto.” (Rev. 21:8) Esnan cu experencia “e di dos morto” lo no bolbe biba nunca mas. Pero pa hende cu ta stima e Creador y ta sirbie fielmente, “e di dos morto” no ta un enemigo.

18. Con e encargo cu Dios a duna Adam lo cumpli finalmente?

18 Tur hende lo ta perfecto e ora ey, y nan lo ta completamente aproba pa Jehova pa haya bida eterno. Lo no tin niun enemigo mas! E encargo cu Dios a duna Adam lo a ser logra sin dje. Lo ta un placer pa su descendientenan cuida e Tera y e bestianan. Esta feliz nos ta cu pronto Jehova lo elimina nos ultimo enemigo: morto!

^ par. 9 E buki Perspicacia para comprender las Escrituras ta bisa cu ora cientificonan ta purba di haya un splicacion pa e echo cu nos ta bira bieu y muri, nan ta pasa por halto di algo importante. Nan no ta reconoce cu ta e Creador tabata Esun cu a sentencia e prome pareha humano na morto. Ta pesey nan no por compronde e proceso ey plenamente.—Volumen 2, pag. 1200.